تقرير قصتي قبل السفر لنيوزلندا !! أولها سهلات .. واخرها ينزلوني من الطيارة ..!

السلام عليكم ورحمة الله ..


اخواني اخواتي .. بقولكم وش صار معاي اليوم الجمعة تاريخ 10 May,

انا حاليا موجود في ماليزيا كولامبور .. قررت اني اروح لنيوزلندا بغرض دراسة اللغه وتطويرها والسياحة ..

حجزت من هنا تذكرت طيران على الخطوط الماليزية بتاريخ 10 May يوم الجمعة الساعه 8:45 صباحاً رحلتي إلى اوكلاند
وحجزت فندق في اوكلاند وراسلت معهد في أوكلاند وارسلولي القبول وحددولي موعد ..
وعندي حجز عودة على الخطوط الامارتيه بعد تقريبا ثلاث شهور ..!

المهم اموري كانت ماشي تمام ..

رحت للمطار بدري وقصيت البوردنق وشحنت الشناط وختمت جوازي وبعدها توجهت لصالة الانتظار ..

وباقي ترقيبا على موعد فتح البوابة ساعه ..

قلت خلني اكل شي قبل اسافر بحكم اني ما احب الاكل اللي بالطيارة .. رحت لمطعم وطلبت واكلت المهم

انفتحت البوابة توجهة لها .. وجيت وتقريبا الناس كانو داخلين ..

مافي قدامي الا كم شخص والصالة شبه مليانه ..!

شافو البوردنق والجواز وقالولي تفضل بإبتسامه من كلا الطرفين

اول ماخلت الا في عجوز شعرها بوي قصير مره .. قالت بالانجليزي

ممكن اشوف جوازك والبوردنق .. قلت لها طبعا واعطيتها ..

وهي جالسه تقراء بالجواز قالت لي : هاو أر يو ؟

قلت لها بخير ..

هاو أر يو ؟ قالت : قووود ..


المهم بدت تسألني ...

ليش رايح نيوزلندا ؟ ... قلت لها .. سياحة ودراسة ..!
ووريتها القبول حق المعهد ..

سألتني وين تبي تسكن؟ ... قلت لها .. بفندق حالياُ لين يحصلي المعهد سكن
واعطيتها ورقة حجز الفندق ..

قالت لي معاك تذكرة عودة؟ ... قلت لها .. ايه معاي
وأعطيتها التذكرة ..

بدت تسأل أسئلة عامه وكثيره وانا اجاوب ..!

وهي تسأل معها "نوته" صغيره وتسجل فيها ..

من ضمن الاسئلة ليش اخترت نيوزلندا ؟
قلت بلد آمنه وغير مكلفة وجميلة ..!

قالت شلون عرفت عنها ؟
قلت قريت بالنت وسمعت من بعض الاصدقاء ..!
قالت عندك أصدقاء في نيوزلندا ؟
قلت تعرفت على صديق سعودي يدرس بنيوزلندا قبل كم اسبوع عن طريق النت
قالت عطني اسمه ومعلومات عنه ..!

استغربت بصراحه وتمنيت اني ماقلت لها اني اعرف احد لكن انا كنت صريح
واللي خلاني اتندم ان الولد اللي تعرفت عليه مابيني وبينه ذيك المعرفه القوية
لكن عنده خبر إني جاي لنيوزلندا وعارف اني بدرس ويعرف تفاصيل اخرى ..!

بعد ما اعطيتها الرقم والاسم قالت لي ابي الاسبلنق حق اسمه ..!

قلت لها ما اعرف الاسبلنق بالاضبط لكن بعطيك الاسم !!

"بحكم ان الاسماء بجوازاتنا السعودية بالانجليزي تحت رحمة موظف الجوازات يعني ممكن نفس الاسم بالعربي لكن بالانجليزي يختلف "

المهم قالت لي طيب انتظر شوي وبجيك ...

جلست انتظر وفتحوا البوابة ودخلت الناس الطيارة وبقيت انا بالصاله انتظر ...!

جتني وقالت الاسم غير صحيح ..!

قلت لها عندك رقم الجوال تقدرين تتأكين .. رغم اني ما ادري وش الهدف من السؤال عن الشخص هذا ..!

المهم قبل تقلع الطيارة بدقايق جتني

قالت لي اوكي .. ناو قو اند ستدي هارد اوكي ؟؟

قلت لها اوكي شكرا

واخذت جوازي واوراقي كلها ورحلت لطياره

دخلت الطيارة وحطيت اغراضي اللي معاي بالمكان المخصص وجلست على مقعدي

وقبل تقلع الطيارة بشوي

جتني عجوز قريح مره ثانيه داخل الطيارة

ومعاها موظف الخطوط الماليزية .. قالت لي خذ اغراضك واطلع برا الطيارة !!!!!!!!!!!!!!!!!






قلت لها طيب



مابي اتكلم قدام الناس اخذت اغراضي

وبحكم ان مقعدي بأخر الطيارة رحت امشي معاها لين باب الطيارة وطلعنا شوي ووقفت

قالت لي انت ماراح تسافر على هذي الرحلة !!


قلت لها ليش وش المشكلة؟ !!!

قالت ماعندك حجز عودة حجزك مكنسل !!!؟

قلت لها أي سوير اي ددنت كنسل ماي ريتورن تكت !!!

حلفت لها اني ماكنسلت تذكرة العودة ..!

قالت ماعليش امش معاي .. قلت متأكدة انه هذا الحجز وطلعت لها التذكرة مره ثانيه ..!

قالت يس يس ...!

قلت لها طيب اسأليهم مره ثانيه .. قالت خلاص انت ماراح تسافر امش معاي ...!

رحت امشي معاها وانا محبط ومستغرب وواثق بنفسي ..!

قالت لي اجلس بصالة الانتظار وراحت عند حقين الخطوط ..! واشوفها تكلم وطولت مره

طبعا عيني على الطيارة واشوفها خلاص دخلت المدرج ...!


بعد ماطارت الطيارة بوقت ..

جتني تمشي..

انا بقيت جالس بمكاني ومنتظر هذي اللحظه بشوف وش تقول؟ لاني متأكد من نفسي

جت وجلست جنبي قالت لي " سوري " تذكرتك حقت العودة صحيحه !!!!!!!!!!!!!!!!!

انا هنا بانت على وجهي معالم الاحباط .. قالت عارفه شعورك بس مو ذنبي وجلست تبرر موقفها


قلت لها ....... تأخير بالمطار وأسئلة كثيره وقدام الناس وكأني مجرم ,, وعادي سكت

بعدها ركبت الطيارة وحطيت كل اغراضي وجلست بمقعدي

ونزلتيني قدام الناس مره ثانيه !!!!!!!!!!!!!

واقولك لك ان تذكرتي سارية المفعول وصحيحه ..! وطلبت منك تتأكدين قبل تطير الطيارة ..!
وقلت لي .. انت ماراح تسافر على هذي الرحلة ..

وضيعتي علي رحلتي ..!
وضيعتي علي حجز الفندق ..!
وبالنهاية سوري ...!


قالت بسوي لك حجز مره ثانيه لكن مافي رحلة الا بكرا بالليل الساعه 11

وبعد معاناة وانتظار طويل ... سوت لي حجز وقالت لي سي يو تمورو ....!


الحين راح احجز فندق هنا لمدت يومين وراح يروح حجزي اللي بنيوزلندا

وهذا من غير الخساير الثانية تاكسي للمطار رايح جاي .. راحت على الفاضي ..؟

وجلستي هنا بدون فايدة على الفاضي ..!

غير كذا الوقت والترتيب اللي كنت مسويه اذا وصلت هناك خرب كله ..!

كنت ناوي ارتاح واعدل برنامج نومي قبل تبدا دراستي يوم الاثنين الجاي ..!

بس حاليا ماعندي الا ليلة وحده انام فيها اول ما اوصل ومن بكرا لازم اروح للمعهد .. وبصراحه نومي مره متلخبط ..!

وهذا الموضوع ارهقني كثير ...

ودي اقدم عليها شكوى ..! اخرتني وضيعت علي اشياء بدون وجه حق ..؟

وش رايكم ؟

هذا طبعا بإختصار لما حدث لي اليوم .. وآسف على الاطاله .. واسعد برؤية تعليقاتكم ودعمكم ..!