هل يحق للمعيد المبتعث ان يحصل على قرض من بنك سعودي او سيارة اقساط خلال فتره ابتعاثه

أسألتك مره دسمه ^_^

بفيدك باللي أعرفه و متأكده منه

إن ممكن تسافر و عليك قرض لأن البنك راح يخصم القرض من باقي الراتب

انشاء الله حد يفيدك بباقي استفساراتك

بالتوفيق

شكرا على الرد اختي

واتمنى من لديه معلومات اكثر يفيدنا

وشاكر المرور للجميع

ثلاث شهور بعد تعيينك ويعطونك قرض ويمكن من اول يوم البنوك تبغى تحرك السيولة

وممكن تاخذ القرض قبل ابتعاثك أما أثناء الابتعاث ماعندي علم

بالنسبة للاوراق المطلوبة على مااذكر تعريف بالراتب بعدين يعطونك اوراق تعبيها
وفيه من ضمنها تثبيت الراتب هذي توقعها من عند ادارة شؤون الموظفين هذا في حال
ان البنك يشترط ان راتبك ينزل على نفس البنك ..

اما الحد الاقصى للقرض يعتمد على راتبك الصافي وتحسبها بالشكل التالي
اول شي لازم تعرف ان نظام مؤسسة النقد لا يسمح للبنك ان ياخذ اكثر من ثلث راتبك شهريا
ولهذا السبب يمكن مايعطونك قرض وانت مبتعث ( أقول يمكن ماني متاكد )
ثاني شي لازم تحدد نوع القرض فيه قرض شخصي وهذا اقصى حد للسداد خمس سنوات
وفيه قرض عقاري وهذا لفترة سداد اكثر من خمس سنوات
والفائدة تفرق جداا بين النوعين

خلنا نحسب الحد الاقصى للقرض الشخصي بالنسبة لراتبك
اذا عرفنا ان البنك لا ياخذ اكثر من ثلث الراتب نشوف كم يساوي ثلث الراتب بالشكل التالي
ثلث الراتب = ( صافي الراتب * 33.3 ) / 100
الحين طلعنا ثلث الراتب نقوم نضرب ثلث الراتب بعدد الشهور لخمس سنوات ( 60 شهر )
ورح يطلع لنا كم المبلغ اللي يمكن للبنك اعطاءه لك والمعادلة كالتالي
الحد الأقصى للقرض الشخصي = ثلث الراتب * 60
ونفس الطريقة للقرض العقاري


فيه شي مهم يغفل عنه الكثيرين وهو اهم شي اللي هو موضوع الفائدة
ولازم تسال البنوك وتشوف اقل نسبة فائدة عندهم بأي بنك

ماهي الفائدة ؟
الفائدة يحددها البنك بالنسبة ، هذه النسبة تحسب من اجمالي القرض اللي تنوي انك تاخذه
وتضاف عليك عن كل سنة سداد

البنك رح يسألك على كم سنة تبغى تسدد
سنة أو ثلاث سنوات أو خمس سنوات
وبناء على المدة رح يحدد لك النسبة ( لكن لابد أن يكون لديك القدرة على السداد خلال هذه المدة
من خلال استقطاع ثلث راتبك )
مثلا يقول اذا تبغى على سنة رح تكون الفائدة 2.7
اذا تبغى على ثلاث سنوات رح تكون الفائدة 3.2
اذا تبغى على خمس سنوات رح تكون الفائدة 3.4

بعدين يحسب الفائدة السنوية من اجمالي القرض يعني لو كنت تبى 100000 على ثلاث سنوات
( مع الاخذ بالاعتبار ان البنك لا يستطيع ان ياخذ اكثر من ثلث الراتب )
( 100000 * 3.2 ) / 100 = 3200 هذي قيمة الفائدة السنوية
يعني رح يكون مجمل الفاائدة عليك 3200 * 3 ( اللي هي ثلاث سنوات ) = 9600

النقطة المهمة اللي لازم تلاحظها واللي يغفل عنها الكثيرين
أن كل سنة لسداد القرض عليها فائدة وايضا اذا كثرت السنوات وانت عندك القدرة انك
تسدد بسنوات اقل رح تزيد على نفسك نسبة الفائدة

يعني اذا انت قادر تسدد على ثلاث سنوات لا تقول لا أبغى اخليها خمس سنوات عشان
أخفف على نفسي القسط لانك بهالشكل رح تزود عليك النسبة وعدد سنوات الفائدة
وعشان تتاكد نحسبها على خمس سنوات ونشوف الفرق

( 100000 * 3.4 ) / 100 = 3400 هذي قيمة الفائدة السنوية لاحظ زادت 200 ريال
يعني رح يكون مجمل الفاائدة عليك 3400 * 5 ( اللي هي خمس سنوات ) = 17000

أتمنى وضحت الصووووورة وانك فهمت علي

فيه بعد رسوم ادراية ألف ريال على اجراءات القرض احيانا البنوك اذا كانت مسوية عروض تلغيها
بس الغالب انها موجودة يعني لازم تسال البنك

اخيرا .. نصيحتي لك ان تبتعد عن القروض الربوية وابحث عن قرض موافق للشريعة وفي الغالب يكون عن طريق التورق الحقيقي
التورق البنك يشتري بضاعة ( أسهم ، سيارة .. الخ ) ويبيعها عليك وانت يكون لك كامل الحرية في التحكم بها يعني تبيعها متى مابغيت
طبعا الاسهم هي اسرع طريقة
واحذر من البنوك اللي اجراءاتها كلها ورق على ورق ( يبيعون عليك ورق وبعدين ترجع انت تبيعه عليهم بسعر اقل ) لان هذا تلاعب
واستهجان للشريعة

ويمكن البعض يتساءل عن الفرق بين التورق واخذ قرض ربوي على طول والجواب
ان التورق يدخل فيه طرف ثالث وهو الطرف الذي اشترى البنك السلعة منه وقد يكون الطرف الذي أنت تبيع عليه السلعة وهذا فيه
نوع من تحريك الاقتصاد ، اما الربا فهو بين طرفين فقط
( وأحل الله البيع وحرم الربا )

وبالتوفيق يارب ..

يعطيك الف عافية اخوي مستفسر مستعجل .. عزالله انك كفيت ووفيت
والله يجزاك الف خير على هالمعلومات القيمة

تقدر تاخذ بس قدم قبل ابتعاثك لان نظام مؤسسة النقد يشترط على البنوك انها ماتأخذ اكثر من ٣٣٪ من اجمالي راتبك .
الشي المهم لازم يكون نص راتبك الاساسي اللي ينزل لك من مرجعك خلال فترة ابتعاثك يغطي قسط القرض عشان ماتتورط معاهم ويجمدون حسابك او انك تضطر تسددها لهم من مكافآة البعثة .
بمعنى:
نفرض انك معيد ع المرتبة الاولى راتبك الاساسي: ٥٠٢٠ ريال تقريبا مع البدلات الحالية ممكن توصل ١٠.٠٠٠ تقريبا.
البنك ممكن يعطيك على هذا الاساس انك ممكن تسدد شهريا ٣٠٠٠ ريال تقريبا. ع حسب السنوات اللي غالبا تكون ٥ سنوات
اذا ابتعثت تحسم منك البدلات كلها ويصرف لك نص راتبك الاساسي مع خصم التقاعد : تقريبا ٢١٠٠ ريال! وقتها تصير مديون للبنك شهريا بـ ٩٠٠ ريال! واذا تاخرت عن التسديد بيجمد حسابك ووتعطل.
الافضل انك لما تقدم ع طلب القرض تتأكد من الشؤون المالية في مرجعك كم بالضبط ينزل لك خلال بعثتك وعليه ابنى اقساط القرض.
والبنك ماله دخل بعد القرض كم نقص من راتبك دامه يغطي لهم قيمة القرض، مثل ماقال لي موظف بنك الراجحي.

مشكور على المعلومات المفيدة وماقصرت .. ويعطيك العافية .. هل عندك خبر كم راتب يصرف كقرض هل هو ١٥ راتب ام لا ؟ حاجة ثانية كم نسبة الفائدة حاليا لدى البنوك

السلام عليكم و رحمة الله و بركاته,

حسب علمي أقل البنوك فائدة في القروض بنك البلاد, و هو أبعدها عن الحرام و الشبهات,

مثلًا إذا تبي منهم 155 ألف ياخذون منك فائدة 29 ألف تقريبًا, و إذا تبي 100 ألف ياخذون 18

ألف تقريبًا. طبعًا كلامي إذا تبي السداد على خمس سنين, إذا تبي أقل من خمس راح تقل عليك

الفائدة, و للمعلومية أطول مدة خمس سنين. هذا حسب معلوماتي القليلة.

بعض البنوك تنهب الواحد نهب, والله المستعان.

وفقك الله و يسر لك الخير حيث كنت.

مشكور وماقصرت على الفائده العلميه والله كان مشغلني هذا الشي الله يجعله في موازين حسناتك