حصلت قبول في امريكا واستراليا,,, والحيرة زااادت

السلام عليكم

أتمنى ما أكون ازعجتكم بهالسؤال,, لكن الحيره زااادت عندي ؟؟

انا سبق وعشت في أمريكا اربع سنوات
وحاليا حصلت قبول دكتوراه في جامعة RMIT ميلبورن في استراليا وفي جامعة كولورادو دنفر في أمريكا

والمشكلة اني ما اعرف أي شخص اشاوره عاش في استراليا
انا معي زوجتي واطفالي ,, ومتخوف اني اختار استراليا لجهلي بها (ومثل ما تعرفون الدكتوراه عمر طويل هناك مو سنه او سنتين ) فضروري افكر فيها من نواحي كثيره.
لكن اللي اعجبني في استراليا هو ارتفاع المكافأة وان الدكتوراه فقط بحث!
وما اعجبني في أمريكا هو اني جربتها وحبيتها ولكن اللي خوفني هو تعقيد برامج الدكتوراه هناك من كورسات واختبارات شاملة وغيرها

أي نصائح او معلومات منكم عن أي اختار
محتاج مشورتكم ,, الله يعافيكم

وعليكم السلام ورحمة الله وبركاته

أخي الكريم موضوعك مصيري وصعب أن أحد يحدد لك الوجهة فاامريكا لها ايجابيات وسلبيات وأستراليا بالمثل والافضل تحدد اولوياتك وتستخير وتشاور من تثق برأيه حتى تصبح على بينة وتقرر وانت واضحة الرؤية لديك لكن عموما بما انني عشت في أستراليا 6 سنوات ( بكالوريس وماستر ) صراحة لم اندم على قراري قط فالحياة هنا كانت مريحة وعيشة ملوك بكل ماتعنيه الكلمة من معنى من نواحي مختلفة مثل:

مستوى الجامعات ( 8 جامعات من ضمن أفضل 100 جامعة في العالم وكذلك كثير من الجامعات الأسترالية ضمن أفضل 500 جامعة حول العالم)

المكافآت (متزوج يستلم 5700 دولار استرالي، متزوج مع طفل 6100 دولار) يعني تدفع المصاريف وتدلع عمرك وتدخر المتبقي

الملحقية (متعاونين مع الطلاب من الملحق الى اصغر موظف وماواجهنا المشاكل اللي نسمع فيها بالملحقيات الاخرى)

تنوع الطبيعة والجو والناس (الاسترال او الاوزيز مو فرندلي زي الامريكان لكن كلن في حاله ومحد يضايقك وماتواجه مشاكل عنصرية إلا ماندر)

الفيزا (تجديدها سهل جدا ومافيه عقد يرفضون تجديد فيزتك لاي سبب وانت تدرس) وكذلك لايوجد تقلبات سياسية قد تحصل بأي وقت وتضر مسيرة الطالب الدراسية

المساجد، الملاحم و المطاعم الحلال، المدارس الاسلامية للابناء متوفرة ولله الحمد.

اللي يعيب البلد فقط البعد وماتقدر ترجع للسعودية بأي وقت تبي لإرتفاع اسعار تذاكر الطيران من أستراليا للسعودية.

شئ مهم احرص على الجامعة القوية أكثر من البلد نفسه بأن تكون الجامعة التي ستدرس بها إن شاء الله في أمريكا أو أستراليا من الجامعات العريقة وذات شهرة عالية وتصنيفها عالي فراح تضيف لك الكثير خصوصا انك طالب دكتوراه.

يبقى عليك تستشير وتستخير والله يكتب لك مافيه الخير لك.

موفق.