هنا توضع أي معلومات عن معادلة الساعات في الجامعات الاسترالية .

مرحبا
هذي الاسئله تهمني بعد
عندي دبلوم تمريض وسمعت ان جامعة ساوثرن كوينزلند
تعادل لي ساعات الدبلوم وتكون الدراسه تقريبا سنتين
سنه انجليزية وسنه تخصص

فعلاًُ الموضوع هذا مهم انا بالنسبة لي معي دبلوم حاسب برمجة وسمعت ان جامعة QUT تعادل الساعات وتدرس فيها ثلاث سنوات سنه انجليزي وسنتين تخصص .... لكني غير متأكد من هالكلام ياليت اللي عنده خلفيه عن هذي الجامعة يفيدنا .

اهلا اخواني سراب و رياض المشرافي وشكراً على تشريفكم الموضوع .

فعلاً هي معلومات نحن نحتاجها انا عن نفسي معي دبلوم من كلية التقنية سنتين ونصف وبصراحة ععندما بحثت قليلاً عن المعادلة اصبت بإحباط لان اللي سمعت ان معظم الجامعات الاسترالية ما يعادلون ولا ساعة بس خبرك اخوي رياض بعث الامل فيني خصوصاً ان عيني على جامعة كوينزلاند للتقنية وناوي اقدم عليها . ياليت اللي عنده معلومة اكيده عن هالجامعة يفيدنا .
وشكراً لكم مرة اخرى .

فعلاً موضوعك اكثر من رائع ولك الشكر عليه
اخي العزيز

درست سنتين ونصف تخصص محاسبة جامعة الملك سعود
الدراسة على حسابي الخاص
إذا كنت تعرف جامعة تعادل اكبر عدد من الساعات ياليت تخدمني
هل يلزم الذهاب لأستراليا لكي يعادولن الساعات التي درستها
لأني سمعت ان الجامعة فقط تعطيك قبول عن طريق المراسلة لاكن معادلة الساعات
يلزم حضورك

ليس شرط بأن ادرس في استراليا انا اهم شيء عندي ان تكون الدراسة بالأنجليزي فقط اي لا ادرس اللغة المحلية وتكون الجامعة معترف بها وتعادل اكبر عدد من الساعات لأنك مثل ما تعرف الدراسة على حسابي الخاص وتفرق عندي بشكل كبير


انتظر الرد للأهمية

السلام عليكم ورحمة الله وبركاته
هع هع هع هع هع اخواني اخواني اخواني اخواتي <== متحييز للشباب :123:

كيف حالكم ان شاء الله تكونوا جميعا بخير ومتفائلين دائما يارب :120: :119:

اولا وقبل كل شي انا حابب اشكر الاخ السائر على طرحه لهذه الفكره مع اني قاعد اتصرمح في المنتدى ولا جاء في بالي حتى اني اسوي هالموضوع :109: <== عقلي يبيله تفجير ههههههههههه

على العموم اشرحلكم شوي عن وضعي وراح ابينلكم كم نقطه عرفتها
اولا اخوكم بحور الشوق خريج من كلية المجتمع بجده دبلوم شبكات حاسب الي بـ64 ساعه معتمده في ثلاث سنوات<== لان الكلية فيها سنه تحضيريه الا هي اصلا المفروض سنتين :95:

على العموم انا اكثر واحد يحس بالسنين وهي تمر لاني قعدت ادرس بعد الثانويه 3 سنوات والحين راح ادرس لغه سنه بعد وراح ادرس تخصص سنتين ونص او ثلاث على العموم خلوها على ربكم <== وشفيه الادمي شوي ويبكي :008:

انا ياشباب قدمت على جامعتين فيها تخصص حاسب الي IT الي هي نيوكاسل ولاتروب<== ليش هالجامعتين بالذات

اقولكم ليش اولا يوم اني كنت ناوي اروح للمقابله قلت لازم يكون عندي قبول ورحت قدمت على هالجامعتين بعد استشارة الشباب في مكتب الـidp بجده وطبعا بعد خمسه اسابيع وقبل موعد المقابله باربعه ايام جاني القبول من جامعة نيوكاسل وطبعا لدراسه اللغة مدة سنه ثم التخصص 3 سنوات برمجه

انا على قد ماني فرحان ان جاني قبول عشان يدعمني في المقابله الشخصيه على قد ماني متحطم انهم ماحسبولي ولا ساعه من دبلومي لا وبعد دراستهم طلعة برمجه ومو تخصصي الي هو شبكات :19:

حمدت ربي وتوكلت عليه ورحت الرياض وسويت المقابله واذكر واحد من الاسئله انه الحين لو انهم ماعادلولك الساعات مثل ماصار لك راح تدرس من جديد كأنك متخرج من الثانوي

طبعا قلتلهم نعم ليش لأن دراستهم للبكالوريوس ثلاث سنوات واللغه سنه يعني كذا كذا كأني دارس جامعه وثاني شي انا مجبر وماني مخيير لأن عندي طموح اني اوصل للدكتوراه واذا رفضت هالفرصه يمكن مايجيني غيرها وانا الي اتحمل نتيجة هالسنوات الي تضيع من عمري بسبب تكاسلي في المرحله الثانويه

المهم رجعت من المقابله الشخصيه وراجعت مكتب الـidp وماحصلت القبول وصل من جامعة لاتروب مع انهم قالولي القبول ياخذ من 4 الى 6 اسابيع بالكثيييييييييييييييير

قلت اجل خلها لين ماتطلع الاسماء النهائيه وامر عليكم واشوف موضوع القبول فلاتروب
مرت الايام وراجعت المكتب بعد شهر تقريبا <== يعني شهرين واسبوع تقريبا من بداية التقديم :107:

الحمد لله لقيت القبول من جامعة لاتروب بعد والي فرحني اكثر لقيتهم حاسبين لي 60 نقطه من مجموع النقاط للدراسه :009: <== اعتقد انهم مايحسبونها بالساعات يحسبونها بالنقاط

المهم يعني تقلصت مدة دراستي من اربع سنوات مع اللغه لـثلاث سنوات تحمست وكنت ناوي اقدم على جامعة ولنجونج قلت يمكن يعادلون لي ساعات اكثر بس <== جاء خبر حطم امالي وخلاني استنى لين موعد صدور الاسماء

الخبر كالتالي ( اي شخص عنده قبول من اي جامعة يبله ويشرب مويته عشان ماراح ينقبل لأننا احنا جبنالك قبول في الجامعه الي احنا مختارينها لك عجبك عجبك ماعجبك محد جابرك عالبعثه التوقيع/مركز القبول بالوزاره ) <== نفسي ااااا:117: واجيب اجلهم جميعا

الخبر هذا خلاني افكر لو اني مقدم الحين على ولنجونج كان دافع فلوس على الفاضي وماراح يقبلونه وثاني شي يمكن يقدمون لي على نفس الجامعه ويكنسلون الجامعة طلبي بما اني مقدم مرتين فقلت ياولد انت خل القبول يجيك واذا قالو القبول من عندهم وبشوف وش الجامعه الي قدمولي عليها وكم عدد الساعات الي عادلوها يمكن اكثر من لاتروب :118:

هذي كانت تجربتي الشخصيه اما بالنسبه للمعلومات الي عندي من واقع تجربتي وبحث وتحري سويته انا بنفسي جزاني الله خير <== لحوووووووول الحمد لله على نعمة العقل ياشيخ ههههههه

اولا:
يجب ان يكون نفس التخصص وبالاخص التخصص الدقيق ليتم احتساب معادله لك في الجامعه المتقدم لها <=== فسر يامفسر :32:

شوفوا يعني مثلا انا تخصصي العام IT وتخصصي الدقيق شبكات وطبعا الشبكات وحده من تخصصات الـ IT لأن فيه كمان البرمجه والـ database وغيرها من التخصصات الي تحت الحاسب الالي عموما ويوم اني قدمت على نيوكاسل طبعا ماكان عندهم الا مجال واحد تحت الـ IT حقهم والي هو البرمجه وبما ان تخصصي شبكات فحاولو انهم يعادلون ساعات ولكن المواد الي درستها مافيها اي شي من البرمجه ماعدا ماده وحده مقدمه في البرمجه وهي طبعا 3 ساعات وماراح تقدم ولا تأخر لذلك هم قبلوني ولكن لازم ادرس عندهم دراسه كامله <==:006:

لكن جامعة لاتروب تحت الـIT حقهم فيه Infotmation system و information technology و Networking <== (وهذا تخصصي الي قدمت فيه عندهم وعادلولي فيه الساعات) وفيه كمان كذا تخصص دقيق ماني فاكرها ولا تهمي اعتقد انها برمجه وتصميم مواقع وغيرها

المهم انكم فهمتوا فكرة المعادله وكيف تصير يعني لازم كل واحد فيكم يدور على تخصصه بالجامعات واذا لقيه يروح يدور على تخصصه الدقيق ويشوف المواد حق ذاك التخصص اذا هي متقاربه من المواد الي درسها ومو بالضروره تكون كلها متشابهه يعني كذا مادره واذا صار يروح يقدم فهالجامعه


ثانيا:
اذا صار الشخص هناك يقدر يدبر اموره ويزبط وضعه تمام التمام <== وهذا الشي الي تأكدت منه 100 في الميه

كييييييييييف اقولكم كيف
انت لو معك مثلا قبول من اي جامعه من الجامعات سواء عن طريقك او عن طريق الوزاره سواء عاجبتك او ماهي عاجبتك سواء عادلولك او ماعادلولك اول شي لازم تدرس لغه صح ولا لا

طيب الموضوع يا اخوان انه يوم انك تدرس لغه تقدر بما انك في استراليا انك تلف على الجامعات الي فيها تخصصك جامعه جامعه وتقدر كمان تسأل وتستفسر عنهم وعن معادلت ساعاتك والجامعه الي تشوفها مناسبه تقدر تقدم فيها واذا قبلتك تقدر تحول بعثتك عليها وعندك طبعا فترة دراستك للغه عشان تسوي فيها الكلام هذا <== يعني تطمنو على الاخر محد راح يقولك يالله الحين تروح تداوم بالجامعه الفلانيه او الجامعه العلانيه :001:
اذا ارسلوك الوزاره على اي جامعه ان شاء الله لو على الحدود اكيد اول شي راح تدرس الانجليزي وفخلال هالمده انت تقدر تدور الجامعه الي تعجبك وتقدم فيها وتدرس فيها بعد ماتكمل اللغه



اتمنى اني اكون افدتكم بتجربتي ومعلوماتي البسيطه وكل الي ابيه منكم الدعاء <== ما اعتقد اني مكلف عليكم بهالطلب انشاء الله

والي عنده اي سؤال او استفسار فأنا حاضر ومستعد اخدمكم بالي اعرفه واقدر عليه انشاء الله:101:: ::87: :108:: :32:

اخوكم
بحور الشوق

الله يعطيك العافية اخوي بحور الشوق على المعلومات المهمة اللي ذكرتها وفعلاً جامعة لاتروب من الجامعات اللي تعادل الساعات ( تصدقون اني حبيت هالجامعة شكلها سلسة وعندها مرونه <<<ترا متعوب عليها ذي )
طيب انا ماجبت قبول الى الان ايش رايكم انتظر مركز القبول حق الوزارة ولا اجيبه انا ازين .

مع الشكر لكل من شارك في الموضوع وتأكدوا ان الموضوع هذا لن نجد الفائدة منه الا اذا تبادلنا المعلومات مع بعض عن طريقه .<<< فهمتوا شي ؟؟

مع السلامة

اخواني اعرف ان ردي يمكن يكون متأخر شوووي ولكن عسى ان يكون نافع

بالنسبه لمعادلة شهادات الدبلوم او الساعات السابقه فهذا موجود في استراليا وفي اكثر من جامعه
فانا خريج الكليه التقنيه النظام القديم 90 ساعه وعادلوا لي جامعة بالارات اغلب الساعات واصبح متبقي لي فقط سنه ونص غير اللغه
وفيه على حد علمي اكثر من جامعه تعادل ويمكن مكتب IDP يقدر يفيدكم بهالشي واللي عنده اي سؤال لايتردد ويرسل لي على الايميل واللي اقدر عليه ابشرواا

Mr.Melbourn


الله يعطيكك الف عافية على الرد الكامل والموضح

لاكن انا من الطلاب الذين يدرسون في جامعة لاتروب وكنت قد واجهت رئيس القسم الهندسي في نفس تخصصي

لمعرفة كم ممكن من النقاط ان يتم معادلتها

لاكن اصابني بالاحباط عندما اجاب

انه يمكن وليس اكيد معادلة الرياضيات والفيزياء فقط

اما باقي مواد التخصص فلا يمكن معادلتها مع ان معظمها تدرس في نفس التخصص هنا

ولكن لادري مالسبب