[ دليل - Guide ] █▓▒░ ترجمة الشهادة الثانوية مجاناً في الدمام ░▒▓█
السلام عليكم اتمنى ان الجميع بصحة وخير, واسئل الله لنا ولكم التوفيق وتسهيل امورنا. في موضوعنا اليوم باتكلم عن تجربتي في ترجمة الشهادة الثانوية في الدمام من مبنى الاختبارات والقبول التابع لوزارة التعليم العالي. الي يميز الترجمة عندهم عن المكاتب برأيي الشخصي :
- السرعة في انهاء المعاملة : تدخل المبنى, تطلع الدور الثاني تخش على الاخ عبدالله العيسى ( رجل شبابي وحبيب الله يوفقه ويجزاه خير ) تسلم وتعطيه شهادتك الثانوية وصورة من الجواز عشان الاسم بالانجليزي ويترجمها لك وانت عنده ويسلمك اياها على ورق رسمي لوزارة التربية والتعليم.
تاخذ النسخة المترجمة وتنزل عند المدير سلام عليكم وعليكم السلام, تعطيه الورقة يوقعها لك. ( واذا بغيت تقدر تروح تصورها وترجع لهم بالاستقبال يصدقونها.
- المجانية, في المقابل المكاتب اسعارهم 30/40/ الى 100 ريال , اذا ماله خلق ما يسويها لك وقتها ( مع العلم انا قد ترجمت عندهم وسواها لي خلال نص ساعة لانه كان فيه كم شخص قبلي ).
- طابع الرسمية, ورق مقوى تابع لوزارة التربية والتعليم, اضمن لك وبصراحة يريح نفسياً كثير من ان المكتب يطلع مو مصدق وتضطر ترجع تصدق من سفارة وخلافه.
المهم في الموضوع الحين الوصف ( للاسف انا اخذت وصف احد الاخوة الظاهر انه ما كان يسوق وقتها, لانه وداني آخر الدمام والمبنى في جهة ثانية ),
لو كنت على الشارع الأول - امتداد طريق الظهران لو جاي من الظهران / الخبر :
- تمشي الين اشارة الملعب ( تكون واقف عند الملعب, يمينك مطعم مأكولات بحرية والعربية للعود ويسارك شواية الخليج وتشوف الملعب في الزاوية اليسرى ), تعدي الاشارة وتوصل الاشارة الثانية ( الملعب صار ورى - يسار , وعلى يسارك مجمع الواحة التجاري ويمينك المكتبة العامة بالدمام ).
- تاخذ مع الاشارة يسار ( يصير الحين مجمع الواحة يسارك مرة اخرى, ويمينك مكتب البسام للسفريات ), وتمشي قدام بيجيك دوار.
- عدّي الدوار بتجيك اشارة ( بتشوف الزاوية الامامية اليسرى محطة بنزين ) عدي الاشارة هذي بتجيك الاشارة الثانية ( تقاطع كبير مقارنةً بالي قبله, الشارع اليمين مسار واحد " يعني كل السيارات تمشي يسار " ).
عدّي الاشارة وامسك المسار الايمن ( بتلاحظ يسارك ارض فاضية ووراها مدرسة قديمة اهلية رايحة بالرحلة خخخ ) اول لفة خذ معها يمين بتلقى على يسارك مباني وزارة التعليم, اول باب خله ( باب اخضر كبير, زي ابواب مواقف الاحواش ) اتوقع انه ثاني او ثالث باب ( الزبدة انه الباب الاخير قبل التقاطع ) بتلقاه مفتوح وفيه مكتوب مركز الاختبارات والقبول, ادخل واصفط تحت المظلات بس بعيد عشان محد يجي يقول لك وخر السيارة :D وانزل المبنى الكبير ( ابو 3 ادوار ).
كروكي اخذته من احد الاخوة في المبنى الجديد :
http://www.mbt3th.us/vb/attachment.p...1&d=1280230160
http://www.mbt3th.us/vb/imgcache/83923.png
- اول ما تدخل المبنى الكبير, عدي الباب الثاني بتلقى يمينك درج, اطلع لين الدور الثالث ( او الثاني اذا فرضنا ان اول دور اسمه ارضي :D ), اول ما تطلع من الدرج بتشوف قدامك اخر السيب غرفة صغيرة فيها مكتب وفيها الاخ عبدالله العيسى الي تكلمت عنه اول الموضوع.
- تعطيه الاوراق الي ذكرناها ( الشهادة " نسخة مصدقة اذا مو الاصل " و الجواز ), وتنتظره لين يترجمها لك.
- تاخذ الشهادة المترجمة, وتنزل وتطلع من المبنى تروح المبنى الثاني, ادخل على الاستقبال وقولهم ابي توقيع المدير وبيقولونك تفضل من الجهة الثانية ( الباب على اليمين وهو اول مكتب على اليسار ).
- يوقعها لك المدير وبكذا شهادتك جاهزة ومترجمة ومصدقة ومن ادارة التربية والتعليم بعد, اذا تبغى صور لاي احتياطات ثانية, فيه مكتبة يدلونك عليها تصور منها وترجع للاستقبال يختم عليها بنفسه.
ملاحظات دقيقة يمكن تهم البعض, ما كان فيه اشكالية على اللبس, فقط التحفظ على الشورت, لذا يفضل تروح لهم يا بجينز يا بثوب, يمكن الموضوع طويل لكن لسردي التفاصيل بشكل دقيق عشان محد يطيح بالمشورة وضياع الوقت الي مريت فيه ولو اني اشكر الاخ ( والله للاسف ما يحضرني اسمه ولا الموضوع الي قريته فيه ) الي تفضل وكتب رد عن تجربته وما موضوعي هذا الا تفصيل لا اكثر. اتمنى ان الموضوع يفيد احد, خصوصاً اني بحثت في الموقع وفي قووقل عن اي اشارة لمبناهم او موقع الترجمة وما حصلت نتيجة, فقلت بما اننا استفدنا بحمدالله, واجب نرجع نفيد. الله يوفقنا واياكم ويفرّج همومنا اجمعين. محبتي وتقديري,, 7saM
* ملاحظة اخيرة : شفت ان هذا القسم قد يكون الانسب لكن ان كان لدى المشرفين رأي افضل ارجو اتخاذ اللازم مشكورين *
رد: [ دليل - Guide ] █▓▒░ ترجمة الشهادة الثانوية مجاناً في الدمام ░▒▓█
يعطيك العافيه اخوي بس شهادات هذي السنه مترجمه ماتحتاج احد يترجمها
ويعطيك العافيه اخوي على المساعده,,,
تقبل مروري,,,,,,,,,
رد: [ دليل - Guide ] █▓▒░ ترجمة الشهادة الثانوية مجاناً في الدمام ░▒▓█
شهادة الثانوية مترجمة ولكن هل نحتاج لترجمة شهادة حسن السيرة والسلوك لأنها غير مترجمة ؟
رد: [ دليل - Guide ] █▓▒░ ترجمة الشهادة الثانوية مجاناً في الدمام ░▒▓█
لا ليه مكتوب في الشهاده المواظبه والسلوك ومترجمه ماتحتاج هذا كلام واحد في التعليم وكلامه صح,,,
رد: [ دليل - Guide ] █▓▒░ ترجمة الشهادة الثانوية مجاناً في الدمام ░▒▓█
حياكم الله اخواني وشاكر لكم اضافتكم, ما كان عندي علم ان حديثي التخرج شهاداتهم مترجمة وجاهزة, لكن كتبت الموضوع من باب مشاركة الفائدة خصوصاً اني مترّت الدمام وانا ادوّر على المبنى.
بالتوفيق :)
رد: [ دليل - Guide ] █▓▒░ ترجمة الشهادة الثانوية مجاناً في الدمام ░▒▓█
شهادة حسن السير والسلوك التي عندي غير مترجمة فقط بالعربي هل مطلوب ترجمتها ؟
رد: [ دليل - Guide ] █▓▒░ ترجمة الشهادة الثانوية مجاناً في الدمام ░▒▓█
يعطيك العافيه ياصاحب الموضوع,,,
اما بالنسبه لك يأخ رضائي اذا انت من خريجي هذي السنه امسك الشهاده واقرأ بتحصل المواضبه والسلوك
مكتوبه بالعربي والانجليزي لاتهمك الورقه الي وحدها مكتوب فيها حسن السيره والسلوك الي مكتوب في الشهاده
يكفي عنها ,,,
وشكرا’’’’
رد: [ دليل - Guide ] █▓▒░ ترجمة الشهادة الثانوية مجاناً في الدمام ░▒▓█
رد: [ دليل - Guide ] █▓▒░ ترجمة الشهادة الثانوية مجاناً في الدمام ░▒▓█
السلام عليكم
يعطيييييييييييييييك الف الف عافيه
انا كنت جالس اسأل عن اماكن اقدر اترجم فيها وسبحان الله موضوعك جا بوقته
ماشاء الله عليك الشرح بالتفصيييييييل وواضح جدا
انا سجلت بالمنتدى الان بس عشان اشكرك على مجهودك وحبك للخير لاخوانك
والا انا ناوي اسجل اذا قربت البعثه بأذن الله
مشكوووور وما قصرت والله يكثر من امثالك ويجعلها بميزان حسناتك
رد: [ دليل - Guide ] █▓▒░ ترجمة الشهادة الثانوية مجاناً في الدمام ░▒▓█