شرح مشاكل الطيران (حتى لا تتورطوا) وتوصيه على بعض الشركات.

November 24th, 2011, 11:00 PM

بسم الله والصلاة والسلام على النبي الأمي واله وصحبه اجمعين.

بحكم خبرتي في مجال الطيران لمدة 18 سنه وبحكم سفرياتي :
اسرد لكم بعض الملاحظات للاخوان المبتعثين والمقبلين على مرحله مهمه في حياتهم وحتى لا يتورطوا في رحلتهم وخصوصا انه
اغلبهم انجليزيته محدوده ولا هو حمل المناحله خلال سفرته وخصوصا لامريكا :

1- الشنط يجب ان تكون شنطتين وزن كل واحده لا يتجاوز 24 كيلو احتياطا وبعض شركات الطيران 30 كيلو وواحده في اليد لا يتجاوز وزنها 7 كيلو من المقاس الصغير.
2- لا تحمل اغراض لاشخاص مجهولين >>>>> انتهى زمن المرجله والدنيا ما عادت زي زمان.
3- لا تحمل مأكولات زي الرز والدقيق والنواشف والمعلبات والسوائل والابازير (شوف اليوتيوب للمبتعثين اللي كانوا اخدين ليمون ناشف في نيوزلانداوالمبتعثين اللي اخدو التوم (طراطيع))فضيحتهم بجلاجل.
4-شنطة اليد لا تحمل فيها عطور او سوائل اكثر من 25 مل.
5-طبعا الادوات الحاده مالها داعي في شنطة اليد و ادوات الحلاقه.
6- نجي للاوراق المهمه زي جواز السفر والاي 20 والسفيس وكل ورقه ان شاء الله ميمو صغير صورها و خليها معاك في شنطة اليد.
7-بالنسبه للمبتعثين لامريكا نصيحه مهمه انك تحاول خط طيران لمدينتك عن طريق دوله تانيه ولاقرب مطار وحاول تتجنب الطيران الداخلي حقهم لانهم قلق وعندهم قوانين زي اللي عندنا قطعه واحده وبس بمعنى انك رايح تتورط في القطعه الثانيه وغير انهم ممكن يفتشوك الين يقرفوك(بأقول ممكن).
مثال: انا مسافر لمدينه KENT واقرب مدينه لها كليفلاند في اوهايو ممكن اجي على واشنطن ومدة الرحله كلها 23 ساعه واخد خط داخلي واتعرض لما ذكرته ولكن...هناك حل انه اروح من جده - فرانكفورت - تورينتو-كليفلاند وممكن احد يقول طيب انت كده بتطول المشوار؟؟ وانا اقول ابدا لانه مدة الطيران اقل والانتظار في المطار برضه اقل واستلم اغراضي في مدينة كليفلاند.
8- بالنسبه للمبتعثين من داخل المملكه يفضل الذهاب بالخطوط السعوديه من مدينتكم والى نيويورك او واشنطن لانه التشييك بيكون مره وحده يعني احسن ما تجي جده والا الرياض وتروح على شركه تانيه ممكن يرفضوا اغراضكم وتتورطو في الاغراض.
9- الاخوان اللي في الرياض والدمام الافضل الذهاب على الخطوط القطريه او الاماراتيه او الاتحاد او الوفتهانزا واللي في جده ممكن التركيه او السعوديه او المغربيه اذا كنت رايح على نيويورك ومنها على بلد الابتعاث..
10-تجنب الخطوط اللي فيها قلق بسبب الاضطرابات الجويه كما حصل معي على الخطوط البريطانيه لمن توقفت الرحلات بسبب البركان او العواصف الثلجيه.او بسبب الاعتصامات زي المصريه والفرنسيه.>>>>اتأخرت في مطار القاهره 18 ساعه وباريس 21 ساعه واليونانيه 5 ساعات والسبب اضراب الموظفين عن العمل او الايطاليه اللي معاملتهم جلفه وكابينة السفر مقرفه.
11- اذا كان لا بد لرحله داخليه داخل امريكا يفضل شركات الطيران الدلتا والامريكان ايرلاينز لكن لاحظو انه احيانا الحجز بيكون على الشركة طيران ولكن تسيير على شركه اخرى.
12- لا يلزم السفر لواشنطن وممكن انجاز المعاملات عن طريق البوابه الالكترونيه.
13-بعض الدول الاوربيه يلزمها تأشيرة دخول للترازيت من الافضل انكم تتأكدوا من الموضوع دا مع مكتب الطيار.
14-بعض المبتعثين هداهم الله ما يكدب خبر ويخرج من السعوديه وبما انه بعض شركات الطيران مسموح فيها المشروبات الكحوليه فأنهم لمن يوصلوا ما يدروا فين الله قاطهم وتلاقيه عند الجوازات راسه خفيييييفه.
15- بالنسبه للعوائل وخصوصا اللي معاهم اطفال تجنبوا الرحلات الطويله ....ترا اطفالنا خلقهم ضيق.
16-بعض شركات الطيران الامريكيه الاكل والطلبات تكون بفلوس وخصوصا لمن تتطلب بندول او مواد صحيه.

هذا مالدي الان والله ولي التوفيق.

• نشر عبر تويتر
• نشر عبر فيسبوك
• نشر عبر جوجل