حوار مكاتب القبولات ارجوكم احذروا منها((مكتب مرزاي؟))؟ و EF هل هناك حل لمشكلتي؟

December 25th, 2014, 10:00 PM

مكتب مرزاي الرياض بجوار عيادات العنايه بالشعر والبشره القريب من اشارة مستوصف الشبلين وفيديو الماسه الزرقاء احذركم منه ... لانه يعطي قبولات مغشوشه او منتهيه بعد اول ترم يمر عليك في امريكا وهنا اي طالب يريد الانضمام للبعثه يدخل في مشكله مع الملحقيه وهي انتهاء تاريخ القبول كما حصل معي وسالوا الاستاذ محمد عبدالعزيز و الاستاذه سلوى والاستاذ محمد صديق في الشؤون الدراسيه في الملحقيه حيث اشعر الان في هذا الوقت ب معاناة كبيره واستيقضت من كذبه كبيره بسبب هذا القبول وانا صاحب عائله وادرس ماجستير .......... هذي قصتي بتفصيل:
انتهيت من دراستي للجامعه بكالوريوس قانون اسلامي واتجهت للانترنت كي ابحث عن قبول جامعه في امريكا ورايت اعلان مكتب مرزاي وذهبت لهم وقابلت سته غير سعوديين من الحبشه والهند والسابع سعودي للاسف ... وبداو في اعطائي الكلام المعسول واخذوا مني 3000 ريال كي يحضروا لي قبول جامعه وللغه وبدوا في المدح في معهد EFوجامعة ميدل تنسي ... وانا بمبدا احسان الظن وجهلي وجهلي وجهلي ....وافقتهم احضروها لي في مده سريعه لاتتجاوز الاسبوع ...
اللغه كانت في سانتا باربرا بعد ان كنت ارغب فيها في سياتل ولكن تفجائت حين اخذت الورق i20 انها للسياتل وقالوا ماعليك موقفك سليم وماهي مشكله ماراح يتسبب لك في مشكله روح لمدينة سانتا باربرا وماعليك راح يحولونك عليهم ... اول ماوصلت الى لوس انلجس لان سانتا باربرا لايوجد فيها مطار دولي.......... لم اجد سواق العائله الذي دفعت للمكتب مقدما من ضمن الفتره الدراسيه وبدات معاناتي لا املك جوال دولي وفارق التوقيت وارسل للمكتب ايميل ومدير المكتب الموظف السعودي مايرد على الواتس اب ثم ارسل لي الموظف بعد انتظار في المطار ثلاث ساعات قال لي الموظف (نعتذر عن هذا الخطا لكن خذ لك تاكسي ورح للمعهد)اخذت تاكسي بقيمة 200 دولار ( اخواني لاتنسوا تحسبوا معي الخساير الماديه ) المهم ذهبت بتاكسي ووصلت بعد ساعه ونصف الى معهدef وقالوا ليش جيت هنا قبولك في سياتل لن نقبلك ... الشي الثاني انت مادفعت لنا الفلوس( طلع الحاصل ان المكتب تكاسل في دفع المبلغ المالي اضافة تكاسل في الاهتمام بالعميل والطالب الي هو انا ؟ اضافة الى عدم قانونية اجرائهم مع دار االهجره في امريكا حيث قالوا المعهد واحد سواء كان في سياتل او سانتا باربرا وهذا كذب وجهل من مكتب مرزاي حسبي الله عليه) (( المكتب فقط ضمن فلوسه وترك الطالب ضايع من غير متابعه)) المهم الموظفه قالت لي لازم تروح سياتل
او تنتظر بعد ثلاث ايام يجي المدير من اجازته ويشوف مشكلتك الفلوس و اختلاف معهدك وقالت انصحك تروح سياتل اختصارا للوقت طبعا الي ترجمي طلاب هناك في المعهد سعوديين واحد اسمه محمد المالكي والاخر اسمه فواد السعيد
المهم طلعت هااايم على وجهي والدنيا اظلمت علي ورحت دفعت في فندق 250 دولار ارخص شي بعد مادفعت 100 دولار للتاكسي ابحث عن ارخص فندق داخل المدينه ... وجلست في الفندق وتوضيت وصليت ودعيت الله ينتقم من هذا المكتب .. المهم نمت وصحيت على وقت الفجر صليت الفجر وقررت اروح لسياتل خوفا من زيادق الصرفيه علي المهم اخذت تاكسي ورحت لمطار سانتا باربرا المحلي 80 دولار تاكسي ودخلت على المطار ووجدت جزائري هناك الله يوفقه ترجم لي وقال مافي رحلات اليوم على سياتل لكن يمديك تطلع من هنا على اريزونا ومن هناك على سياتل وافقت واشتريت تذكرتين كما ذكر لي بقيمة650 دولار وصلت اريزونا وبعدها انتظرت رحلة سياتل ووصلت سياتل والمفاجاه الكبرى ان معهد EF ليس في سياتل كما كذبوا علي اتضح ان المعهد في مينة اوليمبيا تبعد عن سياتل ساعه وربع فذهبت بتاكسي 120 دولار الى اوليمبيا لا اعرف احد هناك استاجرت فندق 128 دولار ليوم وانتظرت االصباح حتى اذهب للمعهد وخلال هذه الفتره اراسل المكتب مرزاي الكذابين يعتذرون ويتعذرون بان هناك خلل في حسابهم البنكي وووو
انتظرت الى الصباح وانا والله مهموم من الذي حصل لي وللاستنزاف المالي الكبير الغير متوقع لكن قدر الله وماشاء فعل
ذهبت الصباح الى معهد EF السيئ في كل ماتعنيه الكلمه من معنى تعاملا ودراسه
ولما وصلت شافوا اوراقي قالوا وين ورقة الدفع قلت المكتب ارسلها لكم قالت موصلنا شي حتى مدير المعهد ستيفن قال هذا المكتب مشاكله كثيره معنا ومع اي طالب يجي من طرفه طبعا قابلت طالب اسمه س الزهراني هو الي ترجم لي ماشاء الله عليه له سنه لغته جيده
عموما قال ستيفن هذا المكتب مشلكله كثيره وقدمنا لللمدير الاقليمي بالسعوديه ايميل عنه ...
لكن في موظفه اسمها بيكي ماقصرت دخلتني الكلاس وقالت خذ لك اسبوعين الى ان يصل ورقة الدفع او انت تدفع واما السكن اذهب سكن الطلاب
ذهبت سكن الطلاب (( اعزكم الله سكن زباله مايسكن فيه انسان روائح ووصاخه غير الاوسائخ الاخلاقيه))
رفضت السكن فيه وقابلت شخص سعودي الله يوفقه فهد الشمري عرفني على طااب سعودي وسكنت عنده شهر ودفعت 400 دولار (( هذا وانا دافع فلوس السكن مع العايله مدة اربع اشهر))
بدات الدراسه وبعد اسبوعين وصل المبلغ وانا تركت المعهد ماقدرت استمر اكثر لانه مايساعد على الدراسه ابدا واخذوا قيمة الاسبوعين وانا حولت لمعهد ممتاز اكاديمي اسمه ساوث بيودجت (( للمعلوميه معهدef المخيس قيمة اربع اشهر 8050 دولار وقيمة ساوث بيودجت ثلاث اشهر ودراسه ممتازه اكاديميه 3450دولار ))

درست في وجيت ارفع خطاب انضمام للبعثه
المفاجئه ؟ قالو خطاب القبول انتهى ايضا فيه خطأ في اسم التخصص الفرعي ........

والان انا اتواصل مع االمكتب مرزاي ولازال يكذب علي ويلف ويدور
وانا الان راح ادفع من جديد الى احد المكاتب هنا عشان يجيب لي قبول في اسرع وقت لان اهلي جو قبلل اسبوع وزادت المصروفات علي لاني كنت مخطط انضم بعد اربع اشهر وشريت التذاكر لاهلي من قبل ست اشهر ارخص
لكن قدرالله وماشاء فعل


وللمعلوميه هناك طلاب هنا يعانون من هذا المكتب? عددهم اربعه وانا خمسه


ختاما جهلي وحسن ظني بهذا المكتب المخادع هو سبب مهم في هذي المعاناة ارجو منكم الحذر منه ومن غيره ...وانا وكلت احد الاخوان لرفع قضيه عليه والمطالبه بالتعويض على كل الي صرفته حتى فلوس التكاسي ولله الحمد عندي لها ايصال .....



وانا مستعد لارسال اي اثبات على كل ماذكرت

• نشر عبر تويتر
• نشر عبر فيسبوك
• نشر عبر جوجل