وعليكم السلام
مرحبا اخوي مستر جوكر...تسلم على الموضوع وان شاء الله اعضاء يتحمسوا ويعطونا تجاربهم.
بالنسبه لي انا طالبه ادرس السنه التحضيريه وان شاء الله كلها شهر وتعدي الاختبارات على خير واخلص.
ساكنه في اوكلاند..صار حتى الان في نيوزلندا سنه ونص تقريبا.. راح اجيب اقتباسات ردود لي في مواضيع ثانيه للفائده.
بالنسبه للسكن في اوكلاند يعتبر غالي نسبيا..لكن بالبحث يلقى الواحد خيارات مناسبه...نصيحتي للي جايين جدد انهم يحاولوا يعتمدوا على انفسهم وما يقبلوا بأي خيار للسكن اذا مو مقتعين فيه..يعني الاحظ ان السعوديين تلاقيهم كلهم متركزين في عماره وحده او منطقه وحده وهم يظنون انها هي الافضل وان فلان ماسكن فيها الا وهو مدور زين وفي الحقيقه تلاقي انه فيه خيارات افضل بكثير.
فيه موقع جدا مفيد للبحث عن سكن واللي هو Trademe انصح اي واحد قبل يجي لنيوزيلندا يلقي نظره على البيوت ويقارن بين الاسعار والمناطق وبالذات انو فيه صور . طريقة الاستأجر من الموقع سهله مره ..في كل صفحه فيها عرض للسكن معين يكون فيه طريقة الاتصال مع المالك او المنجر ويحدد الواحد وقت معين عشان يشوف المكان..واذا شفته اعجبك وحبيت تستأجره حيقول لك المسؤال عن الاجراءات الباقيه وكلها اشياء روتينيه يعني مافيه حوسه.
اوكلاند تقريبا تنقسم لاربع اقسام واللي هي: الستي , النورث شور, ماناكاو, وايتاكاري.
بالنسبه لمناكاو هذي المناطق مشهور بالجرائم وغير امنه ماانصح اي احد يسكن فيها.
افضل منطقتين الستي والنورث شور...راح ارفق صوره تبين المناطق
اسعار الشقق المكونه من غرفه وحده في الداون تاون يتراوح مابين 220 الى 350 للشقق اللي تكون مستواها متوسط او افضل من المتوسط.
طبعا كل ماابتعد الواحد من الستي سنتر كل ماكان سعر السكن ارخص والغرف اكثر واوسع..لان السكن في السنترل اغلبه مصمم للطلاب وتعرفون كيف تكون الغرف صغيره وضيقه.
فيه ثلاث جامعات معترف فيها من الوزاره في اوكلاند..واللي هي جامعة اوكلاند, جامعة AUT , وجامعة ماسي. وكلها مستواها الاكاديمي ممتاز.. AUT تعتمد على الجانب التطبيقي اكثر في تدريسها مثل ماسمعت من بعض الطلاب وهذا شي حلو..
معاهد اللغه كثيره في نيوزلندا واشوف انو افضل شي الواحد يدور معهد يكون عدد السعوديين قليل حتى لو يظطر يغير المدينه اللي جاي لها ..لان مرحلة اللغه هي اهم حاجه للطلاب ..وهي اللي بالتحديد عليها دراسته وفهمه...لازم الواحد ياخذها على انها جد ويستفيد باكبر قدر ممكن عشان يطور لغته..
انا درست في معهد ELA التابع لجامعة اوكلاند..وكان جدا ممتاز لكن هذا كلام كان قبل اكثر من سنه ماادري عنه الحين..لان كثير من المدرسين نقلوا منه وسمعت ان السعوديين اعدادهم هائله فيه...واكثر حاجه فادتني في دراستي ..هي الكتابه ..تطور عندي كثير وبديت اعرف اكتب مواضيع طويله وتكون افكاري واضحه ..وهذا كان كله بسبب اني احاول اي واجب يعطونا نسويه لازم اسويه حتى لو كان طويل.لانه تبين اخطاء الواحد ويتعود على طريقه الكتابه.
نجي للاسعار في نيوزلندا ..اشوف انها غاليه ..ويحاول الواحد يجيب معاها الملابس اللي يحتاجها..لان الملابس هنا جودتها ماهي مره كويسه واسعارها غاليه...بالنسبه للاكل انا اسوي شوبنق للمقاضي لشخصين في الشهر تقريبا 500 دولار شامل اللحم وكل شي...طبعا يعتمد على الشخص اذا بيطبخ والا بيكون اكله من برا...اذا بياكل برا غالبا الوجبه الواحده في مكدونلدز او محل وجبات سريعه من 8 الى 12 دولار تقريبا..اذا مطعم عادي تقريبا 18 الى 25 دولار للطبق...
المواصلات متوفره وسهله فيه باصات وقطارات وفيري (ينقل للنورث شور والجزير القريبه من اوكلاند) اسعارها تعتبر معقوله ..وفيه بطاقات تدفع مبلغ معين وتستخدم الباصات قد ماتقدر ..بس مااعرف كم سعرها بالظبط..انا استخدم باص اسمه LINK BUS هذا الباص يدور على السنتر وقيمه التذكره مايتغير 1.60$ بعكس الباصات اللي يكون قيمه التذكره على حسب كم ستيج تبغى.
راح اتكلم عن اوكلاند لاني ساكنه فيها ومااعرف عن باقي مدن ...تعتبر اوكلاند اكبر مدينه في نيوزلندا واكثر سكان فيها...من ناحيه الكافيهات والمطاعم ..فمليانه..عندك منطقه مطاعم وكوفي شوبز على الهاربر في الداون تاون مرره حلوه واحلى انو يتقهوى الواحد على منظر البحر
وفيه بعد parnell road فيه كوفي شوبز حلوه على امتداد الشارع تقريبا.. وفيه عندك في north shore منطقة ديفنبورت Devonport تروحي للبحر وتلاقي منطقه فيها كوفي شوبز بعد. منطقه mission bay بعد حلووه وكثيير اروح لها لان جلساتها رايقه وفيه مطاعم وكوفيات كثيره. من ناحيه المطاعم الحلال مااعرف صراحه كثير لاني عادي اكل من مطاعمهم..لكن فيه كذا مطعم اروح لهم من فتره وفتره..فيه مطاعم مغربي اسمه saha (صحه) موجود في نيوماركت اكله صراحه لذيذ مرره واهم شي لما اروح له لازم ناخذ الجلسه اللي فوق لانها على الارض 
وفيه الميترو metro على كوين ستريت فيه سينما وستار بكس ومطعمين حلال على مااظن ..فيه واحد لسى فاتح اسمه مطعم نوره اكله مره حلو ويصنف على انه شامي وخليجي بعد لان فيه اكلات منوعه..انا مااحب اروح للمترو لانه كللللله خليجيييين .. فيه بعد مطاعم هنديه اتوقع اغلبه تقدم حلال لكن اعرف ثنين حلال واحد في ميشن بي mission bay بس مااعرف اسمه صراحه لكنه هو شوي داخل جواا..لكنه حلوو بعد للي يحب الهندي..وفيه مطعم اسمه رافيز لها فروع كثير في اوكلاند. وطبعا اغلب المطاعم تقدم سي فود واشياء مايكون فيها لحم وكحول ..تقدروا تروحوا لها.
انا الحين بتكلم عن اوكلاند من ناحيه الاسواق والاشياء اللي لازم الواحد يزورها
اول شي بالنسبه الاسواق.. نيوزيلندا بشكل عام ماهي مشهوره بالتسوق والشراء بالعكس يمكن اقل من الدول الثانيه<<وحده متعقده من اسواقهم اهم الاسواق silvia park ومكانه في Mt Wellington.. يعتبر اكبر سوق في نيوزيلندا كلها بس لاتتحمسون مو مره كبيره ... Albany Mall مكانه في Albany بالنسبه لي يعجبني هالسوق لان فيه محلاات كثيره واذا بغيت اتسوق اروح له Botany Town Centre مكانه فيCnr Ti Rakau & Te Irirangi Drives هذا المول مره رايق صاير زي الشوراع وبينهم نوافر وكذا..وفيه سينما حلوه
Dress Mart مكانه في Onehunga هذا السوق يعتبر زي الاوت لت ..فيه البضائع اللي تكون مخفضه ..لازم تلقين نظره عليه لان فيه اشياء حلوه وتكون رخيصه مره
وفيه عندك newmarket فيها محلات حلوه بالذات الجزم .. طبعا هذي شارع وفيها محلات منفصله وفيه مجمع اللي هو westfield .. هذي المجمع تلاقونه تقريبا في كل منطقه بس سووا سرتش للمنطقه اللي تبون وراح تلاقونه.
وطبعا اهم حاجه تميز اوكلاند اللي هو queen street هذا هو الشارع الرئيسي في اوكلاند زي ماتقولون التحليه لسكان الرياض وفيه محلات حلوه..وحلو للتمشيه وحوالينه محلات حلوه ..يعني فب الشارع اللي خلف كوين ستريت اسم الشارع اللي فيه محلات حلوه high street فيه محل بجامات مره حلووو 
comme il faut October 26th, 2008, 02:08 PM
7 " 
LinkBack URL
About LinkBacks
October 26th, 2008, 04:06 AM
و من خلال هذا الموضوع انا ادعو كل عضو في المنتدى له تجربه او حالياً يخوض تجربه ان ينصح و يوضح لإخوانه جميع الجوانب التي تهمهم من خلال تجربته
سكن-جامعه-معهد-الأسعار-المدينه-و اي شي يهم الدارس في نيوزلندا