مساعدة سؤال عن الفيزا والمعهد والتغيير

حياك الله يا دمعه ..

ماجد كفى ووفى برده .. ولكن حبيت أضيف لك معلومات ..

لا يضيق صدرك بخصوص الفيزا .. تقدرين تآخذين موعد مقابله بالسفاره ((( طارئ ))) ركزي على كلمة ( طارئ ) ويجيك خلال 3 أيام بالغالب ما يتأخر ( بشرط أن دراستك يكون باقي عليها أقل من شهر ) .. وهم إذا شافوا ان دراستك قريبه مره ماراح يتأخرون عليك بإصدار الفيزا
بس أهم شيء يقبلونك بالاول ( ويتحدد القبول من خلال المقابله ) لا ترتبكين أو تخافين الأمور بسيطه جداً ..
وهذي خطوات التقديم على الفيزا وتقدرين تسوينها بيوم واحد : ( على فكره موقع السفاره يوجد فيه ترجمه بالعربي ) ولكن الأفضل ان اللي يقدم لك على موعد السفاره يكون شحص فاهم وسبق أنه تعامل مع الموقع لأن خياراته كثيره ..
عشان كذا شوفي لك مكتب ممتاز وخليه يقدم لك أو أحد اقاربك إذا سبق وتعامل مع الموقع ..

الخطوات :

1 - تدخلين على موقع السفاره وتعبين ( الأبلكيشن ) : فيه اسئله شخصيه ومعلومات عنك واسئله عامه واسئله عن المعهد ( ويطلبون الـ I20 ) اللي جاك من المعهد وعناوينك وايميلك ( تأكدي من تسجيل ايميلك صح ) وحاولي انه يكون ايميل رسمي ( تستخدمينه للسفاره وللدراسه ) ..
طبعاً قبل ما تبدين بتعبئة الأبلكيشن يطلب انك تحطين رقم سري و اسم مستخدم عشان اذا بغيتي ترجعين تعدلين على الابلكيشن تقدرين من خلال الرقم السري ..
بعد ما تنتهين من تعبئة الابلكيشن بيقولك ارفعي صورتك الشخصيه على الموقع ( فيه شروط للصوره ابحثي عنها ) بعدين بتجيك رساله على البريد من موقع السفاره فيها ( بار كود ) أو ( كود ) يعني رقم طويل ويتخلله حروف انجليزيه
هذا الباركود احتفظي فيه لانه هو دليلك للأبلكيشن حقك أو ( رقم مرجعي للأبلكيشن ) .

الان عندك ( رقم سري للدخول على الابلكيشن وعندك باركود للأبلكيشن ) ..

أطبعي الايميل اللي جاك ( بالغالب راح يجيك بصيغة ملف ( بي دي إف ) .. ورقه وحده فيها صورتك اللي رفعتيها على الموقع وفيها الباركود اطبعي كم نسخها من هالورقه وإحتفظي فيها وخوذي نسخه معك للسفاره بيوم الموعد .

2 - الخطوه اللي بعدها حجز الموعد ( عن طريق الموقع ) .. وتكتبين ( الباركود اللي أخذتيه من الخطوه السابقه ) عشان تربطين بين الأبلكيشن وبين الموعد .. وطبعاً لابد يكون عندك بطاقة فيزا ( البنكيه ) عشان تسددين قيمه الموعد ( 45 ريال ) بعد تعبئة الخانات المطلوبه و بعد دفع المبلغ يجيك جدول يبين لك الايام المتاحه للموعد .. لكن حالتك انتي طارئه .. لذلك أطلبي موعد طارئ وهم يحددونه على ما اعتقد ويتواصلون معك عن طريق الايميل ( ما سبق لي ان حصلت على موعد طارئ عشان كذا ما اعرف طريقة الحصول عليه ) .. اسألي عنه .
بعد حجز الموعد تجيك رساله على الايميل فيها تاريخ ووقت الموعد .. اطبعيها وخوذيها معك للسفاره بيوم الموعد .. ضروووري

3 - الخطوة التاليه : دفع رسوم ( السيفس ) ( 200$ ) دولار
يعني ( 800 ريال ) تقريباً .. وهذي بعد عن طريق الموقع ببطاقة الفيزا البنكيه .. ولها خانات معينه تعبينها وبالأخير يولون لك ادفعي المبلغ ..
اذا خلصتي من دفع السيفس ( السيفس = دار الهجره أو الأمقريشن ) .. بيجيك خيار يقولك اذا تبغين تطبعين الأوراق اللي تثبت انك دفعتي مبلغ السيفس .. انتي اطبعيها وخوذيها معك للسفاره ..

وبكذا انتهيتي من الموعد ( وهذي الخطوات راح تآخذ منك تقريباً ساعتين ) وأمرها بسيط ما فيها شيء ..

الخطوة الأخيره .. تروحين لـ بنك سامبا ( الأمريكي ) .. وتطلبين منهم قسيمه ( ورقه صغيره ) لدفع رسوم الفيزا الأمريكيه .. تعبينها وتعطينها الموظفه وتدفعين ( 532 ريال ) .. وهذا المبلغ ما يرجع لك في حال عدم قبول طلب الفيزا ..

بالنهايه كل هذي الخطوات تقدرين تسوينها بيوم واحد .. وخليك حريصه انك تحتفظين بكل ورقه تطبعينها وكل رقم او كود أو تواريخ أو رسائل تجيك سواء من السفاره أو المعهد أو الوزاره .. لانك بتحتاجينها ..

بالنسبه للأوراق الضروريه اللي لابد تآخذينها معك للسفاره بيوم الموعد هي :

ـ صور شخصية 5×5
- الجواز
- ورقة الموعد ( اللي جتك على ايميلك من السفاره ) .. ( قيمته 45 ريال )
- ورقة دفع رسوم السيفس .. ( اللي قيمتها 200$ دولار = 800 ريال )
- الاي توني I20 .. ( ورقة قبول المعهد ) نسخه طبعاً .. خوذي الأصليه معك بعد لكن لا تعطينهم الأصليه فقط يبغون نسخه منها .. صوريها لهم
- ايصال دفع رسول الفيزا ( اللي دفعتيها بسامبا ) .. قيمتها ( 532 ريال ) ..
- الضمان المالي .. ( اللي مسجل فيه انك مضمونه إلى 32.000 $ ألف دولار ) ما يعادل الــ 120.000 ريال في حال كنتي بتدرسين على حسابك الخاص .. أو الضمان المالي اللي عطتك الوزاره في حال كنتي تبع برنامج الملك عبدالله ..
- كشف حساب لآخر 6 شهور .. سواء كان حساب أبوك أو أخوك أو أمك أو حسابك .. المهم يكون نفس حساب الشخص اللي معطيك الضمان المالي ..
- قبول الجامعه الأمريكيه في حال جاك قبول الجامعه ( نسخه ) .. ما هو ضروري تقدرين تروحين بقبول المعهد فقط .. ولكن زيادة خير
- صوره من آخر مؤهل علمي حصلتي عليه .. مثلاً : اذا كنتي ناوي تدرسين الماجستير تجيبين صوره طبق الأصل من شهادة البكالوريوس .. أو اذا كنتي بتدرسين بكالوريوس تجيبين صوره طبق الأصل من شهادة الثانويه .
- أخيراً اذا كان عندك جواز قديم خوذيه معك ..

وحاولي بيوم الموعد ما تآخذين معك أي اجهزه الكترونيه لانها ماراح تدخل السفاره .. والأفضل انك تروحين بدون شنطه عشان ما يشغلونك عندها .. خوذي أوراقك بيدك وقلم وأفطري زين وتوكلي على الله ..

الله يوفقك ويسهل أمورك .. وأدعيلي حتى أنا انتظر الفيزا .. عسى ربي يبشرني بخير ..