استفسار سفري قريب جدا .. عندي كم سؤال مهمين رجاءا احتاج مساعدتكم

السلام عليكم و رحمة الله و بركاته...
أول شي أسأل الله يقدرني أساعدك..و عموما أتمنى من التانيين اللي سافروا على الخطوط الألمانية يساعدونا (بما إني ما قد سافرت عليها قبل كده).
فب نقطة مرة مهمة... إنك توفقي بين قوانين كل الخطوط للي حتطلعي عليها إن شاءالله (دا إذا كانت أكثر من واحدة طبعا)...دا شي مرررررة مهم...

1)- دا الرابط يشرحلك كل شي لوضع الشنط و محتوياتها:
http://www.lufthansa.com/online/port...en&cid=1000390

2)- دا الرابط يشرحلك بخصوص الشنطة اللي حتكون في يدك في الطيارة
http://www.lufthansa.com/online/port...en&cid=1000390

3)- دا الرابط يشرحلك بخصوص الوزن (إذا كان مو مذكور فوق في النقطة 1! )
http://www.lufthansa.com/online/port...3&l=en#ancAbT0

و أنا اللي فهمته إنهم ماشيين على مبدأ الوزن مو العدد... الخطوط الكندية جامعة الإثنين الوزن و العدد...

الأدوية مو مسموحة في شنط اليد لكن ممكن في الشحن و مو كميات مهولة (دا الكلاك للخطوط الكندية أتوقع نفس الشي لأي خطوط بس برضك أتأكدي!)

و برضه أنا سمعت حكاية الكراسي الضيقة مرة دي... أنا الكندية أنخنقت كيف بالله الألمانية...الله يستر...

إن شاءالله خير... الله يسهلك أمرك و أمرنا..

في حفظ الرحمـــن...
SmiloTactic

أنا مابعد اسافر راح اجاوب على اللي اعرفه وان شاءالله باقي الاعضاء يقدرون يفيدونك اكثر مني

مسموح لك شنطتين ولاخوك شنطتين كل شنطه 23 كيلو

الشهادات الاصليه خليها معك وخلي معك صوره منها

الله يوفقك ويسهل دربك

بالنسبة للشهادات الأصلية طبعا شيليها في يدك!!! دا إنتي تضيعي لا سمح الله ولا هيا تضيع لوووول

بالنسبة للكب كيك و كده ما أظن صراحة...
أول ما تنزلي مطار فرانكفورت عادي أسألي أي موظف إنه عندك كونِكتينق connecting flight على كندا و وريه الأوراق و أكيد إن شاءالله حيدلوكي فين تروحي

في حفظ الرحمن...
Smilotactic

جزاكم الله خير ماقصرتوا افدتوني وتم تقيمكم

بس متاكدييين انه شنطتين في كل شنطه 23 كيلوو اخاف اتورط اقعد

افكفك العفش قدام الله وخلقو << موسوسه خوفوها

والهاردسك والفلاش ميموري ما عندكم اي فكره عنو ؟؟

الف ششششششششششكر لكم

والله يا أختي ودي أفيدك بس أنا سافرت على خطوط الامارات .. وكان معاي علاجات للزكام ومسكنات للسخونة في الشنطة اللي معاي في الطيارة وكان عندي الفلاش واللابتوب وكيكات وعصيرات وبرضو في الطيارة ولا أحد سألني ليش ولا أحد فتشني أصلا إلا اللهم حطيت العفش في السير بس عشان يمر من تحت الجهاز والأفضل عشان تطمني خذي معاك الورقة اللي تجي مع العلاج اللي تبين طريقة الاستعمال عشان لا قدر الله لو سألوك وما عرفوا العلاج أعطيهم الورقة .. وأذا وصلتي مطار فرانكفورت اسألي أي أحد وقولي أنا عندي ترانزيت وبسافر بعدها لكندا وهو راح يدلك وين تروحين , فمن ناحية مطار فرانكفورت لا تشيلي هم أبدا أبدا .. وبالنسبة لباقي الأسئلة أنا راح أسألك وأقولك ما عليك إلا الانتظار وتدعيلي وإن شاء الله شوي ويجيك العلم...

السلام عليكم .. رجعت لك يا أختي وتأكدي إن الكلام اللي راح أقوله لك هو من شخص أعرفه عز المعرفه ومجرب الالمانية ويارب أفيدك:

1- الشنط المسموحه لكل فرد شنطتين ووزن الشنطة الواحدة 23 كيلو ولو زادت عن كذا تدفعون عشان الزيادة , يعني لك انتي ولأخوك 4 شنط وكل شنطة 23 كيلو .. وانتبهي زين عند شحن الشنط قولي أبغاها في اوتاوا مو في فرانكفورت عشان لا ينزلونها لك في مطار فرانكفورت..

2- في شنطة يدك كل شي مسموح إلا الأسلحة طبعا والسوائل , عشان كذا خذي اللي تبين بس حاولي ما تأخذين سوائل وأتوقع والله أعلم إن ودك تأخذين عطر معاك في الطيارة , عادي خذي العطر معاك بس حاولي يكون قليل أو تكون القزازه صغيرة , وغالبا مايهتمون ولا يدققون في كمية العطورات بس للاحتياط ..

3- خذي العلاجات اللي تحتاجينها معاك وانتي مطمنة ع الاخر سواءا في العفش أو معك في الطيارة ..

4- الأوراق الرسمية والهارديسك والفلاش ميموري وأي شي تخافين عليه الأفضل و الأفضل إنه يكون معك في الطيارة ولا تخافين أبدا ..

5- المقاعد عادية جدا مثل أي طيران ثاني بما إنها درجة سياحية , والفرق زي منتي عارفه راح يكون في الدرجات الأولى ورجال الأعمال ..

6- إذا وصلتي إن شاء الله بالسلامة مطار فرانكفورت امشي في البداية ورا الناس الين تحصلين مكتب استعلامات أو رجال أمن , قولي لهم إنك ترانزيت وعشان تريحين راسك أعطيهم التذكرة وهم راح يدلونك ..

7- الشريحه شغليها تجوال دولي وعادي سواءا كانت باسمك أو لا , بس انتبهي ترا سعر المكالمات والاستقبال غالي جدا , وحسب ما أظن إن الاتصالات السعودية سعر الدقيقة إذا اتصلتي 17 ريال و80 هلله , وإذا استقبلتي مكالمات 5 ريال وعليها , وسعر الرسالة حوالي ريال ونص .. فإذا كانت شحن اشحني أبوها زي الناس لأنك فعلا راح تحتاجينها أول ما توصلين ..

8- الكيكات والبساكيت مسموحه بس حاولي بدون سوائل , وترا والله في الطيارة راح ينفخونك سوائل فتطمني ..

وختاما .. والله العلي العظيم يا أختي ما في شي يدعو للخوف وإن شاء الله راح تعيشين التجربة بنفسك وتتذكرين كلامي زين .. أنا زيك لي الحين أسبوع في تورنتو ووالله ما شفت أطيب وأروع من الشعب الكندي , وبالنسبة للأمان الوضع آمن جدا جدا جدا , وربي وأنا ماشي في الشوارع والأسواق كثير ما أشوف من أخواتنا المحجبات فالمنظر هذا أصبح عادي جدا في كندا وخصوصا تورنتو ..

اسأل الله العلي العظيم يوفقك وييسر أمورك انتي وأخوك ويحقق أمانيك وتوصلين يارب بالسلامه وترجعين لأهلك بالسلامه رافعه راسهم وراسك .. وأي استفسار أو خدمة لك أو لأخواني أعضاء المنتدى أنا حااااااااااااااااااااااااااااااااااااااااااااااااا اااااااااضر ..

اللهم آمين ياررب

اخوي حنون والله مو عارفه كيف اشكرك لكن اوعدك اني ادعيلك في ظهر الغيب بصدق
فعلا استفدت منك كثير ووعدت ترجع للموضوع وما اخلفت ..
اسأل الله العلي العظيم انه يوفقك ويفرج همك ويكتبلك الخير وتشوفه قدام عينك
ويباركلك في وقتك وفي جهدك وفي رزقك وكل شييء يخصك و ترجع السعوديه وانتا رافع راسك وراس اهلك وبلدك
شكرا لك من الاعماق + تقييمي ولو اقدر اقدم اكثر ما قصرت

وكمان ما انسى الاخوان اللي ردو عليا من قبل واقولهم ان شاء الله ادعيلكم كمان بظهر الغيب
ما راح انقص من حق احد شيء والله يوفقكم ويحفظكم ويردكم سالمين لاهاليكم

شكرا شكرا شكرا من قلبي

ولا يهمك يا أختي ما سوينا إلا الواجب , ويكفيني ورب الكعبة إنك ارتحتي وتطمنتي , موفقه يارب ..

الهاند باق لا تزيد عن 8 كيلو واي مشروبات او كريمات او ما خلافها يزيد عن 100 مل في الشنطه الي بالعفش