استفسارات جداً مهمة .. أفيدوني بأسرع وقت أفادكم الله

السلام عليكم ورحمة الله ..

عندي كم استفسار بما إني طالبة أدرس بالسعودية أنا وأخوي .. وحابين نطلع ابتعاث ..
و أنا والله مالي خلفية قوية عن موضوع الابتعاث .. فبقولكم مؤهلاتنا ..

أنا : أدرس سنة أولى "أولى بعد التحضيرية" في كلية علوم الحاسب وتقنية المعلومات في جامعة الملك فيصل "الدمام" حالياً ..

وأخوي: يدرس في جامعة البترول تخصص هندسة كيميائية .. مازال "Fresh Man" ما خلص هالمرحلة ..

طبعاً السبب اللي بيخلينا نقدم عالابتعاث هو إنه أخوي مو ماشي بجامعة البترول .. يرسب كثير .. والسبب مو لأنه مو شاطر .. بالعكس .. بس أنظمة الجامعة وطريقة اختباراتهم واحتساباتهم أتعبته نفسياً .. لدرجة إنه سوى "Drop" لهالسمستر لما الـ "adviser" المسؤول عنه نصحه بهالشي ..

أما بالنسبة لي أنا ماشية أوكي الحمدلله ومعدلي حلو ..

بس الوالدة ما ودّها أخوي يطلع بروحه .. يعني تبيني أكون مع أخوي نتساعد مع بعض ونكون مع بعض..

ملاحظة : حنّا مواليد السعودية ومن أم سعودية وما عمرنا زرنا بلدنا الأصل ووالدنا متوفّي من فترة بسيطة بعد ما عاش بالسعودية أكثر من 35 سنة وكان مهندس بأحد الشركات المعروفة .. ووالدتنا حالياً مسؤولة عننا وهي ولله الحمد موظفة في التربية والتعليم .. بالنسبة لنا أنا وأخواني ما نعرف إلا السعودية اللي ربتنا وكبرتنا واللي ندرس لجلها ونبي نرفع راسها سواءً برة أو هنا بشهادات عالية .. ونخدم ترابها .. ونرجعلها بالخير والعلم والكفاءة لو ربي كتب لنا وطلعنا ابتعاث .. فهل تنطبق علينا شروط الابتعاث؟

أنا أحس إنه من ناحية التعليم بما إنهم قبلونا هنا بجامعات السعودية وفقاً للقانون اللي يقول إننا نعامل معاملة سعوديين في مجال الصحة والتعليم "وهذا اللي حاصل الحمدلله" .. إننا ممكن نشتمل ببرنامج الابتعاث ؟؟ فهل هذا صحيح؟

طيب لو ما كنّا نشتمل بموضوع الابتعاث .. ما عندنا مشكلة نطلع على حسابنا الخاص في البداية .. بس هل لو جبنا معدّل كويّس بعد كذا .. نحوّل على برنامج الابتعاث؟

طيب لو ما راح نشتمل بالابتعاث نهائياً .. بإمكاننا نطلع على حسابنا الخاص بس في هالحالة إيش راح يترتب علينا وإيش اللي مفروض نسويه؟ يعني أي توجُّه لازم نسلك في هالحالة ؟

هذا بخصوص حالتنا..


الأسئلة اللي أبي اطرحها لو اشتملنا بالابتعاث سواء فوراً أو بعد ما ندرس سنة أو سنتين :
- بالنسبة لأخوي:
* هل بيعادلوله أو لازم يعيد؟ وإيش المتطلبات في كل حالة؟

- بالنسبة لنا حنّا الإثنين :
* إيش الإجراءات و الأوراق الرسمية اللي لازم نوفرها؟
*إيش أفضل الجامعات في الولايات المتحدة الأمريكية؟ وهل هم اللي بيختارون الولايات أو حنّا نختاره؟
* كيف راح يكون طبيعة اختيار التخصصات ؟ هل على كيفنا ؟ أو وفقاً لضوابط وشروط معينة راح يحددولنا التخصصات المتاحة؟
*هل فيه اختبارات معينة لازم نتجاوزها مبدئياً ؟
بما إنه لغتنا الإنجليزية قوية .. والمناهج اللي درسناها حنّا الإثنين جداً قوية!



ومرة شكراً ما قصرتوا :heart:

ننتظر الأفادة في اقرب فرصة
:)

اولا ,, مشكور للي سوا لي دعوة على الموضوع ,,

آختي انا مقدر وضعك ووضع اخوك الدراسي وداسته المتعثرة بالبترول بس ماتقدرين تلتحقين ببرنامج الابتعاث الا تكونين سعودية اذا عندكم بطاقات احوال خلاص آموركم تتيسر اذا تبين مواصلة تعليمك وتمنحين ببعثة ,, لازم بطاقة احوال سعودية ولو عندك جواز امريكي حالتك خاصة ,,

اقتباس:

---

هل بيعادلوله أو لازم يعيد؟ وإيش المتطلبات في كل حالة؟

---

مافيه معادلة لازم يعيد ,, المتطلبات يجيب درجة بالتوفل او الآيلس لدخول الجامعات بامريكا ,, هذا وفق القبول المشروط .. قبول غير مشروط تنهي مستويات اللغه في معهد الجامعه وبعدها تلتحق بالجامعه بدون الاختبارات الي فوق ,,^

- بالنسبة لنا حنّا الإثنين :

اقتباس:

---

* إيش الإجراءات و الأوراق الرسمية اللي لازم نوفرها؟
*إيش أفضل الجامعات في الولايات المتحدة الأمريكية؟ وهل هم اللي بيختارون الولايات أو حنّا نختاره؟
* كيف راح يكون طبيعة اختيار التخصصات ؟ هل على كيفنا ؟ أو وفقاً لضوابط وشروط معينة راح يحددولنا التخصصات المتاحة؟

---

انصحك تبحثين عن التخصصات قبل وتشوفين الولايات الانسب لك يعني مزاجكم كيف .. دراسي .. ترفيهي .. تبين ولاية فيها عرب .. ضجيج .. سؤالك بحر .. والجامعات عندك 51 ولاية بامريكآ ,, انصحك تشوفون التخصصات الي تبونها وتبدون البحث عن الجامعات بعدها البحث بالجامعه عن التخصص ,,

اقتباس:

---

*هل فيه اختبارات معينة لازم نتجاوزها مبدئياً ؟

---

تقدرين تختبرين ايلس او توفل من السعودية ولكن انصحك ادرسي لغه بامريكا وبعدها اختبري جربي ,,

اقتباس:

---

بما إنه لغتنا الإنجليزية قوية .. والمناهج اللي درسناها حنّا الإثنين جداً قوية!

---

بوضح لك شيء .. الدراسة بامريكا غير عن السعودية بكثير .. الجامعه تحتاج الى لغه قوية مو ركيكة ,, تحتاجين تناقشين اشياء امام 300 شخص مثلا وتلقين خطابات وتكتبين ويكون الاستماع عندك عالي ,, ما ابي احطمك بس الكلام باللغه مو كل شيء .. الشغل كله بالورق ..:)

هذا التقييم بامريكآ ,,

بالتوفيق االطريق امامك طويل .. اذا احتجتي مساعدة بامكانك تراسليني بملفي وبرد عليك متى مادخلت المنتدى .. اخوك .. عبدالله ..

الله يوفقك يارب

ولكن اتوقع لن يتم إلحاقكم بالإبتعاث طالما أنه لا يوجد لديكم جنسية سعودية


وبرأيي خلوكم على جامعاتكم وإذا خلصتوا البكالوريوس وقتها فكروا في الإبتعاث


وفقكم الله

السلام عليكم ورحمة الله وبركاتة

اختي الفاضله ،، اولا اسأل الله لك التوفيق والنجاح

وبنسبة لما تقدمتي به ،، بالفعل كما ذكر الاخوان برنامج خادم الحرمين الشريفين - حفظه الله - للإبتعاث
خصص للمواطنين السعودين ،، علما بأن يوجد برنامج من وزار التعليم العالي حاليا لغير السعودين يتكفل
بجميع دراستكم في الجامعات السعودية ومن افضل الجامعات ،، ومن خلال عملنا في هذا المجال

كان عدد الطلاب الغير السعودين المتقدمين لبرنامج الابتعاث الداخلي كبير جدا والعديد منهم متميزين
لهذا انا اوجهكم بالتقدم داخل المملكة العربية السعودية ،، وذلك بسبب الفرصه اكبر من خلال تقدمكم
للبعثات الداخلية ،، ام البعثات الخارجيه الزوجات الغير سعوديات والازواج الغير سعودين المرافقين مع المبتعثين الرئيسين
لم يحضو بفرصه البعثه ،،، هذا والله اعلم


بالتوفيق والنجاح