الأعضاء الإشتراك و التسجيل

الملتقيات
ADs

## الشرح الاوضح للفيزا الكندية الاخيرة 2011/03/01 ##

## الشرح الاوضح للفيزا الكندية الاخيرة 2011/03/01 ##


NOTICE

تنبيه: هذا الموضوع قديم. تم طرحه قبل 4693 يوم مضى, قد يكون هناك ردود جديدة هي من سببت رفع الموضوع!

قائمة الأعضاء الموسومين في هذا الموضوع

  1. الصورة الرمزية قوطي فاضي
    قوطي فاضي

    مبتعث فعال Active Member

    قوطي فاضي كندا

    قوطي فاضي , ذكر. مبتعث فعال Active Member. من السعودية , مبتعث فى كندا , تخصصى طالب , بجامعة No Comment
    • No Comment
    • طالب
    • ذكر
    • الرياض, المنطقة الوسطى
    • السعودية
    • Sep 2008
    المزيدl

    May 14th, 2011, 11:43 PM

    السلام عليكم ورحمة الله و بركاته
    (( تمت أعادة تنسيق الموضوع وأضافة معلومات جديدة بشكل أوضح ان شاء الله بتاريخ 02-04-2012 ))
    كيف حالكم يالاخوان عساكم بخير ان شاء الله ،،
    في الحقيقة الاخوان كفوو ووفوا والله يجزاهم الف خير ومواضيعهم قمة في الروعة ،، لكن ملاحظ هناك لخبطة وخوف كبير من قبل بعض الاخوان ومعاهم حق ،، لان حتى انا ضيعت شوي ولخبطت لحد مافهمت الوضع والطريقة ولله الحمد وهذا بفضل الله ثم بفضل تعليماتكم .

    يالاخوان السفارة الكندية في شهر مارس اللي هو 3 / 2011 غيرت الابلكيشن للفيزا الكندية ،، يعني يالربع اللي معاه ابلكيشن قبل شهر مارس من هالسنة يحذفه ويحمل الابلكيشن الجديد والواضح والبسيط ويقدم على فيزته .

    فشخص يسألني الان ويقولي ياصديقي انا ابي اقدم على فيزة دراسة لكندا أبي الكلام النهائي والاخير لاني انلحست ولخبطت ،، فانا اقوله لاتشيل هم ولا تحتار وتابعنا زين زين ،، ومايحتاج تروح لا مكتب الفيفا ولا غيرهـ ، عبها بنفسك ووفر الـ 250 في جيبك ،، لان الشروحات اللي وضعها الاخوان ممتازة جدا جدا الله يوفقهم .
    وبعدين مادري ليه الخوف من انك تقدمها بنفسك رغم بساطتها وكأن مكتب الفيفا يضمن لك الفيزا ،، سواء قدمتها انت او مكتب الفيفا دامها كاملة ان شاء الله لاتشيل هم واللي مقدرهـ الله هو اللي بيصير ،، المهم قبل ما أبداء تفضل هالرابط وحمل برنامج الادوبي الاصدار الاخير :
    http://aihdownload.adobe.com/bin/ins...r_mssd_aih.exe

    --------------------

    الان اذا حبيت تقدم على فيزة الطالب الكندية تحتاج لثلاث نماذج او ابلكيشنات :
    الابلكيشن الاول وهو : Application Form [IMM 1294 : وهذا الابلكيشن تعبينه من خلال برنامج الادوبي واهم شي يكون اخرر اصدار ،، والرابط و ضعته في الاعلى ،، وعقب ماتعبيه بالكمبيوتر تطبعه ، واهم شي تأكد انك ماتترك فراغات ابد ، فالخانات الفارغة اكتب فيها N/A لاتخليها فاضية ، مع العلم أن هذا الابلكيشن لكل من يرغب بالاستدي بيرمت او الدراسة في كندا سواء كان فوق الـ 18 سنة أو تحتها ،، من هم تحت الـ 18 سنة يوقع أحد والديهم نيابة عنهم.
    وهذا رابط الابلكيشن الاول من موقع الامجريشن الكندي :
    http://www.cic.gc.ca/english/pdf/kit...s/IMM1294E.pdf
    (( ملاحظة مهمة جدا : لمن تعبي الابلكيشن الاول وهو يتكون من اربع اوراق ،، وعقب ماتخلص من التعبأة بالكمبيوتر راح تجيك في الاخر كلمة validate أضغط عليها ، فاذا طلع عليك خطأ ماء راجع الابلكيشن وراح تلقاء مربعات حمراء معناها انت أخطاءت هنا وحاول تصلحها ،، أما اذا ضغطت على هذا الزر وطلعت لك صفحة خامسة وفيها خمس مربعات سوداء فأنت شغلك تمام وهذا شكل الورقة الخامسة
    http://dc16.arabsh.com/i/02795/19uzjgm43lxn.jpg


    الابلكيشن الثاني وهو : Family Form [IMM 5645 : هذا الابلكيشن خاص بالعائلة تعبيه ايضا من خلال الكمبيوتر وانتبه من التواريخ والفراغات مثل ماقلت لك ،، وهذا الابلكيشن مطلوب على كل شخص عمرهـ يزيد عن الـ 18 سنة ،، أما من هم تحت الـ 18 سنة فلا يطلب منهم هذا الابلكيشن ،، وهذا رابطه :
    http://www.cic.gc.ca/english/pdf/kit...s/IMM5645E.PDF
    (( ملاحظة مهمة : هذا الابلكيشن ماتقدر تسوي له حفظ ،، يعني لمن تعبيه بالكمبيوتر مباشرة اطبعه بالطابعه على عكس الابلكيشن الاول ،، ايضا لمن يكون عدد اخوانك او عيالك أكثر من الخانات المتاحة في الابلكيشن ،، اكتبهم في ورقة خارجية واكمل جميع بياناتها وارفعها مع الابلكيشن )) .

    الابلكيشن الثالث وهو : Supplementary Form : هذا الابلكيشن ماتقدر تعبيه من خلال الكمبيوتر ، لذلك اطبعه ثم عبيه بخط يدك وتحرص ان الخط يكون واضح وجيد ، وهذا رابطه :
    http://www.canadainternational.gc.ca...s/51_1_eng.pdf

    الابلكيشن الرابع وهو : بصراحة مو ابلكيشن هو مثل ورقة تشييك لك ، يعني مثلا احضرت ورقة القبول تضع علامة صح امامها ، احضرت الضمان البنكي تضع علامة صح امامها وهكذا ،، ويفضل عند الارسال للسفارة من خلال الارامكس انك تضع هذا الابلكيشن في المقدمة يعني اول ورقة تكون ، وهذا رابطه :
    http://www.cic.gc.ca/english/pdf/kit...s/IMM5483E.pdf

    الابلكيشن الخامس وهو : IMM 5257B_1 : هذا الابلكيشن له شروط لازم تتحق عشان تعبيه ،، في الابلكيشن الاول هناك مجموعة اسالة اذا كانت اجابتك على احداها بـ ( نعم ) فلابد عليك من تعبأت هذا النموذج أما ان كانت اجابتك عليها بـ ( لا ) فمايحتاج تعبيه ،، واعتقد ان جميعكم اجاب عليها بـ ( لا ) لانها تتحدث عن جرائم الحرب أو ان كنت موظف في العسكرية والشرطة وغيرها ،، وهذي الصورة راح تفهمكم اكثر :
    http://www2.0zz0.com/2011/05/14/19/809277146.jpg

    هذي هي الابلكيشنات المطلوبة لفيزة الدراسة .
    -----------------------

    طبعا راح يجيني واحد ويقول ، والله ياخوي اللغة لك عليها وتعبانه ومحتاج مكتب يعبيها ،، راح اقوله لااا ،، تفضل هذا الموضوع للاخت ندا ،، فيه شرح كافي ووافي الله يجزاها خير ،، طبعا شرحها كان للابلكيشن الاول ،، اللي يتكون من اربع صفحات وهذا هو الرابط :
    http://www.mbt3th.us/vb/forum107/thread268091.html

    راح يجيني واحد ويقولي يالغالي طيب والابلكيشن الثاني تبع الفاملي والابلكيشن الثالث التكميلي شلون اعبيه ،، راح اقوله فيه واحد من الاخوان ايضا الله يجزاهـ خير واسمه M3EETHINHO رفض انه يزعلكم وشرح الابلكيشن الثاني والثالث ، وراح تجد شرحه على الرابط التالي :
    http://www.mbt3th.us/vb/forum108/thread245960.html
    (( ملاحظة مهمة : الاخ الغالي شارح ابلكيشن العائلة ، والابلكيشن التكميلي )) .

    ايضا راح يجيلي واحد ويقولي والله ياخوي انا خايف تكون معلومات الاخوان غلط ؟ راح اقوله ولا يهمك ريح راسك وتفضل هذا الدليل الارشادي من موقع الامجريشن الكندي نفسه وفيه تعليمات وارشادات عن تعبأة الابلكيشنات ، بامكانك الاستفادة منه كما استفدت منه انا ،، وهذا هو رابط التحميل مباشرة مأخوذ من موضوع الاخت ندا :
    http://www.cic.gc.ca/english/pdf/kits/guides/5269E.PDF

    (( وهذا أيضا شرح بالفيديو لطريقة التقديم على الفيزا و تعبئة الابلكيشنات للاستدي بيرمت ))



    هالحين ندخل للنقطة الثانية :
    ذهبنا لموضوع احد الاخوات الله يجزاها خير واسمها ملاك الديرهـ ، وهذا رابط الموضوع تبعها :
    http://www.mbt3th.us/vb/forum108/thread272866.html
    وأستفدنا منها ، ان الاوراق المطلوبة مع الابلكيشنات اللي ذكرناها سابقا هي :

    1- - الجواز الأصلي + صوره منه .

    2- الشيك المصرفي الخاص برسوم السفاره ( من البنك الأهلي )
    بأسم (
    THE RECEIVER GENERAL FOR CANADA” ) .

    3- ( 125 دولار للفيزا الدراسية ، شاملة تصريح الدراسة ) , ( 150 دولار كندي للفيزة المتعددة السياحية) و ( 75 دولار كندي للفيزة السياحية المفردة) .

    4- صور شخصيه حديثه مقاس (3,5 * 4,5 ) ويكتب الاسم وتاريخ الميلاد بالخلف كما هو مكتوب بالجواز .

    5- خطاب السفاره ( الضمان المالي ) ... ويكون صوره منه فقط ،، ( ملاحظة : بالنسبة للمبتعث الضمان المالي راح تعطيه الوزارة ، لكن المرافق عليه يجيب ضمان مالي لنفسه مثل ماذكرو لنا الاخوان المبتعثين في المرحلة السابعه عشان يقدم على الفيزا ) .

    6 - شهادة بنكية + كشف حساب لأخر 6 اشهر ويكون حساب نشط + ورقة ضمان من الشخص المتكفل بمصاريفك ( مترجمة للانجليزي ) هذه لغير المبتعثين ،، لان ضمان الوزارة المالي يكفي للمبتعث ،، واذا كنت غير مبتعث وعندك القدرة المالية احضر الشهادة البنكية وكشف الحساب باسمك ،، أما ان كنت غير قادر ماليا فأحضر ورقة ضمان من شخص يتكفل بمصاريفك تكون مصدقة من الغرفة التجارية+ شهادة بنكية باسمه + كشف حساب باسمه او بأسم مؤسسته ، ،، وهذي صورة لعينة من عندي لورقة الضمان والعينات كثيرة :
    http://www7.0zz0.com/2012/01/31/17/120012687.jpg

    6- صوره من قبول المعهد ( تكون واضحه ) ونا بصراحة أنصح الاخوان يجيبون قبول جامعي أفضل واقوى بكثير من قبول المعهد ،، لان فيه ناس رفضو فيزهم لهذا السبب ( على حسب كلام السفارة فيه معاهد في الخليج والسعودية افضل من هالمعهد ، لكن قبول جامعه ماراح يقدرون يقولون شي ) .

    7- صورة بطاقة الأحوال + كارت العائله للمتزوجين ومن لديهم مرافقين أو عقد النكاح ( مترجمه بالإضافه لنسخه عربيه ) بالامكان ترجمتها في شارع الستين بالملز لأهل الرياض ،، عن كل ورقة اعتقد 40-30 ريال .

    8- صوره مصدّقه من آخر شهادة + السجل الأكاديمي ( مترجمه ومصدّقه من جامعتك ) .

    9- صوره من شهادة الثانويه العامه + حسن السيرة والسلوك ( مترجمه ).

    10- أرفاق الجوازات القديمه ،، لذكر الدول التي سافرت لها العشر سنوات الماضيه ضمن محتويات النوذج التكميلي ... يكتفى بذكر العام فقط ،، ( لو قدرت ترفق جوازاتك القديمة يكون افضل ،، او بأمكانك تصور الصفحات المختمة والفيز والتأشيرات للدول اللي زرتها في جوازك وترسلها لهم ،، او تجيب برنت من الجوازات وتترجمه ان كان عربي ) .

    11- التوقيع على الجواز الأصلي ،، وهو أمر عادي كل الدول توقع على جوازاتها ،، ( واذا ماوقعت مافيه اشكال ، لكن وقع وفك راسك ) .

    12- يلزم لكل مرافق جواز سفر مستقل ( بالنسبه للأبناء تحت 18 سنه ) ونموذج فيزا مستقل ( يعبأ نموذج الفيزا لزائر ) ،، حتى لو كان طفل .

    13- كل نموذج مع مرفقاته ومحتوياته .. توضع في ظرف مستقل لكل شخص محتوياته كامه .. وتوضع بظرف كبير عند الارمكس ،،، يعني ابلكيشنات واوراق كل شخص رتبها ونسقها واجمعها مع بعض وضعها في ظرف صغير منفصل وهكذا كل شخص ،، وتاخذ هالظروف وتروح عند الارامكس وراح يضعها لك كلها بظرف واحد كبير . ( عشان يكون شغلك مرتب ) .

    14 - للراغبين بالدراسة في أقليم كوبيك ( Québec ) عليهم أحضار شهادة القبول للدراسة في كوبيك ،، ثم بعد ذلك التقديم على الفيزا الكندية ( لازم تحضر هالشهادة قبل التقديم على الفيزا الكندية ) وتفضل هالرابط المساعد لأستخراج هذه الشهادة :
    Immigration-Québec - Foreign students

    15- أذا أردت قبول معهد او جامعه عليك مراسلة المعهد او الجامعه نفسها ،، واذا لغتك ضعيفة استخدم قوقل للترجمة وطريقة استخدامه بالاسفل واضعها ،، واذا لغتك ضعيفة وماتعرف الطريقة فيه اشخاص كثر بالمنتدى يقدمون هالخدمة لاخوانهم بالمجان ،، وفيه بعض الاخوان برسوم بسيطة .


    16- ترسل عن طريق أرامكس ... أو الفيفا.

    17- حاول تسوي نسخ لأي ورقة معاك ، سوا كانت من السفارة الكندية أو من رسوم الفيزا او رسوم قبول المعهد ، اي ورقة انسخها مباشرة من باب الاحتياط .

    ملاحظات هامة /
    1- الأطفال الذين تقل أعمارهم عن الـ 18 سنة غير مطلوب منهم تعبئة أبلكيشن العائلة ،، ويجب على أحد والديهم التوقيع نيابة عنهم في باقي الابلكيشنات .
    2- الاطفال الذين يرغبون بالدراسة في كندا وهم بسن الدراسة عليهم التقديم على الاستدي بيرمت ،،، وغير مطلوب منهم احضار قبول معهد ( يشترط أن يكون فوق الخمس سنين ) واذا كان تحت الخمس سنين عليه التقديم لفيزا سياحية .
    3- بالنسبة للشيك والرسوم المالية حبيت اوضع نقطة لان كثير ملخبطين بسالفة الـ ( 400 $ ) :

    أ) الاستدي بيرمت على كل شخص يدفع ( 125 دولار كندي ) ومافيها سعر عائلي ،، يعني مثلا ( أب ومعاه ثلاث من ابناءه يبون يقدمون على ستدي بيرمت راح يكون على كل واحد مبلغ 125 دولار ،، اذن راح يكون المجموع 500 دولار كندي ) يفضل أن يكون لكل شخص شيكه الخاص ،، يعني لا تجمع المبلغ بشيك واحد .

    ب) الفيزة الكندية سوا الدراسية او السياحية المتعددة والمفردة ( وليس الاستدي بيرمت فقط الفيزا ) هي اللتي تدخل بسالفة الـ ( 400 $) ولتحققها لابد من توفر الشروط التالية بالعائلة :

    ــ العائلة تتكون من الاب والام والاطفال المعالين من قبل والديهم الذين تقل اعمارهم عن ( 22 سنة ) .
    ــ أن يقدمون كلهم بنفس الوقت وبنفس المكان على الفيزة السياحية .
    مثال / أب ومعاهـ ثلاثة من ابنائة المعالين الذين اعمارهم تحت الـ ( 22 سنة ) وناوين يقدمون على الفيزة السياحية او الدراسية المتعددة ( مره اخرى الفيزا وليس الاستدي بيرمت ، هناك فرق بينهم ) ، راح يكون على الواحد ( 150 $ ) ،، لو ضربناها على عددهم راح يطلع الناتج ( 600 $ ) ،، بما ان الشروط انطبقت عليهم أذن راح يكون المبلغ النهائي ( 400 $ فقط ) يفضل ان يكون لكل شخص شيكه الخاص ،، الا اذا كان ينطبق عليهم السعر العائلي فترفق بشيك واحد .

    (( أنا لست معصوم عن الخطأ فأن اخطاءت فمن نفسي ومن الشيطان وأن اصبت فمن الرحمن ،، فأرجوا منكم يالاخوان أذا شاهدتوا اي خطأ او معلومة مغلوطة تفيدونا لكي نصححها ،، واخص بالذكر سالفة الشيكات ورسوم العائلة ( 400 $ ) ،،، لاني ملاحظ كثير ملخبطين فيه ،، فأي شخص عندهـ معلومة تفيدنا يقدمها لي بالخاص وله الشكر ))








    علفكرة يالاخوان أنا اليوم بالضبط أتصلت على المكتب الرائيسي لشركة الارامكس ، وقلت لهم هل تعبون لنا الابلكيشن اللي ينرسل للسفارة قالي الموظف لاا ،، هم فقط يستلمون الاوراق منك كاملة ويرسلونها للسفارة الكندية ، وياخذون عليك 100 ريال سعودي ،، والرد يجيك خلال ثلاث اسابيع تقريبا ،، والكلام على لسان موظفهم والله أعلم .

    ختامها يالاخوان يازينها لمن الواحد يعتمد على نفسه ويبتعد عن سرقة المكاتب ،، هذاكم شايفين الابلكيشن كيف يتعبأ مافيه ابسط منه والله والشروحات ممتازة ماشاء الله ،، فقط يبيلك كاست شاهي وساعة زمن وانت مخلص كل هالسوالف .

    ويالاخوان أتمنى انك تدعون للاخوان اللي افادوني انا شخصيا وافادونا كلنا لاستقطاب والاستفادة من هذه المعلومات الجديدة وترجموها لنا ودخلوا المنتدى عشان يساعدون اخوانهم ،، رغم ان بأمكانهم يتركونا ومايزعجون روؤسهم ويخلونا بحيرتنا . فاتمنى منك الدعاء لهم أولا .

    أتمنى الموضوع يكون كافي ووافي ومافيه لخبطة ولا حوسة .

    والله يوفق الجميع ان شاء الله

    للحصول على الفيزا السياحية ، تفضل هالرابط :
    http://www.mbt3th.us/vb/forum108/thread278776-3.html



    للحصول على معلومات عن الفيزا الكندية والاستدي بيرمت وطرق تجديدها من داخل كندا ،، تفضل هالرابط :
    http://www.mbt3th.us/vb/forum108/thread294066.html


    لغتك ضعيفة ومحتاج مساعدة في الترجمة تفضل هالشرح المبسط وراح يساعدك ان شاء الله في الاعتماد على نفسك والبحث عن اسعار المعاهد والقبولات وغيرها
    http://www.mbt3th.us/vb/forum108/thr...ml#post2805521





  2. المشاركة الأصلية كتبت بواسطة ibm2000
    جعله الله في ميزان حسناتك وبارك الله فيك ووفقك اخي العزيز
    حياك الله حبيبي .

    حنا كل اللي نبيه ان العالم تتعلم من نفسها وتخلص امورها بنفسها ، وتبطل تعتمد على هالمكاتب الاستغلالية اللي كل يوم والثاني يرفعون بالاسعار ،، لكن لمن يشوفون الشعب معتمد على نفسه والله ان تشوف الاسعار برخص التراب .

    فيه عندي زميل مكلمني قبل ثلاث ايام جاي عندي فرحان والابتسامة شاقة وجهه يقولي ابشررك لقيت معهد بيطلع لي الفيزا بدون كشف طبي يقولون عندهم واسطات؟ قلت له ياشيخ معقولة ،، والرجال مستانس ويضخم في المكتب ويمدح فيه وناوي يقدمها مباشرة رغم ان المكتب طالب منه 1300 ريال عشان يجيب له ورقة قبول معهد ويعبي الابلكيشن فقط .
    قلت له يابطل الكشف الطبي ملغي اساسا وماتحتاجه الحين ، وانصدم خوينا .

    فانتبهوا يالاخوان بارك الله فيكم . بالتوفيق
    7 "
  3. المشاركة الأصلية كتبت بواسطة فارق يا روح امك
    معلومه جديده والله
    الله يعطيك العافيه
    واهم شي الدعوه الطيبه
    واذا احتجنا للي عندهم خبره ما راح يقصرون معنا

    تقبل مروري

    حياك الله ياصديقي .

    فيه عندي ملاحظات مهمة جدا راح اذكرها لكم ان شاء الله في نفس هالموضوع عشان ماشعب المواضيع لذلك راح اجمعها في هالموضوع ،، لكن في وقت اخر ان شاء الله .

    تحياتي لكم .
    7 "
  4. عزيزي

    ألف مليون شكر ... على كلامك وشرحك
    بالنسبه لي .. كلامك واااضح ومفهوووم .. لأني مريت بنفس تجربتك
    وحاااااسه فيك

    وأشكرك على ادراج موضوعي ضمن .. شرحك
    هذا يدل ,, على حسن اطلاعك .. واهتمامك برأي غيرك

    وابشرك فيزتي وصلت
    ومقبوله والحمد لله
    لازم الواحد يتعب
    عشان يلقى ثمرة تعبه
    لها طعـــــــــــــــــــم

    أسأل الله لنا ولك التوفيق والثبات
    7 "
  5. المشاركة الأصلية كتبت بواسطة ملاك الديره
    عزيزي

    ألف مليون شكر ... على كلامك وشرحك
    بالنسبه لي .. كلامك واااضح ومفهوووم .. لأني مريت بنفس تجربتك
    وحاااااسه فيك

    وأشكرك على ادراج موضوعي ضمن .. شرحك
    هذا يدل ,, على حسن اطلاعك .. واهتمامك برأي غيرك

    وابشرك فيزتي وصلت
    ومقبوله والحمد لله
    لازم الواحد يتعب
    عشان يلقى ثمرة تعبه
    لها طعـــــــــــــــــــم

    أسأل الله لنا ولك التوفيق والثبات
    حياك الله ياصديقتنا ونورتي الموضوع .
    وهالموضوع انا اعتبرهـ كوكتيل بين موضوعك وموضوع الاخت ندا الله يجزاكم خير كنا ملخبطين جدا صراحة ومو دارين شسالفة الشروط الجديدة وشسالفة الابلكيشن الجديد ومالنا غير ندعيلك وهذا واجبنا اتجاهكم .

    ومرهـ اخرى مبررررررررررروك القبول وناخوك .
    7 "
  6. السلام عليكم

    كيف حالكم يالربع عساكم بخير ..... بصراحة فيه موضوع مهم حبيت اطرحه لكم بحكم قرب الاجازة الصيفية والطلاب ناوين يسافرون للخارج للدراسة في هالاجازة والعالم تضبط امورها من هالحين وتستثمر للوقت .

    فالسالفة يالاخوان أننا للاسف الشديد قمنا نعتمد على هالمكاتب بشكل مبالغ فيه ولاسباب مالها داعي ، وخاصة لمن يجيك واحد كبير وفاهم ومعاهـ لغة وفوق هذا يروح لم هالمكاتب والعذر هو الاحتياط واجب ونضمن الفيزا وبعضهم يقولك الكسل .

    وللمعلومية ترى مو شرط انك لمن ترسلها من المكتب راح تنقبل فيزتك لااا ،، فيه كثيرر وعالم مقدمين عن طريق هالمكاتب وجاهم الرفض والسبب أخطاء غبية وبسيطة مثلا : يجيك واحد مسافر لكندا اكثر من مرهـ ويروح لم هالمكاتب ويعتمد عليهم وعلى اجوبتهم ويجاوب المكتب بـ لا ،، ومباشرة ترفض طلبه السفارهـ لانه عطاهم معلومات مغلوطة وتروح عليه الفيزا بسبب غلطة تافهه صراحة .
    البعض الاخر يقول نعبي الابلكيشن ونا معه ،، فانا اقوله طيب دامك معه ومتعني وقاعد تعبيها معه وراء ماتعتمد على نفسك وتعبينها في بيتكم والشروحات بهالخصوص متروسة وواضحة جدا والتكنلوجيا تطورت ،، واللي معطينا هالشروحات ناس مقدمة على الفيزا وجاهم القبول ،، فهالتكاسل يالربع وهالاتكالية على هالمكاتب سبب لنا زيادة بالاسعار واستغلال وجشع من هالمكاتب ، ولو شافونا نعتمد على انفسنا كان والله ان تشوف الاسعار برخص التراب ، واذا انت مرتاح ماديا وتبي تعتمد على هالمكاتب وماهمتك الاسعار ففيه غيرك حالته الماضية ضعيفة ومحتاج لكل ريال .

    فالحاصل يالاخوان ووالزبدة لكم انتبهوا من هالمكاتب ومن بعض العاملين فيها لان السرقات تكثر وخاصة في فصل الصيف وحنا ياغافلين لكم الله ،، ونا بنفسي اطلعت على حالتين شخصيا ، وحدة لقريب لي والثانية لزميلي ، راحوا لم هالمكاتب في مثل هالوقت وقبل الصيفية وهم متحمسين جدا وعقولهم للحين مانضجت ومايفكرون بالدراهم دام اهلهم بيدفعونها ، فالمهم راحو لم هالمكاتب وقالوا نبي فيزة سياحية للدراسة ثلاث اشهر ، طلب منهم صاحب المكتب يدفعون له قيمة الثلاث اشهر كاش عشان تضمن الفيزا على كلامه ،، والشباب ماقصروا كلموا اهلهم وعطوهـ المبلغ كامل ، ويمر الاسبوع والاسبوعين والشهر وهو يماطل لحد ماجاء يوم وراحوا لم المكتب ولقوهـ مقفل وراحت عليهم دراهمهم وسفريتهم ،، وتعرفون القضاء عندنا والشرطة لاجيت تطالب واحد عطوك ورقة وقالولك رح عطه اياهـ ويالربع الشي اللي يروح في هالزمن انسى انه يجي خاصة ان كان فلوس .
    فالمهم حاولوا يتواصلون معه حاولوا يصيدونه هددوهـ بيشتكون عليه لان معاهم السند والاوراق ، لكن الرجال سحب عليهم وانحاش ، فيالربع انتبهوا وناخوكم ،، واياكم تسلمون اي مكتب المبلغ كامل ،، اول كان معانا عذر لاننا غشمان ومانعرف شي لكن هالحين كل شي واضح وكل الاجراءات واضحة .

    وبعطيكم مثال بسيط يخصني المرهـ الاولى يوم رحت لكندا كنت غشيم وجاهل رحت لمكتب على اساس انه يقدم لي على الفيزا الكندية فطلب مني 1500 ريال فقط حق القبول وحق تعبئة الابلكيشن وارسالها للسفارهـ على حسابك فترددت شوي ورحت ابحث وادور لحد مالقيت مكتب ووالله يالاخوان كان في نفس موقعه وقالي ابضبط لك كل شي بـ 300 ريال بس انت ترسلها للسفارة واستلمت الفيزا ويادار مادخلك شر .

    وقمت ابقدم مرهـ ثانية هالحين ويوم دخلت المنتديات لقيتهم كاتبين ابلكيشن جديد لشهر مارس وهالكلام لخبطني شوي صراحة لكن بعد قراءهـ لمواضيع الاخوان وبعد بحث في موقع الامجريشن الكندي فهمنا السالفة وطبقنا كلامهم وأكتشفت ان مافيه خوف او تعب ابد ابد ،، فقط تراسل معهد في الخارج وتطلب منه قبول ويرسلونه لك على الايميل ، ونا اشوف شباب كثير بالمنتدى موجودين بالخارج ومستعدين لاحضار قبولات للمعاهد للي يبي ، وباقي الطلبات بسيطة .

    فقط حبيت اضع هالنصيحة للاخوان الجدد والراغبين بقضاء الصيفية ووقت الاجازة بالدراسة في الخارج ولايطيحون بفخ مكاتب الاحتيال وتروح عليهم اجازتهم وتروح عليهم فلوسهم .

    وهي نصيحة بأمكانك قبولها او رفضها والله ولي التوفيق
    7 "
ADs

قم بتسجيل دخولك للمنتدي او

الانضمام لمبتعث

Search Engine Optimization by vBSEO ©2011, Crawlability, Inc.