james madison university كل ما يخصها و مدينتها harrisonburg نصائح و خبرات

February 17th, 2011, 05:33 AM

انا طالبة مبتعثه لامريكا و تحديدا مدينة هاريسون بورغ لجامعة جيمس مادسون صار لي سمستر كامل الآن موجوده هنا فحبيت افتح هالموضوع عشان الكل يستفيد قبل القدوم الى هنا و انا على اتم الاستعداد للإجابه ع اسئلتكم ع البريد الخاص او حتى في الموضوع .
نبدأ اول شي بالمدينة مدينه هاريسونبورغ مدينه تعتبر صغيره ليست كبيره كواشنطن دي سي او لوس انجلوس و لا صغيره جدا كالارياف يعني تقدر تقول انها اصغر من مدينه الدمام تعتبر كمدينة الخفجي مثلا .
يوجد بها مجمع واحد صغير به عدد من المحلات التجاريه ولكن لا تجود به الماركات العالميه يعني المجمع حق مشي حالك بالشوبينق بس فيه اشياء جيده و فيه مطاعم من الداخل و المجمع طابق واحد فقط و حوالي المجمع يوجد محل ( تارقيت ) اللي يعتبر مثل كارفور او بندا عندنا يوجد به كل شي كل المعدات اللي يحتاجها المبتعث من اواني للمطبخ اذا كنت مستأجر بشقه الى فرش سرير الى اطعمه و و ملابس و ادوات استحمام و تنظيف و يوجد بداخله كوفي ( ستاربوكس).
يوجد بالقرب من المجمع تبعد عنه حوالي عشر دقايق بالسياره سينما متواضعه بها ١٤ صاله كويسه و فيها افلام جيده .
و يوجد ايضا اشهر و ارخص محل ع الاطلاق في هاريسونبورغ اللي هو(الوول مارت ) كل شي موجود فيه اجهزه و تلفزيونات و ملابس و اطعمه كل شي فيه ارخص من باقي المحلات وهذا طبعا يوجد باص خاص ينطلق من الجامعه الى ما يسمى ب(هاريسونبورغ كروسينق ) وهو مكان توجد به محلات عده و طبعا الوول مارت اشهرها و تلاقي كل طلاب الجامعه هناك و طبعا حوالي الوول مارت في مكان احذيه - اجلكم الله- رخيص اسمه (باي ليس) او شغله هيك يجيب احذيه حلوه و رخصيه و عمليه جدا و طبعا هناك مطاعم حوالين المكان و محلات لبيع الاجهزه الالكترونيه فقطط (البيت باي ) و مكتبه يمكنك شراء الكتب منها .
غير كذا مدينة هاريسونبورغ مافيها نشاطات سياحيه اخرى يعني بالويكند يا سينما يا اقعد ذاكر و مستحيل اصلا تلاقي وقت انك تطلع بعدين اذا وصلنا لسالفة الدراسه اقلك ليش
باختصار هي مدينه مصممه للطلاب عشان يذاكرو و بس مافيها طلعات اصلا الا الى واشنطن و تبعد حوالي ساعتين الا ربع عنها .
طرق المواصلات اما سيارتك الخاصه او الباصات و اللي تقدم مجانا لطلاب الجامعه بالنسبه للمواصلات من و الى واشنطن -الى و من هاريسون بورغ راح تلاقيها غاليه شوي بالتاكسي راح يكلفك ٢٠٠ دولار و( بالقرين شلتر) اذا كنت لوحدك ١٩٦ دولا و اذا مع ٤ و اكثر ٤٨ دولار .
نجي للسكن السكن يعتبر كويس لا رخيص ولا غالي طبعا السكن مع عاءلات امريكيه غير موجوده هذي الخدمه هنا لاني سألت عنها كذا محل عندك طريقتين اما بالشقق خارج السكن الجامعي او السكن الجامعي
السكن الجامعي راح يكلفك بالسمستر ٣٠٠٠ دولار و تدفعها كلها مره وحده يعني مو كل شهر مبلغ ما يقبلون الا المبلغ كامل و تكون لك وجبتين يوميا معاها و عيبه ان الحمامات مشتركه مافي خصوصيه و غالي و ان بالاجازات السكن الجامعي يغلق يعني لازم تروح تدبر عمرك مثلا باجازه الربيع ٥ مارس راح يطالبونك بالمغادره الى نهاية الاجازه ١١ مارس عاد دبر عمرك وين تبي تقعد هالوقت .
السكن في شقق خارج السكن الجامعي في بعض المجمعات السكنيه بنظام تأجير الغرف يعني الشقه فيها ٣ غرف نوم راح يطلع عليك ايجار الغرفه ب ٤٠٠ دولار و الشقق من هذا النوع تتكون من حماماين - اعزكم الله- و ٤ غرف نوم بحيث يكون عندك ٣ روميت معاك و مطبخ مفتوح ع الصاله عادة هذي الشقق تكون مأثثه بس عليك تجيب ك تلفزيون و اكل بالثلاجه واواني المطبخ و لحاف السرير لو حبيت و في شقق ب ٣٥٠ دولار نظامها لشخصين فقط فيها غرفتين نوم و غرفتي للدراسه و حمامين و صاله و مطبخ مشترك و مأثثه ايضا و في ايضا شقق لشخص واحد يعني انت لو حدك بشقه فيها غرفه نوم و صاله و مطبخ مفتوح و حمام ب ٥٠٠ دولار شهريا طبعا هذي كلها الشقق تمر فيها باصات الجامعه و اي احد حاب ارقام او استفسارات ياريت يراسلني الخاص لاني مو كل يوم ادخل المنتدى
نجي للجامعه طبعا حرم الجامعه كبيييييييير تقول ديره و تتنقل من مكان لاخر بالباصات ايضا و فيها مكتبه و ستاربكس و مطاعم او بمعنى اصح كفتيريات و بوك ستور تشتري منه كتبتك المدرسيه بس تراه غالي و بزياده كل شي داخله تحصله دبل سعره بره نصيحه كتبتك المدرسيه اطلبها اون لاين ارخص من موقع الامازون او الاي باي .
نجي للدراسه نظام الدراسه هنا مختلف تماما عن باقي الجامعات بحيث انك الو ما تجي يختبرونك توفل و بعدين علطول بدون مقدمات يحطونك في صفوف الجامعه يعني تدبدي تدرس تخصصك بالانقلش وانت ما عندك اساس
نظام الدراسه هنا اعتماد كلي ع الطالب ع فكر ١٢ شخص من دفعتي لصعوبة الدراسه هنا تم تغيير جامعتهم بجد الدراسه صعبه يعني انا اذاكر حوالي ٦ ساعات يوميا و ١٠ ساعات بالويكند و اخرتها المعدل سي يعني كرف في كرف ادا عندك استعداد تكون زي طالب الطب ٢٤ ساعه تدرس تعال و ادا لا من الآن اشتغل ع اوراقك و غير الجامعه لان وربي ما تسوى عليك و خصوصا ادا تحس انقلش تبعك ماراح يخدمك و تخيل بعد سنه يختبرونا توفل من جديد اذا شافو مستوانا نزل ماراح يقبلونا في الجامعه و راح نظطر نغير واذا شافو ارتفع و لاحظ بدون ما ناخذ كلاسات انقلش راح يخلونك تكمل بجد بجد عزيزي او عزيزتي بكل صراحه اقول لكم ان الوضع لا يحتمل صحيح انها ٥ مواد يا دوب احصل وقت اسبح مو ع بالكم بس انا!! ترا الكل معاي بالدفعه يعاني و ع فكره في طلاب ماراح تكمل و قدمو الآن ع نقل يعني بجد نصيحه لكم شوف نفسك قيسها على نفسك لمصلحتك الخاصه و عشان ما تضيع نفسك هل انت مستعد تذاكر ٢٤ ساعه او ٦ ساعات ع الاقل يويميا ؟ وا انك انقذ نفسك روح لمكان يساعدك مكان انت تنتمي له يعني انا جد بديت اتضايق من الموضوع هون بس مادري لمتى بصبر يعني غيرنا الطلاب يدرسون اي بي سي من الصفر و مرتاحين و كل ويكند طلعه و روحه و جيه واحان مقفلين ع روحنا يا دوب اشوف صاحبتي معاي بالجامعه الوضع صعب و خصوصا الى انقلش تبعه ما ينفع انه يدخل فيزياء و كيمياء و رياضيات و طب نفسي من البدايه و مصطلحات اول مره نسمع فيها و كلمات طوووويله تبدأ تظهر و في اليوم الواحد يطلع لك هوم وركيين واحد منهم كتابة مقال عليه ١٠٠ درجه من معدله و لازم يكون مقال محترم و الثاني تحل ١٨ مسأله و الواجب الوالحد ياخذ منك ٣ ساعات و احيانا يومين فبليز انا ما كتبت هالموضوع عبث كتبته و هدفي المساعده بيز بليز لا ترتكبو غلطه تضيع البعثه عليكم بسبب ان مستواكم نازل او تضيع عليك سنه و تروح ترجع تدرس لغه من جديد او تضيع روحك بليز برجاء خاص فكر شوي مو عشاني او عشان امك ابوك اخوك صاحبك لا !! عشان انت انت بنفسك
ع العموم انا اللي عليه سويته و الباقي عليك انت اخي او ختي انت تعرف نفسك تقدر تتحمل ولا لأ و المدينه ترا تضيق الخلق شوي لانها صغيره و حواليها ارياف
اوك يا حبايب اي استفسار او مساعده انا هون راسلوني ع الخاص لاني ما افتح المنتدى اوك بالتوفيييييق من كل قلبي للجميع تكفووون ادعوو لي احناج دعائكم عندي اختبرات كل يوم فوراي مذاكره
يلا اخواني اخواتي........
السلام عليكم و رحمة الله و بركاته

• نشر عبر تويتر
• نشر عبر فيسبوك
• نشر عبر جوجل