اتعبني التفكير عطونا ارائكم

السلام عليكم ورحمة الله وبركاته

كيفكم ان شاء الله طيبين

الصراحة ماني عارف من وين ابتدي ولا اكتب مقدمه لذا بخش بالموضوع على طول:)

انا موظف وظيفة حلووه ولله الحمد والمنه وراتبي فوق 8000

بس افكر اكمل دراستي طبعا معاي دبلوم حاسب الى (دعم فني) بتقدير 4.39 من 5

والانجليزي عندي يمشي الحال

بس افكر اكمل بكالوريس وماجستير

هل يمكن اعادل موادي واكمل بكالوريس دعم فني وبعدها ماجستير ادارة اعمال

وثاني شئ محتار احس انها مغامره اني اترك الوظيفة واروح ادرس اخاف ارجع ماحصل وظيفة

مع العلم ماتوقع احصل ترقيات غير الي اخذتها لان الي عندي كلها شهاداتهم قوويه

ولو قلت اطلع كيف الطريقة الي راح اطلع فيها وادرس على حساب الدوله مع العلم ان عمري الان 24 سنة

منتظر تعليقاتكم :)

اخوي عشان تنجح لازم نجاحك يستند على ضمانات ومافي مكان للافتراضات فالمستقبل لامجازفة فيه
اذا انت ضامن الوظيفه بعدالتخرج وبراتب يفوق راتبك الحالي فستختار الابتعاث بلا منازع وان كان غيرذلك فالاستقرار بوظيفتك هو ضمانا لمستقبلك

قدم على اجازة بدون راتب وتوكل على الله وبعد ان تستقر في بلد الأبتعاث ممكن ان تقدم الأستقالة اذا رفضوا تمديد الأجازة.

بالتوفيق

والله ياخوك انا راح اتكلم عن نفسي لو انا مكانك ماراح اطلع من الوظيفة لأنه قدامي مشوار بكالوريوس وماجستير وقبلها لغة يعني يبيلك 6 سنوات كأقل تقدير من يعلم الحال بعد 6 سنوات وش راح يصير اذا فيه ناس تخرجو من برا في وقتنا هذا ومايحصلون وظيفة مثل وظيفتك
يتمنونه مابالك بعد 6 سنوات انا لا اجزم ولااعلم المستقبل ولاكن عصفور باليد خير من عشرة على الشجرة وحاول تطور نفسك هنا خش جامعة انتساب او حاول تبتعث عن طريق شغلك او اقل شي اجازة بدون راتب ولاكن ارجع واقول لو انا مكانك راح اتمسك في وظيفتي وفي النهاية القرار الاول والاخير لك وانا ما اقصد اكسر مجاديفك لا والله بس انا تكلمت على اساس اني مكانك وهذه وجهة نظري في النهاية لك الحرية في الاقتناع بها اولا
ولا اوصيك بالاستخارة ثم الاستخارة راح تفيدك بأذن الله في الاختيار الصحيح وبالتوفيق لك ان شاء الله فيما تختار.

الله يجزاكم خير

ماقصرتوووو

اول حاجة استخير
و نصيحتي لك لاتطلع من وظيفتك والله اعرف واحد متخرج دبلوم كلية تقنية - شبكات ورفض الوظيفة وراح استراليا وكمل بكالوريس ولما جا يدور وظيفة مالقا مع انه متخرج بكالوريس جيدجدا ويعتبر تقدير حلو ,, وبالاخير اضطر انه يرجع لاستراليا يكمل ماجستير لعل وعسى يلقى وظيفة وبعد عشان الناس اكلوا وجهه لانه مالقى وظيفة بشهادته
طبعا كل هذا من عمره ولازواج ولاوظيفة ,, والله موقصدي احطمك بس هذا الوجة الاخر للابتعاث اللي الناس ماودها تواجهه
وكل شي مقدر من عند علام الغيوب
الله يكتب لك اللي فيه الخير