ياناس حنا عايشين في مدغشقر والا على شواطئ جزر البريتشان المفقودة ؟

November 11th, 2011, 12:39 PM

بدون مقدمات أو صياغة وتنميق الألفاظ !

مدري هذي دولة ..

ولا حارة من حارات ( الشام القديمة ) ..

على طاري الشام .. الثورة مازالت سلميّة , ولا فيه تطورات ؟!


المهم ..

شي جميل إن حظي ليس عاثراً إلا في تفاهات إيرلندا ..

كل شي يذكرني بالبر وطلعات الصيد , ماعدا ( طيحني والتحشير المقترن بالقذارة ) ..

ولاتهون الريييييييييحة , بس الله راحمهم إن عندهم برد طوال العام ..


من يوم جيت هنا .. والحظ متغربل ( الحمد لله ) إنه ماهو حظ مصيري .. حظ ( اكسترا ) !

لي كم يوم وأنا أتصل على الأخت الكريمة ( جميلة ) مسؤولة الـ Vhi التأمين الطبي .. والخط مشغووووول .. مشغوووول .. مشغووول (( بس هالمرة الخطأ مني , كنت أتصل 01 , والمفروض بدون الصفـــ 0 ــر ))

رجعت وأرسلت بالبريد ..

وردت الفتاة ( جميلة ) ..

صبحتني برد على البريد : لايوجد لكم شيء !

وكان الخبر كالـ :




ليس كالصاعقة ( لأنها خرابيط دنيا ) .. ولو عزت أحد في الدنيا .. في الآخرة زيه زي جدي اللي توفي ( في البرّ ) قبل ستة وخمسين سنة (( الله يرحمه ويسكنه فسييييييح جناته )) ..



كان الخبر كالـ :



نعم كالمعتاد !!




لم يتغير شيء !!



دولة عندهم مبادئ زي مبادئ حارة شارع أبو ( نسافة ) في منطقة بورما البنغلاديشية ..



( وعلى طاري بورما النغلاديشية ) .. هل تعلمون أن الهند وبنجلادش ( تهاوشوا ) قبل فترة .. كلٍّ يقول ما أبي ( البرماوية ) هذول تبعكم !!



أعرف أشخاص ( أنذال ) ..

وأعرف ( محلات تجارية ) فيها نذالة ..

بس دولة ( نذلة ) !!

هذي جديدة ..


مالكم في طوالها ..


اتصلت على الفتاة المهذبة جميلة ..

- صباح الخير

- صباح الخير

- وش فيكم انتم , ماتستحون على وجيهكم , ماتخافون الله ...الخ (وقاطعتني)

- انت اللي وش فيك .. آمر .. اختصر .. وش تبي بس .. ؟


بصراحة .. كانت لبقة ..

قالت شوف يا شيخ عباد .. لزوم أبلغ ابوك بالسالفة ..

((( استغربت من وين جابت اسمي )))

قلت تكفين ..

لاتبلغين أحد ..

أنا إنسان (( مجرووووووووح ))


(( مكلووووووووم ))


شنطتي .. وضيعوها هنا .. قبل ستة شهووووووور , وللحين مالقيتها .. !!

أبحث عنها , كما يبحث بشار عن أمّه !!

وبدون جدوى ..

فيها أغراض ثمينة ..

والأهم ( الكوب )

نعم ..

(( كوب صنع في ماليزيا .. يحفظ القهوة الساخنة .. أشرب فيها ساعة واربعين دقيقة وهي مابردت !! )) ..

كوب .. اشتريته من ( مركز هيف ) .. يوم كان مسوّي بينافس بندة ..

المشكلة خسر ..

وسكّر !!

ولو إنه مازال عنده فروع .. يمكن خفف من الوطء شوي !!


حنّت جميلة لحالي وقالت :

والله يا عباد الموقّر ما وصلنا شي !!

- أبد أبد ؟

- أبد أبد


يا جميلة ..

دوري غيرها .. !!

أرسلتها قبل أكثر من ثلاثة أسابيع !!


قالت والله ما وصل شي ..

قلت .. أنا أرسلت الأصول ..

وعلى نفس العنوان اللي حطيتوه أنتم !!

قالت ما وصل .. ولا أظن بيوصل .. لأن أقصى مدة هي خمسة أيام , وكثيييييرة أيضاً ..


قلت طيب يابنت الاجواد .. أقدر أرسل الصور ( هذا وانا ماني متأكد عندي صور ولا لأ ) !!

قالت : ما أظن !!

قلت .. طيب وش الحل ..

قالت : ممكن تستفسر من البريد ..

قلت .. رجعنااااا ..

صار بشار يدوّر أمه + جدته ..

الله يعين ..

كل شي فيني يذكرني بشي ..

تذكرت :

سالي

وريمي

وجيم هوكنز .. مع البس اللي كبر وتحوّل نمر !

وقراندايزر ... لا لا لا ( قراندايزر ماتذكرته لأنه ماهو حزين ) .. على الأقل فيه ( دامبي ) المرح ..

المهم ..

تذكرت كل شي حزين ..

حتى الهوم لس .. اللي حوالي سمر هل .. بغيت أنزل وأعطيهم من ( اثنين يورو ) ..


مالكم في طوالها ..

القصة مأساوية ..


بس إن شاء الله نرجع لبلدنا ..

ونجلس على شبة النار ..

والقهوة ..

والعلوم الطيبة ..

وكل شوي داق وزير : عباد تكفا توسطلي في أوروبا ..

وأقول له :

شوف اللي تبي .. بس إيرلندا .. عليها زحمة .. لاتحرجني ..

ونتذكر مواقفنا .. ونبتسم ..

ونضحك ..

ونحن بصحة وسعادة ..

وقرب من الله أكثر ..

-----------------------------


اقتراحاتكم وحلولكم ..

على فكرة المبالغ تقارب ( الألف ومية يورو ) !!

بلاوي متلتلة !!

• نشر عبر تويتر
• نشر عبر فيسبوك
• نشر عبر جوجل