أبي نصيحة من أصحاب العقول الناضجة

السلام عليكم ورحمة الله و بركاتة

أخواني أخواتي أبي منكم نصيحة عن حالتي المش كويسه للأسف :(

أنا كنت طالب في أمريكا لمدة 3 سنوات. شيء ممتاز أني خلصت مرحلة اللغة بنتيجة أكثر من رائعة. لكن بالنسبة للدراسة الجامعية صراحة فحطت وجبت العيد.
درست 3 سمسترات ومعدلي جدا جدا سيء. و الآن موقوف عني الصرف الى ان ارفع معدلي وبعدها يرجعون لي الصرف. طبعا رجعت السعودية و صار لي تقريبا 5 شهور هنا لا شغل ولا مشغلة.
الكلام الحين اني قررت اني ارجع و ادرس في كلية مجتمع اجرب نفسي سمستر ان شاء الله اني ارفع المعدل و اكمل مشواري الجامعي. لكن بنفس الوقت متردد اني اروح وما تضبط أوضاعي.
هل تنصحوني أني أكمل محاولة او اتكي هنا بالسعودية و اشوفلي وظيفة او اي شيء :confused1:

أرجو من الجميع أفادتي برأية لو بكلمة واحدة. محتاج لنصيحتكم.
أخوكم أبو عبدالعزيز

ولله ياخوك ان كان لقيت لك وطيفه توكل علا لله لان حرام تجازف والقدر لله ماتمشي في هالترم.

أنصحك بقوة انك تكمل لكن بشرط تنسلخ من شخصيه السعودي وقت المذاكرة(مع احترامي لنا) وتتقمص شخصية الألماني الي مايكل ولا يمل من المذاكرة مهما كانت الأسباب وعشان تصير كذا فكر في نفسك ليش باقي السعوديين مشو في الابتعاث وانا لا. هم مو أحسن مني. خلي الغيرة الإيجابية وقود لك

( تمت المشاركة باستخدام تطبيق مبتعث )

وعليكم السلام ورحمة الله وبركاته

بعد ماتستخير الله
هذا رأيي اذا انت حاس انك بتسوي اللي انت سويته قبل ما انصحك ترجع لانه مجرد تضييع وقت لو تاخذ لك وظيفه وتدرس تعليم عن بعد او انتساب جامعه بيكون افضل لك


ثاني شي المواد اللي انت درستها صعبه او لا؟ والتخصص كان صعب ولا لا؟
مستوى الجامعه اذا كان عالي ونويت انك ترجع دور لك جامعه مستواها اقل


اخر شي اذا انت متردد ولا تبي تضيع الفرصه من ايدينك
دور لك جامعه سهله ورخيصه بنفس الوقت علشان تدرس فيها فصل دراسي ولا تكون خسرت مبالغ ماليه كبيره
هي فرصه حلوه الابتعاث اذا انت ناوي تجي بهمه عاليه تعال اذا بس تجرب لا تجي

رجوعك سوف يدخلك في أمور قانونية كثيرة منها
1- إذا تعديت فترة 5 شهور بدون دراسة خارج امريكا يستلزم اصدار فيزا جديدة للدخول
2- لايمكن اعادة الصرف عليك إلا بعد احضار خطاب مباشرة من نفس الجامعة وتكون المدة اللى درستها من السابق محسوبة لك
3- عملية أنك تبدأ الدراسة في جامعة ثانية من جديد هذا أمر غير ممكن إلا بموافقة الملحلقية حتى يعاد الصرف عليك في حال رفعت المعدل يعني النقل لابد يكون بموافقة الملحقية .
4- عودتك لنفس الجامعة إذا مر عليك فصلين بدون دراسة تفصل من الجامعة و مع هذا يستحيل قبول نقلك في جامعة آخرى داخل امريكا .
5- حسب النظام لا يجوز النقل من جامعة إلى كلية مجتمع " الواسطة ما عندي خبر هنا " ولكن العكس هو المتبع أي من كلية مجتمع إلى جامعة.

فرصتك الآن تصحح وضعك في نفس الجامعة والملحقية ايضا وترجع فوراً قبل اكتمال فترة 5 شهور أو فصلين دراسين وتشد حيلك حتى لو درست كم فصل على حسابك حتى ترفع معدلك ويعاد الصرف عليك وانا على يقين أنك تستطيع متى ما فرغت المخيخ من الحلوين وحلاوة المص وتخلصت من اصدقاء السوء .

و الله يا صاحبي العلم يرفع صاحبه .. بلا شك ارجع لـ أمريكا و كمل دراستك و تأكد أن مستويات الجامعات تختلف
يمكن كنت في جامعة مستواها أعلى من قدراتك الشخصية .. رح لـ جامعة مستواها أقل و تمشي أمورك
كل شي إلا العلم .. لا و بـ أمريكا بعد ! .. غلطة حياتك إذا ما كملت دراسة حنا في زمن الشهادات و الوثائق العلمية هي اللي ترفعك و تبني حياتك و يكون مستقبلك راقي و في الهاي كلاس
نصيحة و انا اخوك كمل دراستك و ارجع

ارجع
حاول تسجل مواد من برنامجك سهلة نسبيا وشد حيلك واجعل المرشد في جماعتك يساعدك
وزي ماقال الرجال "فرّغ المخيخ" وحاول تركز واترك البربسة


( تمت المشاركة باستخدام تطبيق مبتعث )

اقتباس:

---

المشاركة الأصلية كتبت بواسطة ALSHIAKA

رجوعك سوف يدخلك في أمور قانونية كثيرة منها
1- إذا تعديت فترة 5 شهور بدون دراسة خارج امريكا يستلزم اصدار فيزا جديدة للدخول
2- لايمكن اعادة الصرف عليك إلا بعد احضار خطاب مباشرة من نفس الجامعة وتكون المدة اللى درستها من السابق محسوبة لك
3- عملية أنك تبدأ الدراسة في جامعة ثانية من جديد هذا أمر غير ممكن إلا بموافقة الملحلقية حتى يعاد الصرف عليك في حال رفعت المعدل يعني النقل لابد يكون بموافقة الملحقية .
4- عودتك لنفس الجامعة إذا مر عليك فصلين بدون دراسة تفصل من الجامعة و مع هذا يستحيل قبول نقلك في جامعة آخرى داخل امريكا .
5- حسب النظام لا يجوز النقل من جامعة إلى كلية مجتمع " الواسطة ما عندي خبر هنا " ولكن العكس هو المتبع أي من كلية مجتمع إلى جامعة.

فرصتك الآن تصحح وضعك في نفس الجامعة والملحقية ايضا وترجع فوراً قبل اكتمال فترة 5 شهور أو فصلين دراسين وتشد حيلك حتى لو درست كم فصل على حسابك حتى ترفع معدلك ويعاد الصرف عليك وانا على يقين أنك تستطيع متى ما فرغت المخيخ من الحلوين وحلاوة المص وتخلصت من اصدقاء السوء .

---

اخوي عندي تعليق على بعض النقاط احس انها غلط

4- تفرق من جامعه لجامعه فيه جامعات تقدر تتركها لمدة سنه وترجع لهم
وبالنسبه للقبول فيه طلاب كثير تم "طردهم" من الجامعات ونقلوا لجامعات ثانيه

5- مسموح له ينقل اذا عنده ظروف "نزول المعدل"

يعطيك العافيه على افادة الاخ حبيت اذكر هذي النقاط

حاول تبدأ من جديد في كلية او جامعة جديدة اذا معدلك طايح في اول 3 سيمسترات من الصعب ان تحصل على درجة جيدة في حال تخرجت , ابدا من الصفر اذا قررت العودة للدراسة .

وهناك نقطة اخرى . السفارة قد ترفض طلبك اذا عرفت انك كنت طالب ومستواك كان سيء بحجة انك غير مؤهل للدراسة .

باختصار نصيحتي ارجع للدراسة لامريكا او لغيرها , وتذكر بعد بضع سنوات االاف المبتعثيين سيعودون والحصول على الوظائف الجيدة سيكون صعب لشخص بدون شهادة جامعية

اقتباس:

---

المشاركة الأصلية كتبت بواسطة hayway

اخوي عندي تعليق على بعض النقاط احس انها غلط

4- تفرق من جامعه لجامعه فيه جامعات تقدر تتركها لمدة سنه وترجع لهم
وبالنسبه للقبول فيه طلاب كثير تم "طردهم" من الجامعات ونقلوا لجامعات ثانيه

5- مسموح له ينقل اذا عنده ظروف "نزول المعدل"

يعطيك العافيه على افادة الاخ حبيت اذكر هذي النقاط

---

حياك الله حبيبي بالنسبة فيها فصلين وهذا الغالب ربيع وخريف بمعنى ....... السنه = فصلين دراسين
وبخصوص أنه فيه طلاب تم " طردهم " من جامعات ونقلوا لجامعات ثانية بصراحة ماعندي خبر وما اعرفه أن الجامعات والنظام في أمريكا لا يسمح ...
قد تقصد بدء الطالب من جديد في جامعة جديدة وليس نقل دون أخبار الجامعة بانه كان طالب سابق هذا ممكن ..
على العموم إن شاء الله لن يكون هذا مصدر خلاف وهذا للتنوير وعلى الطالب أن يدخل موقع أي جامعة ويتعرف على شروط النقل إليها وكذلك يتعرف على نظام الجامعة إلتي يدرس فيها .

وشكراً على تعقيبك ،،،

السلام عليكم

أشكر الجميع على الرد والنصايح الي تبيض الوجه

أنا ان شاء الله اني ببدأ بكلية مجتمع و بعون الله تتسهل الامور. لأن زي ماقالو بعض الاخوان انه صعب الحصول على وظيفة بترقيات بدون شهادة جامعية

الله يوفقكم جميع ويسعدكم دنيا و اخره