استفسار كم تاخذ وقت موافقة الملحقية لطالب دراس على حسابه الخاص

هلآآ بك أخوي
إممم .. أنـآ حآلتي زي حآلتك بعد .. صار لي أسبوع من قدمت على الطلب .. !!
اليوم ( السبت ) راح أكلمهم تلفون وإنشاء الله يردوا .. إذآ مـآردوا .. رايح لهم الرياض يوم الأحد ..

أتمنى أحد الأعضاء عنده فكرة عن الموضوع ويخبرنا

هلا اخوي المعامله تقريبا تقعد اسبوعين.

بس اذا كنت مستعجل كلمهم بالتلفون وعلي طول تمشي المعاملة، انا قدمت ثلاثه مرات وكل مااكلمهم ثاني يوم من الات صال كان يجيني الرد
وللمعلوميه اخوي اذا كنت حاجز طيران وتبي تسافر سافر ماعندكم مشكلة تجيك الموافقه وانت في بلد الابتعاث لاتقلق (اخويا جاته الموافقه وكان له شهر في استراليا)

بالتوفيق

أهم شيء إننا قدمنا عليهم قبل لا نسافر فلو تأخرو علينا راح نقولهم شوفوا تاريخ التقديم مقدمين عليكم من قبل لا نسافر

اخوي ابو بدر النظام تغير عن اول الان لازم تقدم عن طريق الوزارة الاول واذا اعطوك الموافقة بعدها تفتح ملف عند الملحقية هناك تفتح لك ملف بناء عليه والافضل ماتسافر الا وانت مخلص هالخطوة وتفضل رابط الدارسين على حسابهم الخاص الصفحات - إعلان إطلاق الخدمة الإلكترونية للحصول على موافقة الوزارة للدارسين على حسابهم الخاص في الخارج

دعواتك وبالتوفيق.

شكرا للجميع معلومات تبشر بالخير

اخوي انا قدمت وعطوني الموافقه بعد التقديم تقربا باسبوع واربع ايام والقبول لاتخاف اذا اوراقك كامله يعطونك الموافقه يعني لاتحاتي

شكرا لتجاوبكم مع الموضوع المهم ؛؛

بما ان الموضوع تاخر اسبوعين هناك مشكلة والموظف نائم لم يكلمكم

يفترض على كلامهم ان الامر لاياخذ اكثر من ثلاثة ايام عمل

حدث لي نفس الامر
ورصوني اسبوع كامل (انا مقدم عن طريق الموقع مو عن طريق الوزارة )

المهم اخذت رقم الطلب ورحت لهم في الرياض
وين طلبي انتم تقولون مدة العمل ثلاث ايام والان لي اسبوع
الحقيقة قابلت واحد شقريدي الظاهر اسمه هذال العتيبي

المهم قال خل اشوف ثم قال جامعتكم موقفة (وانا كنت محتاط لهذا الامر ) قلت ياطويل العمر اذا كان فيه نقص بالاوراق تكرما تخبرونا على شان نجي وونراجعكم
واذا كان هناك اي ملاحظات المفروض ترسلونها بالايميل على شان نعرف موقفنا والله الرجال محترم جدا وقال معك حق وهذا خطا موظف

الان قلت نرجع للجامعة الجامعة موقفة للدكتوراة بسبب التكدس وليس بسبب انها غير جيدة وانا بكالوريوس وهي ماعندها مشكلة مع معتمدة في مرحلة البكالوريس كما هو موجود بموقع الوزارة

راجع المعلومات من الموقع وقال كلامك صحيح وكلم بالتلفون وقال ابشر ثلاث ايام عمل وموضوعك منتهي

بعد ثلاثة ايام ماجاني رد واصبح عليهم باليوم الرابع واحصل موظف ثاني واخبره بكل القصة وكان في قمة الروعة والتعامل ورفع السماعة وكلمهم قالو مشكلة في الجامعة قال مافيها مشكلة

الان تردون عليه لاننا استنفدنا وقتنا معهم
قفل المكالمة وقال ابشر دقائق وتصلك الرسالة


الصراحة اني طلعت مندهش ومستغرب اول مرة يتعامل مع موظف بكل هذا الادب والرقي

حتى اني طلعت وجلست اتاكد انا بالرياض او لا

وتاكد اول ماطلعت اني بالرياض يوم شفت فوضى السيارات بالخارج وكل واحد موقف على كيف كيفه


ولاني مقهور من تاخرهم قلت ماني رايح بعيد ابدور بوفية واضربها فطور ثم ارجع لهم

وقبل اوصل البوفية وصلتني رسالة تم فتح الملف لك بالملحقية

تصلك رسالة على الايميل فيها رابط لفتح ملف طالب دارس على حسابه الخاص

ويكون تواصلك مع الملحقية هناك
لكن هذا ماتستطيع تفعيله الا لما تكون بنفس بلد الابتعاث