الأعضاء الإشتراك و التسجيل

الملتقيات
ADs

ما الأفضل تخصص أحياء أم مختبرات طبيه ؟؟؟؟؟؟

ما الأفضل تخصص أحياء أم مختبرات طبيه ؟؟؟؟؟؟


NOTICE

تنبيه: هذا الموضوع قديم. تم طرحه قبل 2652 يوم مضى, قد يكون هناك ردود جديدة هي من سببت رفع الموضوع!

قائمة الأعضاء الموسومين في هذا الموضوع

  1. المشاركة الأصلية كتبت بواسطة قَشْعَرِيْرَةْ فَقْد
    جيمو ثآنكس يآ قلبي

    بس ترـآني مآ فهمت شي ..!

    يآ ليت لو تعطينآ شوي من وقتك وتشرحي وش طبيعة الوظيفة بكل قسم بأدق شي تقدري عليه

    ..{ وإبتعدي عن التسميآت اللي مآ نفهمهآ بليز ترـآ خريجين ثآنوي ^^" هع

    آممم يعني وش التخصصآت الدقيقة لكل قسم ووش وظيفتنآ فيه وبإيش يختص

    ووش اللي تحسيه مهم ووش اللي تحسيه مهم ومو بآيخ (أبي أختآر قسم فيه تشغيل مخ مو بس بالحآسب وأشيآء عآدية علشآن أحس بقيمة درآستي صح هع)

    ولو تخرجت الحين من البكلوريس وشهآدتي أمريكية بيحطوني فنننننننننننننية مختبرآت ؟!!! :|
    ..{ لو كذآ قهر مآبي

    سوري طولت عليك بس أبي أعرف أشيآء كثيرة من زمآن ومحد يعرف وبآين عليك بنت حلآل وعلومك طيبة ~!!
    ويجزآآكـ الله كل خير ,
    طيب انا حاقولك
    معليش اتاخرت عليكي مايمديني ادخل النت كل يوم
    في اخت شرحت برضو جزاها الله خير
    في قسم بنك الدم :دا القسم تشوفي فيه تطابق فصايل الدم عشان لو شخص سار لو حادث لاسمح الله ولا شخص مريض (سرطان --ثلاسيما --ولادة--وحالات اخرى)يحتاجو نقل دم بنفس الفصيله واحنا نطابق المفروض مايكون بينهم تفاعل وانو جسم المستقبل (المريض) يستقبل دم المتبرع بدون مشاكل لانو اقل خطا او مشكله راح يروح فيها المريض فالقسم مره حساس ويبالو تركيز وشغلو جدا ممتع
    اول مايتبرع المريض نعمل اختبارات الفصائل عشان نعرف فصيلته وونتاكد انو خالي من الامراض وزي كدا
    في قسم الاحياء الجزئيه: شغلو حلو له مستقبل هنا نشوف ازا المريض عندو مثلا ايدز او التهاب الكبد الوبائي وبعض الامراض الاخرى زي (انفلونزا الخنازير- حمى الضنك- وبعض الامراض الاخرى) في دا القسم نعتمد بشكل كلي على DNA تبع الفايروس نفسو اكيد تعرفو الدي ان اي ونشوف ازا موجود الدي ان اي ولا لا ازا فيه يعني مريض ازا لا يعني سليم ويدخل مع دا القسم الوراثه الطبيه كلكم تعرفو الامراض الوراثيه وتغير الكرموسومات مره حلو القسم بس يبالو عقل مفتح وفهم ومافي شي صعب ازا نحنا نبغاه يسير سهل
    في قسم السيرولجي ( المناعه): زي ماقالت الاخت فيلو اختبارات تحدد مناعه الجسم مثلا الامراض المناعيه نشوف هل يوجود في جسم الانسان دا مناعه ضد المرض الفلاني ولا مناعتو قليله والمرض مسيطر عليه في دي الحاله الدكتور لازم يديه دوا ونشوف في دا القسم الناس اللي عندهم حساسيه ضد اكل معين وطبعا الدكتور راح يمنعو من الاكل دا وفيها ازا عندو مرض فايروسي نشوف مناعته ضد المرض دا ونتابع تحسنه في دا القسم
    في قسم الهستولجي او (علم امراض الانسجه): هادا غير كل التخصصات لانها العينات التي تستخدم ليس دم وبول وبراز لا انما نستخدم انسجه اجزاء من الانسان مثلا (جزء من الكبد - جزء من السائل المعدي-- جزء من المشيمه --وهكذا)هنا يكمن جمالو انو غير انا احبو عشان كدا وطبعا بعدها ناخد دي الانسجه ونعالجها بحيث شكلها في النهايه تسير رفيعه جدا بالمايكرو مانقدر نشوفها بعيوننا لازم تحت المجهر وتشوف النواة والسيتوبلازم ونشوف ازا فيه اختلاف يعني في مشكله مثلا يكون مرض سرطان او امراض اخرى وطبعا احنا مانشوف بالمجهر الدكتور او رئيس القسم اهو اللي يشوف احنا بس نجهز العينات فيلو تخصصات دقيقه مثلا قسم السرطان واقسام اخرى تتعلق بالامراض
    احيانا يجيبو عينات من غرفه العمليه ويبغو بسرعه نطلع ايش فيلو دا النسيج عشان يعرفو ازا يشيلوا العضو (كلى -كبد-اي جزء من الانسان) وطبعا النتيجه تطلع في خلال ساعه او اتنين
    واحيانا يجيبو سوائل الجسم وبرضو نفس الطريقه
    قسم الباراسيتولجي(الطفليات): دا القسم مقرف عيناته بول وبراز نشوف فيها الديدان ازا كانت موجوده نشوف البول من ناحيه انو طبيعي ولا او لا زي كدا وفيلو تخصصات برضو حلوة في الديدان نفسها وامرااضها وطبعا منتشرة من ضمنها البلهارسيا اللي اصابت عبد الحليم حافظ
    قسم الباكمستري (الكمياء الحيويه): حلو القسم نشوف فيها مستوى الجلكوز والمعادن في الجسم ونشوف انزيمات الكبد والقلب والكلى واشياء اخرى نشوف كمان الهرمونات ومن ضمنها هرمون الحمل مره حلو لمن نشوف وحدة حامل وهي في الشهر الكم ^_^
    والكمياء لها تخصصات كتيرة دقيقه كانك داخل تخصص كيمياء وشغلو كلو على اجهزة وهادا ممل نوعا ما وهو قسم مهم مافي مختبر بدونو
    قسم المايكروبيولجي(الاحياء الدقيقه):هنا نشوف ازا في بكتيريا او جراثيم طبعا بانواعها في الدم والبول والبراز ومسحات مثلا من (الفم - الاذن-القناه المهبليه-الاجراح - وغيرها كتير) ونعمل لهم البيئه المناسبه عشان تنمو ونشوفها بعدين بالاختبارات ونحدد نوعهاوكمان في عينات السبيوتم نحدد منها ازا عندو مرض السل الدرن او لا
    جدا ممتع انك تعيشي مع كائنات صغيرة جدا وتشوفي عالمها مره حلو ولها تخصصات دقيقه لمن تكملي مره حلوة
    قسم الهيماتولجي(علم الدم ووالامراض):من اسمو نشوف فيه امراض الدم ونشوف كريات الدم الحمرا والبيضاء ومستواها يحدد ازا الجسم مصاب بمرض معين او لا ونشوف فيها انواع مرض السرطان ونحدده ونشوف مدى تجلط الدم وسيولته واشياء اخرى كتير مايكفي لو قلتها كلها طبعا نسيت اقولكم انو في عينات السائل النخاعي وهادي تمر على اقسام كتير نحدد ازا عندو مرض الحمى الشوكيه او لا واشياء تانيه من امراض النخاع
    في قسم الفارما كولجي(الادويه والسموم): مره حلو يقولك تاثير الدوا على الانسان لو زاد ولوقل كم الكميه الكافيه اللي يستفيد منها الانسان ونعمل تجاربنا على الفار الابيض يناسو عليه (شفتو بس ماقد مسكته اخاف) ويقولك ايش رده فعل الجسم من الدوا الفلاني وحوسه وحسابات دوخه فيه هو صعب بس ممتع انك تعرفي عن الادويه هادا القسم مو موجود في كل المستشفيات انما في اماكن معينه نسيت اقولكم انو يكشف عن المخدرات ونسبتها في الدم وانو الانسان دا وصل لاي مرحله طبعا العينات دم وبول في ناس تدخل دا القسم مع الكيمياء الحيويه
    مني فاكره ازا في اقسام تانيه اولا
    لو كنتي عندي في مكه كان وريتك المختبر على الواقع

    هنا تكمن حلاوة المختبر يفتح لكي الباب لكل التخصصات تحسي انك كيمياء واحياء واحيانا صيدله فيها مجلات كتيرة لمن تجي تكمل وتخصصات دقيقه كتيرة المختبرات تخصص حلو يحتاج منك عقل مفتح وقوة اصرار على المتابعه وصدقوني راح تحبوه وتفتخرو بيه ^_^
    ممتع في الدراسه بجميع مراحلها سوا بكاليوريس ماستر او دكتوراه ولها مجالات في المستشفيات اوالجامعات يمكن في اماكن تانيه بس لسى انا ماعرفتها
    لمن تدخلي مختبر حلو انك تكملي بالنسبه للعمل زي ماقلت اول لو كنتي حكومي بكتبو لك اخصائيه مختبر اما خاص فانتي فنيه بس يغيروه لكي ازا جريتي وراهم بالنسبه للراتب يبدا من 7000 وانتي طالعه سواء حكومي او خاص
    تمنياتي لكم بالتوفيق ودعواتكم لي
    ازا فيه اي سؤال انا حاضره
    ربي يسهل لكم وتختارو اللي تحبوه ^_^
    اتمنى اني اكون افدتكم لو بشي بسيط
    7 "
  2. هلا ياقلبي شوفي انتي تحبي وهاتعطي في اي مجال اذا ماتأيدي الاختلاط في المستشفيات عندك تخصص الاحياء حلوووو
    اما اذا عادي فالمختبرات حلوووة وممتعة وقسم فية حيوية وشغل وصح متعب بس ممتع
    بالنسبة لية احياء عامة (تربوية) ونفسي اكمل ماجستيرعلم الوراثة او علم الاجنة والحين احاول ابحث اكثر عن هالمجالين وان شاء الله ربي ييسرلنا امورنا
    مين بتكمل ماجستيراحياء في امريكا ؟
    7 "
  3. المشاركة الأصلية كتبت بواسطة حلم.
    وانااا علم حيوان واخترت تخصص احياء للماااستر

    بس اللحين ندرس احياء عامه والاقسم من اقساام الاحياء ؟!

    بالتوفيق
    اللي سمعتة انك تتخصصي في قسم من اقسام الاحياء مثل علم الاجنة -علم الوراثة - علم وظائف الاعضاء -فطريات ---الخ
    7 "
  4. كيفكم صبااايا
    انا بكمل ماستر معاكم بامريكا ..... ويا بنات انا بجد حااابه اتعرف عليكم عشان نكون صحبه جيده ونتعاون ونساند بعض بالغربة
    بالنسبه لتخصص الماستر انا انصحك تختاري تخصص دقيق من ضمن المواد الي درستيها في تخصصك احياء حيوان ....لانه لو اخذتي تخصص لانه مسار ثاني بتعقدي نفسك ... انا هذا رأي .. وانا تخصصي بالبكالوريوس كان احياء دقيقه ودرست كل المواد الي درستها الاخت جيمو كمان اتدربت بمستشفى الولاده ... وحاطه في بالي اما هندسه وراثيه - جينات ونصيحه اخيره ادخلي على مواقع الجامعات الي حتقدمي فيها شوفي ايش برامج الماستر الي عندهم وبعدين حددي ...
    والله يقدم الي فيه الخير......
    7 "
  5. اللي قالت انه كثير متخصصين احياء

    فأنا أوافقها لكن للأسف أغلب الخريجات يوفقوا ع الماستر وبس فيضطروا يدرسوا معامل أقل شي

    لذلك نصيحة من أي وحدة حابة الشغل الاكاديمي انها تكون ذكية ف اختيار التخصص اللي تبغى تكمل فيه وموافق لاحتياجات سوق العمل

    ع الاقل اذا رجعت ان شاء الله تلاقي وظيفة ع طول

    وانتوا عارفين جامعاتنا ماتخلوا من الدكاترة الاجانب وهذا دليل ع العجز ف الاقسام وعدم وجود دكاترة من أهل البلد يغطوا هذا العجز

    أتمنى للجميع التوفيق

    ويارب أكون أفدتكم

    مودتي
    7 "
  6. انا مثلك ياصاحبة الموضوع نفس التخصص خريجة كلية التربية جده

    مع أن تخصصات الاحياء كثيره الفرعية لكن مو على كيفنا يعني ممكن تقدمي للجامعات في تخصص معين ما يقبلونك

    لذلك على كل بنت أنها تضع تخصص رئيسي وتخصصات فرعيه ( استبنه ) لطوارئ في حال عدم قبولك في التخصص الي تحلمي فيه

    وبالتوفيق للجميع

    مبتعثه لكندا
    7 "
  7. السلام عليكم صبايااااا

    مره مبسوطه انو فيه احد فتح دا الموضوع

    انا تخصصي أحياء دقيقة وبكمل ان شاء الله ماستر في كندا ..

    وحالياً بتدرب في المختبرات قسم الأحياء الدقيقة ..

    بصراحه اول ما قرأت الموضوع حبيت اني افيد الطالبات اللي طالعين بكالوريوس ويفكروا يتخصصوا احياء ..

    عزيزاتي ..

    اي احد يتخرج بكالوريوس أحياء دقيقة وحابب يشتغل في المختبرات لازم يتدرب سنه كاملة في مستشفى حكومي تطوعاً ( يعني من غير راتب ) بعد التخرج علشان فيه شي اسمو رخصة مزاولة مهنة .. وماتقدري تاخذيها إلا لمن تدربي سنه وبعدها تدخلي اختبار هيئة التخصصات السعودية واذا اجتزتيها تاخذي الرخصة ..

    أما بالنسبة لخريجين بكالوريوس أحياء حيوان فهم غير معترف بهم في هيئة التخصصات السعودية وهذا كلام أكيد لأني سالتهم بنفسي علشان صحبتي ومالهم اي اختبار او رخصة مزاولة مهنه .. يعني بالعربي مايقدروا يشتغلوا في المختبر بشهادة البكالوريوس تخصص أحياء حيوان ..

    غير كذا .. خريجين بكالوريوس التقنية الطبية او المخبترات الطبية لهم الأولوية في وظيفة المختبرات لأنهم زي كرت الجوكر يعني يدرسوا جميع اقسام المختبر .. اما الاحياء الدقيقة فـ تندرج تحتها قسم الأحياء الدقيقة اللي هي البكتيريا والجراثيم و الطفيليات والفطريات والفيروسات والمناعه ..

    بكالوريوس الاحياء الدقيقة يكون دراسه عامه في جميع الكائنات المجهريه اللي قلتها اول وبالاضافه الى الكائنات المجهرية اللي ماتندرج تحت الميكروبات الممرضة مثل الطحالب والاوليات ..

    قسم الاحياء الدقيقة جداً ممتع وحلو للي يبغى يكمل ماستر ودكتوراه .. وممكن للي يبغى يدرس بكالوريوس احياء دقيقة ممكن يكمل ماستر في الاحياء الدقيقة الطبية .. حلو جدا في العمل لأنك تشوفي نمو البكتيريا على الاطباق الغذائية حقتها وفيها شغل يدوي كثير وتشوفي التستات ( الاختبارات او التفاعلات ) حقها بعيونك وبيدك تشتغليه ..

    قسم الجينات يندرج برضو تحت الاحياء الدقيقة .. وهو قسم رائع بس يبغاله طولت باااال و مخ نظيف واحنا البنات مافي شي صعب علينا ان شاء الله ...


    واي سؤال انا كمان حاااضرة

    7 "
  8. المشاركة الأصلية كتبت بواسطة E.Me
    السلام عليكم صبايااااا

    مره مبسوطه انو فيه احد فتح دا الموضوع

    انا تخصصي أحياء دقيقة وبكمل ان شاء الله ماستر في كندا ..

    وحالياً بتدرب في المختبرات قسم الأحياء الدقيقة ..

    بصراحه اول ما قرأت الموضوع حبيت اني افيد الطالبات اللي طالعين بكالوريوس ويفكروا يتخصصوا احياء ..

    عزيزاتي ..

    اي احد يتخرج بكالوريوس أحياء دقيقة وحابب يشتغل في المختبرات لازم يتدرب سنه كاملة في مستشفى حكومي تطوعاً ( يعني من غير راتب ) بعد التخرج علشان فيه شي اسمو رخصة مزاولة مهنة .. وماتقدري تاخذيها إلا لمن تدربي سنه وبعدها تدخلي اختبار هيئة التخصصات السعودية واذا اجتزتيها تاخذي الرخصة ..

    أما بالنسبة لخريجين بكالوريوس أحياء حيوان فهم غير معترف بهم في هيئة التخصصات السعودية وهذا كلام أكيد لأني سالتهم بنفسي علشان صحبتي ومالهم اي اختبار او رخصة مزاولة مهنه .. يعني بالعربي مايقدروا يشتغلوا في المختبر بشهادة البكالوريوس تخصص أحياء حيوان ..

    غير كذا .. خريجين بكالوريوس التقنية الطبية او المخبترات الطبية لهم الأولوية في وظيفة المختبرات لأنهم زي كرت الجوكر يعني يدرسوا جميع اقسام المختبر .. اما الاحياء الدقيقة فـ تندرج تحتها قسم الأحياء الدقيقة اللي هي البكتيريا والجراثيم و الطفيليات والفطريات والفيروسات والمناعه ..

    بكالوريوس الاحياء الدقيقة يكون دراسه عامه في جميع الكائنات المجهريه اللي قلتها اول وبالاضافه الى الكائنات المجهرية اللي ماتندرج تحت الميكروبات الممرضة مثل الطحالب والاوليات ..

    قسم الاحياء الدقيقة جداً ممتع وحلو للي يبغى يكمل ماستر ودكتوراه .. وممكن للي يبغى يدرس بكالوريوس احياء دقيقة ممكن يكمل ماستر في الاحياء الدقيقة الطبية .. حلو جدا في العمل لأنك تشوفي نمو البكتيريا على الاطباق الغذائية حقتها وفيها شغل يدوي كثير وتشوفي التستات ( الاختبارات او التفاعلات ) حقها بعيونك وبيدك تشتغليه ..

    قسم الجينات يندرج برضو تحت الاحياء الدقيقة .. وهو قسم رائع بس يبغاله طولت باااال و مخ نظيف واحنا البنات مافي شي صعب علينا ان شاء الله ...


    واي سؤال انا كمان حاااضرة
    هلا اختي ومشكوووورة عالمعلومات القيمة
    بالنسبة لية انا درست احياء عامة بمعنى حيوان ومايندرج تحتة ونبات ومايندرج تحتة يعني كل شي في الاحياء تمام
    كيف انتي درستي احياء دقيقة وايش هية المواد اللي كنتى تدرسيها فية ؟
    طيب لو بكمل في هذا المجال 0(الجينات)يمديني والا لا ؟
    والوظيفة مستقبلا فين بالظبط ؟
    ومشكووووووورة مقدما
    7 "
4 من 5 صفحة 4 من 5 ... 345
ADs

قم بتسجيل دخولك للمنتدي او

الانضمام لمبتعث

Search Engine Optimization by vBSEO ©2011, Crawlability, Inc.