للمبتعثين الجدد فقط : توضيحات ونصائح سريعة

السلام عليكم ورحمة الله وبركاته
هذه نصائح وتوجيهات سريعة وتوضيحات،لأشياء هي بالتأكيد قد تخفي عليكم،لأنها كانت هذه التوجيهات عبارة،عن اتصالات تأتيني من زملاء ،اتصلوا يسألوننا عن أشياء،تخص الابتعاث،كتبتها بأسلوب عامي،ليس ضعفا في اللغة العربية،فأنا مدرس عربي سابقا،ولكن لأني قد أطيل فيها،فقارئها قد يشعر بالملل،الضمان المالي،معهد اللغة ،التأشيرة، الفيزا،الجامعة ، الملحقية ،الحساب البنكي،،تغيير الدولة ،محتار بين الدول وش اختار، الحجاب ، المحرم،وش اختار تخصص؟ ،ترتيب أمور السفر ،،تساؤلات و أشياء كانت قد خفيت علي قبل سفري،وللأسف أن كل من يسافر ولا سيما القدماء في،دول الابتعاث من كثرة ما يكررون نصائحهم لزملاءهم، يملون فيحسون بالملل فتأتي مرحلة لا يستطيع أن يقدم نصيحة واحدة فيحس بسهولة الموضوع بينما المبتعث الجديد هو في دوامة من أمره وأحيانا يحق له ذلك فأعرف شخص :،نصف حياته الدراسية في بريطانيا غياب
والسبب : استقبال طلاب ،والبحث لهم عن المعاهد ،وما إلى ذلك سوف أتكلم في هذه الصفحات عن رؤوس أقلام ،في كل شيء حتى تستقر ،في شقتك ..
في البداية أحب أبارك لك هذه الفرصة بالابتعاث والتي لولا توفيق الله سبحانه لك ثم وجود هذا البرنامج،تموت وتبطي ما قدرت تطلع تدرس على حسابك،لأن الدراسة تقريبا لمرحلة البكالوريوس،تكلف نصف مليون أو أكثر،في الدول الغالية،يعني أغد رجال واغدي حرمة وشد حيلك وحاول تستفيد من كل فرصة وكل لحظة ولا تقول على حساب الدولة طز،خلني أنبسط : واعتبرها سياحة ،هي فرصة فاستغل كل لحظة لتأخذ فيها فائدة ،أولى هذه النصائح لا بد أن تعلم أنك مخلوق لعبادة الله سبحانه ليس لتحصيل شهادة ماجستير أو دكتوراه،يعني لا يجي بكرة أشوفك رازنن وجهك في بار وإلا نايت كلوب وتقول زملاي،يقولون اللغة بالممارسة مو بالمعاهد والكتب،وهذا من تلبيس إبليس وأعوانه من الناس الفاشلين،اللي لما يفشل ما يتعلم لغة يقول اللغة في البارات،إن شاء الله ما تتعلم لغة طول عمرك ، إذا تعلم اللغة في معصية الله .لن أتكلم بخصوص اللغة بقدر ما أتكلم في نصائح سريعة جدا ..علها أن تنفع ولو بشيء قليل..،لا شك أن هذه الطفرة طفرة البعثات جديدة في هذا العصر بعد عصر الملك خالد رحمه الله
وبما إني طلعت بعثة وتورطت لأني مالقيت نصائح أو توجيه من أحد
إلا سكنت مع واحد يرسلني للبقالة
وهو منسدح ويقول عشان تتعلم يلعب علينا
فهذا الشيء مازال يبكيني لحد الحين
أول شيء تسويه من الحين مو بعدين
من الحين :
تروح تسجل في أي معهد لغة إنجليزية
بتقول ليش وأنا أصلا لما أطلع بدرس لغة ليش اتخسر الحين
بقول لك عشان تنفض الغبار اللي على عقلك شوي
لأن البعض مخلص الثانوية له عشر سنوات يعني من عشرة سنوات ما سمع ولا كلمة إنجليزية
لما يروح يدرس بمعهد اللغة في الخارج يجلس شهرين ما يفهم وهذا اللي صار لي
أنت ضيع هالشهرين بالسعودية عشان لماتطلع ما تنصدم بعقليتك
كذلك وهو الأهم أغلب المعاهد ما فيها مستويات متدنية يعني تتعب عشان تلاقي يمكن يقبلون زوجتك (لأن بطبع البنات أفضل بالقرق والحش والنم فهن دائما أفضل في تعلم اللغة من الرجال )
يعني تخيل يقبلون زوجتك وأنت لا!
فشيلة شوي بحقك او هي تكون في مستوى أعلى منك والله إن تذلك قدام الله وخلقه
يعني أغد رجال وشد حيلك من الحين
حبذا قبول اللغة اللي معاك يكون أكثر من سنة
عشان الفيزا تكون أكثر من سنة
لأنها لو كانت ست شهور راح تضطر غالبا ترجع عشان تجددها بعد ست شهور وهذا يمكن يكلف عليك
بالنسبة للملتقيات :
باختصار اللي راح يكون فيها
هي نصائح وتوجيهات وإرشادات
لشيء كبير أنت مقدم عليه
لأنهم يعرفون إن بعض الناس طالع ما يدري
وش الطبخة
فسووا هذه الملتقيات
لا يجيك مرض نفسي،
لا تطفش ،
لا تضيع ،
وش تسوي لماتروح هناك
الإجراءات اللي راح تصير ولازم تسويها
بعدها يحطون لك أكل حلو لا وصيك تأكل زين
بتموت ما تاكل زيه >>>متحسف كان مريض
بس هذه باختصار
وأنا أختصرها لك بأسلوب واضح
أنت طالع لدراسة في بلد يتكلم غير لغتك
إذا تبغى تدرس ..لازم تتعلم لغة
البلد :
إذن أول شيء راح يدرسونك لغة
لحد ما تكون على درجة عالية
بعد ذلك تبدأ بالدراسة
إذن لو كان معاي لغة قوية
هل أحتاج لدراسة لغة
لا طبعا ما تحتاج
والعكس صحيح
فأنا أعرف مدرسين لغة إنجليزية
طلعوا فضائحنا
جايين يدرسون ونفس مستوى اللي ما يعرفون
عموما :
بعد ما تنتهي من اللغة تكون انتهت قيمة
شيء اسمه (قبول لغة ).
وهذا دائما نسمعه..
عندك بعد كذا (قبول جامعة مشروط : او غير مشروط).
الوزارة جايبين لك ورقة إن فيه جامعة كذا راح تقبلك يا فلان
بشرط (إنك تجينا معاك لغة إنجليزية ).
هنا لما تدخل الجامعة يكون شيء اسمه
قبول (جامعة )انتهى
عودا على بدء
بعض الإجراءات
خطاب السفارة
الضمان المالي
الفيزا(التأشيرة)
أمر الركاب
تذاكر السفر :
بمجرد تستلم أوراقك في الملتقى
تذهب إلى الوزارة:
راح يعطونك : خطاب للسفارة
عشان تطلع لك فيزا أو تأشيرة :
والفيزا كلمة إنجليزية
بالعربي اسمها تأشيرة :
هذه إذن بالسماح
مثلا بالسعودية : نسمع كثير
من العمال أبغى فيزا عشان أنا فيه جيب اخو هنا
بعض الدول لا تسمح بدخول شخص
إلا بهذه الفيزا لسبب معين
مثل حج أو عمرة أو عمل في السعودية
أو سياحة في كثير من الدول
بعض الدول شغلت طيارتك وأمش
ما فيه فيزا
الدول الأوربية :كل شيء مرتب
وأنت جاي بفيزا طالب : تدرس
أوكيه
أخذت خطاب السفارة
والضمان المالي للسفارة
الضمان المالي معناه :
أحنا يا وزارة التعليم
متكفلين بتدريس فلان
ومصاريفه
يعني ما راح تبلشون فيه هناك بدولتكم
تودي هالأوراق لسفارة دولتك
وتدفع فلوس التأشيرة
ولا تضيع الفاتورة
عشان تعطيها الملحقية مستقبلا
يرجعونها لك
وكل سفارة حسب إجراءاتهم
في سرعة استلام الفيزا
مثلا بريطانيا :
ثلاث أيام

تستلم الفيزا
تروح للوزارة
يعطونك قرار الابتعاث
إنك خلاص مبتعث
وأمر الإركاب
يعني خلاص روح أحجز التذكرة
من الخطوط اللي تبي
من مكتب الطيار طبعا .
بالنسبة لتجهيز الشطنة
لا تغلط نفس غلطي
أول شيء لازم تشتري شطنة أصلية مو بالمطار تتكسر وتتشقق من كل جهة
وتشتري كيس زبالة عشان تشيل عفشك
دور شطنة حليلة ولا تكشخ بزيادة تشتري طقم جفنشي وإلا بربري تسوي نفسك ولد عز وأنت متسلف عشان تشتريهم
بالنسبة لللأغراض أغلب المدن والدول اللي عليها الابتعاث راح تضطر تسافر بطيران (العلة ).والمشكلة
عشرين كيلو : أنا بس كنت شايل كليجا
وزنها عشرة كيلو
ودرزن شامبوا : عشرة كيلو >>يسمع بغلاء أسعار بريطانيا >>>مضحوك عليه
لو يزيد كيلو خلوك قدام الله وخلقه ترميه بالزبالة
وشفت بعيوني واحد يرمي تمر بالزبالة
ما علينا ..
تروح لمحل السباكة وتشتري ميزان حق الكيلو وتسوي وزن للشطنة عشان ما تتورط بعدين
ترى راس ماله عشرين ريال
كذلك لا أنسى الشطنة حبذا تكون خفيفة الوزن قبل العفش مو تاخذ وحدة وزنها عشرة كيلو لو تاخذها فاضية رجعوها المطار قالوا العفش زايد
وأهم شيء تكون عربية تقدر تسحبها بأي مكان ولازم الكفرات تكون كبيرة لأني اشتريت شطنة كفراتها صغيرة ضحك علي هندي قال (هاز أربعة كفر مافيه منه أبد إلا حبة واحد )يوم حملتها عفش خفست جلست أسحبها سحب فشلتني بالله وخلقه
بالنسبة للأغراض وأيش تشتري
لا تشتري شامبوا وعطر ودررزن شرابات
ومفارش نوم
خذ الأشياء الضروري والهامة
للنساء مثلا : العبايات والحجاب
هذا الشيء العام بالنسبة للبنات العبايات الطويلة هذه اللي تفصل تقل جاكيات أكيد هنا ما فيه إلا نادرا على الاستايل
الهندي
يعني حبذا البنات يكثرون منهن
طبعا هذه للبنات اللي ربهم في كل مكان
>>>>>>>>يعلق على اللي راح يكشفون
للرجال : قهوة وهيل (والشاي لاتاخذون تراه موجود وأحسن من اللي عندي تقل غسال شاي >>>يحب الشاي العاقد )
يعني الأغراض خلها أساسية : ومهمة
وخفيفة ترتاح في شيلها وتنزيلها
وما تتعب هناك
أنا من الأغلاط في حياتي
ما كنت أعرف أحد في بريطانيا
وأسمع إنها غالية
رحت عبيت ثلاث شناط كبار
حتى الجنوز أشتري بالجملة
على إني بحياتي ما لبست جنز بالسعودية
ومن المواقف الحقيقية والمضحكة
صارت لي شخصيا:
يدل على إني ما معي ذوق ومسكين
جالس أدور جنز كشخة
وأدور الرخيص طبعا
كنت في محل قسمين
قسم رجالي وقسم نسائي
وأنا من وقتها صرت راقي
ومنظم ومرتب
جالس أدور جنز كويس
وأسمع بالماركة
عشان ما ينقطع ولا يخرب من الغسل
وإن كان نظامي الجديد الجنز لا تغسله
لأن كل شيء عندهم موضة
لو جنزك مشقوق
موضة
لو كان وسخ موضة
قصير موضة ، ضيق موضة
هذا أحسن شيء عجبني
نكمل السالفة : وكنت ماشي بالمحل
وسرحان وأدور
وأتفرج على البناطيل
وأقول الله يخلف على شبابنا
هذا من يلبسه
وكل ما شفت جنز : قلت وع حق بنات
لحد ما سرحت شوي :
طلعت لي تنورة : لونها وردي
دريت إني بالقسم النسائي ومن اليوم أفتش في بناطيل الحريم
هههههههههههههههههههه
التفيت يمين يسار
ما أحد شافني
تلطمت ومشيت
حبذا تاخذ لاب توب معك ضروري
وياليت ما يكون فيه مسنجر عشان ماتدق حنك كل يوم مع أهلك..... تبي تسولف أجلس في بيتكم احسن لك.
بالنسبة للكلام المعروف إن مثلا بريطانيا غالية نار موت
ولا تروح تسوي زيي
تشتري درزن صوابين ودرزن مقصات أظافر ودرزن شرابات وتبلش فيهن بالمطار وتبلش فيهن في تسحيبهن في الشوارع وتتكسف
لحد الحين خوياي يحشون فيني بالله وخلقه
يقولون عادل لما جاء : جايب معاه درزن زنوب نعال حمامات : الصدق إني جايب نعال حمام بس مو درزن عاد
جبت كم حبة بس >>>فضيحة

أعيد وأكرر :خذ الأشياء الأساسية ولما مستقبلا تبغى تشحن عطني مس كول أعلمك وشلون تشحن لأني بعد تكسفت بالشحن
شحنت بشركة حسبي الله عليهم
أخوي دفع بالسعودية ألف ريال تقريبا
وأنا دفعت هنا ألف ريال
زد على ذلك اسبوع كامل أغيب من المعهد
وأروح أدور مترجم
وأغيب واحد من زملاي
عشان نخلص إجراءات الشطنة
ما أنسى ذاك الأسبوع الكئيب
لدرجة قلت خلها تنقلع الشطنة باللي فيها
قال واحد لا
لازم تستلمها غصب عليك
وكل يوم مئة ريال غرامة تأخير
مشاكل
عموما كل شيء متوفر وأحسن من اللي عندنا
إلا الكوسة والليمون الأسود >>>>>دوره لين داخ ما لقاه
بعد ما ترتب نفسك وعفشك لا تنسى تكتب وكالة لأحد أخوانك على كل فلوسك ومستلزماتك عشان مو كل يوم يدق عليك اكتب لي وكالة مدري أيش ويشغلك
حبذا يكون معاك ورقة من التأمين السابق على سيارتك إن ما صار عليك أي حادث باللغة الإنجليزية
وترجم رخصة القيادة إنجليزي
عشان لو بغيت تشتري سيارة تكون جاهز.
ضروري يكون معاك فلوس لا يقل عن عشرة ألاف بشرط يكون السكن سبق ودفعت حقه وكل شيء
هذه للمصاريف لأن المكافأة ما تتأخر بس الاحتياط واجب
طبعا حساب الراجحي يصرف عادي وخل معاك كاش بما يعادل ألف دولار حسب عملة الدولة
كذلك لا ننسى نقول لك ممكن تتعلم أطباق سريعة غير البيض المقلي ..لأنك بجيك وحام من البيض المقلي ،والتوست بالزبدة، وأنا ممكن أعلمك طريقة البيض المقلي بالمكروويف ...لأنها من إبتكاري فالحاجة تولد الابتكار..
في هذا السياق أقول لك أترك الدلع وطبخ أمي وطبخ زوجتي هنا لازم تتنازل عن أشياء كثيرة مقابل العلم والهدف اللي جيته عشانه ..لا يصير بطنك مانع لك من العلم ..وأذكر كنت أوصي أحد الزملاء الذي تهاوش مع خمس عوائل من زود الدلع ، لأن الولد ولد نعمة ماتعود على المرمطة والشقاء ..كنت أقول لها ياخي لازم تتنازل عن أشياء كثيرة ..
أنا عندك شفني تنازلت عن أشياء كثيرة ، تخيل سكنت عن عائلة ما فيه باب للحمام ومع ذلك صبرت ؟!
قال هذه قلة حياء مهوب تنازل >>>>>>>وهذه ثالث مرة أنلطس على وجهي في الحياة...
فالمرة الأولى كنت في بلاد (الصعيد من مصر ): وكنت راكب دراجة تشبه السيارة تسمى (التوك توك )وأنتظر المفتاح
من زميلي أبغى أجرب سواقتها : فجاءت ابنة عمه الطفلة فقالت (بتعرف تسوئها : قلت أنا بالسعودية أسوق طيارات موعاد دباب : قالت أنت ماتسوق وولا حتى ....حمار : بللهجة المصرية... والصدق طاح وجهي ...
أما اللطسة الأولى في الحياة مبغى أقولها ....إلا اللي يلزم بقولها له بيني وبينه..
نرجع لمحول حديثنا :
أول ما تنزل من الطيارة ، طبعا ما ننسى نقول قبل ماتطلع من الطيارة لبعض الدول يلزمك : كشف طبي ..لا أحد يقول لك مو لازم ..خليه معاك احتياط ...
بمجرد تاصل : دولة الابتعاث
راح تبدأ النصائح بمجرد تدخل الكلية : أول شيء تسمعه : شف لا تكلم سعوديين ..لو ينطحك أحد بالشارع يسلم رد بالإنجليزي .....هذه أول نصيحة بتسمعها : وإذا قالها لك أحد قل أقول لايكثر ......لأنها صارت قديمة ومملة بنفس الوقت ...الديرة اللي ما تتعاضد فيها مع ناس بتطلع أنت الخسران بالنهاية ...كل شيء باعتدال وتوازن ..بس مو معناه إنك تفلها ..وأربع وعشرين ساعة ...طلعات وكشتات ..لا ...ودق حنك وسوالف ...وهذه هرجة أبوي الله يطول بعمره
لأني كنت بتزوج : قال وبتأخذها معك ...قلت أجل أخليها .......قال عشان تدق حنك أنت وياها كل evry time
عز الله ما تعلمت ....يعني أبوي حرمني يزوجني عشان اللغة.>>>>>يقول الله يلعن اللغة يا شيخ ..
كذلك نصيحة للبنات : كذلك يكون لهم علاقات مع بنات جنسهن من البنات المعروفات يكون قروب يطلعون يغيرون جو
ويتاكتفون للتناصح بينهم .....عشان الوحدة ماتجلس شهرين وترجع مريضة نفسيا : نبلش فيها بالمستشيفيات والعيادات ..ويقولون أهلها شافوها ذكية وسووا لها غسيل مخ ..أو عطوها أبرة مهلوسة لأنها مبدعة وهي دميجة ..ماتدري وين الله حاطها ....
كذلك من النصائح اللي راح تسمعها من زملاءك في المعهد : على طول ( شوف ترى المعهد ما يعطيك إلا نسبة 20% والباقي عليك ...راح تسمعها من كل واحد جاء قبلك لو بيومين ......هذا إذا مو بنفس الطيارة جاي معاك ومسوي فاهم).
فعلا المعهد ما يمتلك قرص مرن يحطه داخل دماغك وتصير فاهم باللغة ...يلزمك مجهود جبار وبالذات للي جايين مثلي ما يفرق بين C ..S
A..E
P..B
حبذا تقسم وقتك بعد الخروج من الكلية على مراجعة الأساسيات ..وتعويد نفسك على القراءة والكتابة ، التي نغفل عن أهميتها....ونومة القايلة يا ليت تتركها ..لأن ما عندهم

يتبع >>>>>>>>>>>>>>>



بعد اربع سنوات من كتابتي للموضوع اعود واقول امريكا هي افضل دول العالم
فمن حصلت له الفرصة فليذهب ولا ينظر ولا يستمع لاي شخص يحاول منعه
من هذه الدولة العظيمة

هالكلام ..
ونومة الضحوية والظهرية سحبة وحدة أنساها .....لأنك لو قمت الساعة 2 مثلك بالقصيم وإلا بالرياض عقبال ماتبلع لك بلعة وتصلي تطلع السوق تكون الساعة 5 يكون السوق مسكر والبارات مفتوحة ...تجينا ملزوخ أو ضايقن صدرك ...
قم بدري وعين (بتشديد الياء ) وعيني من الله خير . (وبورك لأمي في بكورها ).
قد تكون أول مرة تسافر لدولة غير مسلمة : فيها من الإنحلال الشيء الكبير : لذلك سوف ترى مالم تره قبل..
سوف ترى : اثنين يبوسون بعض بالشارع : مو تقول واااااااااو حراااااام بروح أنصحهم ...: بقول مالك دخل ..اسكت وخلك بطريقك ...
وإلا يجي واحد مشفوح :يقول بروح أبوس معاهم : وقتها بجي أتوطأ في بطنك ...
في المعاهد دائما اختلاط : وشبابنا للآسف صنفين : صنف يتهاوشون مع بعض عشان بنت ..تقل بالثانوية : بقول عيب عليكم خليكم ثقل شوي ..
وشباب يغلي من داخله : يشوف البنات وما معاه لغة يتفاهم معاهم : بقول إن فكرت تتعلم لغة عشان بنات ، أحلق شنبي إذا تعلمت ...شد حيلك وأغد رجال.
أحب أضيف نقطة للبنات خاصة : أنه بالإمكان تجمع خمس ست بنات ..وإجبار المعهد (أو وإرغامه )على فتح فصول نسائية مغلقة : وهذا موجود لدرجة يلزمون المعهد بمدرسات إناث .........هذا شيء طيب ...ولا تجي وحدة تقول لا نبي مختلط عشان نمارس اللغة مع الرجال ....ترى مو ناقصينك حنا ...طلعتي من المدرسة الثانية عشرة بالقرية اللي ما بها ولا بقالة ..ومسوية فاهمة هنا وتسمعين بالتحرر..وتلاقيها بالليل : تصارخ من الخوف ماتقدر تنام (تسمع بالجني الكافر إنه ما يخاف الله ).إغدي حرمة ..وساعدي زميلاتك على الخير....
بالنسبة لتغيير الدولة :
لا نختلف في أن أمريكا أفضل دول
لكن : وضعها الحالي السيء
وتضيققها على الطلاب ترك الجميع يهرب منها
وأعداد هائلة حولوا منها إلى بريطانيا
لذا لا أنصح فيها .
فنحن سوف نقضي وقت كبير في الدراسة
قد يتجاوز الست سبع سنوات
لذا لست بحاجة لأحد يضيق علي عيشتي.
إذن الدولة الثانية بريطانيا :
ويحتار المبتعثين بين بريطانيا وكندا
كندا لا تستطيع أن تأتي بمكانة بريطانيا
أو حتى قريبا منها
بريطانيا على مر العصور اشتهرت بالتعليم
ويكفي شهرة : أكسفورد وكامبردج
من منا لا يعرفها
وهي دولة تكتظ بالمسلمين واللحوم الحلال
والمساجد ودولة نظامية تأخذ حقك بالقانون
وتمارس عبادتك براحة تامة.
لكن مشكلتها إنها دولة مملة : للذين يريدون الدراسة
بالسياحة ..فهي تساعد على الدراسة
ولا تساعد على السياحة .
من مميزاتها قربها من السعودية
طيران سعودي مباشر لها .
اعتيادهم على الطلاب ..
كثرة الأندية السعودية فيها .
قوة الشهادات فيها .
كندا اشتهرت : بالزمالة الطبية فقط
بعدها
شدة برودها
أشياء تجعل الواحد يستخير في غيرها
وهي عموما ممتازة
بقية الدول جيدة
كاستراليا
ونيوزلندا
.
بالنسبة لتغيير التخصص:
التخصص شيء مهم
ونحن فتحت لنا أبواب بعثات
ولم نعلم ما نختار من تخصص
لدرجة البعض اختار تخصص لا يعرف عنه شيء
لابد أن تحدد مستواك وهواياتك وما يليق بها من تخصص
مع المنطقية شوي
مو يجي واحد متخصص مكياج وتجميل بشرة
أو تجي بنت متخصصة مكانيكا سيارات
لازم الجنس يحدد كذلك التخصص
كذلك أذكر قصة واحد
طلع لأمريكا يدرس
وكان يسمع إن فلان تخصص تخصص نادر
وكل الدول تطلبه
راح تخصص الرجل : هندسة شلالات وأنهار
راح يقدم على شركة بالسعودية
قال المدير
شوف روح من تبوك
لين نجران
إذا لقيت أنهار وشلالات
تعال أوظفك هههههههههههه
هذا الجزء الأول من التوجيهات
والنصائح
بكتابة عفوية
وراح ينزل الجزء الثاني إن شاء الله
عادل العتيبي



الجزء الثاني :

يوم سكنا عند شخص ضفنا الله يجزاه خير لين لقينا سكن


http://www.mbt3th.us/vb/forum66/thread132810-2.html

الحين بعد سنتين صرت اجيب قبولات اللي يبغى قبول يراسلني :(

بالنسبة لتغيير التخصص نسيت أتكلم فيه >>>>>يا شين اللي يكتب وهو ميت جوع

اختيار التخصص: يحتاج لكثرة قراءة

مثلا أنا عندي مجموعة تخصصات : ما أدري أتخصص أيش؟

أجلس فترة ما أنا أدرس لغة إنجليزية

أقرأ في هذه تخصصات : الإدارة ، التسويق التمويل ، التأمين ، التجارة الأكترونية

سوف تجد نفسك بعد شهرين ثلاثة من القراءة :

تميل لتخصص معين ..بشغف

وتكره بقية التخصصات : إذن لابد أن تتخصص ما تحبه وتميله له ..

أرجو أن أكون أفدت بدون ملل

اشكرك صراحتن والله اني استفدة من موضوعك وفي انتظار الجزاء الثاني

اشكرك ياااخ سمير ومارايك في فرنسا

فواز الجميعان : إن شاء الله أكون أفدتك فعلا

شوشو 666 : فرنسا حسب ما سمعت إنهم متعصبين مرة ، هذا شيء

وسمعنا كثيرا : عن منعهم للحجاب ......

والأدهي والأمر : اللغة :

ماراح تستفيدين منها أي شيء : لأن أي تخصص يريدون : تخصص + لغة فرنسية :

زوجة أخوي : صار لها سبع سنوات : تدور وظيفة ، متخصصة آداب فرنسي ...مو لاقية

إلا أماكن كلها رجال.......

الفرنسي للرجال مناسب ........لكن للنساء والله اعتقد ما ينفع لحد ما

لأن الهدف من الدراسة : التخصص : عشان الوظيفة ....بمعنى لو رجعت بتخصص مو كويس ..مالقيتي وظيفة فيه ..........عادي

معاك شيء ثاني : لغة إنجليزية .....ممكن يساعدك في الوظيفة

وأغلب المبتعثين الهدف عنده اللغة وليس التخصص ماجستير ....

فاللغة بحد ذاتها داعم قوي على الوظيفة مستقبلا

جزاك الله خير والله يجعله في ميزان حسناتك من جد نصائح في قمه الروعه
من جد اعجز عن الشكر والله يعطيك العافيه
بس عندي سوال انت وش تخصصك هناك

جزاك الله خير
التعليم بالترفيه خخخخ
والله من جد ألف شكر لشخصك الكريم

مشكوووووووووووووووووووووور اخ سميرر القائك للموضوع وبساطتك بالتعبير
لقيت كل الفايده منكــ
شكررااا وننتظر الجزء الثاني

صعبه التغيير لبلد آخر