مساعدة دمرت مستقبل زوجي بقبولي الوظيفه وتركي للبعثه ... أنصحوني جزاكم الله خير

اذا خاطره في البعثه يستخير ويتوكل على الله على حسابه وانتي تدعمينه براتبك لين ينضم لان هذا اقل واجب تسوينه تجاهه

واذا انضم للبعثه تروحين معه مرافقه وتكملين دراستك معه ووظيفتك تكون محفوظه لين ترجعون



الله يكتب لكم الخير اينما كان ونصيحتي الاستخاره والاستشاره هي من سيقرر مصيركم

ما ودي أكون قاسي عليك أختي لكن ما أدري كيف فكرتم بهذه الطريقة.
أنا اللي أشوفه هو:

أن واحد كان موظف، وترك البعثة لأجل الثاني
طلعتم تدرسون وجت الثاني فرصة وظيفة
ورجع الأول ترك الدراسة لأجل وظيفة الثاني
رجعتم السعودية صار الأول موظف والثاني لا

يعني ببساطة رجعتم لنفس الحالة الأولى
واحد موظف والثاني لا وهي الحالة اللي كنتم عليها وتركتموها لأجل البعثة.


الحل هو:
يطلع يدرس على حسابه، وأنت تقومين بواجبك تجاهه
إذا انضم للبعثة، تتركين وظيفتك أو تسوي إجازة بدون راتب
تطلعين تدرسين ويدرس، وتتطورون أنفسكم، وإن شاء الله تلقون وظائف أحسن بعد الرجعة.

زوجك ترك وظيفته لأجل بعثتك، ثم ترك بعثته لأجل وظيفتك، والآن الدور عليك أن تساعديه.

تحياتي،،،

تعقيب #
زوجي عندما ترك وظيفة القطاع الخاص كان راتبها قليل وداومه طوال ايام الاسبوع عدا الجمعه بالاضافه الى انها كانت في منطقه بعيده عن اهالينا .. وكان قرارا الاستقاله برغبه من زوجي لانه يريد الدراسه

وعندما حصلت لي الوظيفه كانت حكوميه وبراتب عالي ... والفرصه تأتي مره بالعمر وفضلت اغتنامها

**********

جزاكم الله كل خير

نصيحتكم راح اخذها في الحسبان

وانا ارغب بالمزيد من النصائح والآراء

هل يقبل الوظيفه اللي ذكرت تفاصيلها بالموضوع ام يرفضها ويكمل دراسته في الخارج؟
وهل الانضمام للبعثه خلال 4 اشهر ممكن ام لا ؟

الرجاء من يقرأ موضوعي لايبخل علي بالمشوره

اولا : الانضمام خلال فتره بسيطه بإذن الله بيكون ممكن، لأن أغلب الأخبار اللي توصلنا الفتره الأخيره تقول أن الانضمام مضمون تقريا بعد 4 اشهر من دراسة اللغه.
ثانيا : اذا زوجك بيدرس على حسابه اربع اشهر خليه يدرس في معهد رخيص أوفر له، يعني معهد تجاري رخيص مثلا.
ثالثا : زوجك وش المؤهل اللي معه حاليا ..؟ ، اذا معه بكالوريوس فالوضع ممتاز كلها بإذن الله 3 سنوات بالكثير ويرجع معه ماجستير.
رابعا : عندكم مشكله لو يبقى كل واحد في وظيفته ودراسته ..؟ يعني فيه فكره أنو انتي تبقين في وظيفتك في السعودية، وهو يروح يدرس عزوبي ألين يتخرج، وفي الاجازات تروحون عند بعض، مره بالسعوديه ومره بأمريكا.
بالتوفيق للجميع.

اهم شي تكوني تكوني استخرتي

السلام عليكم ورحمة الله وبركاته ..

اولا الله يبارك لكم في رزقكم ويعطيكم قدر ما شتهيتم يارب ويغنيكم عن بقية خلقه يارب العالمين ..

ثانيا ...
أنا أرى ان الرأي رأي زوجك .. هو من يحدد وهو من يقرر ..
قد سبق وأن دعمك في قرارك .. والآن وقتك لتدعميه بقراره .. فأجعليه يفكر ويقرر بما يراه مناسب لوضعكم .. فلا أحد منا يعرف وضعكم اكثر منكم !

ولكن .. الشيء الوحيد الذي بإمكاننا أن ننصحك فيه .. هو أن تلجأوا الى الله لييسر اموركم ويسهل عليكم سعيكم .. ويرشدكم لما هو خير لكم ..

أنتوا سبق وكنتوا بامريكا والان رجعتوا .. وسوف يصعب الوضع إذا رجع او رجعتم مع بعض ..

راتبك يبدو لي انه مجزي .. وإلا لما تركتي البعثه لاجل هذه الوظيفه ...
فلذلك .. أرى انه من الأنسب أن تتريثون وتصبرون وتسعوون باموركم .. فلا نعلم من الممكن أن الله كاتب رزقكم بالسعوديه ..
وإلا لما رجعتم من امريكا بهذه السرعه .. وسنه لازالت مدتها قصيره ..

مادام أنك قادره على تكفل مصاريف البيت .. فلا حاجة للعجله والرجوع من جديد والتضحيه بكل ماتملكون لاجل السفر ..
بل من المفترض ان تريحين زوجك .. وتشجعيه على السعي في ايجاد وظيفة جيده .. ولا يهم ان يكون راتبها بمثل راتبك .. بل المهم انه يكون راتب جيد لاباس به ..
فيكون راتب اضافي على راتبك .. وتكون مؤقته .. حتى يجد وظيفة اخرى براتب مرضي ..

ولعل هذا الوقت هو اختبار من رب العالمين لكم حتى تلجأون الى المولى عز وجل .. فأستغلوا مثل هذه الفرص باللجوء الى اليه سبحانه .. فلا منجي ولا رازق ولا صاحب غير الله سبحانه ..


جميع النصائح سواء مني او من غيري .. لايجب عليك أن تطبقيها حرفيا .. بل عليك أن تأخذينها فقط كافكار توسع مدارككم ورؤياكم في البحث عن حل للمشكلة لا غير ! ..

ونصيحتي لك .. فقط أعرضي الافكار التي تجدينها تناسب وضعكم على زوجك .. مع مراعاة وضعكم وظروفكم الحاليه .. وانصحيه بالصبر وعدم التعجل في إتخاذ الامور ..

وتذكري قصة سيدنا ايوب عليه السلام .. ففيها من عظم رحمة رب العالمين وجزائه فيمن يصبر ويتكل عليه سبحانه ..


وأخيرا ..
إذا قرر زوجك .. أدعميه بقراره أيا يكن .. واجعليه يسعى في أمره بعد استخارة رب العالمين .. فإن كانت خير لكم فالله يكتب لكم فيها كل الخير .. وان كانت شر عليكم .. فالله يبعدها عنكم ويستبدلها بما هو خير لكم ..

أسأل الله أن يصبركم ويثبت اقدامكم على الخير ويرزقكم من حيث لاتحتسبون ...