باوند...

الباوند عباره عن تامين يستقطع منه حق الاضرار الناتجه عن استعمالك للبيت
مثلا ان كان البيت مفروش ممكن انك تنظف البيت عن طريق اي شركة تنظيف وياكثرهم على موقع القم تري
او كسر باب او شباك او تلف صبغ الحائط يعني ملزوم بانك تدل كل ضرر سببته فالبيت
هذي من ناحية الاضرار وعلى فكره مهما كان الضرر ان كان صبغ او غسيل او ادوات صحيه او باب شباك غيره ترا اسعارها جدا رخيصه ومب غاليه البدا

في فقره هني لابد ننتبه لها اذا كان عقد ايجارك لمدة سنه لابد اتمام السنه في البيت او بحالة عدم تكمله العقد يشترط عليك بانك تبلغ المكتب قبل خروجك ب28 يوم وان لم تبلغ المكتب تتم مصادرة الباوند
كبدل للايجار عن ال28 يوم وهذي من شروطهم المعترف عليها

اما من غير هذا ماله اي حق انه ياخذ منك البوند وحصل معاي من قبل اشتكيت عليهم فالمحكمه وخلال 3 ايام قيموا الاضرار واستقطعت المحمكه 350 دولار وردوا ا الباقي غصب عن المكتب

اتمنى اني افدتك اخي الكريم

لله الحمد .. أنا لسه مسترجع البوند كامل الأسبوع الماضي، وعادة المكاتب تتحايل عشان تاخذ البوند .. ولكن لا تعطيهم مجال ابداً ..
بالنسبة لحكايتي مع البوند .. كنت دائماً ارسل ايميلات مع الصور لمكتب العقار ..لو لاحظت أي شي تلف أو قرب يتلف مع الاستخدام .. واحتفظ فيها بملف خاص على ايميلي
وعند تنظيف البيت .. طلبت من الايجنت أن يرسلي رقم شركة تنظيف يتعاموا معاها ويثقوا فيها ..
وعند تعبئة طلب استرداد البوند .. قام المكتب وحاول التحايل من خلال الطرق التالية:
1- طلبوا مني اوقع على الفورم .. قبل ما يحددوا المبلغ النهائي .. فرفضت ..
2- قاموا تحججوا بأن مقبض احد الأبواب شبه مخلوع .. فقلت لهم عندك ايميل بطلب الصيانة من ستة اشهر .. لأنه بدأ يتأثر مع الاستخدام ومالقيت أي تجاوب ..
3- في الآخير قالوا خلاص نخصم مبلغ 310 دولار عشان التنظيف .. لأنه النظافة الحالية مهي مرضية .. فقلت لهم عندي ايميل منكم موصيني على استخدام هذي الشركة .. فلو سمحتوا اتصلوا عليهم ثاني وخليهم يرجعوا ينظفوا ..
بعد ما طفشوا .. قالوا خلاص .. وقع على استرداد البوند كامل 100%
المكتب ذا اسمه MICM وهو احد اشهر المكاتب بالسيتي .. والظاهر كلهم يتعاملوا بنفس الطريقة .. عشان ياخذوا أي مبلغ من المستأجر ..
وبالتوفيق ..

الحقيقة لا املك ان اقول الا الله يكثر من أمثالك أخي Chairman وانت وامثالك هم من يرفعون الراس ومن اهم التجارب اللي يتعلمها المبتعث في الغربة انه يعرف حقوقه القانونية ويقرأ قبل لايوقع وإذا وقع طالب بالصور او الأصل حتى يصير على بينة في كل شئ يصير حوله ويوثق كل شئ ويعرف انه القوم مايتفاهمون الا بلغة الوثائق والمستندات والصور حتى تاخذ حقك والمشكلة انه بعض من الناس هنا هداهم الله يستحي يطالب بحقه لأنه يتعامل مع من حوله بثقة مفرطة وبجهل في حقوقه في بعض الأحيان وهم طبعا لايمكن تثق فيهم كلهم ولذلك يجب ان يسأل الانسان عن كل شئ لأنه لايمكن ان تتعذر فيما بعد انك جاهل بالقوانين والانظمة دام انك رضيت وكذلك يطالب بحقوقه ولا يخجل فالناس هنا وفي كل مكان تحترم الانسان اللي يعرف ماله وماعليه.

اسأل الله ان يوفقك في دراسنك وان يردك لأهلك سالما غانما.

وعليكم السلام ورحمة الله وبركاته

أختي ياقوته بالنسبة للبوند فبعض المكاتب تدور الزلة على الساكن حتى تنقص من قيمة البوند وبعضهم فعلا يجد اضرار غير موثقة في Condition Report ويطالبك بااصلاحها او خصم قيمة الاصلاح من البوند وحاولي تبحثي عن الأشياء اللي دونتيها وموجودة Condition Report قبل لاتسكنين في الشقة او البيت حتى تصبحي على بينة فيما لو حاولوا استغافلك وطالبوا بااصلاحها وطبعا تردين عليهم بأنه الشئ هذا موجود قبل لا انتقل للسكن عندكم.

الشئ الثاني اذا كان هناك اضرار حصلت من بعد ماسكنتي ولم تذكريها في العقد فعندك حلين اما اخفائها اذا كان يمكنك ذلك او اصلاحها من نفسك حتى لا تخصم منك فيما بعد.

الشئ الثالث لا توقعي على اية اوراق ومنها البوند كليرنس حتى تتفقون على المبلغ هل هو راح يرجع لك كامل او هناك خصميات ويكون المبلغ محدد مثلا يقولون لك راح نخصم 100 دولار فيصبح البوند 2300 دولار بدلا من 2400 دولار وطبعا تكون المراسلات عن طريق الايميل حتى يكون معك حجة فيما بعد لو غيروا كلامهم او تكون المكالمة الهاتفية مسجلة وابعدي كل البعد عن الحضور الشخصي للمكتب لأنه المخاطبة الشفهية لا يمكن الاعتماد عليها ولا يمكن اثباتها.

الشئ الرابع عندك طلبهم منك توقيع الفورم تبع مكتب البوند احرصي انك تذكرين المبلغ في الخانة المخصصة للساكن مثلا اتفقتوا على 2300 دولار اكتبي 2300 دولار ولا تتركينها فاضية وكذلك صوري الفورم وخلي عندك كوبي قبل ارسالها بالبريد او سويلها سكان وارسليها بالايميل لمدير/ة السكن.

الشئ الخامس احرصي على انك تدخلين على موقع RTBA وهي الجهة الحكومية اللي ترجعلك البوند لحسابك وتشيكين على الطلب وتتاكدين انه مكتب العقار مدخل الطلب بشكل صحيح والمبلغ المسترجع يكون كما اتفقتوا عليه وايضا مكاتب العقار وحصلت لي في بعض الاحيان يستلكعون ويتعمدون مايدخلون الطلب بموقع RTBA ويقولون لك الموقع مايشتغل او الموقع عليه زحمة او ارسلناه بالبريد وننتظر يدخلونه بالموقع او خلال اليومين الجايات وكل هالأعذار مختلقة منهم ويحاولون يلهون ويطفشون الواحد عن المطالبة بحقه واذا صار لك مثل هالمواقف اتصلي على RTBA وتأكدي من صحة كلامهم إذا مالقيتي طلب استرجاع البوند نازل في السستم وبعدها شبي على مكتب العقار الين مايسلمون الطلب للموقع وكل الشغلة ماتاخذ عليهم اكثر من 5 دقائق.

اذا اتبعتي هالخطوات بإذن الله وهي مجربة شخصيا راح تقل نسب الإحتيال عليك من قبل مكتب العقار وتخلي امورك القانونية ان شاء الله في السليم وحقوقك محفوظة.

دعواتك وبالتوفيق.

الله يعطيكم العافية يا إخوان نبهتونا على أمر مهم . المشكلة بعض الناس شرواي ما نعرف في التفاصيل هذي

جزاكم الله خيرا