عاجل جدا لكل عسكري يرافق مبتعثة او مسئول يستطيع المساعدة

حياك الله .......وبالتوفيق

اشكرك اخوي على الرد
وجزاك الله خير الجزاء
لكن سمعت ان القطاعات تختلف وانه ممنوع لقوات الامن الخاصة
هل الأشخاص الذي اصدر قراره والذين يتابعون معاملاتهم تابعين لهذا القطاع؟!
واذا كانوا كذلك ماهي الاجراءات التي اتخذوها؟
وهل التعميم خاص بقوات الأمن الخاصة؟

أفيدوني جزاكم الله خيرا

مساء الخير
اولا اختي كل قطاع لو نظام في قطاعات يوافقون وفي قطاعات لا . بس وزارة الداخلية اعتقد يرفضون ,

انا مثلا عسكري ومرافق لزوجتي طبعا انا في الحرس الوطني وعندنا نص يقول انو ارافق زوجتي او اختي بس بدون مزايا ماليه (بدون راتب)

اسأل الله انو يكتب لكم اللي فيه الخير

وبالنسبه لموضوع ابتعاثك انصحك تسافرين مع احد اخوانك ( زوجة صاحبي مسافرة مع اخوها لأن عمله ما وافقوا ) الين تضبط امور زوجك

اتمنة اني افدتك

النظام بقطاع الداخلية ممنوع مرافقة الفرد لزوجتة .
ورتبة زوجك طيبة وإذا فصل ماريح يلقاها الناس تدور على جندي .
استخيري""""
والبعثة والعيش خارج المملكة صعبة وترجعين بخف حنين.
ادرسي بالسعودية افضل من الغربة والتعب وما تدرين تكملين او ترجيعن بسبب ظروفك

السلام عليكم ورحمه الله وبركاته

اذا تبغين الكلام الواضح والصريح ومن غير لا لف ولا دوران

نظاماً وحتى اللحظه زوجك مستحيل مستحيل مستحيل ياخذ إجازة مرافقه لكامل فترة إبتعاثك نهائيا لاحظي انا اقول نظاماً

لكن اذا عنده واسطه فيه بصيص أمل

ديرة ما يمشي فيها الا الي عنده واسطه

انا حاولت قبل لا نسافر بستة شهور وما قدرت وأشاروا إلى نفس التعميم الي ذكرتيه مع العلم اني تبع الأمن العام وبرتبة عريف لكن النظام الي يمشي على الأمن العام يمشي على قوات الأمن الخاصه لأنها تندرج تحت وزارة الداخليه

بعد المحاوله اخذت اجازه إعتياديه شهرين شهر مستحق وشهر رصيد ومددتها 4 شهور استثنائية بدون راتب يعني التوتل 6 شهور

وبعد نهايتها جلست في بلد الإبتعاث وضبطت نفسي شهرين قلت يمكن الله يفرجها وشاء الله انها ما تنفرج رجعت السعوديه ورميت في وجييهم الإستقاله وحبيت راس الوالد والوالده وعينت من الله خير معهم شهر كامل وعدلت مهنتي ورجعت انا وعيالي والآن باقيلي 3 اسابيع على المستوى الأخير في دراسة اللغة وبدخل الجامعه مع بداية الترم الجاي

قدامك ثلاث حلول ولا تصدقين اي كلام غيرها

يا واسطه عن طريقها يقدر يطلع إلحاق

يا يستنفذ رصيده من الإجازات الإعتياديه ويشبكها بالإستثنائية وتطلعون بلد الإبتعاث واذا قربت تخلص ترجعون للسعوديه

يا وانتم في بلد الإبتعاث يقدم إستقالته ويصدق المعروض من سفارة المملكه في بلد الإبتعاث او وكاله صادره من السفاره لأحد أقاربه او اصدقاءه وتكملون في بلد البعثه

للأسف يا أختي خدمتنا وتضحياتنا للوطن تقابل بلا مبالاه وتهميش وتجاهل للأوامر الساميه التي تنص على وجوب تواجد محرم يرافق من أختارها خادم الحرمين الشريفين لتكمل دراستها في الخارج

فيه نظام الإستيداع لكنه خاص بالضباط حفظهم الله ورعاهم بحكم انهم هم من يسنون الأنظمة الخاصه بالأفراد

أسأل الله لنا ولك ولجميع المسلمين التوفيق

ألف شكر لجميع الأخوان الذين قاموا بالرد والذين استفدت من ارائهم وتجاربهم
واعجز عن شكرهم
فجزاهم الله خير الجزاء في الدنيا والأخرة
ورفع قدرهم وأثابهم
أسأل الله ان ييسر أمورهم وأن يوفقهم لما فيه الخير
وشكرا