الأعضاء الإشتراك و التسجيل

الملتقيات
ADs

شرح إجراءات الابتعاث لمعيدي ومحاضري (( جامعة الملك عبد العزيز )) بالتفصيل والصور

شرح إجراءات الابتعاث لمعيدي ومحاضري (( جامعة الملك عبد العزيز )) بالتفصيل والصور


NOTICE

تنبيه: هذا الموضوع قديم. تم طرحه قبل 3800 يوم مضى, قد يكون هناك ردود جديدة هي من سببت رفع الموضوع!

قائمة الأعضاء الموسومين في هذا الموضوع

  1. الصورة الرمزية للجنة حنين
    للجنة حنين

    مبتعث مستجد Freshman Member

    للجنة حنين المملكة المتحدة

    للجنة حنين , أنثى. مبتعث مستجد Freshman Member. من السعودية , مبتعث فى المملكة المتحدة , تخصصى Information Security , بجامعة University of Glasgow
    • University of Glasgow
    • Information Security
    • أنثى
    • Glasgow, Scotland
    • السعودية
    • Dec 2012
    المزيدl

    November 2nd, 2013, 05:10 PM

    السلام عليكم ورحمة الله وبركاته

    أسعد الله مساءكم وصباحكم بعفوه ورضاه

    بما إني مبتعثة لسة طازة على قولتهم، ومالي كم شهر واصلة بلد البعثة
    حبيت أشرح جميع خطوات الابتعاث اللي مريت بيها من الألف للياء، متضمنة في ثنايا كلامي الأخطاء اللي وقعت فيها واللي كنت أتمنى أحد نبهني عليها
    بالإضافة لنصائح وإرشادات من واقع تجربتي الشخصية، وتجربة زميلاتي المبتعثات

    موضوعي هذا موجه لموظفي جامعة الملك عبد العزيز بوجه خاص، ولا يمنع تعميم الفائدة لمعيدي ومحاضري الجامعات السعودية بشكل عام لأن إجراءات الابتعاث تكاد تتقارب في أغلب الجامعات

    راح أقسم الموضوع لـ عنوانين:

    1- نصائح وتوجيهات هامة قبل الابتعاث
    2- إجراءات الابتعاث (بالصور)



    نبدأ بسم الله الرحمن الرحيم



    .


  2. نصائح وتوجيهات هامة قبل الابتعاث


    1- قبل ما تختاروا بلد البعثة، الجامعة، التخصص الدقيق ( استخيروا، استخيروا، استخيروا)
    هذا قرار راح يعتمد عليه كل الجاي، فادعوا الله بصدق، وخلوا قلوبكم حاضرة وانتو تقولوا في دعاء الاستخارة (فإنك تقدر ولا أقدر، وتعلم ولا أعلم، وأنت علام الغيوب)
    أقللكم هذا الكلام من تجربة، لأنه كثير منا يعتمد على كلام فلان عن المدينة الفلانية، والجامعة العلانية
    بينما السماع شيء والمعاينة شيء آخر، واللي يعجب فلان ممكن ما يعجبك، واللي يناسبك الآن ممكن يتغير بعد سنة قدام لما تتزوج أو إذا جبت أطفالك معاك، ولا يعلم الغيب إلا الله.



    2- الفيزا وما أدراك ما الفيزا
    قدّموا عليها في أقرب فرصة ممكنة، ولا تأخروا الين قبل السفر بفترة قصيرة
    أحسن تطلع الفيزا بدري وانتو مرتاحين وباقي عالسفر شهر شهرين، ولا تجلسوا متوترين الين آخر لحظة وتلغوا الحجوزات وتأجلوا الدراسة
    أنا قدمت على فيزتي بالسفارة البريطانية قبل موعد دراستي بـ 3 شهور تقريبا، وعادي طلعولي هي وخلّوا وقت دخول بلد البعثة قبل الدراسة بشهر
    لكن مرافقي اتأخر في تقديم الفيزا، وجلست في السفارة شهر كامل، وأنا خلاص على أعصابي، الدراسة حتبدأ وفيزته ما طلعت
    اتخيلو طلعت الفيزا قبل موعد السفر بيوم واحد، وأنا كنت خلاص حروح ألغي حجز الطيارة لأنه إذا ما لغيتها خلال 24 ساعة تروح علينا فلوس التذكرة كامل
    هذا غير إني كنت حدفع على كل شخص مايقارب 500 ريال عشان ألغي الحجز وأسوي حجز جديد
    بس الحمدلله طلعت الفيزا في آخر لحظة، كان فعلا درس لا يُنسى !



    3- اسألوا الله التيسير، ادعوا كثير، واتوكلو عليه تعالى في كل أموركم
    والله ما وجدت مثل الدعاء والتوكل في تيسير الأسباب وتذييل الصعاب وشرح الصدر
    أعرف اثنين راحوا الملحقية في نفس اليوم، الأولى فتحت ملفها وأخذت ضمان مالي وخطاب للبنك والسكن و ماجا العصر إلا وخلصت كل أمورها، أما الثاني فكان الدوام حينتهي وهو لسا مازال في أول خطوة ( فتح الملف )
    وأحيانا تلاقيهم كلهم مجهزين أوراقهم ومستعدين، بس سبحان الله تصير أشياء ما كانت في الحسبان
    فـ قبل ما تقدم على أي خطوة، ادعي مرة واثنين وثلاثة، ومو بس في الأمور الصعبة، لأنه أحيانا إجراء سهل وما تتوقع تصير فيه أي تعقيدات، وتعتمد على إنه فلان أو علان حيساعدك
    وتلاقي فجأة تطلع لك علة من تحت الأرض، يا كثر الأكشنات في البعثة : )



    4- إذا ناوين تبتعثوا بعد سنة إن شاء الله، ابدؤوا اتجهزوا من الآن !! وراح أقللكم ليش من الآن
    أول شي حتحتاجوه اختبار الآيلتس أو التوفل، فنقول مثلا تحتاجوا تستعدوا له وتذاكروا قبلها بشهرين، باعتبار إنه عندنا التزامات أخرى ومو كل يوم حنذاكر انجليزي : )
    اختبرتوا فرضا بعد شهرين، وطلعت النتيجة نص نص، وتبغوا تدخلوا اختبار ثاني، أقرب موعد اختبار بالذات في جدة غالبا يكون بعد شهرين، لأنه المواعيد اللي قبل تكون كلها محجوزة
    إلا إذا بتسافرو مثلا الخبر تختبروا ممكن تلاقو وقتها في نفس الشهر، المهم هادي 4 شهور، لأنه الواحد ما يجيب النتيجة اللي يتمناها دايما من أول اختبار
    نقول كمان مراسلة الجامعات وعلى بال ما يردوا عليك، فيه جامعات ترد بعد أسبوع، وفيه بعد أسبوعين، وأطول جامعة عندي ردت بعد شهر
    هادي خمسة شهور، غير إجراءات البعثة ومجلس القسم واللجنة الثلاثية والفيزا الجميلة وتأخيراتها : )
    فاحسبوا حساب كل هذي الخطوات وابدؤوا من بدري



    5- حاولوا في كل خطوة تسووها في اختيار الجامعة والتخصص، تستشيروارئيس قسمكم فيها، أو عالأقل تعطوه خبر
    مثلا احنا بكليتنا كانو فاتحين لنا الابتعاث لبريطانيا، لكن كنت أسمع في الكليات الثانية ما يرضو لهم إلا بأمريكا وكندا
    فاتخيلوا تكونوا جبتوا القبول وخلاص رفعتوا أوراقكم لمجلس القسم وتُفاجؤوا بعدين بالرفض !
    أو تختاروا تخصص معين دقيق وتطلبوا عليه ضمان مالي وتقدموا عالجامعات وكل شي، وبعدين تكتشفوا إنه التخصص هذا خلاص فيه اكتفاء بقسمكم
    فخلوكم دايما على تواصل مع رئيس القسم حتى تكونوا في الجانب الآمن بإذن الله



    6- أخيرا .. الحصول على شهادة الماجستير أو الدكتوراة أمنية حملناها في صدرنا وسافرنا لتحقيقها
    والأجمل من هذه الأمنية إنه يسافر الواحد منا وهو يدعي الله ويتمنى بصدق إنه يكتب على يديه إسلام المئات، بل الألوف !
    ولما أقول ألوف ما أتكلم عن شيء مستحيل، ممكن تكون سبب في إسلام شخص واحد، ويتوفاك الله بعد سنين، وهذا الشخص يصبح داعية ويسلم على يديه الألوف، وكل هؤلاء الألوف في ميزان حسناتك وانت في قبرك
    بصراحة .. أغبط اللي كان سبب في إسلام يوسف أستس : )
    نسأل الله أن يجعلنا مباركين أينما كنا وأن لا يجعل الدنيا أكبر همنا


    .

    - - - مشاركة محدثة - - -



    إجراءات الابتعاث ( بالصور )


    قبل ما أبدأ في شرح إجراءات الابتعاث عبر نظام (( أنجز ))، أحب أنبه على نقطة مهمة:
    حتلاحظوا بكل إجراء فيه مستندات مطلوب منكم ترفقوها، فاتأكدوا من بدري إنه كل المستندات متوفرة عندكم
    وإذا فيه شي مهو موجود فحاولوا يكون جاهز من الآن حتى لا تتعطلوا بعدين
    يعني على سبيل المثال: من ضمن الملفات المطلوب إرفاقها عند تقديم طلب ابتعاث هو (شهادة حضور دورة الإعداد للابتعاث)، وهذي الدورة ما تُقام إلا مرة واحدة في الفصل الدراسي
    فإذا هادي الشهادة مهي عندكم فمعناتها حتضطروا تنتظروا الين موعد أقرب دورة وتحضروها قبل لا تقدموا على طلب الابتعاث
    بالنسبة لي شخصيا، حضرت هذي الدورة قبلها بترم، عشان تكون كل أوراقي جاهزة، بس اتأكدوا كم مدة صلاحية شهادة الدورة هل هي سنة أو سنتين


    نبدأ في إجراءات الابتعاث، وهي كالتالي:
    1- التعرف على الجامعات المعترف بها
    2- طلب ضمان مالي لمراسة الجامعات
    3- مراسة الجامعات والحصول على قبول
    4- طلب ضمان مالي للتأشيرة
    5- التقديم على التأشيرة (الفيزا) والحصول عليها
    6- طلب ابتعاث
    7- استكمال البيانات وإخلاء الطرف
    8- حجز التذاكر وأمر الإركاب
    9- استلام قرار الابتعاث التنفيذي
    10- في أمان الله يا جامعة الملك عبد العزيز : )


    نشرح كل خطوة من هذي الخطوات بالتفصيل والصور



    ( 1 )
    التعرف على الجامعات المعترف بها



    قبل ما نختار الجامعة، نتأكد إنه معترف فيها في وزارة التعليم العالي.
    لا تعتمدوا على المواضيع السابقة للجامعات المعترف فيها، لأنهم يغيروا مابين فترة والثانية، وبعض الجامعات يصير فيها تكدس، فادخلوا بنفسكم موقع وزارة التعليم العالي واتأكدوا
    وافتحوا صفحة إدارة شؤون البعثات بجامعة الملك عبد العزيز، ادخلوا على الجامعات الموصى بها، واتأكدوا إنه اسم الجامعة موجود في التصنيف











    ( 2 )
    طلب ضمان مالي لمراسة الجامعات



    (هذا الضمان نحتاجه لما نراسل الجامعات كإثبات إنه فيه جهة راح تتكفل بمصاريفنا الدراسية)

    ندخل على نظام أنجز






    الابتعاث >> إنشاء طلب >> ضمان مالي



    حتلاحظوا عندنا ثلاثة أنواع من الضمان المالي:
    بحث عن قبول - الحصول على تأشيرة - تجديد قبول
    نختار ( بحث عن قبول ) ونعبي البيانات المطلوبة



    نرفق المرفقات ونرسل الطلب




    سير المعاملة: الطلب حيروح للرئيس المباشر، ثم رئيس الجهة (وكيل الكلية)، ثم إدارة البعثات، ثم المشرف على إدارة البعثات
    بعدها حتلاقوه في:
    الابتعاث >> متابعة الطلبات



    حتلاحظوا فيه طلبين فقط عندي: ( طلب ابتعاث خارجي ) و ( وصول مبتعث )
    ليش مافي بالصورة طلب ضمان مالي للبحث عن قبول : ) لأني صورت لكم هذا الموضوع الآن بعد ما وصلت مقر البعثة بكم شهر، بينما أنا طلبت هذا الطلب من زمان فأصبح في (الطلبات القديمة)
    نقدر نوصلله من خلال:
    الابتعاث >> الطلبات القديمة




    حتلاحظوا هنا عندي طلبين ضمان مالي (بحث عن قبول)
    لأني في البداية كنت مقررة على تخصص معين، وأخذت ضمان مالي على أساس أراسل الجامعات عليه
    بعدين غيرت رأيي وقلت باخذ تخصص ثاني، فرجعت طلبت ضمان مالي للتخصص الجديد، وراسلت الجامعات
    المهم لا تسووا نفس حركتي : ) واستقروا عالتخصص من بدري
    مدة هذا الإجراء: بإذن الله يومين ويتوقع، أهم شي رئيس قسمكم ووكيل الكلية يوقعوا بسرعة، لأنه إدارة البعثات ماشاء الله عليهم ما يجلس الطلب عندهم 24 ساعة إلا وهو متوقع خلاص الحمدلله
    المشكلة دايما تكون في اللي قبلهم هل يوقعوا بسرعة أو يتأخروا




    ( 3 )
    مراسلة الجامعات والحصول على قبول



    اختاروا 10 جامعات تقريبا وراسلوهم.
    يمكن حتواجهوا صعوبة في تعبئة أبليكيشن الجامعات في البداية، بس بعد كدا حتلاقوا الأبليكيشنات لكل الجامعات متشابهة مع اختلافات بسيطة
    فتقدروا تسووا هذي الخطوة بنفسكم بدون ما تلجأوا لمكاتب
    المهم إذا جاتكم ورقة القبول، انتقلوا للخطوة التالية
    مدة هذا الإجراء: شهر أو شهر ونص بالكثير




    ( 4 )
    طلب ضمان مالي للتأشيرة



    الابتعاث >> إنشاء طلب >> ضمان مالي



    نختار هذي المرة ( الحصول على تأشيرة ) ونعبي البيانات المطلوبة



    نرفق المرفقات ونرسل الطلب




    سير المعاملة: الطلب حيروح لإدارة البعثات مباشرة، ثم المشرف على إدارة البعثات
    بعدها حتلاقوه في:
    الابتعاث >> متابعة الطلبات
    مدة هذا الإجراء: يوم واحد




    ( 5 )
    التقديم على التأشيرة (الفيزا) والحصول عليها



    قدّموا عالفيزا بالسفارة مثل ما اتفقنا في أقرب فرصة
    مدة هذا الإجراء: حسب تأشيرات الدولة اللي مقدمين عليها، بعضهم ياخذوا أسبوع أسبوعين وبعضهم شهر وبعضهم أكثر !!
    بعد ما تحصلوا عالفيزا، تبدؤوا الآن في تقديم طلب الابتعاث





    ( 6 )
    طلب ابتعاث



    الابتعاث >> إنشاء طلب >> ابتعاث



    نعبي البيانات المطلوبة



    نرفق المرفقات ونرسل الطلب



    سير المعاملة: الطلب حيروح للرئيس المباشر، ثم رئيس الجهة، ثم إدارة البعثات، ثم أمين اللجنة الدائمة للابتعاث والتدريب، ثم المشرف على إدارة البعثات، ثم وكيل الجامعة للدراسات العليا والبحث العلمي، ثم مدير الجامعة
    بعدها حتلاقوه في:
    الابتعاث >> متابعة الطلبات
    مدة هذا الإجراء: شهر إلى شهرين تقريبا، وممكن أقل، حسب وقت انعقاد مجلس القسم واللجنة الثلاثية وموافقتهم على الطلب


    ملاحظة مهمة جدا:
    في موقع إدارة البعثات كاتبين هذي النقطة:

    فإذا تم التأكد من أن المؤسسة التعليمية التي تم الحصول على قبول منها موصى بها، وتم استيفاء كافة الشروط ، هنا يُعمل على خطين متوازيين وذلك استثمارا للوقت ، وهما كالتالي :
    الخط الأول : القيام بتقديم خطاب ورقي مرفق به صورة القبول الحاصل عليه إلى الرئيس المباشر يُطلب فيه عرض موضوع الابتعاث على المجالس المختصة (مجلس القسم ومجلس الكلية ممثلا في اللجنة الثلاثية) لأخذ الموافقة ليتم استكمال بقية إجراءات الابتعاث .
    الخط الثاني : الدخول على نظام الابتعاث الإلكتروني وتقدم طلب ضمان مالي للحصول على تأشيرة ، ثم يرسل إلى إدارة البعثات بعد أن تتم تعبئة جميع الحقول وفق خطاب القبول الحاصل عليه ، مع إرفاق كافة المستندات المطلوبة . لتقديمه للسفارة المعنية للحصول على التأشيرة خلال فترة عرض موضوع ابتعاث على المجالس المختصة . إلا أنه ينبغي قبل تقديم طلب الضمان المالي للحصول على التأشيرة عرض القبول الحاصل عليه على الرئيس المباشر لأخذ الموافقة المبدئية على القبول من حيث المؤسسة التعليمية والتخصص ونوع الدراسة وغير ذلك من الأمور الأكاديمية .



    ايش يعني هذا الكلام : )
    يعني بدل ما تقدم عالفيزا في السفارة وتنتظر الين ما السفارة يصدروا فيزتك وبعدها تقدّم لسا على طلب ابتعاث
    تقدر تشتغل على خطين متوازيين، تقدّم عالفيزا في السفارة، وبنفس الوقت تقدّم خطاب ورقي طلب ابتعاث لرئيس القسم عشان يبدؤوا بعرض طلبك على مجلس القسم واللجنة الثلاثية ويوافقوا عليه على بال ما تطلع فيزتك
    وهذا اللي سويته، كلمت رئيستي مبدئيا على أساس يحددوا أقرب موعد للجنة الثلاثية ومجلس القسم، وأخذت منها موافقة مبدئية عالجامعة والتخصص، وقدّمت لها خطاب ورقي أطلب فيه الابتعاث
    طيب ممكن أحد هنا يسأل: ليش ما أقدّم عالفيزا بالسفارة وأقدّم بنفس الوقت طلب ابتعاث الكتروني عبر أنجز وخلاص ؟ ليش يعني ورقي؟
    أنا سألت هذا السؤال لرئيسة القسم، فقالت: عشان محقدر أوافق لك عالطلب الالكتروني ومجلس القسم لسا ما انعقد، وحيجلس الطلب عندي في النظام فترة طويلة وأنا لسا ما رديت لك عليه، لكن أعطيني هذا الخطاب الورقي حتى أعرضوا عليهم مبدئيا، وقدمي عالفيزا في فترة الانتظار الين ما ينعقد مجلس القسم، لأنه احنا موافقين خلاص، بس هاذي إجراءات روتينية : )
    المهم قبل انعقاد مجلس القسم بأسبوع، قالت لي: قدمي الآن طلب ابتعاث الكتروني على أنجز، عشان بعد ما نسوي مجلس القسم على طول أوافق لك عالطلب وأرفق لك معاه صورة من موافقة اللجنة الثلاثية ومجلس القسم
    فاتصلت أنا بإدارة البعثات سألتهم: هل عادي أقدّم طلب ابتعاث الكتروني عبر أنجز وأنا فيزتي لسا ما طلعت وانتو طالبينها ضمن المرفقات في طلب الابتعاث ؟
    فقالوا لي: قدمي عادي طلب الكتروني وخلي اللجنة الثلاثية ومجلس القسم يوافقوا لأنه هم اللي ياخذوا أطول وقت، وبعد موافقتهم حيوصلنا الطلب، ويصير نرجعه لك عشان ترفقي الفيزا، وترفقي الفيزا ويرجع لنا الطلب ونوافق عليه
    فقدمت الطلب إلكتروني، وعلى بال ما وافقت رئيستي عليه ووكيلة الكلية، طلعت فيزتي الحمدلله في فترة الانتظار هادي
    فلما وصل طلبي لإدارة البعثات رجعوه لي وحطوا ملاحظة إنه لازم أرفق الفيزا، فأرفقت الفيزا وفي نفس اليوم مشي الطلب من عندهم وراح لوكيل الدراسات العليا، وتقريبا 3 أيام وصدر قرار ابتعاثي
    كان التأخير كله في مجلس القسم واللجنة الثلاثية، أما إدارة البعثات والبقية اللي تمر عليهم المعاملة، فما جلس الطلب عند كل واحد منهم أكثر من يومين الحمدلله


    أنا جالسة أقللكم اللي صار معايا، وكل واحد يستشير رئيس قسمه
    باختصار: ممكن تمشي عالإجراءات المعتادة ( تقدّم عالفيزا في السفارة، وتنتظر الين ما تصدر فيزتك ثم تقدّم طلب ابتعاث الكتروني )
    وممكن تشتغل على خطين متوازيين ( تقدّم عالفيزا في السفارة، وبنفس الوقت تقدّم طلب ابتعاث ورقي لرئيس القسم حتى يعرضه على مجلس القسم واللجنة الثلاثية، وبعد ما يوافقوا تقدّم طلب ابتعاث الكتروني وترفق فيزتك، وبكدا حيوافق لك رئيس قسمك مباشرة عالطلب الالكتروني ومحتنتظر لسا انعقاد مجلس القسم واللجنة الثلاثية )




    ( 7 )
    استكمال البيانات وإخلاء الطرف



    الابتعاث >> متابعة الطلبات
    حنلاقي مكتوب جنب طلب الابتعاث ( تم توقيعه )
    نضغط على الطلب، وحتطلع لنا هادي الصفحة، نضغط على ( استكمال البيانات )



    نعبي البيانات ونسوي حفظ + نطبع التعهّدات ونعبيها بيدنا



    ثم نقدّم طلب إخلاء طرف إلكتروني:
    إخلاء الطرف >> استعلام عن العهد >> تفاصيل إخلاء الطرف



    حتطلع لنا صفحة فيها قائمة بمرافق الجامعة، وكل مكان مكتوب جنبه ( لا توجد عهدة على الموظف أو توجد عهدة على الموظف )
    أنا كلمت شوون الموظفات، قلت لها عندي عهدة بالمكان الفلاني والعلاني، فأعطتني رقم الشخص المسؤول بكل مكان، فاتصلت على كل واحد، أعطيته اسمي ورقمي الوظيفي وقلتله يلغي العهدة، مافي دقايق إلا والعهد اتلغت كلها الحمدلله
    بعدها لو فتحتوا على صفحة إخلاء الطرف من جديد، حتلاقوا كل العهد راحت، وتقدروا الآن تضغطوا على أيقونة ( طلب إخلاء طرف )



    الطلب المفروض إنه يروح لرئيس القسم يوافق عليه، ثم لمدير الإدارة
    بس للأسف الطلب يروح لمدير الإدارة مباشرة، ومدير الإدارة ماراح يوافق عليه إلا لما يوافق رئيس القسم على إخلاء الطرف
    هنا راح نحتاج خطاب ورقي من رئيس القسم يفيد بإنه موافق على إخلاء الطرف
    فكلمت سكرتيرة القسم قلتلها أبغاك تطبعيلي ورقة إخلاء طرف توقع عليها رئيسة القسم حتى أعطيها لمديرة الإدارة، وأعطيت الورقة لمديرة الإدارة، ففتحت مديرة الإدارة على طلبي الإلكتروني في أنجز ووافقت عليه
    وطبعت ورقة إخلاء الطرف الإلكتروني من أنجز




    ( 8 )
    حجز التذاكر وأمر الإركاب



    نروح لإدارة البعثات ( وإذا كانت المبتعثة امرأة فتخلي أحد محارمها يروح لهم ) ونجيب معانا كافة التعهدات بالفقرة (7) + ورقة إخلاء الطرف الإلكتروني
    نعطي هذي الأوراق لإدارة البعثات، وبعدها حيقولولكم تروحوا على مكتب الطيار اللي عند الجامعة عشان تحجزوا تذاكر السفر
    فتروحوا لمكتب الطيار ومعاكم جواز السفر لكم وللمرافقين، وتحجزوا الرحلة





    ( 9 )
    استلام قرار الابتعاث التنفيذي



    قبل موعد السفر بأسبوع، روحوا لإدارة البعثات عشان يطبعوا لكم قرار الابتعاث التنفيذي اللي راح تعطوه بعدين للملحقية لما توصلوا بإذن الله
    وهذي صورة قرار ابتعاثي



    ولو دخلتوا بعدها على أنجز ورحتوا على ( الابتعاث ) حتلاقوا جنب اسمكم مكتوب ( مبتعث )





    ( 10 )
    في أمان الله يا جامعة الملك عبد العزيز : )




    بالنسبة للراتب ومتى يبدؤوا يخصموا منه، فـ ( أظن ) الخصم يبدأ من تاريخ السفر
    وأفضل تتأكدوا من إدارة البعثات بنفسكم لأني ما دققت كثير في الراتب أوحسبت الفرق : )
    بعد السفر إن شاء الله حيُصرف لكم نصف الراتب الأساسي، مخصوم منه التقاعد، مُضاف له بدل الندرة فقط



    ختاما ..
    نسأل الله المغفرة والقبول، وأن نكون نموذجا مشرفا للإسلام والمسلمين
    وإذا كان هناك أي خطأ في المعلومات الواردة فمرحبا بالتصويب : )
    والسلام عليكم ورحمة الله وبركاته


    .
    7 "
  3. يعطيك العافية، فعلا كل شي واضح ومفصل.
    كنت أحسب الشغلة أسهل بس شكله يبغالها طولة بال!

    عندي استفسار ما أدري لو ممكن أحد يفيدني :
    هل من الممكن انه أقدم عالفيزا وأنا حامل بالشهور الأخيرة ( علماً بأني لن أسافر إلا بعد ولادتي بشهرين على الأقل ) ؟
    خايفة ءأجل كل الأمور لما بعد الولادة وأنزنق بالوقت!

    شكرا مجدداً
    7 "
  4. المشاركة الأصلية كتبت بواسطة ihanouf
    يعطيك العافية، فعلا كل شي واضح ومفصل.
    كنت أحسب الشغلة أسهل بس شكله يبغالها طولة بال!

    عندي استفسار ما أدري لو ممكن أحد يفيدني :
    هل من الممكن انه أقدم عالفيزا وأنا حامل بالشهور الأخيرة ( علماً بأني لن أسافر إلا بعد ولادتي بشهرين على الأقل ) ؟
    خايفة ءأجل كل الأمور لما بعد الولادة وأنزنق بالوقت!

    شكرا مجدداً
    نعم ما فيه إشكال في قضية الحصول على الفيزا، هو الإشكال في المطار لو بغيت تسافري في الشهور الأخيرة.
    7 "
  5. المشاركة الأصلية كتبت بواسطة ابن بيت آل هليلة
    ما شاء الله، شكراً لك على هذا الموضوع التفصيلي، والله يكتبه في موازين حسناتك.
    آمين يارب وإياك
    أشكر تجاوبك مع الأسئلة هنا

    المشاركة الأصلية كتبت بواسطة ihanouf
    يعطيك العافية، فعلا كل شي واضح ومفصل.
    كنت أحسب الشغلة أسهل بس شكله يبغالها طولة بال!

    عندي استفسار ما أدري لو ممكن أحد يفيدني :
    هل من الممكن انه أقدم عالفيزا وأنا حامل بالشهور الأخيرة ( علماً بأني لن أسافر إلا بعد ولادتي بشهرين على الأقل ) ؟
    خايفة ءأجل كل الأمور لما بعد الولادة وأنزنق بالوقت!

    شكرا مجدداً
    العفو
    الله يعافيك
    إن شاء الله يكون ابن بيت آل هليلة جاوب على سؤالك

    المشاركة الأصلية كتبت بواسطة مجرد مواطن
    بالتوفيق لكم يا رب .. !
    آمين
    7 "
  6. المشاركة الأصلية كتبت بواسطة abu sarh
    أشكرك جزيل الشكر
    كنت شايل هم كبييييييير
    لكن شرحك سهل لنا وبين أشياء كثيرة
    أسأل الله أن يكتب أجرك ويوفقك في كل أمورك


    ( تمت المشاركة باستخدام تطبيق مبتعث )
    آمين يارب وإياك
    الحمدلله كثيرا
    الله ييسر أمرنا وأمرك


    ( تمت المشاركة باستخدام تطبيق مبتعث )
    7 "
  7. ماشاء الله تبارك الله ،، موضوع شامل و مرستك

    بخصوص الراتب (جامعة الملك عبدالعزيز) فهو يتم خصمه من تاريخ صدور قرار الابتعاث من الجامعة ،، علشان كذا افضل شي الواحد يصدره قبل السفر بيومين او 3

    موفقه بدراستك و الله يسهلها عليكي و ع الجميع.
    7 "
ADs

قم بتسجيل دخولك للمنتدي او

الانضمام لمبتعث

Search Engine Optimization by vBSEO ©2011, Crawlability, Inc.