إرشادات (على السريع ) مفيدة لكل جديد (تجربتي) + ماهي خطوات الأميقريشن (لم أجرب بعد)

May 23rd, 2011, 08:51 PM

بسم الله الرحمن الرحيم
السلام عليكم ورحمة الله وبركاته ..

أنا جديد في إيرلندا .. دبلن ..

إرشادات ( في اللي جربته ) ومتأكد إني سأوصل المعلومة أحسن توصيل + ( سؤال عن الأمقريشن : اصدار الإقامة بنغالية ) ..

1- خذ كل الأوراق اللي تخصك ( كل شي يخص البعثة وشهاداتك أنت حتى المرافق .. تخيلوا .. طلعلي موظف في الملحقية يقول ما تدرس جيب آخر شهاداتك .. وأنا مرافق !! ) .. وسألت قالوا ماحصلت من قبل .. خذ شهاداتك وأوراقك للاحتياط .. !

2- احتفظ بتذاكر السفر وكرت صعود الطائرة ( البوردنق ) وأوراق العفش والشنط .. وأوراق العفش الزائد ... تخيلوا سألوني عنها في دبلن وأنا طرت من الرياض إلى أبو ظبي .. ثم دبلن .. ويوم ما لقيت أوراق الرياض أبو ظبي سوولي رجّة .. وفي الأخير طلعتها لهم قلت : أوووه لقيتها !! ... ترا بعضهم فيه همجية ..

3- روح للمعهد وجدد القبول بالفترة اللي تبيها .. وأنا أنصح بشهرين على شان لو بتغيّر ..

4- الأحياء ( في دبلن ) ذات الأرقام الفردية فيها نسبة خطورة .. وبعضها خطر جداً .. الأحياء الجيدة 2 و 4 و8 .. حتى حسب كلام أهل دبلن .

5- أول ماتجي فكر في انك تقتصد .. وأصرف على نفسك بالقطارة ( أقل فندق الغرفة بخمسين يورو الليلة = 300 ريال تقريباً ) ..

6- اعمل على كل الجهات في آن واحد وفي اللحظة نفسها .. كمل قبولك .. وعبئ بياناتك في الملحقية ( فتح ملف ) وهو أهم شي .. وخذ أوراق للبنك وافتح حسابك .. ودور على شقة وسكن آمن ..

7- ترتيب الخطوات الماضية:

اطلع معك ( على الأقل ) 30.000 ثلاثين ألف ريال .. أقسم بالله إني أقولها جادّ ومجرب .. وأخاف على إخواننا الجدد + لاب توب مجهّز لأنك ستتعامل مع النت لفتح ملفك.

أول ماتصل حاول تسكن في فندق بسعر معقول ثم تعرف على المنطقة وموقع المعهد .. وحاول إن المعهد يكون داخل وسط المدينة

بعد الاستقرار النفسي ابدأ في تصوير الأوراق المطلوبة وارفع ملفاتك (( فتح ملف )) واجتهد في هذا الموضوع لحظة بلحظة .. إلى أن ينتهي ويرسلون لك الأوراق.

دور شقة ( فيها نظام أمان سكيورتي ) .. خلك في الفندق عشرة أيام على الأقل .. واسأل لا تستعجل لأن النظام عندهم عقد سنة على الأقل .. واللي ماهو ابن كلب فيهم ستة شهور.

خذ أوراق وخطابات من المعهد لفتح حساب في البنك ( أوصيكم ابدأوا في بنك أوف ايرلند ) فهو اللي يفتح بسرعة مع إنه أردى بنك عندهم لكن أهم شي تنزل مكافأتك فيه وبعدين تفتح حساب على رواااقة .. ولا تروح للبنوك الثانية تراها تحطمك وتتشرط .. لأن فيه أنظمة جديدة نزلت الأسبوع الماضي معقدة جداً ..

أخيراً .. فيه عدة أمور ستعرفها ماهي بذيك الأهمية .. مثل الإقامة وتسجيل الجواز وبطاقات الباصات وبطاقات التخفيض وغيرها ..

-------

أنا الحمد لله ( ادعولي بالتوفيق والسعادة ) أنهيت كثير من هذي الأشياء ..

باقي الأمقريشن ..

وين موقعها ؟

وش الأوراق اللي آخذها بالتفصيل ؟

وش الخطوات والمحظورات والمستحبات ؟

أريد كلام شامل يستفيد منه المتصفح بدون تساؤلات ..

شكراً لشعوركم الجميل ..

وآرائي تحتمل الصواب والخطأ ..

• نشر عبر تويتر
• نشر عبر فيسبوك
• نشر عبر جوجل