متوقع تخرجي الصيفً والذي حصل معي في مرحلة التدقيق
سلام كيفكم أنا عارفه أنكم متحمسين للتدقيق ما ابغي احبطكم بس ما قبلو أوراقي بحكم أني متوقع تخرجي الصيف أنتو عارفين انو اللي اتخرجو ولسا ما استلمو الوثيقة وجابو إفادة ما قبل مركز التدقيق افادتهم فما بالكم متوقع تخرجهم المهم لاتحبطو و ربنا يوفقنا ويكتب لنا كل خير /ملاحظة هامةالرجا الرد فقط للناس اللي مثل حالتي متوقع تخرجة وقدم علي المرحلة السادسة رجا بدون زعل واللي مو فاهم الموضوع لايرد من أصلو دا موضوع لنقاش مشكلتنا ماهو
للتخمين او العتاب يكفينا اللي فينا أوكي شكرًا علي تعاونكم مقدما
رد: متوقع تخرجي الصيفً والذي حصل معي في مرحلة التدقيق
:(
شيء محبط عموماً انا ماراح اوقف و بخلي تدقيقي اخر يوم اكون تخرجت فعلاً لآن اختباري ب ١٣
الله يوفقك و يسهل امرك و الخيره فيما اختاره الله
لكن بسآلك كلمتي المستشاره ؟ قلتي لها اللي بالمرحله الخامسه انقبلوا ؟
رد: متوقع تخرجي الصيفً والذي حصل معي في مرحلة التدقيق
يس اصلا المستشارة قالت انو ليش تقدمي و انتي ماتخرجتي قلت لها صار كدا السنة الماضية ما أبدت اي تعاون وقسم الرجال قالو انهم فعلا صارت دي الحركة السنة الماضية لكن اتورطو بيها
رد: متوقع تخرجي الصيفً والذي حصل معي في مرحلة التدقيق
ليش هم اصلا طالبين افاده بالنسبه اللي تخرجهم بالصيف كيف صارت ؟؟؟
رد: متوقع تخرجي الصيفً والذي حصل معي في مرحلة التدقيق
الله يعينكم ويوفقكم جميــعــــا يـــــــــارب .. انا اتوقع الافادة ماتنفع للي تخرجهم في الصيف لأنه المعدلات اكيد حتتغير ياحترتفع او حتنقص .. وبكذا انتم حتكونو مسجلين في التقديم معدلات غير معدلاتكم الصحيحة < هذا اللي اعرفه والله اعلم .. وانا ماني متأكدة من صحة دا الكلام مجرد توقع فقط لاغير
رد: متوقع تخرجي الصيفً والذي حصل معي في مرحلة التدقيق
9- إفادة بالتخرج للطلبة المتخرجين هذا العام.
:dry: ؟؟؟؟
طيب الافاده اللي عندك ايش مكتوب فيها ؟؟
رد: متوقع تخرجي الصيفً والذي حصل معي في مرحلة التدقيق
يا أختي الإفادة اللي هم طالبينها مو إفادة بوقت التخرج ..
بل إفادة بإنك خلاص اتخرجتي..بس باقي إجراءات طباعة الوثيقة..
وفيه بنات قدمو بيها وانقبلت منهم..
بالتوفيق..
رد: متوقع تخرجي الصيفً والذي حصل معي في مرحلة التدقيق
السلام عليكم ..
اتذكر أول ظهور لك في المنتدى في موضوعك كلمتك وقلتلك ماراح ينفع , لكن ربنا يكتبلك اللي فيه الخير , ان شاءالله السنه الجايه عالمرحلة السابعه باذن الله اذا مطابقه كمان للعمر الخ ..
اتمنالك التوفيق اختي ..
رد: متوقع تخرجي الصيفً والذي حصل معي في مرحلة التدقيق
اقتباس:
المشاركة الأصلية كتبت بواسطة kewl
السلام عليكم ..
اتذكر أول ظهور لك في المنتدى في موضوعك كلمتك وقلتلك ماراح ينفع , لكن ربنا يكتبلك اللي فيه الخير , ان شاءالله السنه الجايه عالمرحلة السابعه باذن الله اذا مطابقه كمان للعمر الخ ..
اتمنالك التوفيق اختي ..
اول شي أنا ماكان داكا اول ظهور ليا با الأصح دا ظهوري الجديد بحسابي الاخر فقط تاني شي أنا ماقدمت من فراغ ارجع للموضوع راح تلاقي شخص قالي انو قدم وكان زي حالتي كان السنة الماضية
وقبلوه بس ما راح لعذر. ولعلمك الاستشاري بمركز التدقيق قال انو فعلا السنة االماضية قبلو أوراق اللي متوقع تخرجهم بس حصلت مشاكل كتير
رد: متوقع تخرجي الصيفً والذي حصل معي في مرحلة التدقيق
اقتباس:
المشاركة الأصلية كتبت بواسطة Biochmist
لو سمحتو اللبس مو فاهم الموضوع لا يرد أنا هنا بي اخاطب اللي مثل حالتي متوقع تخرجهم والغلط مو مننا إحنا سوينا متل ما حصل مع الاخوان اللي بمتل حالنا السنة الماضية و انقبلو و ابتعثو الان رجا بدون زعل اللي مو فاهم الموضوع لا يرد
سؤال ..ولاحظي إني بخاطبك على أساس إنك إنسانة متعلمة
س: إنتي ليه كاتبة الموضوع؟
هو واحد من إثنين :
1.إما إنك تبغي مشورة ومساعدة..
وإحنا بحكم إننا اكبر منك و"أعلم" مرينا بتجارب اكثر.. والإفادات فاهمين فيها أكثر منك ..
فجينا نقول لك الواقع لا أكثر ولا أقل
أو
2. تبغي بس تلمي اللي زي وضعك في الموضوع وتقعدي تلطمي .. وما تبغي أي كلمة حق..
بس بقول لك كلمة راس أختي..
عشان أثبت لك إن عندي خبرة في الموضوع.. أنا قدمت العام بمثل إفادتك تماما.. ولم يتم قبولي..
ومستعدة أشرح وأنص لك صيغة إفادة التخرج .. وإفادة المتوقع تخرجهم .. وأشرح لك الفرق عشان تتنوري..
إيش رأيك؟؟ أنفع أرد؟؟ :)
ما صار وضعي زي وضعك.. وأنا مقدمة في المرحلة الخامسة اللي تقولي عدوا فيها مثل هذي الإفادة..؟!!
لا تحطي موضوع بالعام وتتشرطي مين يرد ومين ما يرد..
ولا ما تبغي أحد يواجهك بالواقع.. ولا تبغي تستفيدي من خبرات اللي قبلك..
ترى إحنا ما وصلنا لمكاننا هذا إلا من نصائح اللي سبقونا
لكن مشكلتك راسك كبيرة.. لسة ما اتخرتي وقاعدة تضاربي العالم..
أبشرك .. حنرجع بعد عشرة سنوات وإنتي بنفس المكان ما اتقدمتي خطوة..
بالتوفيق..