وش ألبس للمقابلة بالسفارة الأمريكية
السلام عليكم ور حمة الله وبركاته
طبعا ً ياجماعة أنا عندي موعد بالسفارة الأمريكية إن شاء الله بـ19/04/2011
المهم ماني عارف وش ألبس والا وش الطريقة للبس والشكل
فيه ناس يقولون لازم تكون محلق شعرك (أنا شعري طويل) .. ويقولون لازم بدلة ولا تلبس جينز ولا تلبس ألوان جذابة ..
فـ ياليت الله لا يهينكم اللي عنده معلومات جيدة عن الموضوع ذا لا يبخل علي ..
يعني وش ألبس بالضبط ؟
وهل الشعر الطويل مشكلة ولازم أحلقه وإلا عادي ؟
.......
وإذا عندكم نصايح بتنفعني للمقابلة الشخصية يالبيت ماتبخلون ....
شكرا ً جزيلا ً
رد: وش ألبس للمقابلة بالسفارة الأمريكية
البس لبسك الي دايم تلبسه<<<<<<<< حسيت انه شطر بيت
عزيزي انا رحت ولابس ثوب وشماغ لانه لبسي في العاده ومافيه اي شروط للبس
ليته بعد اقدر البس ثوب وشماغ في امريكا وارتاح من البدله
رد: وش ألبس للمقابلة بالسفارة الأمريكية
طبعا انا اول مرة رحت كان شعري كثير وما قالولي شي عن الشعر وكنت لابس ثووووب احسن يا وطنية
طبعا رحت المرة الثانية وكنت محلق والوضع اوكية الحمداللة
الله يسهل امورك
رد: وش ألبس للمقابلة بالسفارة الأمريكية
البـس سروال وفنيــلة دروش ..
.. وش ذا الاسـئلة الله يهديك ^ ^
طبعا تلبس الزي الوطني ..
رد: وش ألبس للمقابلة بالسفارة الأمريكية
البس ثوب وشماغ وبعدين ماعليهم منك شعرك طويل والا قصير هذي حرية شخصية وموفق باذن الله
رد: وش ألبس للمقابلة بالسفارة الأمريكية
انا رحت السفارة مرتين
اول مرة سبورت
والثانية الزي الوطني ثوب وشماغ
وبخصوص الشعر اللي مايستقبلونك وزارة التعليم العالي وليس السفارة السفارة عندها حرية مهي مثلنا وين مارحت حلق^_^
رد: وش ألبس للمقابلة بالسفارة الأمريكية
أكيد أنت بالسعودية ألبس الزي الرسمي .. وإذا قالولك ليش لبست كذا قلهم أنت تعرفوا هاذا لبسنا وحنا هنا غبار وحر عشان كذا لبست العمامة
وقلهم لو الله وثم هالأجواء كان مافيه بترول هههههههههه
رد: وش ألبس للمقابلة بالسفارة الأمريكية
شف اخوي اده انت تلبس بدلة البس على كييفك وتكشخ كمان وحط من العطور الزينه على راحتك .. واده ماكنت تلبس بدله البس الثوب .. انا رحت بادله ولاتوجد اي مشاكل ابدا والحمدالله اخدة الفيزا وماطولت ..
رد: وش ألبس للمقابلة بالسفارة الأمريكية
يرجال اللة يهديك اكشخ والبس ثوب وشماغ وعقال ونكس العقال بعد وماعليك من احد اي تلبسة بس يفضل السروال دروش والفانيلة وطاقية مشخلة والعقال تفصيل
واللة اني مشتاق للبس الثوب والشماغ من زمان عنة اتمنى لك التوفيق والنجاح وسامحاً
رد: وش ألبس للمقابلة بالسفارة الأمريكية
أقول عساكم إستانستوا بس؟
عاد أنا محضر لكم مفاجأة المرة الجاية .. سؤال مهوب صاحي بتفطسون عليه من الضحك ..
أهم شي الوناسة ..
بعدين وراكم أكلتوني بقشوري .. وش فيها لو إني سألتكم وش ألبس .. عادي ياخي .. صيروا حبّوبين يعني مهوب ماتصدقون على الله تلقون أحد تذبون عليه :) ..
بعدين أبشركم شريت بدلة رسمية مثل اللي يلبسونها حقين المطاعم < لا وتبي تروح أمريكا بعد !
المهم إني بلبسها بدون كرفته .. والشعر بحلقه وأصير شايب عشان يقولون (عطوه عطوه ذا عاقل) < سياسة ياحبيبي :)
المهم ياجماعة أنا الحين ما أخفيكم .. والله اني مرتبك شوي وخايف من المقابلة ..
هي سهلة والا تعقيد؟..