حوار المعيشة في ايرلندا ؟؟؟؟؟؟؟؟؟؟

هلا وغلا اختي احساس انا صار لي من جيت شهر وزيادة وبصراحة تكونت لدي بعض الخبرة من تكاليف المعيشة في ايرلندا ..بالنسبة للمبتعث بدون مرافق تكفي وحلوة اما المبتعث ومعه مرافق يعني يبغاله اشوي يقتصد وممكن تكفي بس بشرط بدون سياحة وتمشية وعزايم واكل في مطاعم وشراء ملابس تكفي بس مع ماذكر سابقا لا طبعا ماتكفي ...انا معاي زوجي وبذكر لك تقريبا التكاليف اللي بتصرفينها خلال شهر مع هامش زيادة او نقصان بحدود مائة يورو .
1) تشترين عزبة للبيت (لحم ودجاج وخضروات وفواكة وعصيرات والأجبان واشوية معلبات وادوات تنظيف للمطبخ والحمام الله يكرمك بحدود 600 يورو لان اسعار المواد الغذائية والمعلبات نااااااااااار وخصوصا الخضروات والفواكة مثلا كيلو الموز تقريبا ب4 ب20 ريال عندنا 3 كيلو بعشره التفاح 6 حبات ب12 ريال عندنا الكيلو ب6 ريال حبة الخيار الوحدة تقريبا ب3 ريال وعندنا كرتون كامل ب10ريال الخ .... .
2) مواصلات قولي بطاقتين مخفضة للباص او اللويس بحدود 200 يورو لشخصين كل واحد مائة يورو .
3) شحن جوال تقريبا 40 يورو للشخص يعني 80 يورو .
4) وجبة الفطورغالبا خارج البيت في المعهد او من السوبرماركت خارج المنزل وتسالي بين الوجبات (قطعة جاتوه او كراوسون او بسكويت مع عصير او كابتشينو او اي مشروب غازي ) للشخصين 4 يورو في اليوم يعني تقريبا 120 يورو شهريا .
5) الكهرباء والغاز تجي الفاتورة كل شهرين تقريبا بين 200 و300 يورو كل واحد وحسب استخدامة للكهرباء والغاز (حيث ان ايرلندا تقريبا 10 شهور شتاء ) يعني بالشهر 150يورو .
6) اشتراك للنت 40 يورو مع اظن اشتراك للتلفزيون (الكيبل تقريبا 30 يورو ) يعني 70 يورو شهريا انا موموشتركة بالكيبل لان ...(انا مركبة دش هوتبرد وعرب سات وفاكة نفسي جميع القنوات العربية موجوده وايضا جميع القنوات الرياضية مثل الجزيرة (حق زوجي ههههه) .
7) تحتاجين بعض الاحيان تاكسي للضرووووورة اذا انتي مستعجلة او لظرف طارئ في يوما ما قولي 100 يورو .

المجموع الكلي 1320 يورو يعني تقريبا تكفي من غير تمشيات او سياحة او سينما او شراء ملابس ...طبعا هناك من المبتعثين يقدر يوفر من المكافاة على حسب تعوده بالمعيشة اساسا بالسعودية كيف يحب يعيش عيشة كريمة ويستانس او يضيق على نفسه . وانتي اذا جيتي ان شاء الله تستانسين البلد جميل جدا وشعبه جدا رائع وربي يوفقك .
ملاحظة : اذا تقدرين تشحنين بعض المعلبات والرز والبهارات وتمر وانواع اجبان يكون احسن واوفر انا شحنت تقريبا 5 كراتين قبل امشي كل شي شحنته حتى المكسرات و الهريس والهيل و دبس التمر حق اللقيمات برمضان هههه. و10 ايام ووصلت الشحنة والحمدلله عن طريق وكالة الملحم للشحن .

كم مكافأة المبتعث الي ايرلندا بدون مرافق (طبعا باليورو) .

اخي غريب الدار المكافأة للمبتعث بدون مرافق 1800يورو وهي تكفي وزيادة بس المرافق يستلم نصفها تقريبا اي 900 يورو فقط .

مرحبا منار كيفك
بسألك عن وكالة الملحم بكم شحنت لك وهل في وزن محدد
لاني ابي اشياء من السعوديه ومتوهقه

ونورتي دبلن هع مع اني جيــت بعد ^-^

هلا وغلا اختي كبرياء ان شحنت تقريبا 65 كيلو في 5كراتين كلفني الشحن مع التامين والتغليف تقريبا 1000 ريال وقالي الموظف 10 ايام وتوصل دبلن (يعطيك الموظف رقم تتبع الشحنة عشان تعرفين وين وصلت كل يوم حتى وصولها دبلن ) وفعلا باليوم العاشر وصلت وراح زوجي المطارودفع 30 يورو تامين واستلمها, والجمارك الايرلندية فتحوا كرتونين فقط ومافتحوا الباقي (روتين يعني اهم شي لا تشحنين سوائل ماعدا ذلك كل شي مسموح ) انا شحنت اغراض كثيرة اغلبها معلبات واجبان وقدر ظغط ودلة قهوة واغراض غذائيةمتنوعة لشهر لرمضان المبارك والحمدلله وصلت كلها سليمة , وتنورين دبلن ان شاء الله قريبا واي مساعدة انا حاضرة .

ماشاء الله يامنار السلام كفيتي ووفيتي الله يعطيك العافية لكن ياليت كل وحدة ترفق اسعار الشقة اللي ساكنة فيها ولو بروح على حسابي كم رسوم معهد اللغة ياليت تجاوبوني

اهلين اختي ترى احسه كثير 1400 على اجار شقه
يعني احنا ساكنين بشقه بدبلن 2 ب1300 ومجمع لكن والله ندمانين وبنحاول نغيرهاا باقرب فرصة
لان فيه شقق حلوه ب800 و 850 وغرفتين وقريبه كمان
يعني لا تشيلي هم مواصلات كل الانواع متوفره هنا حتى لو ختي بعيده عن معهدك
ومو شرط بمجمع الحمد لله الدنيا امان واغلب العماير فيها سكيوتي سيستم
يعني تانو كثير بالسكن
احنا راتبنا3025 ومو مكفي لان عندي ولد بالروضة وياخذ 500
والاجار 1300
والله احيان الواحد يجي تعبان ماله خلق يطبخ وايام الامتحانات
يستسهل الجاهز واكيد بالويكند لازم تتطلع وتتمشى صعبه تحبس حالك بالبيت واكيد بتصرف

شكرا لك اختي
كنت اظن ان مكافأة المرافق مثل المبتعث

انا بعد ساكنة بدبلن 2 بـ1200 يورو بالشهر حلوة وشرحة وقريبة من معهدي بس تقولين ب850 وب800 وحلوة وتكفي لشخصين ماشفت الا اذا تشبه سويت صغييييير مره وهذي تصلح لشخص واحد او شخصين عزوبية ممكن بس بنت وزوجها او بنت وابوها ماتصلح بتااااااااااااااتا ... اما كلامك عن الامان فعلا ايرلندا آمنه اغلب مناطقها الا القليل وحنا بدبلن 2 ساكينين صار لنا شهر ونصف ماشفنا اي شي غريب او مثير للريبة ونطلع تقريبا كل يوم نحوس ونتمشى الى صلاة المغرب واحيانا بعد الصلاة بالليل نروح سوبر ماركت او نحتاج حاجة بصراحة امان وروعة ...الغريب انا شفت كثير بنات يدرسون بمعاهد بدبلن 1 ودبلن2 ويسكنون في سكن بعييييييييييييييييييييد دبلن 9 و14 و16 و18 ومدري وين و كل يوم مساكين يستخدمون الباص ساعة مجئ للمعهد وساعة رجعة لسكنهم و لان الباص اذا صار سكنك بعيد يكثر محطات التوقف و ولما اسئلهم يقولوا عشان السكن امان بعيد عن دبلن 2 خطره ههههههههههه والله مدري مين معشعش هالفكره براسهم انا ساكنه بدبلن 2 وقريب مني 3 بنات برضو سعوديات مع ازواجهم واطفالهم وبعضهم من سنه مبتعثين هنا ولا شكوا من شي . شقتي عن المعهد اروح بالباص 3 دقائق فقط وساعات اروح مشي اذا صرت جالسة بدري وارجع كل يوم مشي 20 دقيقة وانا بطريقي القرافتون ستريت وحديقة الستيفن قرين ووناسة وتمشية ولا اروح اسكن بعيد عن معهدي وعن الحياة الحلوة في دبلن 2 و اخر الدنيا عشان الامن المزعوم ...
ونرجع للمكافاه مثل ماقلتي للمبتعث والمرافق ماتكفي وان كفت يبيلك تظغطين نفسك بالمصاريف اما للمبتعث اللي جاي لحاله فهي فل الفل وتكفي وتزيد .
والوحده لازم تطلع مع زوجها او اخوها او ابوها تتمشى تغير جو تشوف هالبلد الغني بالاماكن الجميلة والمتنوعه فلازم يحتاج مصرف . مثلا حنا رحنا قبل امس الى منطقة هوث رائعه بحر وطبيعة ومطاعم كلفتنا الذهاب والعودة بالدارت مع غداء خفيف ساندويشات شورما ووورق عنب ومشروب وآيس كريم تقريبا 40 يورو . فلازم الواحد يحسب حسابه انه بيتمشى ويسوح وينبسط بيحط زيادة على المكافاة .