من مطار بلدك بالسعودية الى مطار مدينة الدراسة..كل ما سيواججهك والحلول بالتفصيل...!!

March 26th, 2010, 02:51 AM

مطار مدينتك بالسعودية:

راح يبدأوا بالوزن طبعا يسمح للفرد بشنطتين مايزيد وزنهم مع بعض عن 60 كيلو
طبعا انا اخدت شنطتين وزنهم كبير واخوي وزن شنطو قليل طلبت من الموظف يضف اوززاننا لبعض لين صار تعادل بالوزنية
والكيلو الزايد ياخدو علييه في حدود 60 ريال يعني انتبهوا

بعد كدا راح يدوكم البوردنق وراح يطلبوا منكم تتوجهوا للجوازات

بالنسبة للبنات اللي نعاهم مرافق لازم تصرررريح موافقة الاب لمرافقة اخوها لها كمحرم
والا حترجعوا او تضطروا احد يرسلها لكم فاكس للمطار
بس افضل امنوها من دحين

حيختموا على جوازاتكم خروج و بعد كددا تدخلوا الصالة الداخلية و قبل الصعود للطائرة فيه تفتيش اخير

بعدها تطلعوا عالطايرة و حتجلسوا فيها 13 ساعه طبعا ما حتملوا لانوا حاطين لكم شاشه قدامكم فيها انواع الافلام والبرمج العربية والاجنبية كل شئ تحبوه
و فيه مصلى و فيه بوفيه تاخدوا منو اللي تبغوا

حتملوا بس شويتين جيبوا معاكم كتاب او اي حاجه

بعدد كدا حيبدأوا بتوزيع استمارة اي تونتي فور و دي مرررررره مهمه واول شئ يطلبوه بمططار امريكا

فيه ورقة زرقة والتانية بيضا و لاحظوا لو معاكم فواكه او ماكولات بالشنط دي في لها خانه مخصصة بالورقة الزرقة لازم توضحوا دا الشئ لانو انا ماما حطتلي تفاح وكتبت مافي فواكه عندي وبعد ماوصلت المطار صارتلي هرجه
لما الكلاب شمت شنطتي قالتلي اللي ماسكة الكلب هاتي ورقتك اديتهم قالتلي عندك فواكه او اكل قلتلها ايوة قالت طيب ليش مو حاطه يس قدام دي الخانه؟ فركزوا


لما توصلوا مطار وواشنطن حتطلعوا ترافيك حيوصلكم لصاله فيها مجموعة مكاتب زجاجيه عددها كبير يجي موظف يقول لك انتا راح تروح ناحية اي بوابه
طبعا هما ييحترموا الصدق والامانه بسرد المعلومات لو كنت كدا حيعاملوكوا احلى معاملة حتى احسن من عيال البلد والله

حيبدأوا يسالوا مجموعة اسئلة ما تاخد خمس دقايق حتى وياخدو بصمة اصابع وياخدولك صورة وتمشي
تاخد شنطك حتلاقوا مندوب من الخطوط السعوديه ييهتم بكل اموركم مجرد مايشوف الجواز الاخضر حتى الشنط يشيلها لكم من السير حق الشنط ويحطها عالعربية


و تمروا على تفتيش اخير و بعدها تخرجوا من الصالة الداخلية للمطار طبعا اللي عندو فلوس سعودية يبغى يحولها قدامو مكتب تحويل يحول الفلوس بدون اخد عمولة و في ثواني معدودة

طبعا في اسوا الحالات حياخدوكم ويحطوكم لمدة ساعتين تنتظروا الين يجي دوركم ودا يكون بشكل عشوائي و غالبا لثلاث انواع: اللي عمرو ما سافر او جوازو جديد او اللي لغتو سيئة او اللي عمرو اقل من 20

و برضو خلال فترة الانتظار دي الوضع مررررررا ايزي بس تتاخروا ساعتين

ما علينا بعد خروجكم من الصاله الداخلية و معاكم عفشكم حتخرجوا تلاقوا الملحقية السعودية حاطه ستاندر كبير عليه الملحقية السعوديه حيدوكم على طول اوراق فتح ملف او وصول مبتعث ويقولوا لكم انتظروا سيارة الملحقية حتجي دحين
تنتظروا يادوب خمس دقايق و توصل السيارة وينزل السواق يشيل شنطكم ويحطها بالسيارة ويوديكم على فندق ب 78 دولار نظيف جدا و حلوووووو وكانك جوات السعوديه كلو سعوديين وسعوديات وكانهم عيلة وحده ولا حتحسوا باي غربة

و حتلاقوا ثلاث موظفين من الملحقية قدامكم يستلموا الاوراق بعد ماتعبوها ويساعدوكم في كل شئ حتى تصوير الاوراق داخل الفندق وكلو فري


طبعا بالنسبة للاتصال اللي ماطلع شريحة امريكية نصيحة سيبوكم من التجوال الدولي لانو 500 ريال راحت عليا بنص يوم وفيه بطايق تلاقوها بالسوبر ماركت اسمها زازا مررررره كويسه بخمسه دولار بس فيها 30 دقيقة تكلم السعودية

وبالنسبة للاكل فيها مطاععم مرسله مندوبين يسوا اكل كلو لحم حلال اطلبوه وانتو متطمنيم لانو مره لذيذ ونظيف

معلومة : اللي رايح مطعم اول كلمة يقولها لو مايعرف لحم الخنظير ( نو بكين نو بيرن )

و هما حيفهموا انو ماتاكل اي شئ فيه مشتقات الخنزير


بعد كدا تخلصوا كل اوراقكم وياخدوها الملحقيه بعد ماشيكوا انو كل شئ تمام التمام ويقولوا لك انو حيمروك الساعه 8 الصباخ

و فعلا يمروك وتروح الملحقيه وتخلص كل امورك
طبعا انا ماحفيدكم عن اللي جوات الملحقية لاني لسى مالتحقت بالبعثه

بس الغالبية خلصوا بنفس اليوم وراحوا على ولايياتهم

المهم نجي لوقت السفر من واشنطن لولايتك اي الرحلة الداخليه

اول شئ تشوف البوابة اللي فيها الخطوط اللي مسافر عليها فيه يونايتد وفيه دلتا....الخ

طبعا حيبدأوا اول شئ بوزن الشنط وانتبهوا حياخدوا عالباوند الواحد الزايد 75 دولار

انا جبت عامل فلبيني واديتو 10 دولار وقلتلو اتصرف اخدني ناحية ميزان و بدا يضبط الوزن
اوول شنطه كبيرة طلعلي وزنها 68 يعني حدفع بحدود 500 دولار وزن

قاسلي وزن الباقيه لقيها تمام وبدأ يضبط الزن ويفرغ من شنطه لشنطه الين صار وزن كل شنطه مايزيد عن 43 باوند

ومادفعت للوزن ولا دولار

اتمنى تكونوا فهمتوا الفكرة واللي لازم تسووه هنا

طبعا بعد كدا المطار لخبطه والبوابات وضعها ملخبط جدا جدا والطار كبروا غريب قبل ماتروح تديك الموظفه البوردنق وتقول لك رقم بوابتك
طبعا تعاملهم ولا اروووووووع شويا يشيلوك من فوق الارض

المهم عشان ماتتلخبطوا نصيحة سووا اللي انا سويتوا كلمت وحده امريكية وقلتلهم انو انا جديده هنا ممكن تساعديني عشان اوصل لبوابة رحلتي

والله كانو اديتها عيني انببسطت وتبغى تخدمني بعيونها الاتنين ومشتني معاها الييييييين وصلنا للتفتيش

طبعا حطوا في بالكم شئ التفتيش في اليونايتد جدا دقيق مو بس عليننا العرب لا على حتى الامريكان
فسخوا الكل الشوزات والاحزمة و الجاكيتات

و بداوا بتفتيش شنط اليد قطعه قطعه طبعا احنا العرب حيزيدوا تفتيشنا شويتين بس بكل احترام يعني لاتخافوا

انا سالوني تحتاجي لخصوصية اثناء التفتيش اليدوي لانو بيفتشوا تقريبا كلل مناطق الجسم يدويا
قلتلهم ايوة و طبعا اللي يفتشوا البنات بنات زيهم

و بس يدوكم شنطكم وهم مدينكم ابتسامة عريضه ويشكروكم وتخرجوا

طبعا انا خرجت لقيت الامريكية اللي طلبت مساعدتها تنتظرني و كملت معايا لانو حتمشوا الين تتكسروا وحتطلعوا ترافيك وخربطه ودنيا

عشان كدا نصيحة اطلبوا مساعدة امريكان عشان يدلوكم عالطريق ولاتنكسفوا بالعكس مرررررررا ينبسطوا لما تطلبوا مساعدتهم

توصلوا الين البوابة ولو تبغوا تاكلوا شئ مليان مطاعم

و بعدها حتسافروا وتوصلوا لمطار مدينة دراستكم وحتدوا التاكسي العنوان طبا التاكسي كلو شغال عالعداد انا عني مادفعت الا 50 دولار يعني اللي يقولوا مية وميتين هدولا يبالغوا او انو مناطق سكنهم جدا جدا جدا بعيدة

المهم حتى التاكسي يجلس يديكم معلومات وينصح فيكم الشعب مررررررره فرندلي وحبوب ويحبوا ثقافتنا ولبسنا

و بعدها توصلوا لمقر سكنكم

اول يوم دراسه لكم اطلبوا تسجيل دوام وابدأوا داوموا


دي التفاصيل المملة للرحلة اللي بيواجهها اي شخص مسافر سواء مبتعث او مو مبتعث

و اتطمنوا والله ماتحسوا انكم خرجتوا من بلدكم الا بالعكس الناس هنا تعاملهم احسسسن من بلدنا بستمية مليون مليار مره
يعني حطوا في بطنكم بطيخه صيفي.

اي اسئلة تانيه اتفضلوا وانشالله اقدر افيدكم..

و سلامتكم

• نشر عبر تويتر
• نشر عبر فيسبوك
• نشر عبر جوجل