توني مخلص ثانوية و ناوي ادرس بأمريكا IT

سلام عليكم و رحمة الله و بركاته
أعزائي أعضاء مبتعث

توني مخلص ثانوية بمعدل 93
و ناوي ادرس بأمريكا -programming-networking-تطوير الالعاب -----IT


و بغيت مساعدتكم في البحث عن اقوى الجامعات بأمريكا
تتصدرها عدة شروط :

1-الجامعة: ان تكون فيها جامعة معترف فيها و قوية جداً (مشهورة)
2-الجو:ان لا يكون جوها حارا جدا ولا باردا جدا .
3- المواصلات:يمكن التنقل بها بسهوله (هل تحتاج لشراء سياره او لا).
4-السكن والتسوق:اود ان يكون السكن قريب لأماكن التسوق المولات .
5-السكان : لان يكون سكانها و شعبها طيبين و ان لا تكون منطقة خطرة .

و ارجوا اني ما ازعجتكم بالموضوع و ارجوا من الجميع الأستفادة من الموضوع ايضاً

وعليكم السلام ورحمة الله وبركاته ,
انا عندي سؤال .. هل انت تبي برمجة أو شبكات أو برمجة العاب ؟
لان الـ IT متشعب .. وانت ماشاء الله عليك كتبتها كلها !

اذا انت تبي تدخل في مجال برمجة وتطوير الالعاب .. فأفضل طريقة هي انك تدخل تخصص علوم حاسب الي وبعدها تكمل ماجستير على علوم حاسب الي بتخصص دقيق برمجة العاب او تطوير العاب او غيرها من التخصصات الدقيقة اللي راح تكون في نفس المجال !
اما انك تتخصص العاب في البكالريوس , فمافيه هالطريقة حسب ما اعرف , لان البكالريوس يكون عام , ولكن تقدر تاخذ بالاليكتيف كورسات لبرمجة وتطوير الالعاب وهذا الشي راح يساعدك في الماجستير .. او تقدر تاخذ دبل ميجر .. بحيث يكون الميجر الاساسي علوم حاسب والميجر الثاني برمجة العاب او تطوير الالعاب وهذي راح تساعدك على انك تكمل الماجستير في نفس تخصصك الثاني ..

اعطيك مثال ..
انت تبي تتخصص برمجة العاب .. في البكالريوس راح تحتاج الى انك تاخذ علوم حاسب الي كتخصص اساسي .. وتنزل معه تخصص تطوير العاب كتخصص Minor (تخصص ثاني) .. ويكون تدرس تخصصين بنفس الوقت ..
التخصص الثاني راح يضيف عدد كورسات على الخطه الدراسية الحالية .. ولكن غالب هذي الكورسات راح تكون موجوده بالاساس في تخصصك الرئيسي (علوم حاسب الي) فبالتالي يصير يضيفون لك الكورسات اللي ماهي موجودة في التخصص الرئيسي ..
وبالتالي راح تقل عدد ساعات تخصصك الثاني وبدال مايضيفون 12 ماده اضافية على التخصص الرئيسي .. يصير يضيفون 5 مواد على سبيل المثال .. لان الباقي موجود من الاساس عندك بالتخصص الرئيسي ..
لان التخصص الفرعي اللي اخذته (برمجة العاب) يعتبر إمتداد لتخصصك الرئيسي (علوم حاسب الي) ..
وبكذا يكون عدد الساعات اللي تحتاج تخلصها في الجامعه تزيد عليك فقط 12 الى 15 ساعه كحد اقصى .. يعني يزيد عليك فصل او اثنين بالكثير ..
ولما تخلص البكالريوس .. تقدر تكمل ماجستير بالتخصص الفرعي (برمجة العاب) .. ويصير الماجستير بدال ماتاخذ 38 ساعه .. تاخذ 20 ساعه .. والسبب انك انت اساسا ماخذها في تخصصك الفرعي في البكالريوس !
وتخلص الماجستير في سنه ونص الى سنتين كحد اقصى ! وبالتالي قصرت عليك المده والجهد والتعب .. ووتخلص دراسة بشكل عام في مده اقصاها 7 سنوات كحد اقصى ! واللي غيرك ياخذها في مده لاتقل عن تسع سنوات !
هذا لو كنت صامل ومجتهد وفعلاً تبي افضل طريقه توصل لهدفك بمده قصيره وجهد اقل ! ..

هذي بس فكره توضيحيه عن خطه دراسية راح تنفعك ان شاء الله وتختصر عليك الطريق ..

اما عن افضل الجامعات التقنية فهي Massachusetts Institute of Technology ..

وهذي افضل عشر جامعات في علوم الحاسب الالي :
Best Computer Science Programs | Top Computer Science Schools | US News Best Graduate Schools

مشكور اخي محمد فهد

و تخصصي إنشاء الله علوم حاسب آلي ( برمجة و تطوير الألعاب )


و لكن احد اقربائي و ابي خصوصاً
ينصحوني دائماً بالمحاسبة
لأن معاشه في النهاية سيكون اكبر بكثير من IT

و اخاف اصبر اخرتها استاذ حاسوب في المدرسة
مثل باقي الأساتذة اللي عندنا يجتهدون و يدرسون و اخرتها مدرس بمعاش 5000 ريال

فحبيت اخي محمد فهد أن اخذ رايك بما ان لك خبرة واسعة


لأن كل اللي أعرفهم تخصص محاسبة معاشاتهم فوق تقريباً
25000 ريال
30000 ريال

هل هناك مستقبل و شغل قوي لعلوم حاسب
لأن ميولي بشكل كبير لعلوم الحاسب

اقتباس:

---

المشاركة الأصلية كتبت بواسطة idreamer

مشكور اخي محمد فهد

و تخصصي إنشاء الله علوم حاسب آلي ( برمجة و تطوير الألعاب )


و لكن احد اقربائي و ابي خصوصاً
ينصحوني دائماً بالمحاسبة
لأن معاشه في النهاية سيكون اكبر بكثير من IT

و اخاف اصبر اخرتها استاذ حاسوب في المدرسة
مثل باقي الأساتذة اللي عندنا يجتهدون و يدرسون و اخرتها مدرس بمعاش 5000 ريال

فحبيت اخي محمد فهد أن اخذ رايك بما ان لك خبرة واسعة


لأن كل اللي أعرفهم تخصص محاسبة معاشاتهم فوق تقريباً
25000 ريال
30000 ريال

هل هناك مستقبل و شغل قوي لعلوم حاسب
لأن ميولي بشكل كبير لعلوم الحاسب

---

وليش تجري ورى الوظيفه ؟
ليش ماتخلي الوظيفه هي اللي تجري لك ؟

تخصص المحاسبه راح يكون فقط محاسبه يعني وين ماتروح بتكون محاسب اما في بنك او في شركه او اي قطاع اخر !
اما تخصص الكمبيوتر بشكل عام .. فراح تكون عندك خيارات كثيره متاحة .. ممكن تتوظف فني شبكات , او مبرمج , او دعم فني .. أو اي وظيفه ثانيه فيها كمبيوتر !

مجال الكمبيوتر بشكل عام لو نظرت له من منظور ضيق , اصبحت الخيارات لديك ضيقه .. ولو نظرت له من منظور اوسع .. اصبحت الخيارات لديك كثيره جداً ..

برمجة الالعاب جداً حلوه وممتازه .. وتقدر تصير ملياردير من خلالها لو تبي ! فقط تحتاج الى هدف ومعرفه وحسن تدبير !
اقرب مثال لذلك , العاب الايفون والاندريود .. اللعبه الوحده صاحبها يدخل عشر اضعاف مايتقاضاه اصحاب الوظائف المرموقه !
واقرب مثال لذلك لعبة فلابي بيرد اللي الكل هب فيها لما نزلت .. صاحبها كان يدخل 5000$ على الاقل بشكل يومي ! يعني شهرياً يدخل 150 الف دولار !
عارف كم بالسعودي ؟ يعني تقريباً نص مليون ريال شهرياً .. يارجل والله ولا حتى وزير يوصل راتبه الشهري بهالشكل !
فما بالك بالالعاب الثانيه المشهوره مثل الانجري بيرد وغيرها واللي كانت بدايتها بسيطه والان اصبحت شركه ! تتوقع كيف صارت شركه ؟ يعني راعيها تاجر ؟ بالعكس الا هذا يبين لك انه دخل مدخول ولا عمره حلم فيه وفتح شركه من هالمدخول واصبح له راس مال واصبح تحته مطورين وظفهم لاجل فقط هذي اللعبه !
فأنت لو دخلت محاسبه .. راح تبقى على راتب معين وان زاد مع السنين ماراح يزيد بالزياده اللي انت تتمناها .. يعني تقضي ثلاثين سنه وراتبك ماتعدى 30 الف او 50 الف ريال (هذا لو جيتلك في وظيفه طيبه بالحيل) ..!
لو قارنتها باللي ممكن تكسبه من ورى الالعاب او البرمجه عموماً .. صدقني ماراح تجي ولا ربع اللي تتصوره !

اذا انت عندك شغف وحب في برمجة الالعاب .. انا متأكد انك راح تبتكر وتبدع فيها .. وهذا الابداع هو اللي راح يخلي الفلوس تجيك مو انت اللي تبحث عنها !
فقط تحتاج الى صبر وشوية وقت وحسن تخطيط وتدبير في الامور حتى تدير مشروعك بشكل ناجح ..
وماراح تتعب اساسا .. لان الان عندك ثلاث بوابات سهله حتى تنشر لعبتك وهي متجر ابل , ومتجر اندرويد , ومتجر مايكرسوفت !
يعني بتكون انت صاحب ومدير ومطور ومبرمج اللعبه .. وفوق هذا الفلوس تجيك وانت في بيتك !

هذي من ناحية .. الناحيه الثانيه لو تبي تتعمق في الموضوع اكثر .. ممكن تصمم لعبة RGB ومن خلالها تقدر تتعاقد مع احد المستثمرين في الالعاب وينتجونها الى لعبة على الاكس بوك والبلايستيشن ويكون لك نسبه كبيره من الارباح !

ترى مجال برمجة الالعاب مربح جداً .. فلا تستهين فيه .. ولا تضيق نظرتك فقط على السعودية !

لان ماضيع الناس الا فكرتهم بالوظائف في السعودية .. وهذا اللي خلاهم في النهايه بوظيفه براتب ثابت لايزيد ولا ينقص ويقعد يكد طول عمره والراتب مايكفي حتى مصاريفه !
الله عطاك عقل .. استخدمه ووظفه في مصلحتك .. لاتجعل الناس هي من توظف عقلك !

خذ دبل ميجر زي ماقال اخوي محمد فهد باحد الجامعات القوية بالتصنيف، بعد التخرج تدرب باحد شركات الالعاب الشهيرة سنة او سنتين وان شاء الله بتحصل الي يرضيك

مشكوور اخي محمد فهد
حمستني صراحة
اقنعتني بشكل كبير
و إنشاء الله بتخصص علم حاسب ( برمجة و تطوير الألعاب )