سؤال عن استخراج شنغن في امريكا

السلام عليكم

عندي سؤال شاطح شوي :

هل اقدر استخرج فيزا شنغن من امريكا !؟

وهل فيه احد جرب

وشششكرا مقدما

ايه نعم تقدر .. أنا طلعتها من قبل. فقط روح لقنصلية الدولة اللي تبي تروح لها بأوروبا و طلع الفيزة منها .

فيه حاجه ماني متأكد منها .. بالنسبة إذا تبي تروح لأكثر من دولة بأوروبا .. فأنت تحتاج تروح لقنصلية الدولة اللي تبي تجلس فيها أطول فترة أو أول دولة راح توصل لها.

ماني متأكد من المعلومة اللي فوق لكن هي وحده من الثنتين .. ياتروح لقنصلية الدولة اللي راح تجلس فيها أطول فترة أو لقنصلية أول دولة راح توصلها بأوروبا.

ياريت تتأكد من المعلومة إذا عندك نيه تفرفر أوروبا .. لكن إذا بتروح لدولة وحدة فقط فأنت تحتاج تروح لقنصلية الدولة اللي تبي تروح لها.

فيه حاجه مهمه لازم تعرفها عشان توفر على نفسك العناء والتعب والخسائر .. كل جزء من أمريكا له قنصلية تتبع له.. يعني اذا أنت بشمال أمريكا راح يكون فيه قنصلية قريبة من الشمال أنت تتبع لها. خل أعطيك مثال عشان تتضح لك الصورة .. نفترض إنك طالب في ولايه إنديانا وتبي تروح للقنصلية الألمانيه .. يوجد هناك فروع كثيرة للقنصلية الألمانية في أمريكا .. لكن بما إنك من سكان إنديانا ماراح يقبلك الا فرع قنصلية شيكاغو. يعني لو تروح للقنصلية الألمانية بواشنطن راح يرفضونك لأنك ماتتبع لمنطقتهم .. عشان كذا يطلبون منك فاتورة كهرباء أو ماء عشان يتأكدون من العنوان اللي بالفاتورة ويعرفون اذا انت متواجد بنطاق تغطيتهم أو لا.

تقدر تحصل كل المعلومات والأشياء المطلوب تجيبها معك على موقع القنصلية اللي راح تروح لها . نظام القنصليات مو خذني جيتك .. يعني لازم تحجز موعد أون لاين وبعدها تجي ومعك كل الأوراق المطلوبة . فلذلك لا تفكر تروح وأنت ماحجزت موعد أونلاين لأنك راح تخسر فقط عناء المشوار.

أتمنى معلوماتي تكون أفادتك لو بالشيء البسيط ولا تنساني من دعواتك

النازف

^^

يعطيك ربي الف عافيه يالغالي

كفيت ووفيت يالغالي ماقصصصرت

اهممم شي
اذا بتفرفر طلع الشنغن من أول دولة بتروح لها موب أكثر دولة بتقيم فيها

ترى هالنقطة لايستهان بها ياما رجعوا ناس بالطيارة بسبب انهم قالوا بنطلع الشنغن من أي قنصلية وبس

Enjoy it 💐