سكن قريب من جامعة يورك - تورنتو

April 17th, 2008, 01:04 AM

بسم الله الرحمن الرحيم
السلااااام عليكم...
بعد جهد جهيد وتعب وبحث دام لمدة شهر او اكثر (والله ما أبالغ هذا الصحيح) وبعد تطنيش للإيميلات اللي ارسلتها للنادي السعودي وللأسف حتى ماعبروني ولا برد. أرسلت لرئيس النادي, نائب الرئيس, الإستعلامات واللجنة الإجتماعية. وللأسف خيبوا ظني فيهم. وأنا من هنا أقول للإخوان اللي بالنادي السعودي, ياجماعة حنا بحاجتكم الآن أكثر من حاجتنا لكم إذا وصلنا كندا على خير وسلامة إن شاء الله. الحين نعتبر جدد على المنطقة ولا نعرف أماكن للسكن والحضانات والمستشفيات و........إلخ. أنا محتاج أعرف هالأشياء قبل ما أختار السكن والحي والمرافق المجاورة. كثير مننا رايحين عوائل, لو لا قدر الله تعب ولده ولا زوجته وماحوله مستشفى توهق. لو الواحد عزوبي يدبر حاله بأقرب مسجد (على بالي رايح مصر) ولا يرمي حاله على الرصيف وماتفرق معه وين يسكن. لأن مشواره للجامعة بأقرب وسيلة مواصلات ممكنه ماتفرق. عموماً هذا مو موضوعي ولا أبي استرسل بالكلام (ماقصرت). وما أنسى عتبي على الإخوان اللي بالمنتدى ومتواجدين حالياً بكندا. حنا مانبيكم تستأجرون لنا وتدفعون عننا. أنا بس ابي اعرف افضل مكان قريب لجامعة يورك تتوفر فيه المرافق الهامة من مستشفيات وآماكن توقف الباصات والبنوك والسوبر ماركت و....إلخ من المرافق الحيوية اللي الواحد يحتاج لها كل يوم. ولو ما احتاج لها يوميا بس احتاجها فجأة ومضطر يكون فيها بوقت قصير مايتبهدل.
خلونا نرجع لموضوعنا.
من خلال بحثي عن سكن قريب من جامعة يورك, لقيت أماكن (الأماكن كلها مشتاقة لك) كثيرة تتفاوت أسعارها ونوعياتها والمرافق المحيطه بها.
طبعاً أنا وضعت لنفسي طريقة للتأكد من السكن, وحسيت إنها مناسبة لكل الدارسين بجامعة يورك. يمكن تعجبكم ويمكن ماتعجب البعض منكم. لقيت جنب الجامعة (2 كم بالضبط) موتيل (مو فندق بس نفس النظام) وشكله حلو وسعره مناسب. وهذا موقعه
أَضغط هنا
فكرت اني لو استأجرت فيه كم يوم (وفي حالتي راح اسكن فيه 5 أيام لأني رايح 25-أبريل بإذن الله على الإماراتية واي شخص معاه عائلة نتخاوى على الخط ). منها أدور سكن قريب على راحتي (وطبعاً أنا لقيت سكن قريب وراح اتكلم عنه بعد شوي) واشوف بعيني وبدون مساعدة النادي السعودي (حاقد عليهم) وبعدها أتوكل على الله وأسكن. بيكون معي 5 أيام بحث وإذا لقيت ان شاء الله راح يكون معي 5 أيام تجهيز أساسيات وضروريات الشقة من مواد غذائية وفرش (بطانيات - مطارح....إلخ) ومنها أتعرف على المنطقة اللي حولي. وبكذا يكون جاء موعد الدراسة اللي هو 5 - مايو.
جينا الحين لأهم نقطة بالموضوع وهي السكن الرئيسي. فيه بنفس موقع المعهد وصلة مساعدة مفيدة جدا جدا جدا وللأسف ما انتبهت لها الا قبل كم يوم بالصدفة. ويمكن كثير من الإخوان والأخوات ماركزوا عليها.
اضغط هنا
اللي يبي أي مساعدة باللغة أنا تحت امركم.
طبعا أنا من الفرحة دخلت على هالموقع اضغط هنا ولو تلاحظون ان شعار الجامعة موجود فوق وهذا الشي طمني وريحني كثير. بعدها دخلت على هالموقع اللي شدتني العمارة اللي فيه اضغط هنا.أنا ارسلت ايميل لمكتب العقار اضغط هنا (حلوه مكتب العقار) وثاني يوم ردوا علي, مو مثل شباب النادي اللي ماعبروني ولا حتى جبروا خاطري . العيب الوحيد ان مافيها مكيف ولا باقي المواصفات من وجهة نظري ممتازة وخاصة السعر. أهم شي فيها ان القطط والكلاب (اعزكم الله) مسموح سكنها لأني ابي اجيب أرنب معي. والأهم من هذا الدخان مسموح لأني لاحظت ان بعضهم ممنوع فيه التتن
(يامعذربين التتن لولاه لولاه***لولا شرابه ياعرب وين اروحي
والله يلولا العظم يوم اني املاه***واكويه بالجمره ويكوي جروحي
مع دلتن صفرا على النار مركاه***ابصر بصبتها على كيف روحي
فنجالها يشدي خضاب الخونداه***الجادل اللي عند اهلها طموحي) صح لساني..
والأحلى من كذا... لمن دخلت على نفس موقع المكتب يقول ان فيه بارات قريبه.. رايحين نسكر مو نتعلم..
وأنا أفضل ان العوائل اللي بنفس الجامعة نسكن مع بعض. عشان حريمنا يروحن للجامعة ونجلس كل يوم الغدا على واحد والجلي على الثاني والحضانة على الثالث والتوصيلة على الرابع و.... إلخ, ويروحن حريمنا يحومن يالأسواق بما اننا طالعين مرافقين, يعني على كفالتهم ...
أحس اني طولت بزيادة... اللي يبي يستفسر أنا حاضر وهالشي افضل من كثرت قرقرتي...
لا تنسوني من صالح دعواتكم حتى اللي ماله شغل بالموضوع يدعيلي..
فمان الله وآسف على الإطالة وقلت الشرح المفيد..
بالتوفيق جميعاً

• نشر عبر تويتر
• نشر عبر فيسبوك
• نشر عبر جوجل