السلام عليكم ورحمة الله وبركاته
طبعاً شكلك داخل وأنت رجولك تصافق وحنوكك تراقل من الخوف والخرشة ومن كثر الكلام والتهويل اللي سمعته عن الفيزة وعن السفارة الأمريكية ..
أحب أقولك روح جيب لك صندوق ليمون وعطه أهلك يسوون لك عصير على بال ماتخلص من قراية الموضوع ..
هل فهمت الجملة على إنك بتقرأ شي يلعب بأعصابك وإني قلت لك جيب ليمون عشانك بعد ماتخلص من الموضوع بتكون محتاج ليمون تهدي أعصابك؟..(اذا فهمتها كذا فـ من جد كلام الناس لاعب فيك مثل ماكان لاعب فيني وبناس كثير) ..
السفارة الأمريكية بوابتك للحصول على الفيزة .. الشبح المرعب لكل واحد يبغى يروح يدرس بأمريكا خصوصا لأن فيه ناس الله يسامحهم مخلين الموضوع كأنه أحد أجزاء Saw للأسف الشديد جدا ً ..
يعني مدري ليه الواحد يحب يخوّف الناس ويربكهم ويرهبهم بإن الموضوع "يمّه" وشي كبير ومشكلة ولازم تتجهز من ملابس وشكل وطريقة كلام وما إلى ذلك "وتحس إنك بنت تتجهز للشوفة الشرعية" مع إن الموضوع سهل !!
لهالدرجة تخويف الناس متعة ؟!
كان فيه واحد كاتب موضوع يتكلم فيه عن شكل اللبس وكان يتكلم بتفصيل عجيب ..
مثل: إلبس قميص مقلم والخطوط تكون أفقية والتقليمات واسعة وليست متقاربة ..
(ما كأنك نسيت تقول لنا كم عدد الخطوط الأفقية اللي لازم تكون بالتيشيرت يالطيب!!)
واللي خلاني أنخدع بكلامه إنه كان يتكلم باللغة العربية الفصحى وبالتنوين وكانت عدد مشاركاته أكثر من 300 نصبة ..
عموما ً
على ضوء هاللخبطة اللي صارت نزلت موضوع وكتبت فيه (وش ألبس لمقابلة السفارة؟).. من جد كنت صادق بالسؤال ومحتار مدري وش ألبس .."غشيم" ولقيت ناس تفلسف وتهوّل المواضيع وقلت أسأل قبل ما أروح للمقابلة وأتفاجأ بالقنصل يقول لي ( إيش اللبس البايخ ذا , يالله برا مافيه فيزة ! ) .. وللأسف كانت التعليقات لا تقل بياخة عن الوضع كله فـ أنواع الكومنتات المذهلة صارت على الموضوع والعجيب بالأمر .. مافيه ولا كومنت إستفدت منه "وين شايف هالحركة قبل كذا؟" ..
* إذا وصلت لهالنقطة من الموضوع إعرف إنك تعديت المقدمة المملة اللي بالبداية .. وبتدخل على جزء ممل ثاني .. لكن أقولك ..(إستمر) ..
حبيت اني أبين بهالموضوع كل شي يتعلق بطلبات السفارة والخطوات اللي تسويها .. وبلاشي نصب ودجل أكثر من كذا ياشباب .. ترى المنتدى هذا محطوط للمساعدة موب محطوط للهياط والكلام الفاضي وتمضية وقت الفراغ عند بعض الإخوان الفاهمين جداً من كل جنب !
ملاحظة: المشكلة إن فيه ناس كثير يجون للسفارة وهم اصلا مايدرون وش المطلوب ووش الأوراق اللي معهم .. يعني يدخل على البركة .. وطبيعي اللي بيجي يدربي راسه بيرفضونه وبيكون مهوب واثق من نفسه .. لأن الثقة تكون على حسب المعلومات والأشياء اللي انت مرتكي عليها ..
* طلبات السفارة الأمريكية كالتالي:
1/ الشهادة البنكية , تاخذها من البنك وتكون مترجمة إنقليزي وفيها مبلغ لا يقل عن 70 ألف .. وترا 70 ألف تكفي موب لازم تزيد ولا شي.
2/ كشف حساب 3 شهور , أهم شي ان كشف الحساب يكون لنفس الحساب اللي مطلع منه الشهادة.
3/ موعد المقابلة بالسفارة.
4/ البن نمبر.
5/إيصال السامبا.
6/السيفيز.
7/نموذج DS-160.
8/الجواز الجديد والجوازات القديمة (أو برنت بالسفرات السابقة من عند الجوازات إذا ماعندك الجوازات القديمة).
9/ الشهادة مترجمة ومصدقة ومختومة.
10/ قبول المعهد الأصل والصورة (أو الوثائق الأخرى مثل قبول الجامعة).
11/ 3 صور 5 في 5 ملونة , كاشف الراس , طبيعية 100% .
12/ ورقة كفالة ترفقها مع كشف الحساب والشهادة البنكية , يوقع عليها اللي بيكفلك (أبوك-أخوك..إلخ) ,, وتكون صيغتها كذا :
To whomit may concern
A This is to certify thatI (Father Name) the
Father of (Ur Name ) , will beresponsible for providing the (Financial Supportfor) my Son during his stay inThe United States of America
And this is forknowledge
SignedDate // 2011
Father Name
…………Sign Here………
بس خلاص ..
كمل أوراقك وجيب معك كل شي .. وحط عينك بعينهم وإذا فيهم خير يرفضونك ..
والأسئلة بسيطة وسهلة جدا جدا جدا .. بس بيقول لك وين تبي تروح؟.. وليش إخترت الدراسة بأمريكا مو في الإمارات والا الأردن والا المريخ؟
صدقني أسألة سهلة سهلة تجاوبها وأنت مغمض ..
وبعدين انا شفت كم واحد يسأل عن اشياء يبغى يخبيها عن السفارة وكذا .. ياحبيبي هم بيبحثون بسجلاتك وكل ماضيك الغابر والمشرق لذلك أنت خلك إنسان دوغري وواضح ولا تقعد تلف وتدور وتطلع بـ50 شرقة قدامهم ..
(خلك صادق بكل المعلومات اللي تعطيها للسفارة) لأنهم بيبحثون عن كل معلوماتك ولا تحسب شي بيفوتهم .. ولا تقول اي معلومة ماطلبوها منك .. خل جوابك على قد السؤال وواضح وصريح وصادق ..
ماعليك انت بتروح تدرس موب رايح تسرق والا تسوي شي غلط .. ماعليك من أحد .. صف نيتك وتوكل على ربك وخلك صادق وصريح وواضح وأمورك بتمشي تمام بإذن الله .. وحاول وانا أخوك ماتسمع كلام اللي بالنت كثير .. ترى الأغلب أو الأغلبين أو الأغلبات الكثيرات إنهم بيّاعين كلام ..
ثانيا ً نجي لموضوع مابعد المقابلة الشخصية :
بعض الناس يقولون له فيزتك مقبولة وروح حط اوراقك عند فيديكس .. وبعض الناس يعطونه ورقة صفرا ويأشرون على أشياء ويقولون له أرسلها لنا بالتاريخ الفلاني ..
عموما ً بكل الحالتين أنت إن شاء الله أمورك ماشية تمام وموافقين عليك بس محتاجين هالأوراق الناقصة عشان يكملون إجراءاتك أو مثلا ً أنت جاي تقدم بدري قبل دراستك بمدة تتجاوز 90 يوم وهم بهالشكل مايقدرون يصدرون لك الفيزة لأنه من الشروط عندهم إنهم مايصدرون الفيزة قبل 90 يوم من تاريخ الدراسة ..
طبعا ً نسمع ونشوف الكثير من اللي يجون يبكون ويصيحون من تأخير الفيزة ومن المشاكل اللي تصير عليها ويقلقون أمن وإستقرار خلق الله المساكين اللي ينتظرون ويدينهم على قلوبهم واللي غالباً مايستلمون الفيزة ونص راسهم أبيض ..
الناس هذول الله يعينهم ومانقول لهم شي .. بس هل تدرون أنتم وش ظروفهم؟..يعني هل كملوا أوراقهم زين؟.. هل جاوبوا على الأسئلة زين؟.. هل إستوفوا الشروط زين؟..
لاتقعد تقرأ كلام هالناس وتبهذل عمرك وتخاف وتنخرش عشان صار معهم كذا ..
زي ماقلت لك أنت إمش بالسليم وضبط أوراقك وأمورك وبتمشي .. السفارة الأمريكية مثل الأحوال المدنية مثل الجوازات مثل أي دائرة .. تمشّـيك أوراقك وإنضباطك وإلتزامك بالشروط والقوانين فقط لا أكثر ..
(واللي عندهم مشاكل مع الفيزة , الله يعينهم وييسر أمورهم , وكل طقة بتعليمة)
*نجي لإنتظار الفيزة
طبعا ً إن شاء الله إن الفيزة ماراح تتأخر عليك .. والدليل على ذلك أنا وأكثر من شخص وصلت تأشيراتنا الحمدلله وكل الأمور مشت سهالات ياربي لك الحمد .. وعقبال كل شخص ينتظر فيزته يارب..
أنا كانت مقابلتي بـ 19/4 .. وعطوني الورقة الصفراء وقالوا ترسل لنا الجواز قبل تاريخ 1/6
لأن موعد دراستي بـ 22/9 .. ومايصير يطلعون لي الفيزة بمدة أكثر من 90 يوم ..
أرسلت أوراقي لهم بتاريخ 23/5
طبعاً الإرسالية وصلت اليوم الحمدلله بتاريخ 27/6
وهذا رقمها
871988334427
أنا يوم حطيت أرقام الإرساليات وهالكلام .. بس عشان أثبت لكم إن مافيه أي شي تخافون منه .. والأمور سهالات بإذن الله .. وإذا كنت تنتظر فيزتك ماعليك إصبر وبتجيك بس لين تخلص إجراءاتها من عندهم ..
* واحد من أصحابي سوا المقابلة بتاريخ 8/5
وإستلم فيزته بتاريخ 22/6
بالنهاية:
أتمنى من كل الإخوان إنهم يراعون ذممهم بالناس ويراعون أنفسهم قبل كل شي بالكلام اللي يقولونه للبشر .. التخويف والترهيب لا يجوز .. وعيب إن المسلم يتبع هالطريقة البذيئة مع الناس ..
المنتدى هذا محطوط للمساعدة ولتشارك المعلومات ..بصدق , بإخلاص , بتعاون
والا المنتديات اللي تبيع الكلام ونظام نسخ ولصق وكلام فاضي معبية قوقل ..
جزا الله خير كل من ساعد مسلم وفك كربته ودله على الطريق الصحيح
بارك الله بكل مسلم وقف مع أخوه وسانده وجبر بخاطره وأخذ من همومه لو شي قليل
قال صلى الله عليه وسلم (المسلم للمسلم كالبنيان يشد بعضه بعضا)
وقال عليه الصلاة والسلام فيما معناه (من فرج عن مسلم ٍ كربة ً من كرب الدنيا , فرج الله عنه كربةً من كرب يوم القيامة)
أتمنى من كل قلبي إن هالموضوع يكون مفيد ..
وإذا أعجبكم .. مابي الا "دعوة في ظهر الغيب"..
أسأل الله لي ولكم التوفيق والسداد وإنه يحقق أحلامنا وأحلام أهلنا فينا.,
