اجراءات اصدار قرار الابتعاث وشراء التذاكر

February 6th, 2008, 01:41 AM

السلام عليكم ورحمة الله وبركاته

مرحبا بكم اعزاؤنا الشعب المبتعث

تحية طيبة .... وبعد:

اول شي معذرة على التاخر بسرد تفاصيل اصدار قرار الابتعاث لاني من يوم ما رجعت من الرياض وانا مشغول لتجهيزات السفر وخليها على الله وكل يوم يتصلوبي الاعضاء ويقولولي فين الموضوع الين ما لقيت وقت فاضي وانا باكتبه الان

طبعا انا طالع بكالوريوس ورحت الملتقى وكان معي قبول مشروط للجامعه وقبول معهد ومعايا الفيزا وكلمت احد الموظفين في الوزارة وقلي تعالنا على السبت الرياض وجيب معاك المستندات التالية وراح اسردها لكم

طبعا انا على طول يوم الخميس رحت سويت حجز للرياض بس ما لقيت اوكي غير على السبت المغرب

وكنت في الوزارة يوم الاحد 18/1/1249 هـ مبنى ادارة البعثات بحي الغدير

وهذي متطلبات اصدار القرار الاي اعطاني اياها الموظف:

1- صورة من قبول مشروط للجامعة لطلاب البكالوريوس او قبول معهد لغة لطلاب الماجستير والدراسات العليا.

2- صورة جواز السفر.

3- صورة التاشيرة الدراسية.

4- صورة بطاقة الاحوال للطالب او كرت العائلة للطالبة.

5- صورة ( جواز السفر + صور التأشيرة + صورة بطاقة الاحوال ) بالنسبة للمحرم المرافق مع المبتعثة.

6- صورة وثيقة التخرج بالاضافة الى كشف الدرجات (او معادلة الشهادة اذا كانت صادرة من الخارج)

7- صورة شهادة القدرات لطلاب المرحلة الثانوية.

8- تعبئة النموذج الخاص بقرار الابتعاث.

9- بالنسبة للمحرم المرافق (زوج - اب - اخ) اذا كان اخ وكالة شرعية او اقرار رسمي من العمدة والشرطة من الاب بالسماح للابن بمرافقة شقيقته.

ملاحظتين مهمة جدا:

1- يجب احضار اصل جواز السفر معك لمطابقة البيانات في الوزارة.

2- بخصوص طلاب الجامعات الي تصدر شهاداتها باللغة الانجليزية مثل كلية ال CBA في جدة يجب ترجمة شهاداتهم الى اللغة العربية ايضا لان تعاملات الوزارة بالعربي.

المهم سلملتهم الاوراق المطلوبة ووقعت على استمارة التعهدات ورجعت يوم الاحد في الليل الى مدينتي الحبيبة جدة غير

وثاني يوم ادخل على موقع الوزارة وادخل على متابعة الطلب والاقي تم اصدار قرار الابتعاث زي ماهو موضع بالصورة التالية



وبما اني مني مستعجل ما رحت لهم الوزارة غير بعد اسبوع على يوم الاحد الماضي بتاريخ 25/1/1429 هـ

ودخلت على الاستقبال وقلتله ابغى استلم قرار الابتعاث قلي روح للصادر في قسم الاتصالات الادارية ووصفلي فين مكتبهم بالدور الارضي ورحت للصادر وقلتله لو سمحت ابغى استلم قرار الابتعاث واعطيته رقم القرار زي ماهو موجود بالموقع شيك عنده على الجهاز وقلي روح الارشيف استلمه مكتب الارشيف ملاصق للصادر

رحت للارشيف وطلع الملف الي لقرارات بتاريخ 19/1/1429 هـ وجلس يدور على اسمي وطلع لي القرار وطلب مني بطاقة الاحوال علشان يتأكد انه القرار لي

ووصل لقرار حقي واعطاني صورة منه وقلي وقع على القرار الاصلي واكتب انك استلمت صورة

كتبت على القرار الاصلي استلمت صورة ووقعت واخذت النسخه

طبعا انصحكم بعد اخذ القرار خذ منه صورة تانيه احتفظ بها لنفسك لانه الصورة الاولى حتسلمها لمكتب الطيار

المهم رجعت لمكتب الصادر وقلت لهم استلمت صورة من قرار الابتعاث وين اروح ؟

قلي روح على قسم الميزانية علشان تصدر امر الاركاب

طبعا رجعت للاستقبال وسألته فين مكان الميزانية ووصفلي هوا في نفس المبنى بس تخرج وتدخل من الباب الي في الجنب

الباب هذا الي في الجنب صالة كبيرة وفيها كراسي انتظار وبها الميزانية وفرع الطيار ومركز القبول

طبعا اول ما تدخل من الباب خذ لك رقم على مكتب الطيار لانه زحمه على بال ما تخلص اجراءاتك يكون وصل لك السرا

المهم رحت للميزانية وطلبوا مني المستندات التالية:

1- صورة قرار الابتعاث

2- صورة التاشيرة الدراسية

3- صورة جواز السفر

4- صورة بطاقة الاحوال او كرت العائلة للبنات

طبعا لازم يكون معاكم جواز السفر الاصل علشان يطابق البيانات مع الصور الي اعطيتهم اياها

وبعد كذا يعطيك نموذج حق امر الاركاب تعبيه وتعطيه اياها ويدبس لك صور الاوراق الي اخذها منك مع امر الاركاب ويوقعه ويختمه لك

ويقلك روح للصادر في قسم الاتصالات الادارية علشان يصادقو على الطلب ويدخلوه في النظام

بعد ما تروح لقس الاتصالات الادارية وتخلص منهم تروح على مكتب الطيار مباشرة الي جنب الميزانية

وتنتظر دورك وتعطيه الاوراق حقتك الي فيها امر الاركاب وصور المستندات

طبعا راح يطلب منك الجواز مرة اخرى لمطابقة البيانات

وبعد كذا تختار خط السير والخطوط الي تبغاها وتختار موعد الرحلة

وتستلم الحجز والتذاكر من عنده ، طبعا التاكر الكترونية

وانتهت الحفلة

وفي الاخير .... اذا عندكم اي استفسارات انا في الخدمه

وتقبلو خالص تحياتي .... اخوكم KaLaNgO

• نشر عبر تويتر
• نشر عبر فيسبوك
• نشر عبر جوجل