الأعضاء الإشتراك و التسجيل

الملتقيات
ADs

تقرير لـ أهم النقاط والأحداث في ملتقى أمريكا الأول في جدة - مرحبمبكوم 1432هـ

تقرير لـ أهم النقاط والأحداث في ملتقى أمريكا الأول في جدة - مرحبمبكوم 1432هـ


NOTICE

تنبيه: هذا الموضوع قديم. تم طرحه قبل 2561 يوم مضى, قد يكون هناك ردود جديدة هي من سببت رفع الموضوع!

قائمة الأعضاء الموسومين في هذا الموضوع

  1. الصورة الرمزية عَـــهـــد
    عَـــهـــد

    مبتعث مميز Characteristical Member

    عَـــهـــد الولايات المتحدة الأمريكية

    عَـــهـــد , أنثى. مبتعث مميز Characteristical Member. من السعودية , مبتعث فى الولايات المتحدة الأمريكية , تخصصى Pre-med , بجامعة Not yet
    • Not yet
    • Pre-med
    • أنثى
    • boston, MA
    • السعودية
    • Jul 2010
    المزيدl

    December 13th, 2010, 09:51 PM

    السلام عليكم ورحمة الله وبركاااته



    اليوم كان أول ملتقى لطلبة أمريكا في جدة ..

    دي البطاقة اللي استلمتها طبعا لازم يكون معاكم بطاقة الاحوال علشان يتأكدو من هويتك
    ويسلموك بطاقة الملتقى اللي لازم تكون معاكم كل التلات أيام .. ومهمة عشان قرار الابتعاث



    حقوولكم الأشياء المهمة :

    الدكتور ماجد الحربي على ماظن قال لازم تروحو تحجزوا موعد للسفارة في أقرب وقت ممكن
    ومرة شددو على دا الشي حتى لو ماعندك ايتونتي .
    ووحدة سألتو لو تقدر تسويها في جدة قام قلها راسلي السفارة وشوفي ايش تقولك .
    وطبعا احنا طلبة أمريكا قال مايحتاج لكم ضمان مالي ولا خطاب للسفارة لأنه الوزارة
    ارسلت للسفارة كل الأسماء .

    من يوم السبت اي واحد معاه الفيزا والقبول وكل طلبات قرار الابتعاث يقدر
    يروح الرياض ويصدر له قرار الابتعاث .. أو انه يرسل الطلبات بالايميل بعدين يروح يستلمو من الوزارة .
    فكل الحالات لازم فيها روحة للرياض ..



    بالنسبة للقبولات قال خلال الاسبوعين او التلات اسابيع الجاية راح تكونو استلمتوها
    وفي قبولات قلييييلة مرة راح يوزعوها آخر يوم في الملتقى ..
    وقال أي مرشح بداية دراستو بعد شهر 4 ميلادي يحاول يقدم الموعد

    زي واحد ولد سألو قله أنا موعد دراستي شهر ستة .. الدكتور قله خلي المكتب يقدملك الموعد .
    لانه بعد شهر 4 ميلادي اللي ماسافر ممكن أموره تتعقد
    ولازم يجيب عذر مقنع عشان يطلعله قرار ابتعاث .
    ** في حاجة اسمها تجديد قرار الابتعاث **
    يعني مدة القرار 3 شهور من بداية اصداره
    لو خلصت التلاتة شهور دي وانت ماسافرت راح تضطر تعمل تجديد قرار الابتعاث

    ::

    بالنسبة للي حولوهم من الطب لعلوم صحية بصراحة الدكتور الموسى والحربي قالو أشياء مرة جيدة :
    أول حاجة قالو انه احنا حطيناكم علوم صحية علشان يكون المجال لكم لدراسة الطب أسهل يعني عندكم طريقين :

    أول حاجة ياانكم تدرسو أي تخصص مثلا أشعة علوم صحية أحياء .... إلخ
    وتاخدو درجة البكالوريس طبعا بعدين تقدمو على كلية الطب ولو جاكم قبول الوزارة والملحقية ماعندها مانع نهائيا تعمل
    زي ترقية للبعثة . ولو مالقيت قبول فأي كلية طب عندك اختيار انك تكمل الماستر والدكتوارة إلى آخره في نفس المجال
    اللي درست في البكالوريس .

    الشي التاني اللي قاله الموسى آخر المحاضرة
    انه انتو يالبكالوريس اللي اسمكم علوم صحية .. بعد ماتدرسو اللغة جبتو قبول طب في أي دولة من جامعه معتمدة وكل شي
    مااااااافي مشاكل انكم تحولو ..
    اما لو احنا حطيناكم من هنا مسماكم ( طب ) راح يكون الطريق عليكم مرررة أصعب ..
    وراح تضطرو انه تدرسو الطب حسب نظام أمريكا ولو ماقدرتو ممكن تنلغي البعثه لأنه انت مادرست التخصص المطلوب منك .

    فعشان كدا افرحوووو والدووونيا حلوة



    طبعا في كلام مرة مو حلو ماحيجعب طلبة الماستر ... اللي طالعين بتخصص بعيد عن تخصصهم
    أخلي طلبة الماستر يتكملو عنه لأني بكالوريس ومابدي أقول كلام ويطلع غلط .


    مممممممم ايوه في شي بالنسبة لتغير المعهد :
    دحين كلنا نعرف انو دراسة اللغة سنة وحدة بس وفي شروط معينة على اساسها ممكن الملحقية توافق تعطيك
    تمديد لمدة 6 شهور .
    أحد الطلبة سأله قله لو انا درست في معهد معين 3 شهور وبعدين غيرت المعهد لأسباب معينة
    هل التلاتة شهور دي تنحسب من السنة ؟

    الدكتور قله ايوه

    قله طيب مااقدر امدد ستة شهور عشان دا السبب ( اللي هوا انه غير المعهد )

    الدكتور قله لا دا مو سبب يسمح انك تمدد ستة شهور

    وقال من الشروط انو عشان يتمددلك ستة شهور انو تكون درجتك في اختبار التوفل اكتر من 550 أو مايعادلها
    يعني لو جايب أقل وكمان مابتحضر الكلاسات ومنت ملتزم ماراح يتمددلك 6 شهور .



    في واحد من الطلبة بكالوريس .. سأله عن الصيدلة وانه مدتها 6 سنوات وانه انت قلت مدة البكالوريس 4 سنوات .. !

    بصراحة انا ماقدرت اسمع تمام السؤال ولا رد الدكتور فياليت اللي فاكر السؤال والجواب يكتبو في دا المووضووع .


    ::

    وفي موقف يضحك حصل لواحد من الطلبة هههههههههههههههههههه

    سأل الموسى قلوو لو انا رحت درست في معهد هناك وسويت مشكلة
    او حصلتلي مشكلة ..
    طبعا الدكتور ماخلا الولد يكمل كلامو الا وخش فيه
    قلو علطوووووول نجيبك

    الولد يحاول يقلو يادكتور يعني انا قصدي .......
    الدكتوور قلوو هات هات اسمك خليني اشووف ادور عنك ههههههههههههههههههه

    بصراحة حزني مااداه مجال يفهمو قصدو
    وهوا شكلو معانا في المنتدى فخليه يعترف مين هوا


    تحديث ahmad Vist :

    وأنا تاني واحد من الأولاد سألت
    سالتو عن تغيير تخصص العلوم الصحية لتخصص أخر غير مكتوب في موقع الوزارة زي العلاج التنفسي و الإدارة الصحية ..
    والحمدالله أفادني إنو يسير التغيير لأي تخصص دام إنو من التخصصات الطبية التطبيقية



    إيوا صح أتزكرت حاجة مرة مهمة قالها اليوم الدكتور ماجد الحربي

    يا جماعة ترا الدكتور قال الوزارة تقبل بالقبول إلي يجيبو الطالب بنفسه
    يعني إلي يقدر يراسل المعاهد و الجامعات وكدا يعتمدو له القبول
    ( طبعا يكون المعهد و الجامعة معتمدين من الوزارة وغير مغلقين للتكدس )

    وكمان قال عن الضمان المالي للمعاهد و الجامعات ...
    قال إلي يبغاه لازم يكون معاه توفل بـ550 درجة

    صراحة أنا حطمني لمن قال الكلام دا



    Kewl:
    الملتقى كان مفيد جداً , خاصه ملاحظات الموسى عن الأي توني والتقديم على أكثر من جامعه وليس الإعتماد على جامعه أو جامعتين ..

    Mr.ReKo0o:
    اما بالنسبة لـ سؤال الصيدلة انا اللي سالت عنو
    سالته ان قرار الابتعاث 4 سنين ودراستي 6 سنين قال نطبع لك قرار 6 سنين مع سنة اللغة


    تحديث :
    Ahmad Vista :

    برضو أتزكرت هرجة تانية
    طبعا بعد ما خلص الملتقى الدكتور الموسى كان بــ يحاول يخرج برا القاعة بس فييييييييييييييييييييييييييييين
    أمة محمد حوطو حولينو ومعاه البودي قارد دكتور ماجد الحربي
    وكانو شغالين إجابات وقافي
    المهم
    وهو ماشي سمعت ماجد الحربي أنفلت لسانو وقال بوكرا أو أخر يوم فيه 189 قبول من الملحقية راح نسلمها لكم
    وعلطول الموسى طالع في الحربي وكان نفسو يسوي فيه
    والحربي
    نقول إن شاء الله ما يطلع نصاب
    يكفي مكتب تجسير جبلنا
    مع إني من إلي قبولاتهم من تجسير .....
    ::

    ---------------------------------------------------------




    اليوم التاني من ملتقى المبتعثين لدولة أمريكا - المجموعه الثامنة ( العصر )



    أحس اكتر اللي استفادو من ملتقى اليوم هما مرحلة الماجستير لأنه اتكلمو فيه عن التخصص
    وامتداد التخصص ...

    نبدا من البداية وزي ماقلتلكم أي معلومة ماقلتها اكتبو وراح اضيفها في الموضوع ..

    أول شي كان اللقاء مع الملحق الثقافي الدكتور العيسى ..
    اتكلم فيها عن الموقع تبع الملحقية وعن الخدمات المتوفرة فيه
    وانه اي طالب دحين يقدر يفتح ملف في الملحقية اذا اكتملت الاوراق حقتوو ..

    وانه يقدر برضو يروح لمقر الملحقية ويفتحه من هناك . وقال انو الافضل من نفس الملحقية
    لانه بيسوو هناك زي لقاء او محاضرة للطلبة اللي واصلين من السعودية ..
    طبعا قال انو الملحقية راح تنقل تقريبا على شهر 2 وراح يكون في الويك اند في تاريخ
    21 فبراير اللي هوا جمعه والسبت لين الاحد
    في دي الفترة راح ينقلو للمقر الجديد للملحقية في مبنى لحالها .. بصراحة ناسية اسم المنطقة اللي قالها
    بس ححاول اعرف واكتبها ...


    **
    بالنسبة للمرشحين اللي عندهم ظروف ومايقدرو يسافرو قبل شهر 4
    زي وحدة قالت انا حامل وولادتي في شهر 3 وابغى اتأخر
    الدكتور قلها : اوكي راسلينا على الايميل واشرحي ظروفك وانك راح تتأخري
    علشان نلغي قبولك الحالي ونجبلك قبول جديد يعني مافيها اي مشاكل مادام ظروفك مقتنعه ولك اسبابك


    **
    بالنسبة لتحويل التخصص مافيها اي اشكالية لو انت مثلا تخصص طبي يمديك تغير
    بين التخصصات الطبية التانية .. لكن لو انت تخصص طبي صعبة تغير لتخصص هندسي مثلا ...

    ***
    قلنا انه كلم الملحقية اليوم وعينو موظفين مسؤولين يردو على استفساراتكم
    حتى قال اي موظف يقصر في اداء عمله انا مستعد اطبق فيه الاجراءات اللازمة ( يعني بالعربي يعاقبو او شي كدا )
    المهم
    ودا الايميل اللي قلنا راسلوو عليه :


    ودا الرقم لكن قال انا افضل انو المراسلة تكون بالايميل ..
    0012023396285


    ::

    **
    في طالب ماستر على مااعتقد سألو : لو انا خلصت اللغة في 3 شهور وابغى اخد دورات في الجيمات
    هل الملحقية تتكفل انها تدفع دا الشي ولا انا ؟
    الدكتور قلو احنا بالعكس راح نقدرلك اجتهادك وانك مخلصة اللغة في وقت قياسي
    واكيد راح تدعمك الملحقية انه تتكفل بالتكاليف دي ...


    ::

    الكلام اللي بعدو كلو عن القوانين والكلام دا مو مستعجلين عليه راح تسمعوه في الملتقى تبعكم ان شالله
    زي انو ايش الاشياء اللي ماتسويها هناك وانه ماتاخد معاك برامج مقلدة وإلخ إلخ إلخ ..


    بعدين جا دكتور جلس يتكلم عن معادلة الشهادات :
    قال لو مثلا انت رحت هناك بكالوريس ودرست 90 ساعه بس في الجامعه
    لمن تجي السعودية ماراح يعادلولك هيا بكالوريس راح تعادلك دبلووم
    متى تنحسبلك بكالوريس لو اخدت 120 ساعه .

    ونفس الشي للماجستير قال مثلا لو واحد سجل 15 ساعة وبدون بحث كمان
    راح يتم معادلة شهادتو على انها دبلوم مو ماجستير

    تتعادل لماجستير لما تكون عدد الساعات
    30 ساعه بدون بحث
    او : اظن 20 او 25 ساعه مع البحث


    واتكلم كمان على تخصص القانون
    وانه اللي يبى يتخصص قانون لازم يكون البكالوريس تبعه : تخصص شريعه او قانون او انظمة
    غير كدا مايقدر


    وبالنسبة للي تخصصهم البكالوريس مقارب للماستر لازم ياخدو مواد تكميلية
    وانه أمريكا هيا أفضل دولة في العالم عندها نظام ممتاز في المواد التكميليه للي تخصص البكالوريس تبعهم
    غير تخصص الماستر


    بعض البنات لمن سألوه جلس يقولهم انو انتي تحتاجي مثلا سمستر واحد او اتنين او تلاتة
    كل وحدة على حسب تخصص البكالوريس تبعها
    ومثلا اللي تخصصهم احياء ويبغو يروحو تخصص مختبرات مثلا قلها انتي ماعندك مشاكل
    ووحدة سألت انه هيا أحياء وتبغى تتخص تقنية النانو
    قلها شي بالانجليزي ماعرف الكلمة بس فهمت قصدو انو تقنية النانو فيها مجال متعلق بالبايولوجي
    فمادام اختارتو فماعلييكي شي ويمديكي تدرسيه بدون مواد تكميليه


    دي أكتر الاشياء اللي حسيتها مهمة
    وأي حاجة ناقصة اكتبوها عشان نسنفيد كولنا




    تحديث

    Ahmad Vist:


    ***** بعد نهاية الملتقى تم توزيع ١٨٩ قبول لغة من قبولات الملحقية ...
    وكان اغلبها للماجستير ...



    يوم كان ممل شوية مة زي امس ....
    اليوم أنا أفتريت
    سألت تلاتة أسئلة
    سألت الدكتور العيسى
    ١- ( يا دكتور زي ما انتا قولت انو الملحقية حا تنقل بعد شهرين.... طيب الطلاب فين يتوجهو على ملحقية ؟ القديمة ولا الجديدة ؟
    رد عليا بجواب غرييييييييييييييب وصراحة أنا تنحت ساعتها
    قال انو عندهم ويك اند في ديك الفترة !!!
    وبعدها كان المايك حا يتاخد مني بس علطول رميتلو سؤال تاني
    قولتلو
    ٢- ( بعد الطالب ما يفتح ملف عندكم وخلاص لازم يسافر للولاية حقتو ...
    تزكرة الطيران للولاية على حساب الطالب ولا الملحقية ؟
    قال على حساب الوزارة
    بعدين سألت القحطاني وانا سؤالي الوحيد إلي كان للبكاليروس في دي المحاضرة
    سألتو عشان نعادل الشهادة للتخصصات الطبية لازم ندرس السنة التحضيرية ؟ وكمان هل نحتاج ندرس سنة الامتياز ؟
    رد عليا
    بالنسبة للسنة التحضيرية عادي ادرسها ويسير الخير خيرين ..
    والامتياز قال لتخصص الطب و طب الأسنان ...
    بس من كلامو كان يدق في الهرج ويقول ادرس سنة امتياز احسن لك ....
    وكمان قال عادي تكمل سنة الامتياز هنا في السعودية مافي مشاكل
    بس هادي الأسئلة إلي اليوم سألتها ...




    مواقف غريبة !
    العيسى انصدم بسرعة الانترنت
    لمن جا الدور حق البنات في الأسئلة لمحاضرة القحطاني عن المعادلة
    ستمية استفسار أنقال وكلها عن الامتدادات ... وطبعا المعلق ااا قصدي إلي بيقطع هرج البنات كل مرة عشان الوقت ! اكل كف من القحطاني لمن قلو خليهم ياخي يسألو
    في المقابل الأولاد قدرو يسألو تلاتة أسئلة ورا بعض
    القاضي وما ادراك ما القاضي
    حكاية عاطفية عن طفل وسلحفاة
    شعر !!!
    ورجع مرة تانية للقصص الخورافية
    وبعدين خلاص عندنا الطلاب يبغو يقومو وهادا شغااااال هرج - فيه ناس قامو ورجعوهم أماكنهم -
    بعدين جا وقت الأسئلة !!!!!!!!!!!!!
    مين يبغا يسأل واحد في مجلس الشورى هههههههه
    بس لاااااازم من التسليك
    والتسليك جا من البنات ههههههههههههه
    واحدة تقول انتا كلامك حلو هههههه فين السؤال طيب هههه
    واحدة كمان قالت الغربة صعبة و الأصعب الحنين للوطن ....
    وبعدين واحدة قالت أنا احب اكتب كيف ما اخلي اللغة هناك تأثر في كتاباتي ؟
    وبعدين برضو تسليك هههههه
    وفي النهاية خرجنا والأدمي مصدق نفسو



    theleder

    اما الاسئلة :-

    انا سألت الدكتور ماجد الحربي شخصيا ...

    س/ هل بامكاني ارجع طب الآن قبل ما اسافر امريكا ؟

    نعم اذا بتحضرها بعد شهر من الآن ... احضر درجة 4.5 في الايلتس و سوف يتم تحويلك الى هولندا ...

    هذا ما دار اليوم في الملتقى من وجهة نظري ...

    بالتوفيق للجميع ...



    8/1/1432 هـ / الثلاثاء



    -------------------------------------------------------

    وكان ختامها مسك في يوم الأربعاء 9 محرم

    طبعا أول محاضرة مرررة مملة كانت عن الايدز
    وكلو كلام عارفينو .. الله يبعدنا عنه وعن مسببابته يارب

    تاني محاضرة بصراحة مرة عجبتني اظن اسم الشيخ يوسف عبد الله ( ناسية لقبه )

    اتكلم فيها عن وصايا للمبتعثين وحكانا قصص مرا حلوة
    وكيف انه في بعض الدول الاسلام دخلها بس بأخلاق المسلمين بدون لا سلاح ولا حروب
    وكانت في بعض الاسئلة الشرعية والأحكام ...

    أكتر أسئلة الأولاد كانت عن البطاقات الائتمانية .. وراح اقول الكلام الي اتزكرو ومتأكدة منه

    الشيخ قال انه الأفضل انه تحط مبلغ في الفيزا كارد حقتك من السعودية
    ويصير لمن تروح هناك بس تسحب من رصيدك ،، علشان بعض البنوك لمن تسحب منها برصيد تحت الصفر
    وتجي تبغى تسدد الفلوس راح ياخدو عليها ربا

    وكمان في نقطة مرة مهمة عن حكاية القصر والجمع
    بلييييييييييييييز انا ابغى احد يأكدلي الكلام اللي راح اكتبه دحين

    اللي فهمتو من الدكتور انه اول ماتوصل امريكا لين تستقر انت تعتبر مسافر
    بعد ماتستقر ، انت خلاص مقيم يعني ماتقدر تقصر في الصلاة
    لكن حكاية الجمع ممكن
    يعني لو مالقيت مثلا مكان تصلي فيه وكنت برا البيت وراحت عليك صلاة العصر والمغرب مثلا
    يصير تقدر تجمعهم لمن تلاقي المكان المناسب اللي تصلي فيه ...



    دي الأحكام اللي حسيتها مرة مهمة وفي أحكام تانية لكن مو متذكرتها
    حاولو تسترجعو الذاكرة معايا


    وتالت وآخر محاضرة كانت مع عضو من مجلس الشورى
    ماقدرت اسمع تمام لانو صوت البنات كان عالي او صوت الشيخ كان موواضح ماادري

    وآخر شي جلسنا نتصور انا والبنات فوق الستيج عند مو مكتوب ملتقى المبتعثين

    وصارت حركة تضحك جلست ادور على جوالي اترنو طلع في جيبي خخخخخخخخخخ


    المهم دا كل اللي صار
    ماكان في أي كلام عن الدراسة بحد ذاتها وأمور القبولات ..


    في النهاية اتمنى انكم استفدتو من موضوعي
    والله يوفقكم ويوفقني يارب




  2. المشاركة الأصلية كتبت بواسطة sto0om
    أخت عهد بسألك..
    الطلاب المحولين من طب الى علوم طبية يقدروا يدرسوا اي تخصص مثل صيدلة اومختبرات والا لا؟؟
    نعم نعم نعم وبعنف
    انا أول ما حولوني الى علوم صحيه رحت للوزارة واتضااااااااربت معهم وحولوا لي حالت الطلب من علوم صحيه الـى صيدلة

    وطبعا طبعت حالت الطلب ووديتها للمكتب علشان يجيب لي قبول صيدله بدل العلوم الصحيه

    آمـــل اني افدتك
    7 "
ADs

قم بتسجيل دخولك للمنتدي او

الانضمام لمبتعث

Search Engine Optimization by vBSEO ©2011, Crawlability, Inc.