ملاحظاتي الاولية عن مدينة فانكوفر لثاني يوم من وصولي

0

0

0

0

0

0

0

0

قبل كل شي احمد ربنا و اشكره على نعمته و فضله علي للتيسير في كل اموري و من بعد تعب نفسي حوالي سنتين عشان انضم للبعثة و الحمدالله جا اليوم الي اتحقق فيه جزء من امنياتي ..

امس وصلت فانكوفر الساعه 12 و نص الظهر و الرحلة كانت طويله و متعبه جسديا و نفسيا كمان !!!

من جدة الى لندن مطار هيثرو بالخطوط السعودية 6 ساعات .. انتظار في مطار هيثرو 4 ساعات .. طيران بالخطوط الكندية الى مطار فانكوفر 10 ساعات

راح اكتب ملاحظاتي على شكل نقاط للترتيب و سهولة الفهم ..

1 - من بعد ما تقطعو التذاكر لازم تحجزو المقعد للطيارة للخطوط السعودية من اي مكتب للخطوط و افضل مكان عند باب الطواريء جانب النافذه

2 - برضو لازم تروحو مكتب الخطوط الكندية على طريق المدينه قبل كوبري المربع في عمارة كانو و تحجزو المقعد المناسب عند اول صف لدرجة الضيافه و نوع الاكل .. و افضل نوع هوا الكوشر ميل لان الاكل الاسلامي مو كويس و قالي الموظف كل الناس تشتكي منه !!!

3 - ادخلو على هادا الموقع http://www.aeroplan.com/enroll.do?gh...&register=true
و سجلو في عضوية ال Aeroplan الي تعطيكم اميال و مميزات ثانيه لنفس فكرة الفرسان السعودية و خصوصا راح تستفيدو لكثرة عدد الساعات على الخطوط الكندية و ببلاش و تستلمو البطاقه لمن توصلو كندا و تحفظو الرقم من بعد التسجيل عشان تعطيه لموظف الخطوط الكندية في مطار هيثرو عند قطع البوردينج باس ..

4- مسموح على الخطوط السعودية بحمل 32 كيلو للقطعه الواحدة من مجموع قطعتين فقط

5- في حالتي طلع عندي وزن زايد و مجموع الشنطتين كانو حوالي 105 كيلو و افضل حل كان ادفع وزن لقطعه ثالثه ب 530 ريال .. و القطعه حدها من 1 كيلو الى 32 كيلو بتكون نفس السعر !

6- لازم تقولو لموظف المطار يكون استلام الشنط في المدينة الي رايحلها و تاخذ وصل الدفع للوزن الزايد عشان تسلمه في مطار هيثرو للخطوط الكندية

7- الرحلة على الخطوط السعودية كانت نصها فاضي ! ..

8- مطار هيثرو سهل و ما يضيع و مجرد اننا نروح على تشييك الشنط الهاند باق على تفتيش الجهاز و تعدي من تحت الاشعه و يسال الموظف اذا عندك اي liquid stuff و انا كان معايا عطر و قلتلو لا ماعندي شي و عادي ما فتشني و بعدها نروح على كاونتر الخطوط الكندية لقطع البوردينج

9- الموظف يسئل عن الجواز و التذكرة و سبب سفرك الى كندا .. و لازم تعطيه وصل الوزن الزايد و استلام الشنط في المدينه الي رايحلها لكندا و رقم عضويتك في ال Aeroplan ...

10- مطار هيثرو مو كبير مره و تقدر تلف على الديوتي فري و انصح انك تاخذ معاك كاش حوالي 50 جنيه استرليني في حالة تبغا تاكل او تشتري شي عالماشي ..

- الخطوط السعودية افضل من الخطوط الكندية و الاكل للكوشر ميل جيد ..

11 - انصح تاخدو معاكم كتاب و ايبود و لعبة جيم بوي او psp عشان تضيعو الوقت في الطياره لرحلة 10 ساعات متواصله

12 - اول ما تنزلو لمطار كندا امشو ورا الناس الين ما تشوفو الطابور لكن لا تروحو معاهم و اسالو اي موظف فين ال immegration عشان له طريق ثاني و طويل شويه و اجراءات مختلفه !

13 - يطلبو منكم الاميجريشن الجواز و ال study permit و صورة من القبول للمعهد ( مع العلم ما طلبو مني قبول المعهد لكن شفت ناس طلبوها منهم )

14 - و تطلع منهم و تاخذ العفش و تسلم الورقه الي عبيتها في الطياره عند باب الخروج للمطار

15 - ما حصل اي تفتيش للاب توب او الشنط و الامور الحمدالله جدا متيسره و شغل سريع سريع

16- للناس الي ما عندهم شريحه عشان يتصلو من المطار للعائله او اي شخص يجي يستقبل تقدرو تحصلو كاونتر الاتصالات في نفس المطار يعطيكم coin تستخدمو من تليفون المطار ببلاش و من غير تحديد للوقت

17- و الجو عموما مرره حلو في فانكوفر و تحتاج تشيل معاك جاكيت خفيف

______________________

في حالتي روحت على عائلة صينيه طيبين و يتكلمو انجلش ممتاز و عندهم طلاب غيري 3 اولاد و بنتين و اخدت غرفه بحمامها الخاص بوجبتين 800 دولار في الشهر و مرره نظيفه الغرفه الحمدالله و البيت كبير و عندهم 7 بساس

و اليوم الظهر طلعت مع واحدة كوريه للداون تاون عشان اشتري خط تليفون بس للاسف قالولي لازم يكون عندي حساب في البنك اول عشان اقدر اشتري خط و راح اضطر كدا استنى الين يوم الاثنين عشان يفتحو البنوك !

و سلامتكم

-