السلاام عليكم، انا قبل ثلاث سنوات لجئت لهذا الموقع بحثا عن حل، وللمشاركين في هذا الموقع افضال كثيرة بمشاركاتهم في هذا الموضوع ومواضيع اخرى افادتني جدا جدا جدا. ، واليوم وصلني استفسار وانا نسيت الموضوع هذا وكمان بصراحة ما عرفت اطلع الموضوع بما اني ما اعرف للمنتديات كويس. ولكن حبيت ارجع اشارك بتجربتي علها تفيدكم ولاتنسون الدعاء للي ذكرني ولي
المشاركة الأصلية كتبت بواسطة lfjueohv
السلام عليكم
استاذ سعد ممكن تفيدني بخصوص تخصص الـ jd
اذا كنت حصلت قبول فيه لان حصلت لك موضوع بهذا الخصوص
وشكراً لك واسف ع الازعاج
وعليكم السلام
مافيه ازعاج ابدا. وقت التقديم وجدت معلومات قليلة جدا عن الموضوع هذا بالعربي، واضطريت اقصر بحثي عن الموضوع هذا على مواقع الجامعات والمنتديات الانقليزية،ولكن اكتسبت خبرة جيدة في الموضوع هذا، ولكن من أجل تعم الفائدة وعسانا نلقى جميعا دعوة ارجوا انك تنقل ردي التالي لاستفساري او مشاركتي، حاولت ابحث عن مشاركاتي اول وما عرفت القاها. وما كنت اتوقع احد بيستفيد، ولكن بما انك سالت وانا تاخرت عليك بعطيك رد مفصل، واذا بقي لك استفسارات اسال وانا اجاوب اللي اعرفه.
انا بديت تقديم واختبرت بس للاسف اكتشفت بعدين اني ما اقدر التحق بالبعثه اذا بجي ادرس درجة JD. ولكن اكتسبت معلومات عن هذي الدرجة وقبولاتها.
القبول فيها يحتاج درجة عاليه في التوفل، عاليه جدا. وايضا اقدر اجزم ان مافيه برنامج واحد في امريكا معترف فيه يدرس JD وما يشترط LSAT. هو عباره عن اختبار قبول طويل ويحتاج سرعة وذكاء وتركيز واي شي يخطر في بالك. آنا ما اقول انه مستحيل، ولكن باختصار يحتاج له تحضير مكثف او ذكاء خارق عشان تجيب درجة تدخلك لجامعةكويسه. ودراستها مدتها ثلاث سنوات موادها نظرية وصعبة ومعقدة للي ما يهوى دراسة القانون
عموما، درجة JD درجة قانون في امريكا ما يدرسها الا فقط الطلبة اللي معاهم بكالوريوس. يمعنى اخر، في امريكا ما تقدر تدرس محاماة الا اذا خلصت بلكالوريوس في اي تخصص علمي او غيره، والدرجة هذي لا تعتبر ماجستير، وحتى في السعودية، لا تعتبر الJD ماجستير وتقدر ترجع لموقع الوزارة في نظام الجامعات والشهادات الموصى بها. انا تخرجت من الجامعة وكنت اطمح ادرس قانون وبديت اجهز للتقديم حظرت ما يقارب ٣ أشهر لاختبار LSAT بشكل مكثف، وكان صعب جدا من ناحية المحتوى واللغة بالرغم من ان اجيد الانقليزية، حتى الامريكان يجدون اللغة صعبه. بعد الاختبار والتعب اكتشفت اني ما اقدر التحق بالبعثة اذا حبيت ادرس هذي الدرجة وحتي لو جبت لهم قبول نهائي، لانه ما يحق لك تدرس الا امتداد لتخصصك. وهي مدتها ثلاث سنوات ودراستها جدا جدا صعبة وتحتاج لغة ممتازة جدا جدا. ولكن، اذا كنت خريج شريعة او قانون، تقدر تدرس ماجستير قانون في امريكا وهي معترف فيها من قبل الوزارة وتقدر تنظم للبعثة وبسهوله كمان. لانه يوجد جامعات كثيرة في امريكا تقبل طلاب سعوديين يلتحقون ببرامج الماجستير في القانون خريجين قانون او شريعة من السعودية. والاهم من هذا كله، انه يوجد عدد لا بأس به من الجامعات لا تشترط اختبار ال LSAT للماجستير. بس احسب حسابك للغة الانقليزية. لازم تكون تجيدها بطلاقة.
بالاضافة: انا ركبت في رحلة بالصدفة بجنب محامي كبير وقت ما كنت اقدم على جامعات عشان هذي JD، واستشرته في دراسة القانون وكان رده لا تفكر حتى لاني كمحامي ما ابغى واحد جاي دارس بس قوانين وضعية، احتاج خريج شريعة عشان اوظفة عندي وينفعني. ويمكن تعرف ان المحاماه كوظيفة تبدا كانك متدرب، فقالي انا مستحيل اشغل في مكتبي خريج قانون من امريكا لاني ما بقدر استفيد منه. يمكن يكون غلطان شفت طلاب هنا يدرسون قانون مبتعثين. او لديك مخططات اخرى للدراسة غير المحاماة.
الزبدة: الدرجة هذي ما بتنفع لك الا اذا بتدرس على حسابك ويكون عندك بكالوريوس وتجي درجة معقولة في اختبار LSAT. ولكن هل هي مجدية؟ يعتمد عليك. واذا كان تخصصك شريعة او قانون، حرام تضيع وقتك وجهدك وماتبدا ماجستير على طول. واذا كنت تبغى تجي تدرس، انا اقدر اساعدك في القبولات، انا جبت قبولات JD, وماجستير في تخصصات مختلفة للبزنس والحاسب والتمريض وتخصصات كثير للبكالوريوس، وانا كمان مبتعث.
معليش ما اعطيتك اخبار حلوه، بس اتمنى افادك ردي، بس اتمنى تشارك ردي في المنتدى العام تحت موضوعي اللي لقيته عشان لا تتعب احد ولا احد يدعي لك ولي دعوة مابينها وبين الله حجاب. وبالتوفيق
أخوك سعد
saad_162 May 2nd, 2013, 11:18 AM
7 "
انا عن نفسي تخصصي دراسات اسلاميه وبكمل ماجستير قانون ان شاء الله في كندا وسالت مسؤوله بالوزاره قالت مافي مانع لانه الدراسات الاسلاميه تدخل بالشريعه وبرا يعتبر قانون اسلامي وان شاء الله يعادلونها ماجستير مو دبلوم عالي وبالتوفيق للجميع