استفسار فزعتكم لا هنتو

وعليكم السلام
الصراحه ما اعرف وش هو الملحق العسكري
التأثيث حسب هواك ما اقدر اقول لك كم بيكلفك لكن المبلغ يكفيك وزياده ان شااء الله اذا كنت بتشتري سياره رخيصه او عاديه تمشي فيها حالك الين تضبط امورك
وبالنسبه للسكن اذا كنت بتقعد مده طويله انصحك تجي لواشنطن تسكن اسبووعين او شهر في فندق نظام شهري
علشان يمديك تدور سكن على مزاجك ومناسب لك

المبلغ اللي معك ممتاز لكن لا تتهور وتاخذ لك اي سياره او اي شقه
لازم تشوف الشقه بعيونك علشان ماتندم لان نظام الشقق عقود سنويه

بيض الله وجهك السياره ابيها عاديه ولأثاث كنب وتلفزيون وغرفه نوم واغراض مطبخ بس ياليت تبين لي افضل منطقه سكن أمان وفيها حركه ولك تحياتي

ووجهك يالطيب
انا من سكان نيويورك فماعندي خبره عن واشنطن ان شاء الله اصحاب واشنطن يعلمونك
نيويورك معروفه انها اغلا من واشنطن نسبياً فأتوقع الاثاث بيكلفك لانك لحالك حدود 7 الاف اذا بتدور لك شي كويس ويفتح النفس
التفزيون اذا بتاخذ نوع حلو بيكلفك ك700 دولار كبير ودقة عاليه 42 بوصه
الكنب بياخذ عليك من800 ل 1800 دولار اذا مايهمك من وين مصنوع او وش اسم الشركه اللي صنعته
السرير وغرفة النوم يختلف انواعه كثيره جدا لكن اتوقع راح تكلفك مع المرتبه او الماترس 1600 دولار
واغراض المطبخ اذا كنت تبي كل شي ما اتوقع يكلفك فوق 1000 دولار
باقي المبلغ للأشياء الزايده مثل طاولة التلفزيون وطاولات الصاله والكماليات الثانيه مثل الابجورات

اتوقع لو تدخل على موقع ايكيا الامريكي وتختار الاثاث اللي ممكن يناسبك
وتشوف الاسعار اذا كانت تناسبك او لا
مع العلم ان اييكيا اسعارها بالغالب اغلى من اسعار السوق
لكن افضل شي عندهم بضاعه كويسه وتلاقي كل اللي تبي بدون تعب تدوير وعندهم بعد اشياء رخيصه واشياء غاليه
تقدر تختار الاثاث كامل مع اغراض المطبخ ويعلمونك كم بيكلفك مع الشحن او بدون الشحن
واسعارهم اتوقع راح تناسبك

انت شف ايكيا اذا ماناسبك اسعارهم فيه عندك walmart هذا سوبر ماركت عنده كل شي وتقريباً له فروع في جميع امريكا
ومعروف انه من ارخص السوبر ماركت لكن جودتهم نص ونص
وله موقع بالانترنت اكتب اسمه بقوقل ويطلع لك وتختار كل شي تبغاه وتحطه بالسله ويعلمونك كم بيكلفك مع الشحن او بدون الشحن اذا خلصت

وايضاً اذا ماناسبك علمني وابحث لك عن مواقع ثانيه تبيع الاثاث

السياره اذا تبي مثل المبتعثين اغلبهم يشتري كامري 2002 تلقاها ب5 الاف نظيفة بعد البحث طبعاً
باقي المبلغ تخليه لاشياء ثانيه مثل اشتراك انترنت وقنوات وتأمين شقه وتأمين كهرب ومويه

انا جيت معي اقل من المبلغ اللي معك واثثت شقتي كامله والاثاث متعوب عليه واشتريت لي سياره امشي فيها حالي لين اشتريت سياره ثانيه بعد ماضبطت اوضاعي

يا جعلك ووالديك فالجنه يارب اتعبتك معي

أما 7000 للأثاث، يارجل لاتطنخ بالأثاث تراك رايح لفترة وراجع
ترى شقتي مأثثها بالكامل (عزوبي) وهي غرفة وحدة تقريباً من ايكيا بـ 1200 دولار.
رح ايكيا (ميزته بتلقى فيه كل شيء)وخذ (أسيح شي) ولاتأخذ أي شيء فخم إلا إذا كنت ناوي تقعد أكثر من 10 سنوات فهذا شيء ثاني.
التلفزيون (آخر طراز من شركة سوني LED مقاس 32 بوصة ) شاريه قبل فترة من أمازون بحول 329دولار.
طبعاً حاول تشتري باقي الأغراض بعد ماتستأجر الشقة مثل الأجهزة الإلكترونية من (أمازون)----< يوصلونها إلى باب بيتك وماعليها ضرائب وتقر تشوف أراء اللي شرو البضاعة قبل ماتشتريها.
بالنسبة للسيارة، للأسف ماعندي خلفية.
وبالتوفيق،،

15 الف دولار .. تكفي وتوفي وتزيد باذن الله !

الاثاث لو بتأثث شقه كامله من والى ماراح تكلفك اكثر من 3000$ .. هذا بعد اثاث من نوعيه ممتازه بعد ..
لان الكنب بتلاقيه مابين الـ 190 الى 500$ .. وبتلاقي أغلى لكن الغاليه هذي تكون مكونه من ثلاث او اربع قطع !
انت خلك على كنب او ثلاث انفار .. بتلاقيه باقل من 500$ ..
اما التلفزيون فراح تلاقي اللي يعجبك وباقيام رخيصه جدا ! ومن النوعيات الجديده بعد LED ..
يعني مثلا انا شاري تلفزيون Samsung نوعية LED و 46 بوصه .. اخذته ب 700$ ..
لان السامسونج معروفه بغلائها .. لكن راح تلاقي ارخص من الشركات الثانيه وتقريبا نفس الجوده ..

اما المطبخ .. ماراح يكلفك اكثر من 300$ .. لو اشتريت مواعين كامله !

وغرفة النوم .. لاتروح للسراير الغاليه .. خلك على الاشياء الرخيصه .. بتلاقي الهيكل بـ 60 دولار .. وعلى حسب اذا كنت تتبي هيكل خشب بيكون غالي .. اما اذا كنت تبي حديد فهو رخيص !
والماتريس ماتتعدى 200$ .. اما اللي تجيك غاليه هذي مبالغ فيها ولا لك حاجه فيها !
لان كلها بترتاح عليها ماعليك من الكلام والاعلانات الزايده ! .. حتى لو مارتحت عليها .. ترا كلها 60 دولار تجيب لك اسفنجه تلبيسه تحطها فوق الماتريس نفسه .. وانتهى الموضوع !
اما تدفع 400$ وزود .. على دوشق ؟! ههه انام على الارض اصرف يارجال !

انا مشتري كل اثاثي من ول مارت walmart.com اذكر انه كلفني بحدود الـ 2800 دولار .. اثاث كامل من اجهزه وسرير ومواعين .. الخ
بس المشكله عندكم بواشنطن التاكس مرتفع .. يعني بتدفع زياده ! علشان كذا حاول تخفف وتجيب فقط اللي تحتاجه !

اما السياره .. فراح تلاقي سيارات على حسب مزاجك .. اسعارها تتراوح من 4000$ وطالع .. وكل مازادت القيمه .. كل ماصارت السياره افضل وموديل احدث !

هذا والله اعلم ..

بس ياشباب لا تنسون انه هنا موظف واحتمال كبير انه يطول
ويمكن بعد فتره يتزوج او شي وواشنطن ونيويورك غاليه من ناحية الاثاث والاشياء الثانيه
كتبت له الاسعار لشخص احتمال كبير يطول علشان العمل
يعني انا اللي خلاني اتعب على اغراضي لاني اعرف ان جهة البعثه اللي انا جاي منها اول ما ارجع بترسلني مره ثانيه لامريكا

K10 المرتبه جربت ثنتين وحده اشتريتها من محل حول الشقه نوع عادي مقاس كوين قعدت ثلاث شهور وبعدها بدت تنخسف من الطرف لاني دبدوب وزني 75 كيلو
وقبل كنت بشقة حقت واحد من انسباي شاري مرتبه والله لو تجربها تنسى شي اسمه هومسك وخلاص ماعاد تبي تتحرك من مكانك
واشتريت مثلها ب600 دولار قلت ابخربها ولها مده معي ولين الحين ماشاء الله تبارك الله
جاني واحد من اخواني زياره لامريكا نومه خفيف مره وبالعاده ينام 5 او 6 ساعات ويقوم مصحصح طول اليوم
صار ينام بسريري من بعد مانصلي العشاء ولا يقوم الا على صلاة الظهر من الراحه اللي فيها
ومع انها قديمة عندي الا انها كأنها جديده

وبعدها بديت اهتم بشي اسمه نوم واشتريت سرير نظامه ياباني يجيك واطي شوي وقريب للارض
والحين لو تحب السماء ما انام برا شقتي الا اذا سافرت


وبالنسبه للكنب قلت له على هذاك السعر لانه موظف واكيد بتصير عنده زيارات من العمل
فلو اشترى قطعه او قطعتين اتوقع ماتكفي خصوصاً بالاعياد موظفين الملحقيه دايم يتجمعون ويتزاورون

والاسعار مثل ماقلت واشنطن التاكس مرتفع حبتين

اجل 75 كيلو دبدوب ههههه

الاثاث انواعه كثيره .. ومثل مانت عارف فيه الغالي وفيه الرخيص وفيه الزين وفيه الشين ..
لكن مو كل غالي ينشرى ولا كل رخيص ينبغى !

فالتوسط بالامور احيانا يكون حل مناسب ..

وبكل الاحوال أحنا مانقدر نحكم عليه .. أحنا نبين له كم الاسعار .. حتى تكون عنده فكره مسبقه بالاسعار ومن طريقها يرتب اوضاعه !
يعني انا بينت مسألة رخص الاسعار .. حتى يكون عارف ان فيه شي رخيص .. لان ممكن تقوله 5000$ تأثث شقتك كامله .. يقول خلاص هذي 5 الاف على جنب .. والعشره الباقيه للسياره والشقه وبقية المصاريف !

لان كلنا فكرنا بنفس الطريقه اول ماجينا امريكا .. فانا ابني على طريقة تفكيرنا وترتيباتنا في اول بداياتنا بامريكا ! وكيف كنا نسعر ونشوف اللي نبغاه وكذا !

لاني اعرف ناس كثيره دفعوا باثاث اقيام خياليه توصل الى 9000$ دولار ! وبعض الاثاث مستعمل بعد !
واضطروا يضغطون على انفسهم وبعضهم حرم نفسه من السياره بسبب انه تكلف بالدفع في الاثاث والشقه والامور الاخرى ! فما بقى معه غير معيشته وترك السياره لبعدين !
فليش احنا نحط اقيام عاليه للناس بينما بامكانهم اخذ اثاث جديد ونظيف ونوعيه جدا ممتازه باقل الاسعار !؟ فمن المفترض اننا ماننظر للي احنا شريناه .. بل ننظر للي في السوق ! ونعطي نبذه مختصره باللي بالسوق ونظرتنا حوله !

فهذي كانت الفكره ياغالي .. دائما اعطي اقل الاسعار .. حتى يمكن للشخص ان يرتب اموره على اقل الاسعار .. ولو كان بيطول او بيعيش طول عمره في امريكا ... وقتها هو يتخذ قراره من نفسه وعلى الاقل يكون عنده خلفيه عن اقل الاسعار كم بتكلف ومنها يقدر يبني عليها قراراته !

الله يجزاكم خير وبينتو لي كل شي بس باقي لي نظام آجار الشقه اول مره لازم ادفع له حق 3 شهور ولا اول شهر وكم يبيون تأمين وأفضل منطقه اسكن فيها لان عملي في منطقه 20007 الله يجزاكم خير