أول مشاركة ويمكن تكون الأخيرة

January 27th, 2008, 07:54 PM

مساكم الله بالخير جميعاً ....
بصراحة هذه أول مشاركة لي برغم أني مقاطع المنتديات كلها لثرثرتها الزايدة وعدم الخروج منها بالمفيد المختصر ولكن هنا إنشاء الله نقدر نفيد ونستفيد وهذا المطلوب ... عموماً أنا عندي أسئلة كثيرة في سؤال ... كيف ؟
أنا ما أدري كيف بس أهم شيء أنكم تعطوني إجابات مقنعة وأكون لكم من الشاكرين ... طبعاً زوجتي إنشاء الله نوت تطلع بعثة ولا تدري وين تروح في أي دولة وتخصصها فني تمريض يعني دبلوم من معهد صحي وتعمل الحين موظفة في أحد المراكز الصحية الحكومية . وين ممكن تلقى تخصصها هذا بشكل ممتاز ... مرة اقولها في أمريكا ومرة اتراجع وأقولها في استراليا ومرة بحكم أني سافرت لبريطانيا قبل كذا أحنّ لها وأقول بنروح بريطانيا وهي احتارت معي ما قدرت تركز وأنا ما عندي سالفة (بيني وبينكم) وش رأيكم وشهي الدولة اللي ممكن تكون أفضل لنا من ناحية الحياة فيها ومن ناحية الدراسة ... لا تقولون راجع الموقع الفلاني وإلا الرابط الفلاني ترى ما أعرف اتفلفس كثير (بس شويه) ....
والشيء الثاني اللي أبغى أسأل عنه : وش تعرفون من مكاتب تقدم خدمات دراسية كويسة في الرياض وتجيب لي الموافقة وتضبطلي أموري في الخارج بشرط تكون أسعارهم رخيصة (لأنه ما فيّه حيل أدفع زيادة) أبغى أوفّر لسفرة المستقبل (واحد طموح يسمع بالابتعاث) ....
إذا افدتموني بالديتول (يعني التفاصيل بالعربي) والله أني لأخدمكم بعيوني في المستقبل بس لا تطلبون أي شيء لأني متمرمط في ديون إلى النخاع وودي أنحاش ببعثة ( تصريفة حلوة) ...
على فكرة تراني قررت أكمل دراستي إذا ربي كتب وسافرت زوجتي ورحت معها مرافق بالرغم أني أعرف أن الاشكال هذه اللي مثلي حدها بسطة عند مسجد وإلا بياع ملفات علاقي عند الأحوال بس تفائلوا بالخير تجدوه ... المهم كيف أقدر اكمل ؟ يعني أقدّم أوراقي من هنا وإلا من السفارة السعودية للدولة اللي بنروح لها وإلا وش الطريقة ؟
الله لا يحرمنا من بعض خصوصاً وقت المصالح (ايه هيّن تلقون مصلحة من وراي) وتراني أنتظر منكم الرد بصابر الفرغ قصدي بفاغر الصبر .... تحياتي ....

• نشر عبر تويتر
• نشر عبر فيسبوك
• نشر عبر جوجل