ارجوكم ساعدوني..مالي غيركم بعد الله...يااهل الخبره

بعد التحية:

ضمان الوظيفه هذا علمه عند الله، ولكن من نظره واقعيه يوجد عندك اكثر من مجال: البنوك،، المدارس،، المستشفيات ( هنا اقصد وظائف اداريه ليست بالضروره طبيه )

بالنسبه للفرق بين Leadership & Administration
Administration هي الادارة والتخطيط وتنظيم المشاريع وعمليات البزنس اليوميه،، ومن مهام المدير في هذا التخصص ان تنتج الشركه بضاعتها باقل التكاليف وان تحقق اكبر عائد ربحي يمكن الوصول اليه،، وايضاً ان يكون قادر على قياس الفاعليه والكفاءه في البزنس. تكون مهام المدير في هذا التخصص مركزه على نشاطات المدى القصير او شبه اليوميه على عكس الــ Leadership الي تكون مهامه مركزه على المدى الطويل ومعرفه ما يمكن ان يحدث في المستقبل وكيف يمكن ان تصل شركته الى افضل النتائج على المدى البعيد.


نصيحه اخيره:
احرصى على متابعة الجرائد بالتحديد اقسام الاقتصاد والعمل،، برضو اذا كنتي لسى في السعوديه،، روحي على الغرفه التجاريه واسالي اي مسؤوله هناك وراح يفيدونك... ( لا تستحي منهم،، هذي حياتك ولازم تعرفين ايش الافضل لك )

بالتوفيق

وعليكم السلام ورحمة الله وبركاته ،، هلا بك اختي .

يالغالية ملاحظ فيك احباط بشكل كبير جدا وخوف وقلق كبير وهذا لصالحك ومو لصالحك :
لصالحك ان كنتي راح تستثمرينه بالجد والاجتهاد والتعقل والتفكير بهدوء لان الخوف يولد قوة ،،، ومو لصالحك اذا استمريتي بهالشكل في احباط نفسك وبهالقوة وكان الرزق بيد البشر وليس بيد الله فصدقيني راح تتعبين وماراح تلقين من يترحم عليك .

حنا الله يقولنا أسعى ياعبدي ونا اسعى معك ،، ندرس ونجتهد ونثابر ونتعب وحنا حاطين بروسنا المستقبل الوظيفي وكيف راح يكون وكيف راح ادورلي على واسطة وشنو الشركات المحتاجة وا وا واو ،، ومانحط بروسنا ان هذا بالدرجة الاولى اسمه طلب علم وأجره عند الله كبير ،، فيازينها لمن نحسبها من هالناحية اولا ثم نحسبها من ناحية المستقبل الوظيفي ثانيا .

مقدر شعورك وقلقك وخاصة بصفتك أمراة ،، فاذا كانو الشباب أنفسهم مو لاقين فما بالك بالنساء ؟؟ فطبيعي جدا حالة القلق اللي فيك لكن مو طبيعي ابد الاحباط اللي عايشته .

لو سألتيني وناخوك وقلتي لي أنا خريجة انجليزي ودرجاتي كبيره وقدمت على اكثر من وظيفة وماقبلوني ونا عطاله سنين راح اقولك فيه ناس معاهم ماجستير ودرجاتهم عالية جدا واعرفهم شخصيا وهذاهم يشتغلون في القطاع الخاص برواتب ماتتجاوز الستة الالاف ريال ،، تعب سنين وغربة وخسائر بالالاف ماضمن لهم الوظيفة للاسف لان الضامن هو الله فقط ،، هذا واقعنا للاسف أن ماكان معك واسطة راح تتعقد امورك وأن جاتك واسطة ماتدري باللي يحمله لك المستقبل والظروف .

فصدقيني وناخوك لو قعدتي بهالحالة ماراح تلقين اجابة مفيدة ابد ولو استمعتي لاجاباتي ولاجابات غيري راح تزيد عندك الحيرهـ والقلق لان كلن بيعطيك رأيه وراح تكبر الدائرة والضحية أولا واخيرا انتي ،، فعندي لك كم نصيحة ووجهة نظر اتمنى منك قراءتها :

1- تعودي دايم تستخيرين الله قبل أتخاذ اي قرار ،، لأن الانسان اذا استخار الله يحس براحة وطمئنينة حتى لو لم يحقق هدفه وماخاب من استخار .

2- لاتقارنين نفسك بالشباب في مجال التوظيف فأنتي امراة والوظائف المتاحة لك بالسعودية قليلة جدا مقارنة بالشباب والعادات والتقاليد تحرمك من وظائف كثيرة متوفرة بمجالات ماترغب فيها عاداتنا ،، فأنتبهي من هالنقطة .

3- ضعي ثلاث ورقات امامك واكتبي في رأس كل ورقة تخصص ترينه مطلوب في السوق بكثرة وتحسين بأنك راح تبدعين فيه مثل ( ادارة الاعمال وفروعها والكمبيوتر وفروعه والاتصالات وغيرها ) وادرسي ايجابيات كل تخصص وسلبيات كل تخصص ( مثلا هل الوظيفة مكتبية ؟ هل فيها اختلاط ؟ هل زوجي بيوافقني عليها ؟ هل انا برتاح فيها ؟ هل راح تطورني في مجال تخصصي الاصلي وهو الانجليزي ؟ وهكذا .

4- ضعي برأسك نقطة مهمة جدا أنه ممكن تتخرجين وتقعدين في البيت وممكن تتخرجين وتطيحين بوظيفة ممتازة فدايم خليك متفائلة وشجعي نفسك وادعميها مو تخذلينها ،، قولي بنفسك دايم ان جاتني الوظيفة فهذا اللي اسعى له وابيه ، وان ماجاتني فانا سويت اللي علي يارب وتاركه الباقي عليك وواثقة انك ماراح تخيبني واللي كاتبه انت راضيه فيه .

5- لو كنت مكانك راح اسافر مباشرة مع زوجي ان شاء الله خاصة ان كان مبتعث ،، منها أطور لغتي لاني متأكد انها ضعفت عندك ،، ومنها اجيب شهادة ماجستير أفضل من القعدة بالبيت .

6- وبحكم اني سعودي ومطلع على الوضع بقرب لو سألني اي سعودي عن الوظائف راح اقوله متوفرة وبكثرة لكن برواتب تعتبر جيدة نوعا ما لشخص مبتدأ لايوجد عندهـ خبرة واللتي تعتبر الاهم بالنسبة للشركات لكن مع الصبر والجد والعمل واخذ الخبرة بامكانه الانتقال لشركة افضل ،، وكلامي عن جميع التخصصات بلا استثنئ .

7- اما لو سألتني اي فتاة سعودية راح اقول لها بصراحة اما ادارة اعمال واحبذ الموارد البشرية لانها مطلوب في كل شركة وادارة الاعمال من التخصصات اللي ممكن تلقاء لك وظيفة في اي شركة لو انها شركة زراعية ،، واما الاتصالات لان الشركات بدأت تبحث عن النساء ،، واما الطب ،،، لكن السؤال الاهم هل هو يناسب عاداتك ؟ .

علعموم الله يوفقك وناخوك ويعينك ويثبتك على اتخاذ القرار المناسب ،،، فقط فكري بهدوء وعقلانية واتخذي قرارك بمشاورة زوجك واستخيري الله وتوكلي ،، ولا تتراجعين او تندمين ابد ابد لان الرزق مثلما ذكرت لك من عند الله .

بالتوفيق واسف على الاطالة