كيفية الحصول على قبول دكتوره بتخصص الكيمياء بستراليا

وعليكم السلام ورحمة الله وبركاته

قبول الدكتوراه أختي الكريمة ليس ستاندرد او شكل واحد تعبي الفورمه وترسلها للجامعة ويقبلوك على طول كقبول البكالوريس والماستر بين كل المتقدمين قبولات الدكتوراه شئ مختلف تماما ولذلك المكاتب لاتشتغل عليه ولاتحرص عليه, تحتاجين أولا تعرفين ايش المجالات اللي مهتمة تشتغلي عليها وبعدها تكتبين اطروحة في المجال اللي راح تشتغلين عليه في الدكتوراه وبعدها تبحثين عن المشرف الذي لديه اهتمام ببحثك وتراسلينه وتوريه الأطروحة وانك تبغيه يكون مشرف عليك وبعدها يوافق عليك أو لا وبعدها يجيك قبول الجامعة ولذلك قبول الدكتوراه شاق ومتعب وياخذ وقت ولا يستطيع احد عمله غير المتقدم نفسه, ويفضل أن الطالب يبدأ في إجراءات الدكتوراه على الأقل قبل 6 شهور من بدء برنامج الدكتوراه.

موفقة.

كلام الاخ صالح سليم ١٠٠٪
هذه هي الطريقه المثلى للحصول على قبول دكتوراه ... لن يكون أحد حريص على ايجاد المشرف المناسب لك أكثر منك
أحببت أن أضيف ايضا ... هناك الكثير من المشرفين يضعون خطط بحثيه لهم على صفحاتهم في موقع الجامعه .. وهذا يوفر عليك كثير .. اذا وافق المشرف .. فقط تضيفين معلومات بسيطة .. مثل ماحصل معي

نصيحتي لك ... حددي توجهك الدقيق .. يعني من كيمياء وش ودك تتخصين فيه؟؟ ثم ادخلي على الجامعات الاستراليه واحدة واحدة وشوفي توجهات المشرفين بمايناسبك.. وابدئي راسليهم

طريقه المراسله التي انصح بها هي:
اكتبي ايميل مختصر عنك .. اسمك - بلدك - دراستك - اهتماماتك البحثيه .. الخ
واهم شيء اذكري انك مبتعثه والدوله راح تصرف عليك .. هذه المعلومه مهمه جدا ...
ثم ارفقي .. شهادتك الماجستير + البكالوريوس + السجل الاكاديمي لكلا المرحلتين + CV + و مقترح بحثي من صفحه واحدة فقط

بالتوفيق

مشكورين و ماقصرتو
بس كان عندي استفسر عن الجامعة الموجودات بأمكان محترمه فيه الوحده تلبس نقابها بأريحه بدون تذمر او استفزاز او قلت ادب من الاشخاص الموجودين بهذا المجتمع؟؟
اخ alsubVi كيف مقترح من صفحه واحده بكذا يكون قصير و غير شامل
ولو جهزت proposal اكامل هل هناك مشكله

نعم بإمكانك لبس النقاب في الجامعة والناس في حالهم محد راح يتعرضلك.

بالنسبة لل proposal يفيدك فيه أبو تركي.

موفقة.

حياك الله اختي الكريمه

ثقي تماما ان النقاب لاتوجد عليه مشاكل .. فقط تجنبي اللون الاسود .. الكثير من الاخوات كانوا معنا في المعهد والجامعه و لاقد احد تعرض لهم .. وهناك بعض الاخوات يلبسن خمار وهو استر بكثير من العبايات السوداء الموجودة في السعودية والحمدلله تخرجوا ورجعوا السعوديه بدون اي مضايقات ..

بالنسبة للبروبوزال (المقترح البحثي) .. هذا يختلف عن اللي تقدمينه للدكتوراه ... هذا فقط من صفحه واحدة او بالكثير من صفحتين (لا يتجاوز ذلك) ... هذا فقط يعطي فكره للمشرف انك مهتم .. يعني الغرض منه قبول مشرف فقط ... اذا وافق عليك المشرف ممكن تعدلينه معه ..
يعني مثلا .. انا قدمت البروبوزال (من صفحه ونصف) للمشرف حقي .. عندما وافق علي .. طلبت مني الجامعه مقترح بحثي تغطي ٥ نقاط:
Objectives
Synopsis
Background
Significance
Methodology

اتمني وضحت الفكرة ...

بالنسبه للمقترح البحثي اللي تقدمينه للمشرف ممكن تكتبينه على الطريقه التاليه:

Title of Proposed PhD Thesis Project
تكتبين هنا العنوان المقترح للبحث

Brief Background
نبذه عامه عن الموضوع اللي حتشغتلين عليه .. مثلا عندنا في النبات .. نتكلم عن تصنيف النبات ونشاته و المشكله اللي مؤثره عليه واريد اعالجها في دراستي كالجفاف مثلا

Research Design
تتكلمين عن تصميم التجربه و تختمين هذا الجزء باهم البرامج الاحصائيه اللي بتستخدمينها..

الموضوع ليس معقد كثيرا .. لكن انصحك تبحثين في النت عن نماذج مثل اللي شرحتها


بالتوفيق

الله يحييكم و ماقصرتم و لكن مازال لدي بعض الاسئله اتمنا ان تتسع صدوركم لها
1- لما اقدم البروبوزال اقدمه لدكتور معين بالجامعه ؟
ام اقدمه للجامعه و ممكن احد الدكاتره يوفق عليه
2- بنسبه لورقت القبول هل تصل الي بمجرد موفقتهم ام يجب اكمل البروبوزال اولا بناً على طلب المشرف و بذالك يتم القبول النهائي ؟؟
3- تخصصي كيمياء غير عضويه لو قدمة ابروبوزال بتخصص اخر مثلا تحليلية او فيزيائيه هل توجد اشكاليه بتغيير التخصص ؟؟
4- هل لو تم القبول و قرارت تغير موضوع البروبوزال و تغيير التخصص هل هناك اشكاليه ؟؟
لقد اطلت عليكم بالاسئله فالمعذره و لكن نطمع بكرمكم

حاضرين و في الخدمة باذن الله

١-البروبوزال (صفحة تو صفحتين) للدكتور..لكي يوافق عليك فقط
٢- اذا وافق عليك المشرف حيحدد التوجه النهائي لكم و بالتالي اما حتعدلين على البروبوزال اللي قدمتيه له من قبل من خلال أضافه بعض المعلومات..او حيكون عنده مقترح بحثي جاهز ..حتقدمينه عند البدء في تعبئة الابليكيشن للتقديم على الجامعه
٣-انتي وش ودك تتخصيين؟؟ اتركي تخصص الماستر..يعني من غير المنطقي انك تقدمين طلب قبول كيمياء غير عضوية و تكتبين مقترح عن فيزيائية..
الأصح..حددي توجهك من بدري..في الدكتوراه تبين كيمياء فيزيائية .. خلاص قدمي على انك تبين دكتوراه في الكيمياء الفيزيائية و قدمي مقترح في نفس الموضوع
٤- لا .. أبدا..لكن لازم يكون باتفاق مع المشرف..
لكي تكوني في الصورة..المشرف هو اهم نقطة في مرحلة الدكتوراه ممكن يسهل عليك الدراسة و ممكن يصعبها...لذلك خذي وقتك في اختيار الشخص المناسب

وفقنا الله واياك لكل خير

تحياتي


( تمت المشاركة باستخدام تطبيق مبتعث )

تمام جزاك الله كل خير

سؤال اخير ان شاء الله

1-هل يوجد قبول مشروط باستراليا ام لا
2- ماهي افضل الجامعات هناك و التي يوجد بها معاهد للغه الانجليزيه
3- عند مراسلة الدكاتره للحصول على موافقت احدهم هل أحيطهم علم اني لا اتقن الانجليزيه و يجب ان ادرسها لسنه او اثنين قبل البدء بالبحث ام لا

١- بالتأكيد نعم
٢- كل الجامعات لديها معاهد تابعه لها..لكن الأقوى من وجهة نظري هي تكون على حسب التخصص و ليس الجامعه
على سبيل المثال..جامعة غرب استراليا ترتيبها الخامس على استراليا..لكن قسم الزراعة الاول على استراليا
عموما أرشح لك هذه الجامعات سيدني للتكنولوجيا .. ماكواري.. نيو ساوث ويلز .. سيدني و جامعة كوينزلاند و جامعات ملبورن RMIT..موناش

بالنسبة لجامعة غرب استراليا اصبح معهدهم سيء جداً مؤخراً مستقعد للسعوديين (لا أنصحك به بسبب المعهد فقط..لكن قسم الكيمياء يعتبر من اسهل الأقسام في الجامعه)

٣- ايه نعم.. وهم عارفين هذا الشيء .. علميه انك بتدريسين سنة للغة قبل البدء في الدكتوراه..هذا طبيعي جداً

بالتوفيق


( تمت المشاركة باستخدام تطبيق مبتعث )