نداء عاجل :للي مقدمين على تخصص ليس امتداد لتخصصهم (:

عفوا اخوي انا كمان اخويا مرافق لي وهو معاه ثانوية شرعي ويبغى يكمل في البكالوريوس في تخصص الهندسة ؟؟
وأنا تخصصي دراسات اسلامية وابغى اكمل في القانون ... وطبعا هذا غير مسموح ؟؟

فلو افترضنا انه انا جبت قبول من الجامعة على تخصص القانون .. ومثلا درست مواد تكميلية ... هل اقدر ااكمل عادي في القانون بدون مشاكل ,,, ولا الوزارة تلغي لي بعثتي ... ؟؟

وشكرا لك

وانا ما ابغى تسويق ابدا لما اشوف كلمة تسويق تطلع لي قرون في راسي

اولا احب اقول للي ارسلي رساله على الخاص انه مارضى المنتدى يخليني ارد عليه الا اذا كان عندي 30 مشاركه, لكني برد عليه بعد ما ارد على االاخت اللي اقتبست كلامها.

اختي انا مثل ماقلت خبرتي مع الوزاره شبه معدومه وانا ماحبيت اوجع راسي فيها علشان كذا قدمت بزوجتي وريحت راسي واذا جبت قبول لنفسي بطلب انظمامي.

بالنسبه لاخوك ما اشوف اي مشكله انه يلقى قبول في جامعه امريكيه تدرسه هندسه (طبعا على حسب درجاته واذا وكم درس رياضيات وغيره من مواد الهندسه) لكن المشكله انه هل هو اللي بيدور بنفسه ولا بيخلي الملحقيه تدور له؟ اذا يعرف كيف يبحث انا انصحه يدور لنفسه لانه ماحد بيحرص عليه اكثر من نفسه والملحقيه تبي ابسط عذر علشان تفتك من عوار الراس وتحطه في اي شي. يعني اخوك لو قدم على جامعه ورفضته يقدم على غيرها ولا ييأس الجامعات كثر التراب وفيه تفاوت شديييييد في نسبة القبول والتدقيق.

نفس الكلام لكي انتي. قدمي على التخصص اللي تبغين خصوصا وانه على حد علمي انه الوزاره ماتجيب قبولات للماستر. ماتجيب قبولات الا للبكالريوس اما الماستر تجيب قبول معهد فقط وانتي تدورين على الجامعه بنفسك. اما هل الوزارة بتلغي بعثتك ولا لا؟ مدري والله لكن عموما يا اختي من كلام ربعي اللي يدرسون في امريكا الان انه الملحقيه متساهله قليلا مع البنات اكثر من العيال ولهم نظره خاصه جدا للمجتهدين. فانتي اذا رحتي للمشرف حقك او المشرفه في امريكا تبين تطلبين تغيير التخصص جيبي معك شي يثبت انك راعية دراسه مو لعب, وعلى قولتهم كثر الدق يفك الحديد خلك مصره عليهم وبتمشي امورك ان شاء الله. بالتوفيق.

بالنسبه لردي على الرسالة الخاصه.

اولا يا اخوان كل واحد ياخذ معاه كل شهاداته بغض النظر وشهي او وش مكاناتها الامريكان يحبون الشي هذا مره, وحتى لو فيه مجال تاخذلك دورة سباكه او تربية حيوانات اليفه خذ وترجم شهاداتك كلها وجبها معك.

بالنسبه للغه الانجليزيه كماده تكميليه ماتنفع لانها اللغه الام في امريكا يعني شي بديهي انك تعرف انجليزي وانت جاي تدرس في جامعه امريكيه, لكن هذا مو مهم لانه كلنا معنا لغه عربيه وهذي ممكن تعتبرها الجامعه عن كورس اللغه الاجنبيه. وهذا هو الفرق بين الجامعات يوم اقولكم فيه جامعات تدقق وفيه جامعات لا. يعني ممكن جامعه تقولك خلاص انت شخص عربي نسقط عنك كورس اللغه لان معك لغه ثانيه وممكن تجيك جامعه ثانيه تقولك لا!!! انا ابي شهاده فاللغه العربيه علشان اسقط عنك كورس اللغه, انا عندي اوراق رسميه لازم اعبيها وارسلها للأدراه مقدر اقولهم والله فلان عربي خلاص لايدرس لغه... جبلي شهاده. وبما انك درست سنه ونص من تخصصك اللي تبي تكمل فيها الماستر فهذا جدا بيسهل عملية قبولك من الجامعه.

والملحقيه تقبل تغيير التخصص بس تستقعد نوعا ما يعني مو سهل, خصوصا اذا انت بتغير لتخصص سهل او غير مرغوب فيها لكن اعتقد التربيه الخاصه جدا جدا مرغوب عندنا خصوصا انه على حد علمي مافيه عندنا فالبلد تعليم للمعاقين لمرحلة الثانوي وما فوقها, المتوسط وبس. لكن مثل ماقلت قبل اللي يبي يغير تخصصه يشد حيله زيين فالتخصص اللي جالس يدرسه ويجيب درجات حلوه فالمعهد علشان يثبت انه مو راعي لعب.

نقطه اخيره ابي انبه عليها خصوصا للي بيدرسون ماستر لانكم انتم اللي بتجيبون القبول لأنفسكم. فيه شي الجامعه تطلبه منكم وهو "statement of purpose" في ما معنى "سبب الرغبه" وهو خطاب تكتب فيه انت ليش تبي تدرس ماستر وليش هالتخصص وليش هالجامعه ومن هالحكي. كثير يغلطون ويحتقرون هالشي يحسبون انه دش كلام وبس. هذا الخطاب يعتبر 50% تقريبا من الاسباب اللي تأهلك للدراسه. لاتقولهم كلام سخيف وممل "والله انا ابي ادرس مهندس علشان اصير كويس مره وهذا حلم الطفوله" وخرابيط مالها سنع بيقولون هذا مو جدي. اكتب اشياء مهمه ووش الاشياء اللي تشوفها في نفسكتخلي التخصص يفعلك ووش ناوي بعد الماستر وليش اخترت امريكا؟ وليش اخترت هالجامعه؟ وليش مادرست التخصص هذا فالبكالريوس؟ ليش تبي تغير الحين؟

في شي بعد ما ابي انساه انه مهم جدا انك اذا بتدرس في معهد انه يكون المعهد في نفس الجامعه اللي بتدرس فيها يعني اول مايبدى الواحد يدرس فالمعهد يبدا يخاطب الجامعات ويكلمهم واذا جاه قبول مشروط "اللي هي قبول بس على شرط تجيب درجه معينه فالتوفل يطلب تحويل مباشرة للمعهد حق الجامعه اللي بيدرس فيها وتقريبا اكثر الجامعات فيها معاهد.

بالتوفيق لي ولكم ان شاء الله.