محتارة وانا ابي منكم اجابة تطمني

لحوووووول

هو اللي بيدينا نعافه والبعيد نطامر وراه ؟ ! ! !

وعليكم السلام ورحمة الله وبركاته
أختي ما فية شخص يمكن يحدد لك ماهو الانسب لك انتي اكثر من نفسك
بمعنى انتي لماقدمتي على وظيفة معيدة وش كانت اهدافك ولية قدمتي عليها من الاساس هل من اجل وظيفة والسلام او لغاية في نفس يعقوب كما يقول المثل
وبعدين هل استخرتي ؟؟ انتي تقولين قدمتي على الوظيفتين مع بعض وربي اختار لك الافضل
اذا على موضوع الدراسة انتي شدي حيلك وتوكلي على الله واعقدي العزم وربي ماراح يخيبك ابدا" ويمكن مرافقك يطلع معاك وتستفيدون مع بعض ،، ومسأله طي القيد هل وقعتي على ورق مكتوب فية هذا الكلام اذا لا فأرتاحي
وصدقيني اعرف كثير معلمات حولوا لمعيدات وهم مرتاحين الان
وفي النهاية تاكدي بان نصيبك هو الي راح تاخذينة ان كان في الجامعه او المدرسة

موفقة لكل خير..،،،

مشكورين على المرور بس مافهمتوا علي ايش كنت اقصد
سيد القصر مو غلط اني اسأل وادور على اللي بيكون اريح لي نفسيا بعيد عن ضغوطات الجامعه
ستايرين الجامعه وقعتني على سنتين ووقعت والدي على سنة كفرصة ادور خلالها على قبول والا اتحمل نتايج عدم قبولي بأي جامعه واالنتيجة طي قيد

بالنسبة لي انا سألت في كذا جهة اليوم وكان ردهم الي بكتبه الحين يمكن احد يكون بنفس حيرتي ويستفيد

1\ اتصلت على مكتب الاشراف التربوي طبعا كالعادة ماعندهم اي اجابة لأسألتي وقالولي
- اتصلي على الديوان
- اتصلي على الجامعه
- اتصلي على قسم شؤون الموظفات فالكلية الي باشرتي فيها واستفسري
2\ اتصلت على الديوان بفرعينه الرجالي والنسائي وكان رد القسم الرجالي :
- انتي بما انك باشرتي خلاص راحت عليك وظيفة الديوان وبعد ماقلتله اني قبل المباشرة سألت القسم النسائي قالولي عادي اقدر استقيل واكمل اجراءات قبولي فالتعليم العام قالي بسألك واتصلي بعد ربع ساعة
- اتصلت بعد ربع ساعة قالي ماتقدري تقدمي استقالة لانه فهالحالة راح تضيعي عليك فرصة انك تكوني معيدة وبنفس الوقت الديوان ماراح يتسقبلك الا بعد 6 شهور يعني الوظيفتين بيطيرون منك ومافي قدامك الا نقل خدمات من التعليم العالي للتعليم العام وادخل مفاضلة من جديد على السنوات القادمة<<<<<<<<وهذي سالفة تاخذ لها سنين اعرف وحدة لها 3 سنوات تطالب بالنقل وماحصل لها
- قالي فيه شئ اسمة الغاء قرار تعيين بما اني جديدة بس قالي اسالي فالجامعه اذا موجود هالشئ عندهم او لا وانه اسلم الطرق هي بس قالي لاتسوي شئ عشان مايطيروا الوظيفتين منك

بالنسبة للقسم النسائي كان ردهم قريب من رد القسم الرجالي قالولي:
- فيه وحدة سألت نفس سؤالي<<<ماطلعت الحالي الي عندها نفس هالسؤال كان ردهم انه عادي اروح اطابق اوراقي عندهم ايام المطابقة وانه اكتب فالخانه المخصصة اني لازلت على رأس العمل في جهة حكومية واكتب اسم الجهة وفي حال كانت اوراقي سليمة وتمت المطابقة والقبول الديوان نفسهم راح يرسلوا خطاب للجامعه تطلب منهم الغاء قرار تعييني بما اني لسى جديدة فالتعيين عندهم كلامهم حلو والله يكتب اللي فيه الخير لجميع المسلمين

3\ بالنسبة للجامعه اتصلت عليهم يا اما مايردون يا اما محول على الفاكس والكلية نفس الشئ اتصلت عليهم مايردون ولو حصلت شئ جديد برجع ان شاء الله اضيفة

اختي يعني انتي الحين ترشحتي في الديوان او لا
اذا ترشحتي وعندك رغبة في الانتقال حاولي معهم بعد الاستخارة
اما بالنسبة لخوفك فلا تخافين من الاعادة لعدة اسباب ومنها
1- ان مافية احد يلزمك بالابتعاث خارج المملكة طالما ان تخصصك موجود في السعودية ، وحسب علمي ان جامعه القصيم فيها برامج ماستر مفتوحة ومن ضمنها الانجليزي وهي لاتجبر على الابتعاث الا اذا كان التخصص غير موجود نهائيا" في جامعات المملكة يعني عادي تدرسين بالرياض او جدة وهذا الكلام من جامعه القصيم لان وحدة اعرفها معيدة هناك وهي سألت عن هذا الموضوع وكان هذا ردهم
2- اذا مر الوقت وما قدرتي ماراح يفصلونك لانهم لايملكون الصلاحية بالفصل واسباب الفصل واضحة حسب لوائح الخدمة المدنية
وفي اسوا الحالات راح يحولونك ادارية
وللمعلومية عندنا في كليتي معيدات لهم اكثر من 5 سنوات معيدات ومافصلوهم ولاحولهم اداريات
ونصيحة لك من اخت في الله استخيري ثم استخيري وبعدين اسألي نفسك هل انتي تميلين الى اي الوظيفتين بغض النظر عن الضغط النفسي
لانك لو تركتي الاعادة وهي رغبتك الاساسية يمكن تشعرين بالندم بعد مرور السنوات
وتوكلي على الله واستشيري والديك فقلب الوالد دليلة
فكلامي هذا من باب تجربة فانا وضعي مشابهة لوضعك الفرق اني كنت معلمة ونقلت الى معيدة بالرغم من ان كان هناك الكثير من قال لي ليش تروحين للجامعه انتي معلمة ومرتاحة وش تبين بالتعب والدراسة وتوكلت على الله وقدمت على الاعادةوانقبلت نقلت لهابعد الاستخارة وتأييد والديني الله يحفظهم
واذا خلاص تقفلت عليك قدمي مرة ثانية السنة القادمة على الديوان وخلال هذة السنة شوفي وضعك يمكن يكون عندك محرم متفرغ ويروح معك والماستر كلة مع اللغة 3 سنوات وتمر بسرعة صدقيني

واعتذر على الاطالة ولكن لم استطع ان اقرا ردك ولا اعقب علية
موفقة لكل خير ولاتنسيني من صالح دعائك فاختك بحاجة اليه

أختي :
فكري كثيراً قبل ترك الجامعة ، فوظيفة معيد يتمنها المئات ، وهي لاتقارن من وجهة نظري بوظائف التعليم العام .
استمري في وظيفتك ، حتى لو جاء تعينك في التعليم العام بجوار منزلك .
وأما ما يتعلق بتعهدات إكمال الدراسة خارجياً ، فهذا أمر روتيني ، وقد تستطيعين مستقبلا إكمال دراستك داخلياً بإذن الله ، ولن يستطيع أي شخص ارغامك على الدراسة خارجياً ، وهذه التعهدات من أجل التخويف لا أقل ولا أكثر .
ولكانت أختي مكانك ، والله لقلت لها مثل ما قلت لكي .
استخيري واستشيري ، وأسألي الله أن يختار ما هو خير لكي .
تحياتي

ربي ييسر أمرك ويكتب لك مافيه الخير ..

مشكورين على المرور وماقصرتوا والله وانا فعلا نزل رقمي بالديوان ولهالسبب جاني التردد وبالنسبة للدراسة بالخارج هذا طموحي وامل كنت اتمناه من زمان بس من يوم انخطبت وانا تفكيري متشقلب اخاف ما اكون قد الدراسة والزواج او ما اقدر اوفق بينهم او اني اظلم زوجي على حساب دراستي او العكس خاصة واني ماتعودت احرك ساكن فالبيت طول ماكنت ادرس بالجامعه يعني كنت متفرغة لدراستي حتى ملابسي كانت الوالدة الله يحفظها تغسلهم وتجهزهم لي وخايفة من الحمل والدراسة او انه وقت الدراسة يكون معي طفل والا ولد الحلال مااعترض على دراستي بالخارج وموافق يروح معي لهالسبب كان عندي هالخوف والتردد واليوم المفروض اروح اكمل اوراقي بالديوان او خلال هالأسبوع بس امي قالت افضل لك الجامعه وخطيبي ماهو معترض واخواني مؤيدين للجامعه وكلهم يقولولي اخذي الماستر الا ابوي يقول راح تتعبين فالجامعه والتعليم العام اريح لك وان شاء الله بستخير وربي يكتب اللي فيه الخير

أختي الله يوفقك ويختار لك مافية الخير
وبالنسبة لمخاوفك فهي مخاوف طبيعية لانك مقبلة على تجربة جديدة ،، وصحيح ان الموضوع صعب لكنه ليس مستحيل
فبعد توفيق الله اذا عندك عزيمة واصرار راح تحققين هدفك فالعقل البشري يتكيف مع الرسائل التي نوجهها الية بشكل مستمر فاذا واصلتي قولك لن استطيع واخشى الفشل فسوف تسيطر عليك الفكرة ، كوني اكثر ايجاابية وتوكلي على الله واحتسبي الاجر في دراستك وغربتك ، ضعي هدفك امام عينيك وثابري للوصول الية ،،واجعلي هدفك هو طلب العلم لنفع المسلمين وثقي بالله وتوكلي علية
أسال الله ان يوفقك في دراستك وفي زوااجك
موفقة لكل خير أختي الكريمة

ستايرين جزاك الله ألف خير لان ردودك دايما تشرح القلب وتطمن واسلوبك اسلوب متفهم للظروف وتقلب النفسيات

الله يوفقك ويحققلك ماتتمنين ويريح بالك ويطمن قلبك

الحين ليه يقولوا الدراسة برى اصعب؟؟ بالنسبة لي انا تخصصي انجلش ومتعوده على الدراسة بالانجلش من أي ناحية راح تكون الصعوبة؟؟ هل يقصدون صعوبة الدراسة بلغة ثانية او صعوبة المناهج او صعوبة الأسئلة او كيف؟؟

سؤال اخير انا نويت ان شاء الله اكمل ماستر في كندا وحابة أسأل كيف نظام الماستر هناك من ناحية تقسيم الاترام يعني مثل عندنا 3 اترام دراسة واخر ترم بحث؟؟