طالب على حسابه الخاص .. أجوبة أحتاجها / لـ أهل الخير !

السلام عليكم .. اخي الفاضل .. أولاً احب اطمنك ان معظم شروط الالتحاق استوفيتها انت من الاساس .. يبقى لك فقط فتح ملف طالب دارس على حسابه الخاص ( تفتحه اول ما تجي كندا ) + Enrolment letter و هي ورقة من المعهد تثبت انك درست في المعهد ٣ أشهر على حسابك الخاص ( تحصل عليها بعد ما تخلص ٣ شهور في المعهد ) + كشف الحضور و الغياب لهذه الاشهر الثلاثة .. بعد استيفاء كل الشروط يتبقى لك الانتظار لصدور قرار ابتعاثك ( ياخذ من اسبوعين الى ثلاثة اسابيع ) ، انا و لله الحمد التحقت بعد ما استوفيت الشروط خلال ١٠ ايام، و لا يحتاج انك تنهي اللغة او تجيب التوفل او الايلتس ليتم قبولك في البعثة. بالنسبة لامريكا ما أدري عن وضعها ابدا. هذه اجابة السؤالين الاول و الثاني

٣/ راح اسوي لك حسبة مبسطة و بتعرف من خلالها الفترة التقريبية اللي يغطيها مبلغ ٦٠ الف ريال :

قيمة التذاكر تتراوح في السعر ( على حسب المواسم ) و ما اتوقع تتجاوز ٨٠٠٠ ريال ( ذهاب و عودة ).

٦٠ الف - ٨٠٠٠ = ٥٢ الف ( باقي راس المال اللي عندك )
ـــــــــــــــــــــــــــــــــــــــــــــ

مجموع مصروفك في الشهر ( شامل المعهد + السكن + مصروف الجيب ) = ٢٢٠٠ دولار X ٣.٧٥ => ٨٥٠٠ ريال سعودي و كسور
ـــــــــــــــــــــــــــــــــــــــــــــ

٥٢ الف ( متبقي راس المال ههههه بعد خصم قيمة التذاكر ) \ ( ٨٥٠٠ مصروفك لشهر واحد ) = ٦ أشهر، و هي فترة كفيلة بإذن الله انك تلتحق خلالها

اتمنى اكون جاوبت على كل استفساراتك .. اذا عندك سؤال ثاني اكتب لي عالخاص ولا يردك الا كيبوردك .. تحياتي

كل إلشكر لك اخوي

والله اجابة كافية ووافية
لكن ياليت تضيفني , بـ استفسر استفسارات بسيطة لا أكثر
real--madrid--@hotmail.com
إذا تكرمت يالغالي ..

وعليكم السلام ورحمة الله وبركاته ،، هلا بك يالاخو .

بصراحة الاخ دودي كفى ووفى الله يجزاهـ خير .

لكن عندي نصيحة لك ،، مو شرط اذا ضمو فلان خلال ثلاث اشهر راح يضمونك مثله ،، فأنتبه من هالنقطة ،، لأن فيه ناس كثير راحو لكندا برأس مال يكفيهم لست اشهر وتحت وكأنهم ضامنين البعثة ،، وفي الاخير رجعو طفرانين لا بعثة ولا دراهم ،، فأنت لمن تروح هناك وتقدم على ألحاق بالبعثة ممكن يقولون لك لازم تحقق الشروط وماعندك حق تحاججهم ابد لان الشروط واضحة وضوح الشمس في موقع الوزارة ،، فأنصحك تسنع حالتك المادية اكثر ،، وتحط براسك أنه ممكن مايضمونك الا عقب ماتنهي مرحلة اللغة ،، وماحد يقدر يضمن لك أنهم يضمونك الالحاق في اقل من 6 اشهر .

فلا تضع نفسك في حسابات ومغامرات وتخمينات انت في غنى عنها ،، فحاول تدبر مبلغ يكفيك لحد مرحلة انهاء اللغة ،، لان نسبة الالحاق بالبعثة لمن انهى مرحلة اللغة كبيرة جدا وشبه مضمونه ،، أفضل من انك تقسط على عمرك وتروح بمبلغ مايكفيك حتى خمس اشهر خاصة مع غلا المعيشة في كندا على أمل انهم يضمونك مثل ماضمو فلان .

هي نصيحتي لك ووجهة نظري وانت حر بقرارك وناخوك .

بالتوفيق

كلامك حلو يـ أخ " قوطي فاضي "

لكن انا كل القصد إني هل انظم للبعثه لو خلصت اللغه وهالكلام كاتبة فـ موضوعي
هذا اولا

ثانيا : انا مستواي جيد باللغة الإنجليزية وماني بادي من الصفر , هل ممكن إني خلصها بـ 6 شهور
لو كنت مجتهد وفاضي للدراسه او يحكموني بكورسات وفترات محدده لازم امشي عليهـا

أتمنى الرَد

هلا بك يالغالي .

وناخوك على هالمبلغ اللي معك راح يكفيك حول الـ 6 اشهر ،، وبالضبط ماحد يقدر يقولك كم تكلفك لان الاسعار مرتفعه صراحة وربعنا تارسين البلد ،، وانت تعرف متى ماطحنا ببلد زادت اسعارهـ .

أنا ماعرف قوة لغتك وناخوك لكن سالفة أنك تنهي اللغة في 6 أشهر اشوفها صعبة شوي ،، انت يالله يبيلك شهر او شهرين عشان تبدأ تتبرمج مع الاكسنت حقهم وتبدأ بفك لسانك ،، خاصة ان الرايتنق عندنا يالسعوديين تعبان .

فانا مابيك تسافر هناك وانت ضامن انهم يضمونك خلال 3 اشهر او 6 اشهر ،، ابيك تسافر وانت مرتب حالتك المادية وحاط براسك انهم اذا ضموك خلال شهر او شهرين او ست اشهر خير وبركة ،، واذا ماضموك تكون معاك دراهمك وتكمل لحد ماتنهي مرحلة اللغة ،، واذا انهيت مرحلة اللغة ان شاء الله نسبة ألحاقك تكون كبيرة .

وطبعا الرأي اولا واخيرا هو رأيك وانت حر فيه وناخوك .

بالتوفيق

كلام قوطي فاضي صحيح ،، ما احد يقدر يفتي لك متى الانضمام للبعثه !! ناس اول ما يجوون وناس يطولون !
بالنسبه للغة لو انت ادفانس في اللغة ،، فـ ٦ شهور تكفيك تاخذ التوفل
اما لو لسى مبتدى او لغتك متوسطه فصبعه !!

بالنسبه لامريكا وكندا ،، حسب اللي انا شايفته القبولات في امريكا كثير اسهل

السلام عليكم .. كلام الاخوان لا غبار عليه .. في طريقة فعالة جداً عشان تعرف مستواك في اللغة و هو اختبار الايلتس، عدد كبير من الجامعات في كندا لا تشترط اختبار ايلتس او توفل لمرحلة البكالوريس، بمعنى انه عندك حلين عشان تكون منتهي من اللغة و تنزل مواد اكاديمية:

الأول: إنك تسجل في الجامعة و تسوي اختبار تحديد المستوى، و اعتماداً على هذا الاختبار راح يحطونك في المستوى المناسب لك. الجامعة اللي انا فيها لديها ٦ مستويات للغة، و بمجرد وصولك للمستوى الخامس يحق لك التسجيل في مواد اكاديمية ( يعني تصبح طالب اكاديمي و ليس طالب لغة، و تجيب enrolment letter يوضح عدد الساعات اللي مسجلها + مسمى المواد، و هذا الشيء يسهل جدا جدا جدا من انضمامك بإذن الله ).

الحل الثاني: تختبر الايلتس، و تجيب الدرجة المطلوبة اللي تبيها الجامعة ( حسب الجامعة اللي انا فيها درجة الايلتس ٦.٥ ، يعني جميع البنود الـ٤ تكون ٦ ) . الميزة في اختبار الايلتس إنك حتى لو ما قدرت تجيب الدرجة المطلوبة و جبت مثلاً ٦ او ٥.٥ ، تتم معادلة شهادة الايلتس و بدل ما تبدأ مثلا من المستوى الثالث يحطونك على طول في المستوى الخامس او الاخير. هذا الحل مريح لانك تضرب عصفورين بحجر واحد، منها تعرف مستواك في اللغة، و ايضاً تعادل شهادة الايلتس.

ملاحطة اخيرة: المستوى الواحد في معاهد الجامعة اما ان يكون ١٣ اسبوع ( كما هو الحال في الجامعة عندنا ) او يكون ٨ اسابيع في بعض الجامعات الاخرى .. سويت لك اضافة .. تحياتي

ماشاء الله حتى انا استفدت من الموضوع وردود الاخوة
استفسار بسيط جدا
هل يشترط احضار قبول جامعي لطالب الماجستير كي يتمكن من فتح ملف طالب على حسابه الخاص؟ام يكفي قبول معهد اللغة؟لان قبولات ماستر في كندا في غاية الصعوبة

طيب الله يعطيكم العافية على النصائح يـ أخوان

لكن الحين الـ أبلكيشن حق الفيزا من وين آخذه !!
أو أعبيه من النت إذا من النت يآليت تعطوني
أي موقع احصل فيه الأبلكيشن


أنـأ بـ إنتظـآركم ...