سويت اليوم المقابلة بدون I20 وعدت على خير

December 28th, 2010, 04:42 PM

صباح الخير
اليوم بتاريخ 28 ديسمبر سويت المقابلة في السفارة الامريكية في الرياض انا والمرافق
بالبداية موعدي كان الساعة 9 ص وصلت الساعة 8 ونص الا وش القى الزحمة شيء ثاني طابور خيالي ومسكنا دور الين الساعة 9:40 دقيقة وجاء دورنا وصلنا الشباك كان نفس الرجال اللي بالصورة حقت 5*5 دخلنا التفتيش الامني وكنت حريصة مايكون معنا ولاشيء حتى بوكي خليته بالسيارة وبالرغم من كذا قالولنا فسخوا الجزمة الله يعزكم ومرت لى التفتيش
المهم دخلنا من البوابة واخذنا رقم وجلسنا عند الشباك حوالي ربع ساعة ونادوا علينا بعدها ودعتنا الهندية وقالت روحوا المقابلة جلسنا من عشرة الاربع الين الساعة 12 وحنا نتظر ينادو علينا والحمد لله فرجت سوينا المقابلة وكنت فرحانة كثير وبنفس الوقت بطني يعوورني من القنصل اسئلته كانت دقيقة شوي مع مرافقي
لانه راح لسوريا قبل 13 سنة وسئلوه ليش رحت ووين بسوريا وكم جلست هناك ومن راح معاك
2 وين عائلتك ساكنين ؟
3 عام كم متخرج من الجامعة؟ توظفت بعدها على طول؟ اعطيني مايثبت انك موظف حكومي؟
4 وين سافرت اذكرلي كل السفرات اللي بحياتك كلها ؟
والتفت لي بعدها قال نفس الاسئلة وبعدها قال لازم اتاكد من هويتك افتحي وجهك ساعته انا قلت خير وزوجي يناظر وطايرة عيونا قال معليش هذا القانون قلت طيب ماعندكم موظفات وين البنات القدعات اللي يوم الملتقى ناظرني يعني اخلصي علي قلت سم واستاذنت زوجي وفتشت بسم الله بسرعة ماامداني ارفع غطاي قال خلاص ماشي تعالي للسماعة
وبقلبي اقول الله يعين عليك
بدا ينكت عيالكم نايمين الان بالبيت وين بامريكا بتروحين قلت ماادري قال بتروحين تبع البعثة قلتله نعم قال اعطيني بطاقتك
بعدها سالني وين سافرتي خارج السعودية وين عائلتك تسكن من وين شهادتك من اي جامعة اتوظفتي بعدها ولا لا طيب وش بتدرسين بامريكا؟ وش تخصصك؟ اي درجة ببتوظفين بعدها ؟ سكت شوي قال وين الاي تونتي قلت ماجاني لسى قال مبروووووك انقبل طلبكم واول مايوصل الاي توني ارسليه لنا نسخة على الايميل
بغينا نحب راسه ودعنا وهو مبتسم ورحنا بعدها للفديكس قال خلال 3 اسابيع الى شهر يوصلكم الجواز والفيزا واخذ علينا 85 ريال يقول لانكم 5 جوزات وسلامتكم ودعنا حي السفارات ورجعت البيت وانا اشوف الدنيا اربعة من الصداع
حبيت اشكر كل من ساعدني في هالمنتدى ويعلم الله اني ادعيلهم في الثلث الاخير من الليل من قبل من انقبل بالبعثة الين لحظة كتابتي لهالموضوع صراحة كثير كنت اطلب استشارة والموضوع مايرد عليه الا اثنين واحيانا حتى يشوفون الموضوع حتى دعوة ماتنقال لكن الله يسامحهم
اخير شيء بقوله يارب يسر لي الاي توني على خير ويكون صبرنا كل هالفترة خيرة لنا ومابعد الصبر الا الفرج
اذا في استفسار حابين تقولونه اتفضلوا
دمتم بخير
اختكم ام عبدالله

• نشر عبر تويتر
• نشر عبر فيسبوك
• نشر عبر جوجل