الأعضاء الإشتراك و التسجيل

الملتقيات
ADs

تفاصيل مقابلتي في السفارة الأمريكية في الرياض 6/12/2010

تفاصيل مقابلتي في السفارة الأمريكية في الرياض 6/12/2010


NOTICE

تنبيه: هذا الموضوع قديم. تم طرحه قبل 2568 يوم مضى, قد يكون هناك ردود جديدة هي من سببت رفع الموضوع!

قائمة الأعضاء الموسومين في هذا الموضوع

  1. الصورة الرمزية musicm7
    musicm7

    مبتعث مميز Characteristical Member

    musicm7 الولايات المتحدة الأمريكية

    musicm7 , ذكر. مبتعث مميز Characteristical Member. من السعودية , مبتعث فى الولايات المتحدة الأمريكية , تخصصى علوم صحية , بجامعة wilkes-barr university
    • wilkes-barr university
    • علوم صحية
    • ذكر
    • wilkes-barr, Pennsylvania
    • السعودية
    • Jul 2009
    المزيدl

    December 7th, 2010, 02:26 PM

    بسم الله الرحمن الرحيم
    والصلاة والسلام على نبينا وحبيبنا محمد الصادق الأمين وآل بيته الطيبين الطاهرين وعلى صحبهم المنتجبين أجمعين

    في البداية أحب أنوه إلى إن أنا قبل نص ساعة كنت كاتب الموضوع ومخلصنه تقريباً لكن بالغلط طفيت الصفحة بدون ماحفظ إلي كتبته فالحين باعيد كتابته والله يعيني لأن ماحب أعيد إلي كتبته مرتين

    المهم نبدأ<<مع العلم إن باقول قصتي ومنها تقدروا تعرفوا شنو المطلوب هناك وكيف الوضع وباقول بعض الملاحظات والنصايح

    أنا من طلاب المنطقة الشرقية وكنت حاجز لي موعد في السفارة في تاريخ يوم الاثنين 6/12/2010م

    وكنت في الرياض من اليوم إلي قبله عشان من الصبح أقعد من النوم وأروح السفارة (كنت خايف أحجز طائرة في نفس يوم المقابلة وبعدين تتأخر الطائرة وأتورط وأتأخر عن الموعد بالدات إن في السعودية هالشي يحصل كثير)

    أنا بكتب وصف لمكان السفارة لكن إدا كان في أكثر من مدخل لمنطقة السفارات فالوصف ممكن يكون غلط إلى إلي بيدخل من غير المدخل إلي انا دخلت منه
    وللمعلومية أنا كنت ساكن في شارع الملك عبد الله تقاطع شارع التخصصي (ساكن في شقة طبعاً مو في الشارع خخخخخ)

    ومعروف إن مفروض الواحد منا يكون في السفارة قبل موعده بنص ساعة
    أنا كان موعدي الساعة 10 وماوصلت هناك إلا الساعة 9 وربع بسبب إن التكسي الي ركبته مايندل شي داخل حي السفارات فداورنا واجد مع إن أنا ركبت معاه من 8 ونص والمشوار مو بعيد واجد

    إدا كان المدخل واحد بس فبعد ماتعدوا التفتيش بجيكم دوار فإمشوا سيدة وبعده بجي دوار ثاني إمشوا سيدة وبعده دوار امشوا سيدة وبعده دوار لفوا يمين وبعده دوار بعد لفوا يمين وبعده الشارع بكون مسدود فوقفوا السيارة في موقف وقوموا مشي باتجاه الشارع المسدود والسفارة بتكون على إيدكم اليسار
    يعني بختصار بعد التفتيش
    سيدة
    سيدة
    سيدة
    يمين
    يمين
    وتوقفوا السيارة <<أو تنزلوا من التكسي

    ويفضل ماتكونوا حاملين لا شنطة ولا أي نوع من العطور ولا ماي وأهمشي ولا شي حاد ولا سيدي ولا جوال (يعني تخلوا هالأشياء في السيارة)
    وكل هالأشياء كانت عندي ماشاء الله عليي هع هع

    الحين وصلت السفارة أول شي مطلوب مني إن أعطيهم ورقة تأكيد الموعد Appointment Confirmation Page وجواز السفر و إيصال سامبا
    عشان يتأكدوا من إنك دفعت ويتأكدوا من موعدك وهويتك
    بياخدوا من هناك منك الجوال لو كان عندك وبيعطوك ورقة عشان وانت طالع تاخده

    بعدها تدخلوا للتفتيش
    غربلوني في التفتيش شالوا كل إلي في الشنطة وعفسوا أوراقي وبعدين حطوا كلشي فوق بعض ويبغوني أشيلهم بسرعة لأن في طلاب ينتظروا دورهم
    ولأن كلشي فوق بعض صار عندي وأنا أبغى أشيل إلي ممكن أحتاجه والباقي بضل عندهم لأن ماقدر أدخل بالشنطة وفيها كل هالممنوعات وأنا جاي بتكسي فكان لازم أشيل أغراضي فالمرأة إلي مشرفة في التفتيش هزأتني وهي تقول ادا انت بهالشكل هنا عجل وش بتسوي في أمريكا (تقصد بهالشكل يعني أغراض واجد وعفسة)
    فحقرتها ومشيت<<بعض ماعطيتهم الشنطة<<الأداء الحادة الي قلت انها عندي هي موس حلاقة خخخخخ ماكنت ناوي أخليه في الشنطة لكن نسيت ماشيله

    دخلت للمبنة بعدها وأخذت رقم ونادوا على رقمي مباشرة وهالمرة طلبوا مني حاجة من حاجتين مانا متأكد إما نموذج الـ DS-160 أو الـ I-20 مايهم أصلي أو نسخة لأن مجرد يتأكدوا من بياناتي
    وبعدها قالت لي الموظفة ان أستريح وبنادوا عليي بعد شوي
    وبعد أقل من دقيقتين نادوا على رقمي من جديد لكن وهالمرة نفس الشي أخدوا مني إما نموذج الـ DS-160 أو الـ I-20 وخلوني أبصم على الجهاز وقالت لي الموظفة إن انتظر بعد شوي بنادوا عليي عشان المقابلة

    حتى الآن كلشي بالعربي

    بعدها قعت على الكرسي أنتظر وبعد مباشرة قالت الموظفة إلي تنادي على الأرقام (المرشدة للبشر) إن إدا في أحد فينا يتكلم انجليزي بيرفكتلي ممكن يروح المقابلة الحين بدون ماينتظر دوره
    أنا رفعت إيدي وقلت أنا أتكلم انجليزي well لكن مو بيرفكتلي مرة
    طلعت فيني بنظرات كأنها تقول شكلك شايف حالك
    وقالت يعني شنو well
    قلت لها إن يعني مرة تمام وأقدر أتفاهم والوضع إيزي
    قالت ومتأكد انك تقدر تخلص المقابلة كلها بالانجليزي
    قلت ليها إي (لأن قلت لنفسي أنا من قبل مطلع لي فيزا سياحية من قنصلية الظهران وكان الوضع عادي مع إن كل الموظفين يتكلموا انجليزي)
    وياليتني ماقلت إي وضليت حالي حال إلي قاعدين لأن انغسل شراعي مع الأمريكي الي سويت معاه المقابلة الله يهديه (ماودي أدعي عليه ماتسوا)
    ماذكر الكلام صار بيني وبين الموظفة بالعربي أو الانجليزي لكن إلي كتبته هو ترجمة الكلام
    المهم قالت لنا هالموظفة (إلي تنادي على الأرقام أو على قولتي المرشدة) إن جهزوا الـ I-20 (مايهم أصلي أو لأ لكن الأفضل يكون أصلي) و وصل سامبا و الـ passport<<الحين باقول لكم ليش كتبت هالكلمة بالانجليزي
    لأن بعدها على طول كان في 2 طلاب جنبي الله يوفقهم (من يدري يمكن يقروا موضوعي بعدين خخخخخ) قاموا سألوني
    يعني شنوا باسوورد
    ابتسمت وقلت لهم هي قالت باسبورت يعني جواز السفر
    حسيتهم تفشلوا وقاموا يقولوا متأكد انها قالت باسبورت؟! << يبوا يقولوا انهم يفهموا معناتها لوووووووول

    المهم انا جهزت إلي طلبت منا نجهزه وبعد دقيقة قالت لي أروح للموظف في النافذة رقم 11 أو 13 مانا متأكد<<لكن شكلها 13 لأنه رقم النحس هع هع

    الحين الكلام الي باقوله مترجم وبما معناه لأن كله كان بالانجليزي
    الموظف: السلام عليكم
    أنا: وعليكم السلام
    الموظف وهو يطلع فيني بنظرات يبن فيها انه مو طايق الدنيا: عطيني جوازك ووصل سامبا والآي تويني
    أنا: أوكي
    قمت مديت له الآي تويني ماشوفه إلا عصب
    وقال: أنا قلت لك أول الجواز ووصل سامبا
    أنا تفاجأت وش هالجريمة إلي سويتها عشان يعصب فجئة
    قلت له : طيب تفضل وكلا الحالات بعطيك اياهم كلهم
    المهم قام يطقطق على الكمبيوتر شوي<<يلعب سوليتير ههههههههههه
    قام قال : عطيني البطاقة إلي وزعوها عليكم في الملتقيات
    قلت له: أنا ماعندي لأني من الشرقية
    قاطعني وماخلاني أكمل جملتي إن الشرقية لسة مابدأت الملتقيات
    وقال: أووووه وإدا من الشرقية تكون مهمل وتجيب كلشي مفروض تجيبه
    قلت له : لأ الموضوع مو كذا لكن احنة طلاب الشرقية
    قاطعني مرة ثانية وهو يصرخ
    قال: انتوا شنو؟؟؟؟! انتوا غير بقية الطلاب مثلاً وماتحتاجوهم، والموظفة ماقالت لكم ان تجهزوا الجواز ووصل سامبا والآي تويني وشي يثبت انكم تبع البعثات، وأنا الحين وش دراني انك فعلاً تبع البعثات
    قلت له : إي قالت (مع انها ماجابت سالفة اثبات ان احنة تبع البعثات) لكن أنا
    قاطعني للمرة المليون وقال: إي انت من الشرقية يعني غير
    وقام ينادي على الموظفة نفسها إلي تنادي على الأرقام وهو يصرخ
    لم جت قال ليها إن أنا مو موصينش لازم تخلي الطلاب يجهزوا كلشي
    قالت : إي أنا قلت ليهم بس هم مايسمعوا الكلام
    قال: شوفي هذا الطالب جايني بدون مايكون عنده شي يثبت إنه تبع البعثات
    أنا قلت ليها حزتها بالعربي إن الملتقيات مابدأت عندنا في الشرقية وأنا وهذا كل شوي يقاطعني وماعطاني فرصة أقوله هالجملة أو أعطيك رقم الطلب حقي عشان يكتبه ويتأكد
    قالت له الموظفة: ان بيعطيك رقم الطلب حقه وتأكد منه
    قال ليها: أوك تقدري تمشي<<طبعاً الكلام كله وهو معصب ويعلي صوته
    والله صدق إلي قال :"إدا عندك حاجة للكلب قوله يسيدي" لأن لو ماكنت محتاج انه يروق ويوافق انه يعطيني الفيزا جان بكون عندي معه كلام ثاني على اسلوبه "إلا أن تتقوا منهم تقاة" صدق الله العظيم << يفضل ماحد يجي يقول ليي التقية من البدع لأن مابارد عليه

    المهم نقلته رقم الطلب حقي وأنا رجايلي ترتجف ان لا اعطيه رقم غلط او اتبهدل في رقم لأن كان هو معصب حده وأنا أبغى أمثل دور البارد
    بعدها قال ان مفروض تجي وعندك شي يثبت انك من تبع طلاب البعثة حتى لو تكتب لي الرقم في ورقة وتعطيني اياه لأن اسلوب غلط انك تنقلني من حفظك
    قلت له اوك آسف

    والمصايب وياه تتوالى

    قال ليي عطيني الآي تويني
    عطيته وياه على طول صرخ ان أنا مانا موقع عليه<<أنا فعلاً قريت في الآي تويني إن مفروض أوقع عليه لكن مادري ليش قلت ماباوقع إن وأنا المقابلة
    وقلت له هالشي
    قال ودام انك قاري ان مفروض توقع عليه عجل وش تنتظر<<حسيت انه يقول انا لله وإنا إليه لراجعون (وأنا كنت أقولها داخلي بعد ههههه)
    قلت له :عطيني اياه الحين باوقع لك عليه ولا تزعل
    قال: لا لم أرجعه لك وقع عليه<<خفت انه يقصد ان انت مرفوض لأن قالها بطريقة غبية
    بعد شوي سألني: انت عندك فيزة كندية فليش ماترجع كندا بدل ماتدرس في أمريكا؟؟
    أنا ماتوقعت هالسؤال أنا تخيلت انه بيسألني ليش ليش اخترت أمريكا لكن ماتوقعت مقارنة مع كندا فتبهدلت وقلت : لأن سمعت إن أمريكا أحلا (وأنا أقولها قلت في نفسي أما عاد وش قاعد تقول يا ميوزك)
    طبعاً الجواب ماعجبه وهالجواب مابيعجب أحد لأن مايختلفوا ثنين في ان كندا أحلى من أمريكا
    قال: أوه يا إلهي.. شوف كون وياي جان جاد وقول ليي سببك
    قلت له: أنا مازرت أمريكا لكن صدقاني قالوا ليي انها أجمل وسببي الثاني لأن القبول في جامعات أمريكا أسهل بالاضافة ان تدريسها ممتاز وشهايدها قوية
    هالمرة اقتنع بالاجابة
    قام سألني: هل زرت أوروبا من قبل
    قلت له إي
    قال طيب ليش ماخترت أوروبا ولا تقول ليي إن أمريكا أجمل من أوروبا
    قلت له لا لكن أنا أبغى أدرس في دولة انجليزية وغير متاح لنا في دول الابتعاث ندرس في الدول الأوروبية الانجليزية
    قال طيب انت من متخرج من أكثر من سنة فوش قاعد تسوي كل هالمدة؟؟
    (جوابي خاص فيني أنا قلت السؤال عشان الخريجين إلي مو من هالسنة يجهزوا نفسهم لهالسؤال)<<نسيت ما أقول انه سألني وش كنت أسوي في كندا وجوابي ان كنت أدرس كورس انجليزي

    بعدها قال ليي إن أنا عندي فيزة سياحية لأمريكا مطلعنها قبل 6 شهور لكن كاتب إن أنا مازرت أمريكا والحين أبغى فيزة دراسية فليش مطلع فيزة سياحية من الأساس؟؟
    سببي إن كنت بازور اختي الله توفت بعد ماطلعت الفيزا مباشرة (ألف رحمة ونور عليها)
    تأسف ليي على هالسؤال وبدأ يهدأ لأن وأنا أجاوبه بينت الحزن في ملامحي
    أخيراً سأني وش بدرس كلت له علوم صحية
    سألني ليش هالتخصص بالدات
    قلت له إن اختي كانت مريضة وكنت أتواجد في المستشفى واجد وأشوف ناس واجد يتألموا فكان فلهالسبب صار عندي طموح ان أدرس حاجة تفيدني في مساعدة هالناس
    وأخيراً بعد هالجواب حبني وقال هذا هدف جميل وإنت انسان تمام انك تفكر جدي والله يوفق ان شاء الله
    وخيرني بعدها ان هل آخد الجواز وأرسله في منتصف جانيواري عشان يعطوني الفيزا أو ان أخليه عندهم لكن مابرجع ليي الجواز إلا في منتصف جانيواري لأن دراستي تبدأ في 16 ماي (may) ومايقدر يعطيني الفيزا قبل بداية دراستي بأكثر من 4 شهور
    أنا فضلت ان الجواز يكون عندهم لأن ماباسافر هالمدة غير دول الخليج وأنا عندي بطاقة أحوال جديدة أقدر فيها أروح دول الخليج بدون جواز سفر
    بس ورجع ليي الآي تويني وطلب مني إن أوقع عليه وإن وأنا طالع أقول للطلاب وشو يجهزوا وان ادا ماعندهم اثبات انهم تبع البعثة فيكفي ان يكتبوا رقم الطلب حقهم في أي ورقة ويعطوها إلى الي بسوي المقابلة وياهم وإن مفروض يوقعوا على الآي تويني
    وقال ليي إن أروح أدفع للفيدكس عشان هم الي برسلوا لي الجواز
    وأنا طالع قلت للطلاب الي وصاني عليه وقلت لهم يفضل ماحد يقول انه يتكلم انجليزي تمام لأن هالموظف عصبي ولعب بخلقتي (أعضم موقف كان على إلي سويته بعد ماتخرجت من الثانوية لأن ماقلت له إن طلعت من دراسة الطب وماقلت له إن كنت أدرس في الجامعة أصلاً فصارت هدرة طويلة لين ما أقنعته بإن كنت أداكر انجليزي في البيت ولو ماكنت اداكر زين جان ماقدرت أتكلم وياك جدي الحين)<<مع العلم إلي راحوا قنصلية الظهران فترى هناك الموظفين متفهمين ان لغتنا مو مرة تمام فيتكلموا شوي شوي ويوضحوا أسئلتهم اما هذا يتكلم ويايي كأني أمريكي قدامه بسرعة وبطريقة صعبة شوي يمكن عشان جدي الموظفة إلي تنادي على الأرقام سألتني إدا كنت متأكد إن أقدر أعدي المقابلة كلها بالانجليزي

    بعد ماقلت للطلاب ان يكتبوا أرقامهم على ورقة ماشوف الا نصهم قام طلع ورقة ويكتبوا عليها<<كلهم زي حلاتي تقريباً
    وبعضهم زيي ماوقع على الآي تويني
    الموظفة إلي تنادي على الأرقام قالت ليي عن مزح إن دام الطلاب يسمعوا كلامك فخليك هني يعطوك راتب لأن كل ما اقول ليهم ولا كأن أحد يسمعني هع هع

    رحت أدفع للفدكس (125 ريال للطلاب إلي برة الرياض و 60 أو 65 ريال مانا متأكد لطلاب الرياض)
    واضغطوا على القلم وانتوا تكتبوا بياناتكم في الفدكس عشان لا تعيدوا إلي كتبتوه لأن لازم الكلام ينطبع على الأوراق الي تحت
    وللمبتعثات والمبتعثين انتبهوا لا تكتبوا في ورقة الفدكس اسم المستلم يعني اكتبوا أسمائكم لأن بعدين يطابقوا بينها وبين الجوازات أما الأرقام فعادي حتى لو كتبتوا رقم المستلم
    ويفضل لو تكتبوا عنوان دقيق
    والفيدكس بياخدوا منكم نموذج DS-160 إلي هو الورقة إلي فيها صورتكم ومايهم تكون ملونة أو أبيض وأسود لكن المهم إن الأرقام إلي فيها تكون واضحة عشان يقراها الجهاز

    بعدها خلاص تكونوا خلصتوا كلشي وأنا ما أخدوا مني صور لأن صورتي موجودة في السستم من الأساس والآي تويني ما أخدوه مجرد تأكدوا من المعلومات إلي فيه<<طبعاً تأكذت من موظف هناك ان مايحتاج ياخدوا لا الآي تويني ولا صور ليي
    حتى ورقة تأكيد الموعد مجرد تأكدوا منها بدون ماياخدواها يعني كل إلي أخدوه هو جواز السفر ووصل سامبا ونموذج DS-160(إلي مكتوب عليها إن هذي مو تأشيرة سفر)
    وهالشي مايعني انكم لا تحملوا وياكم احتياط ورقة تثبت انكم دفعتوا للسيفيز أو شهايدكم أو payment confirmation أو صورة من جواز السفر أو غيرها من أوراق تتوقعوا انها ممكن تفيدكم مثل إلي يحمل شهادة بنكية أو تعريفة لشغل أبوه أو أمه وغيرها
    وصح تذكرت سألني أنا وشو أمي وأبويي يشتغلوا

    أعتقد إن أنا مانسيت شي

    بعدها طلعت أخذت جوالي والشنطة ورحت المطار لكن للأسف ماقدر أقدم حجزي وضليت أنتظر من 11 الضهر لـ 6 المغرب كنت بستجن لكن عدة على خير والله يغربلهم على أكلهم إلي مايسوى سعره اطلاقاً ولا يسوى نص السعر
    وصلت بالسلامة أمس لكن كنت تعبان عشان جدي ماكتبت هالموضوع إلى اليوم


    بالتوفيق للجميع ان شاء الله وأسألكم الدعاء بالصحة والتوفيق في الدنيا والآخرة

    والسلام عليكم ورحمت الله وبركاته
  2. صح في ملاحظة مهمة جداً بعد

    طبعاً في طلاب بتكون الأسئلة لهم غير إلي كانت ليي
    يعني مثلاً في طالب سألوه إن وين كنت تدرس في الثانوية
    وأعرف واحد سألوه هل تعرف أحد يدرس في أمريكا وقال إي
    وسألوه عن اسمه
    ولأن هالشخص إلي في أمريكا من قبل كان مسوي مشكلة (مع العلم إنه مازال يدرس هناك) لكن لأن هذا قال انه يعرفه رفضوا يعطوه الفيزا والمشكلة ماكانت لا كبيرة ولا فيها سوالف ارهاب ولاشي
    7 "
  3. هههههههه والله حبيبي لما شفت موضوعك حسيت ان مقابلتي كانت نعمة من جد احلى تعامل ما سالني غير 3 اسئلة ماطلب مني بطاقة الملتقى انا من جدة لسه الملتقى قالي بس جيب رقم الطلب و مليتو هو وماطلب الاي توني قلتله لسه منتظر اي توني جديد وبرسله اول ما يوصل قالي وين سافرت سنة تخرجك وين ناوي تروح تدرس بامريكا بعدين قلي انتظر الفيزا من اسبوعين ل 3 روح سدد فيديكس THAT'S ALL مع انه كان يحاول يكلمني عربي لكن اانا ارد بالانجليزي ولما يقول كلمة عربي مافهمها العربي مرة مكسر فيقولها تاني باالانجلش طبعا ده شباك 8 احسن واحد شباك 13 معروف انه مو كويس ودائما يرفض فيز خصوصا الي على حسابهم الخاص طبعا انا كنت معاك بنفس اليوم الساعة 9 ل 10 ما شفتني خخخ كنت لابس جاكيت ابيض خخخخخ
    7 "
  4. آية وسعودي15 ودييد بوس
    يسلموا

    أبودي
    بصراحة ماذكرك وإنت أكذت ليي إن انا كنت في النافذة رقم 13<<<ومانسى جملته وهو يصرخ مرة قال ليي (باترجم الجملة) إنت تسوقني للجنون.. هذي قالها بعد ماشاف ان الآي تويني مانا موقع عليه وبعدها قال بتوقع عليه بعد مارجعه لك<<حزتها نشف دمي
    أنا كنت لابس قميص أسود وجينز خخخخ يمكن انت شفتني
    7 "
  5. المشاركة الأصلية كتبت بواسطة musicm7
    آية وسعودي15 ودييد بوس
    يسلموا

    أبودي
    بصراحة ماذكرك وإنت أكذت ليي إن انا كنت في النافذة رقم 13<<<ومانسى جملته وهو يصرخ مرة قال ليي (باترجم الجملة) إنت تسوقني للجنون.. هذي قالها بعد ماشاف ان الآي تويني مانا موقع عليه وبعدها قال بتوقع عليه بعد مارجعه لك<<حزتها نشف دمي
    أنا كنت لابس قميص أسود وجينز خخخخ يمكن انت شفتني
    خخخخخخخ مو فاكر انا لما كنت موجود ماكان موجود غيري انا و 3 كانو ينتظرو ابوهم يعدل شي في DS160 من البلازا الي برا
    7 "
ADs

قم بتسجيل دخولك للمنتدي او

الانضمام لمبتعث

Search Engine Optimization by vBSEO ©2011, Crawlability, Inc.