المدراس السعودية في اوكلاند

اخوي الامور سهله باذن الله
بالنسبه لاولاد السعوديين في نيوزلندا يدرسون المنهج السعودي منازل
بالاضافه لدراستهم في المدارس النيوزيلنديه
وطبعا تصرف لاولادك رسوم الدراسه وهذا الامر انا متاكده منه
الدراسه النيوزلنديه للاولاد حتبدا في 2 فبراير
والمنهج السعودي بيذاكرو في البيت
واخر الترم يجي مدرس سعودي من كراتشي يختبرهم
فلا تشيل هم
بس لازم تجيبو الكتب معاكم
لاتنسوا
والله الموفق

مدرسة زايد للبنات فقط من أول متوسط وحتى ثالث ثانوي
مدرسة المدينة اولاد من أول إبتدائي إلى الثانوي والبنات من أول ابتدائي لنهاية المتوسط
طبعا يأخذون عليك رسوم 10الاف دولار في السنة للطالب الواحد

اخي لايوجد مدارس سعوديه في جميع مدن نيوزلندا والتفاصيل كما قالت الاخت وسن

يدرسو منازل يعني تعليم ذاتي او تجيب لهم مدرس عربي ، ويختبرون بنهاية العام والملحقيه تبلغنا قبل موعد الاختبارات بمده كافيه وتنزل الجداول وفيه تعاون من المدرسين مع الطلاب كونهم بدون مدارس لا تشيل هم.

نظام التعليم في مدارس نيوزلندا كل طفل يبدأ مع المرحلة المناسبه لعمره بغض النظر عن لغته والسن القانوني للدراسه لديهم ٥ سنوات لاول ابتدائي وعليه احسب في اي مرحله حيحطون اولادك.

الدراسة غاليه فصعب لازم يدفعون لك جهة ابتعاثك اسألهم اذا تقدر تجيب لهم فواتير ويصدرون لك ضمان مالي ؟!!!

المراسله حتى الان مع ملحقية استراليا وردهم سريع جدا واذا الموضوع عاجل يجي الرد في نفس اللحظه واحيانا تتفاجا باتصالهم حتى ياخذوا تفاصيل اكثر

بصراحه ماحسيت في بعدها عننا ابدا ابدا.

أشكر كل من رد

والان لو افترضنا اني بدخل عيالي مدارس حكومية وانا اللي بدفع لهم في البدايه ويتم التعويض من مرجعي لاحقا

بماذا تنصحوني بالنسبة للمدراس بنين وبنات ابتدائي وياريت روابط لوسمحتوا وتذكرون لي الميزات والعيوب في المدرسة لأنه بصراحه نصحني واحد اني ماالحقهم لافي مدرسة زايد ولا المدينه بسبب ضعفها تعليميا هل صحيح ؟

وللمعليومية انا راح تكون دراستي في معهد يونتك الوقع على طريق البرت فبما تنصحوني من ناحية السكن واختيار المدارس لأولادي هل اشوف لهم مدراس قريبه من منطقة البرت ويكون السكن هناك ايضا والا تشوفون اني ابتعد عن هالمنطقه واشوف لي منطقه ثانية

تقبلوا تحياتي وفي انتظار توجيهاتكم

بالضبط انا برضه ما انصح بمدارس زايد تدني مستواها وبعد موقعها مافيها شي يستحق الحقيقه.

انت لما تاصل وتزور معهدك لان المعهد مو بشارع البرت ، الحرم الجامعي اسمه البرت .بالنسبه لمعهد يونيتك (وحده من زميلاتي كانت تدرس فيه مع زوجها) هو مش في شارع البرت انا اعرف انه بعيد عن السنتر بينما شارع البرت موازي للكوين ستريت في قلب السنتر ولما دخلت على موقع المعهد فعلا اتضح لي ان العنوان مختلف وان الحرم الجامعي للمعهد في MT Albert في شارع كارنقتون : Mt Albert campus, Carrington Rd, Mt Albert, Auckland, New Zealand

طبعا في المعلومات العامه اللي كاتبها عن موقع الحرم الجامعي لالبرت انه يبعد عشر دقايق عن السنتر وانه عباره عن واحه مليئه بالاشجار.

طبعا هذي معلومات عامه

خلنا في المفيد

اول ماتحدد سكنك شوف اقرب مدرسه فيه لان بعد المدرسة عن البيت جدا مهم يعني انا ممكن امدح لك مدرسه لانها مجربه من قبل السعوديين قبل لكن بعيده كثير عن موقعك لانها في النورث شور ، مستوى التعليم عندهم واحد وتعليمهم بسيط ومهضوم يعني يتقبلونه الاطفال بسهوله والانشطه عندهم كثيره ، غير كذا انت اختار المدرسه حسب التعاون والاتفاق معاك لان بعض المدارس ماتقبل الضمان المالي ولازم تدفع مقدم وبعضهم تدفع قسط وبعضهم يطلب قيمة الترم كامل فلذلك لما تحدد مكان سكنك دور المدارس القريبه له ، وبالمناسبه مدارسهم مي كثيره لان كل حي تقريبا في مدرسه ولا تنسى انها مختلطه.

وراح انزل لك معلومات اكثر ان شاء الله اليوم بعد ما استفسر من زميلتي عن مدرسة اولادها وكيف نظام الدفع .

شكرا لك على تجاوبك لكن قيل لي ان فيه مدارس غير مختلطه
ممكن تشوفي لي المدراس هذي وين وفي اي حي عشان اسكن قريب منها انا اهم شي عندي تكون قريبه لعيالي والا انا ماعندي مشكله بعدي عن المعهد
بصراحة بنتي عمرها 9 سنوات وراح ادرسها ان شاء الله لمدة 3 سنوات يعني عمرها ماودي تكون في مدرسه مختلطه

لكي مني كل التحية

الله يجزاكم خير

اخي الحبيب
انا أعاني من نفس المشكلة
وإليك خلاصة ما حصل معي
المدارس الغير مختلطة مصاريف الدراسة فيها كبيرة لا تقل عن 20الف والمحلقية تدفع للمبتعث 10الاف فقط
أحد الأخوة العرب قال لي بأن بعض المدارس الغير مختلطة مستواها الأخلاقي أسوء من المختلطة!!!
البنت (اول متوسط) سوف اسجلها في كلية زايد
بنت وأبن (ثاني وأول)في مدرسة قريبة من البيت مختلطة
أبناء كبار في الغالب في مدرسة مختلطة قريبة من البيت والله الحافظ

والله ياخوي انا سويت لك بحث في النت عن مدارس البنات لكن النتيجه كانت كالتالي :

جزء منها كاثلوكي ديني بحت . (يعني بنتك حتقلب راهبه بعيد الشر )

القسم الثاني منها تعليمي بحت لكن غالي بالنسبه للطلبه الدوليين (الانترناشيرنال استيردنتس) فالعام الدراسي كامل ب ٢٨ الف دولار نيوزلندي ومثل ماقال لك الاخ am1399 الدولة تغطي لك ١٠ الاف دولار فقط خلال العام.

هذا الرابط فيه التسعيره للمدرسه واسمها وبياناتها.
Fees for 2010

كاتبين في الموقع عن طريقه الدفع ٣ طرق :

١- فواتير فصليه
٢- فواتير مقسمه على ١٠ دفعات
٣- دفع كامل المبلغ مقدم (ولا يسترد المبلغ في حال انتقل الطالب لمدرسة اخرى او انسحب من المدرسه)

وفيه مدارس بس للقواعد .

اذا حاب تبحث بنفسك ادخل على قوقل نيوزلندا واختر البحث الداخلي وادخل : SCHOOL FOR GIRLS او
Education for girls

www.google.co.nz

وتطلع لك جميع الخيارات الممكنه.

كان فيه عائله سعوديه بس رجعوا السعوديه بعد ما انهى ابوهم دراسته اذكر كان عنده خمس بنات كلهم يدرسون في كلية زايد مع ان موقعها مو كويس وتعليمها قالو ماشي الحال استفادوا كثير ونجحوا وتعلموا البيرفيكت انجلش.
صديقتي تقول لي انها زارت ولدها بمدرسته بثالث ابتدائي لقته يلعب مع بنت قالت له مين هذي(تقصد اسمها)؟ قال لها :
She is my girlfriend يا عيني .

عموما اخوي بالنسبه للسكن انا حاولت ادور لك بصراحه لكن فيه مشكله كبيره عائقه وهي ان السكن لازم بعقد طويل اقلها ٣ شهور وبعضها ٦ شهور وبعضها قالو سنه . فلازم تجي وتشوف بنفسك صعب جدا ان احد يختار لك سكن لان كل واحد له رغبته وله شروطه ، رحت لفندقين سألتهم اذا استأجرت سويت غرفتين لمدة اسبوع لاخوي جاي من برا بكم تحسبون لي : واحد قال ماتفرق يوم والا سنه اليليله ب ١٨٠ دولار والثاني قالو لي نحسب له الاسبوع ب ٨٥٠ دولار.

الحقيقه الاسعار لقيتها غاليه وخاصة ان وراك عقد اجار وبوند وليتنق فييز كلها بتكلف شي كثير . افضل شي تسكن موتيل ولو ان غرفتين بيطلع عليك غالي و٣ غرف ماحتلقى.