اسئلة تحتاج لأجوبة

اهلين أخوي,
باعتباري من المهتمين بالقسم سوف أحاول الإجابة على قدر علمي

أول شي ماقهمت انت مبتعث ولا رايح تدرس على حسابك!!!!!

- اول سؤال .. بالنسبة لنموذج الموافقة على الدراسة في الخارج .. أسلمه هنا في الرياض أو اسلمه في الملحقية الثقافية في استراليا ؟؟؟ لأني سمعت آراء متضاربة حول هذا الموضوع وأبى الجواب النهائي الشافي والكافي .

لو انت رايح على حسابك
نموذج الموافقة هو أحد المستندات التي تقدمها للملحقية في استراليا عند فتحك لملف الدراسة على حسابك الخاص.

- ثاني سؤال بالنسبة لملف طلب الالتحاق .. هل اقوم بفتحه مباشرة فور وصولي ولا عادي بعد مدة وهل يلزم علي الذهاب لمقر الملحقية ؟

مثل ماتحب
ممكن ترسل لهم الأوراق عن طريق البريد وكل المعلومات خصوصاً عنوانك واوراق القبول من المعهد والجامعة.
مو ضروري تروح الملحقية.

- ثالث سؤال ... بالنسبة للفلوس وش هي أفضل طريقة تصلني فيها الفلوس شهريا من أهلي ؟ هل يحولون لي على حسابي في احد البنوك السعودية وانا استخدمها هناك عادي ؟ ام هل هذه الطريقة بتخسرني مبلغ وقدره ... على كل سحبه ؟ وهل هناك طُرق أفضل من هذه بحيث ان اهلي يرسلون لي الفلوس شهريا . أبى طريقة مجربة وعملية .

افتح حساب في بنك كندي
وخلي اهلك شهرياً يحولو لك مباشرة من حساب في البنك الفرنسي ولا اي بنك محترم الى حسابك في البنك الأجنبي
البنوك الجيدة هي(الفرنسي-البريطاني ساب- الأمريكي)


خذ الأصول وعشرة صور
والتعويض من الملحقية

نسال الله يعوض عليك أخوي ويتم الحاقك ونبشرنا
وإن شاء الله تلقى اجابات وافية من الأخوان الكنديين

السلام عليكم ورحمة الله وبركاته ...


اخوي الكريم الأخت مسافرهـ ماقصرت وجاوبت على اسئلتك .. بس بحاول اساعدك بإجابات اضافيه تفيدك


الملحقيه الثقافيه بأستراليا عندهم نظام إلكتروني ممتاز .. وتقدر تتابع فيه معاملاتك ومايحتاج ابدا انك تروح لمقر الملحقيه ..

بالنسبه للإرسال عندك اكثر من طريقه بس اسهلها واحسنها انك ترسل عن طريق البريد .. وطبعا المكاتب متوفره فكل مكان ..

بالنسبه لوقت الإرساله تقدر ترسل اوراقك بعد ماتجهزها كلها .. يعني اسبوع اسبوعين شهر ماتفرق لأنك تدرس على حسابك


انا راح اعطيك حلين من افضل الحلول وانا مجربهم ..

الأول انك تطلع بطاقة فيزا مسبقة الدفع من البنك الأهلي .. تذكر اسمها لاتنساهـ

"بطاقة فيزا مسبقة الدفع" من البنك الأهلي ياعزيزي هي بطاقة فيزا عاديه

بس فاضيه .. وانت تشحنها .. يعني زي بطايق سوا للجوال

والميزه فهذي البطاقه انك تقدر تسحب فيها من اي مكان بأستراليا .. وتقدر تسحب بعد من أي صراف بأستراليا وماراح ياخذون عليك عموله ولا حتى 10 سنت

وكل الي على اهلك يسوونه انهم يروحون البنك الاهلي بالسعوديه ويسوون لك إيداع نقدي فحسابك .. وبعدها انت تقدر تسحب الفلوس من استراليا

ورسوم هذي البطاقه للبنك الأهلي 100 ريال سنويا ..

بس اذا اصدرت هالبطاقه ورحت استراليا .. لاتسحب مبلغ كبير من الصراف .. لأنه بطايق الفيزا غالبا لمن تسحب مبلغ كبير من صراف خارج بلدك .. المنظمه الدوليه توقف الصرف وتدقق فالموضوع

يعني لو اهلك ارسلولك فرضا 2000 دولار هالشهر .. حاول تسحبها على دفعات

يعني اليوم تسحب 400 دولار وبكره مثلها وبعده مثلها .. واذا بتخلي الفلوس بالحساب بكيفك

لكن بما انه حساب سعودي فراح يتأثر المبلغ بسعر الصرف .. يعني مثلا اليوم يكون فرصيدك 2000 دولار ممكن تجي اليوم الثاني وتحصل رصيدك 1950 .. وزي كذا


الطريقه الثانيه .. وانا انصحك بهذي اكثر

انك اول ماتوصل استراليا تفتح حساب فأي بنك استرالي .. وتاخذ معلومات الحساب الي فتحته وترسله لأهلك بالسعوديه

وهم كل نهاية شهر يحولون لك على حسابك بأستراليا من احد مصارف التحويل بالسعوديه .. مثل بنك الراجحي او بنك إنجاز

وطبعا ياخذون عالتحويله 100 ريال مهما كان المبلغ المحول .. ماني متأكد من المبلغ الي ياخذونه

هذي الطرق الي عندي .. وطريقة الأخت مسافرهـ ايضا جيده بس ما اعرف هل فيه بنوك كنديه هنا ولا لا ؟؟


الملحقيه ماراح تعوضك بشي الا لمن تكون طالب مبتعث على حساب الدوله ..

لذلك الاوراق لاتفرط فيها .. خلها معك احتفظ فيها الين ان شاء الله تنضم للبعثه وبعدين ارسلها ويعوضونك عنها ان شاء الله

بالتوفيق اخوي