أول مره أسافر تابعوا أحداث رحلتي .... الدمام ... دبي ...سنغافورة ... كرايستشيرج

السلام عليكم ورحمة الله وبركاتة

مساء الخير
شباب يعطيكم الف عافية عالردود والتفاعل والله حمستوني عاد انا لاتحمست من يوقفني

في الحلقة الاولى تحدثت لكم عن التذاكر واسعارها واغلب سوالفي تقريبا بالاشياء المادية
طبعا حلو الواحد يرتب اموره وخصوصا الماديه عشان مايحتد لاي كائن كان

لاكن بالنسبة لي أهم شي عندي هو (النفسية) وبس كل شي تقدر تستغني عنه الا الراحة النفسية بدونها ماتقدر تدرس ولا تشتغل ولاحتى تفكر

قبل السفر بيومين بديت اجهز الشنطة واروح الاسواق واشتري وبس اللي يطلع قصير واللي بضاعه فاسده الخ
طبعا سفرتي كانت الجمعة المغرب وقبلها بيوم جاتني فكرة
قلت شلون ياكحيلان تسافر وانت ماعلمت احد ولاحد يدري عنك كذا كانك هندي منتهيهة فيزته لاوالله عيب والف عيب

قررت اعزم الشبااب عالغداء
المهم سكرت الشنطة يوم الخميس الفجر وبعدها رحت سوق الغنم شريت لي خروف كلاسيكي كذا وعيونه على كيف كيفكم وحلقت وصليت الجمعه واستقبلت المودعين

صلينا العصر ورحنا ثلاث سيارات الى المطار الدمام الدولي
زفوني الى الطائرة مايقارب 14 شخص شايلين عني الشنط ويصورني فيديو ومقابلة وصحافه والباقي 2 مايحبون الهمجيه جلسو عند الباب زبدة الموضوع اول مره
احس اني مهم لدرجة هذي


كنت خايف أواجه صعوبه بالسفر أو أنفس خايسه تتكلم من خشمها لاكن ولله المنه
ماطيح الى في ناس مبتسمين يفتحون النفس شرواكم
وصلت الشارقه بعدين دبي
في دبي حسبي الله عليهم الخطوط السنغافورية قالو ماتركب الطياره
وين المستر كارد او التفويض الشخض اللي حجز لك (أخوي ) قلت ياعالم التيكت باسمي قالو مافيه
تكنسلت الرحله وسكنت بفندق لمدة يوم بديرة دبي
اليوم الثاني اخوي رسل التفويض بالفاكس وطرت بنفس الرحلة بس اليوم الثاني 11:50 مساء السبت
جلست عالدريشه وجاء بجنبي إيران مع زوجته
أول ماتسمعون كلمة ايرانية يجي على بالكم لل ( الريحة الخايسة ) صح؟؟
هذا الايراني مع زوجته غير لالا موزي اللي يجونا بمكه والمدينة يعني حلوين ومرتبين وجينز وحركات وجلست اسولف معه الدلخ مايعرف يتكلم زوجته تغششه
يقول مدير مصنع جزم تكرمون وزوجته حلوه

وصلت سنغافوره وتبهذلت مع الوجبة اللي قلت لكم فكرتها (خنزير)

من سنغافورة الى كرايست ... رحلة دامت 10 ساعات...عندها أبتدأت المغامرات
المضيفات ببلوزة وتنورة ضيقة لونها أحمر باهت عليه رسومات كذا كأنهم أواني الصين الفخارية
فهاضت قريحتي وتذكرت ابيات للمتنبي يقول فيها :-

إن أقبلت كنها الرسلان منحورة **** وإن دبرت كأنه يطوي الثوب لفافي

ركبت الطيارة المتوجهة إلى كرايست وجلست كالعادة عالدريشة وماجنبي أحد
قمت أفرفر بالطيارة أدور سعوديين أوعرب مالقيت إلا سودانية وسعودي واحد ماعطيته وجه ولارتحت له كذا من شنبه حسيته إنه ليبرالي
بعد ساعتين من الجلوس ومتابعة الافلام وحفظ كم كلمة من كتيبي الجيب جات الوجبات طبعا وجباتهم بصراحة حلوة عبارة عن ( دجاج فيلية لذيذ + مكرونه + بسكويت شاي +شاي + ماي )
في مع الوجبة صحن صغير فيه مرتديلا قلت خلني انتف شوي باصبعي واكل نتفه وكلت ومارتحت له ويوم سالتها قالت هاام يعني خنزير انتبهو
عصيرات ايضا وفيه بطول خمر انتبهو منها
انا كنت بطلب توت بس يوم دققت بالغرشه كذا شكلها عجييييييييييب سالتها وقالت خمر

أي واحد بيسافر لازم يحفظ الجملة هذي علمني اياها ابوي

( بليز دونت سيرفمي اني ثاينق انفولف ويذ الكحول اند بورك)
الترجمة
(رجاءا لاتخدمني بأي شي له علاقة بالكحول أو الخنزير)

المهم بعد الوجبة وزعو علينا اوراق في اسئلة عن البيانات الشخصية وين بتسكن وش الغرض من زيارتك لنيوزيلندا كم المدة الي تنوي البقاء فيها هل لديك اصدقاء هل لديك ممنوعات في الشنط عندك اكل اي شي لازم تكتبه اللي عنده تمر يكتب (dates)

طبعا انا ماعرفت أعبيها لان لغتي مش ولابد
وقفت وطليت على اللي وراي ولقيتها كيوية ومبين عليها ووونعم قلت لها ممكن تساعديني قالت اوكي
رجعت ورا بجنبها وسالتني وجلست تعبي الاستمارة وانا احاول اجاوبها وماعرف واحرك يدي ومع الحماس صفقت كاس الماي اللي على الطاوله وسبحت البنت من فوق لاتحت
طبعا مانحرجت ولا طاح وجهي ولاشي
بس لفيت عليها لقيت البنت يدها على فمها وميييييييييييييييته ضحك طبعا لو اني كابه على الايراني كان عرفتوا الفرق والشعب الطيب

وصلت كرايست 10:30 صباح الاثنين يعني زي السبت عندنا وكان عندي مشكله بسيطه وهي اني جاي بدون فيزا (سياحة) ومسجل العودة في تذكرتي بعد سنة فاخفت يدققون
لاكن أبشركم الحمدلله سالني كم سؤال وجاوبته وجلست اسولف معه وقلت له اني مبتدئ بالانجليزي ختم الجواز وقال روح
قلت له وين الفيزا السياحية ؟؟؟؟؟؟؟؟ انا افكرها فيزا فيزا
طلع الختم اللي في الجواز مكتوب فيه اقامه ثلاث شهور للسياحة وبس
التفتيش قوي مابقى الا يفصخونهم بس ولله الحمد انا بس الوحيد اللي قالولي افتح الشنطه اللي فيها تمر الصغيرة وفتحتها قالو خلاص تيسر ولا فتشو الباقي ,طلعت من عندهم حولت العمله من دولار امريكي الى نيوزيلندي وانصبوني عشره سنت في كل دولار بس يسلم راسكم
استقبلني المضيف ضابط في الطافي وخليته يشتري لي فودافون وفوطه ورحنا البيت وتسبحت واسمتها نووووووووووومه بعد سهر دام ايام وليالي

ماطلعت للحين من البيت كله نايم وجالس مع قطوتهم النتفخه
بعد شوي اروح المعهد ادفع الرسوم وافتح لي حساب بالبنك واشتري لي هوز او سطل طشت مويه للغسيل لان تكرمون ماعندهم اهواز شطف بالحمامات

طبعا انا مادفعت الى الان للمعهد شي والسكن تابع للمعهد والمفروض مايستقبلني لاكنه ماقصر وانتظرني ساعه الله يجزاه الف الف خير

أشكركم على روقانكم
وأرجوا من الله لي ولكم السداد