طلاب مدينة Armidale نرجوا الدخول

هلا ابو يعقوب
سجل عندك
المدينه صغيره وحلوه
ولا فيه شي اسمه قريب وبعيد فيها
بالنسبه للتاون فيه سكن سميث هاوس
لازق في التاون وقريب للاسواق على رجولك تمشى
وفيه باصات تودي للجامعه وسعرهم دولارين
طبعا الجامعه مو قريبه للتاون طبعا كلمه مو قريبه اقصد ما تمشي على رجولك لها
طبعا اذا حاب تسكن في سميت هاوس
---
ونجي لنقطه ثانيه
فيه اكثر من اسكان جامعي فيها
الاول هو الماري وايت وهو لازق فيها تقدر تروح لمحاضراتك على رجولك قريب مرره
وفيه سكن الرايت فلج وهو مشوار على المشي طبعا في نطاق حرم الجامعه
والراب فلج نفس الشي في حرم الجامعه بس مو مثل الماري وايت
---
وبالنسبه للشقه والسكن كاجار بصراحه فيه ندره الايام وكثر من الشباب يدور
بس لا جيت انت وحظك تحصل عند المكاتب
--
واي سؤال امر

الله يجزاك خير اخوي سطان ماقصرت

ابشرك انا في السمث هاوس وماني مرتاح فيه كثير لكن بنجرب الاسبوع هذا ((عساك فيه ساكن؟))

انا افضل بيت لذلك جالس ادور والشباب ماقصروا البحث جاري


ويعطيك العافية

والله سميث هاوس يفك ازمه
مادري انت عزوبي او عوائل؟
لان والله الحين فيه ندره بالشقق والبيوت

الاخ ابو سطام كل عام وانت بخير
انا جاي ارميدال في سبتمبر مع عائلتي مكونة من 4 اشخاص بما فيهم انا
كيف المدينة , جوها في سبتمبر , الدراسة في معهد اللغة , عندي طبعا اختبار لغة في 22 سبتمبر هل اروح المعهد من الصباح اي وقت اقصد
دراسة الابناء هل اترجم شهاداتهم واصدقها من الخارجية
اقدر اسجل زوجتي في الجامعة عن طريق الملحقية على حساب الدولة ماستر
تقول السكن شحيح وش الدبرة وش تقترح اسكن فيه الى ان اجد السكن المناسب اسكن في فندق مثلا وهل احجز من الان عن طريق النت
السيارات كيف اسعارها غالية موديلاتها بصراحة ابغى سيارة جيدة جدا تخدمني مدة الدراسة بدون تعب وورش واروح فيها لسيدني
هل نجيب معنا ملابس شتوية
الاجازات كيف في مرحلة اللغة يعني متى اقدر ارجع اجازة للسعودية
شكرا وكل عام وانت بخير

هلا فيك اخوي ابو فيصل
اول شي تجي بالسلامه وانا اخوك
وحياك في ارميديل
بالنسبه للمدينه وجوها في سبتمبر راح تجي في احلى وقت للجو
لان الحين في الشتاء وله يومين الجو تمام
وان شاء الله في سبتمبر بيكون احلى هذي نقطه الجو
بالنسبه للمدينه
ما عليها كلام المدينه خااااااااااصه خااااصه خاااصه للعوائل
وماشاء الله جميع العوائل السعوديه مرتاحين لابعد درجه
وحتى اهل ارميديل متقبلين الطلاب السعودين والعوائل السعوديه بصدر رحب
والمدينه صغيره بصراحه يعني للعزوبي بيطفش تقريبا لكن الي معه عائله بيرتاح
وماشاء الله الشباب السعودين مو مقصرين والنادي السعودي بعد مو مقصر
تجمعات طيبه ماحد يحس بالطفش او بالضيقه

نجي الحين لسالفة المعهد وما ادراك ما المعهد
عن نفسي وهو وجهة نظر خاصه فيني ما يصلح بصراحه
لان شغلهم اكاديمي ومتعب خاصه للي بيكون اول خطوات دراسة اللعه
لكن الي بيكون مجتهد ويتحمل التعب راح يرتاح فيه
وانت تقول اختباري 22 ديسمبر مادري بخصوص الاختبار انت تقصد تحديد المستوى ؟
طبعا اذا اختبار وتحديد مستوى كبر وسادتك لو ما تجيهم الا عشر الصباح مو مشكله

بالنسبه للابناء الي اعرفه ان ما يحصلون على فيزا الا بيكون عندهم قبول مبدئي من اي مدرسه
وعلى ضوء القبول عادي يدخلون المدرسه
ونقطه الابناء بتاكد لك منها ان شا ءالله ورد لك خبر

ونقطه زوجتك بالاول هل معاها لغه يعني جايبه درجه الايلس 6 او لا ؟
طبعا اذا ما معاها لغه تدرس بالمعهد عادي والملحقيه ما تقصر على طول يرسلون ضمان مالي وتدرس عادي
يحددون مستواها وتبدا من المستوى الي هم يحددونه لها والملحقيه تدفع عادي
ولما تخلص اللغه زوجتك عادي تقدرتدرس ماجستير بس بشرط ان فترة الماجستير ما تكون اكثر من سنوات دراسة المبتعث الاصلي لانه تعتبر مر افقه
يعني لو عندك ماجستير سنه ونص وهي بتدرس ماجستير سنه عادي تدرس ويدفعون لها الملحقيه بكل سهوله وبالكثير يومين الى ثلاث ايام مرسلين الملحقيه الضمان المالي
طبعا الدراسه بعد اللغه اذا ما معاها لغه

ونجي لمربط الفرس هو السكن
والله وانا اخوك بصراحه السكن شحيح
وخاصه الي معاها اطفال فيه نوع من الصعوبه انه يحصل
لان نادر او قليل تحصل احد ياجر احد عنده اطفال
بس ان شاء الله يصادف وقت جيتك احد من الشباب بيطلع للسعوديه او يروح لمدينه ثانيه تقدر تسكن في بيته كم شهر الين يرجع وتضبط امورك بعدها
واول جيتك مالك الا موتيل
لان هنا نظام الموتيلات اكثر شي
وبتحصل بدون ما تحجز عن طريق النت

نجي لموضوع السياره يا طويل العمر حسب المعروض
والسيارات كل واحد وحظه والسياره النظيفه بمعنى كلمه نظيفه بحدود 5 الى 6 الاف
طبعا فيه ارخص كثير وتحصل نظيف بتحصل في 3000 وب 2500 دولار يعني مو واحد
وعلى نوعية الي تبي
وسالفه تروح سيدني وتجي والله اخوي روحة سدني ما تروح الا بالسنه يمكن مرتين
لان الدراسه وقتها طويل وتاخذ الوقت

وموضوع الملابس الشتويه لا تجيب لان الشتاء حده نصف سبتمبر

بس جب قهوه وهيل مطوحنين اهم شي وعليهم تاريخ واكتب اسمهم بالانجليزي وترامس الشاي والقهوه لا تنساهم
ههههههههه
موجودين هنا بس سعرهم لك عليه

والاجازه ياطويل العمر كل مستوى 10 اسابيع وبعده اسبوع اجازه
بس جيتك بتصادف عشر اسابيع ثم اجازه شهرين
والعوده على فبراير

واتمنى اجابتي وضحت لك ولا بغيت شي لا يردك الا كيبوردك

مشكور اخوي سطام على هالمعلومات
ولكن هل ممكن ان تفيدنا عن احسن موتيل للسكن للي معاه عائلة لحد الواحد مايحصل له سكن كويس وكم تقريبا سعره في الليلة
وبالنسبة لسكن سميث هل هو جيد وهل هو نظام غرف او شقق واسعاره كم تقريبا
وكيف بالنسبة للأكل والمطاعم خاصة الاكل الحلال وكذلك فيه احد يبيع خرفان ( اخوك يحب اللحم )
وهل في حالة اجتياز ال 40 اسبوع في معهد اللغة بنجاح يتم الدخول الى البرنامج الدراسي في الجامعة حتى لو كان البرنامج دكتوراه
شاكر لك تعاونك اخي العزيز
مع تمنياتي لك بالتوفيق