للتو أنهيت مقابلتي في السفارة الأمريكية بالرياض ولله الحمد والمنة..هذا ماحدث بالتفصيل

February 20th, 2011, 10:58 AM

قبل دقائق أنهيت موعد المقابلة للحصول على فيزا دراسية ...لم نستطع الدخول بالسيارة لأن الطريق مغلق فاضطررنا لإيقافها أما السفارة التركية ثم المشي على الأقدام بحيث كانت السفارة التركية على يدنا اليسرى حتى وصلنا إلى السفارة الأمريكية التي ستكون على يدك اليسار أيضا...مسكنا طابور وكان أغلب المراجعين من السعوديين حتى أتى دورنا عند الموظفة ..طلبت الجوازات ونموذج DS-160 وإيصال سامبا لتسديد الفيزا فضبطتهم ورجعتها لنا ثم عطينا اللي معها جوالاتنا ومفتاح السيارة فحطه في ظرف وأغلقه وعليه ورقة صغيرة حمراء وخذنا الظرف منه ثم جينا للباب الحديدي وفتح لنا .. الساعات والنظارات والقبعات والأحذية وأوراقكم والظرف اللي فيه الجوالات وكل شيء حطوه في السير مثل حق المطارات ثم تدخلون من جهاز كاشف... بعدها ضفينا عفشنا ماعدى الظرف خذوه وعطونا الورقة الحمراء (احفظوها عندكم لأنكم بتاخذون الجوالات من الشخص اللي حطها لكم في الظرف إذا طلعتوا ) ودخلنا الساحة الخارجية وضبطنا وضعنا وكملنا طريق...بتشوفون نوافير وساحة كبيرة...وصلنا لباب حديدي كـتب عليه تنبيه إن الباب ثقيل يقطع الأصابع ههههههههه ...يبي له شدة عشان تفتحونه...بعدها دخلنا للسفارة وقال لنا الأمن اجلسوا...جلسنا إلين جاء دورنا ثم قمنا للي عند الباب وخذت أوراقنا اللي زينوها وطقطقت على الكمبيوتر ولصقت ستكرات على الجوازات من برا ثم رجعتها لنا وعطونا رقم... دخلنا في غرفة فيها ثلاث كاونترات وجلسنا انتظار إلى أن جاء رقمنا...

كانت الموظفة على مايبدو هندية ! حبوبة مرة ومبتسمة... خذت جوازي وبطاقة الملتقى وجواز مرافقي وكشف حساب وضمان مالي وتعهد بتحمل تكاليف الدراسة حقاته ونموذج DS-160 لي وله..وإيصالات سامبا ثم طقطقت على الجهاز وطلبت أكشف وجهي للمطابقة..ثم طلبت البصمات... وركزوا زين كيف تحطون بصماتكم هههههههههه: أولا الأصابع الأربعة بدون الإبهام خلوها متلاصقة ومجتمعة لليد اليسرى ثم لليد اليمنى (أو العكس نسيت ) ثم حطوا ابهامكم اليمين وابهامكم اليسار لصقوهم في بعض بشكل مستقيم وحطوهم على جهاز البصمات ( خخخخخخخخخخخخخخخخخخ ), المهم رتبتهم وربطتهم بمغاط وعطتناهم وقالت روحوا للصالة الثانية.. رحنا للصالة الثانية برقمنا السابق وجلسنا انتظار... الصالة مو كبيرة بس رايحة على طول... فيها من كاونتر 4 إلى كاونتر 13... جلسنا إلى أن سمعنا رقمنا وكان حظنا في كاونتر 10 ولله الحمد...كانت موظفة أمريكية طيوبة مبتسمة بشوشة تعرف عربي...طلبت نرفع السماعة اللي على جنب (لأن بيننا وبينها زجاج) ..عطيناها الأوراق المربطة... خذتها وقعدت تطقطق وطلبت برضو أكشف وجهي ثم طلبت بصمة الإصبع الأوسط لليد اليمنى ( أو اليسرى نسيت من الربكة ) .. طلبت الآي توني حقي..عطيتها إياه وقلت لها إني طلبت آي توني جديد فهل يؤثر على الفيزا؟ لأني طلبت تقديم الدراسة؟ قالت :متى؟ قلت : طلبت تقديمها إلى 28 مارس, قالت إذا وصل أرسليه بالإيميل لنا ثم قعدت تفكر وقالت وإلا خلاص مايحتاج لاترسلينه ... أبكتب ملاحظة هنا إنك ممكن تدخلين أمريكا أبكر بس أهم شيء خليه معك في المطار.. قلت: أوكي, سألتني : من وين متخرجة؟أول مرة تسافرين لأمريكا؟ بتروحين أمريكا للدراسة؟ وش بتدرسين؟ ثم قالت: معك وثيقة التخرج؟ قلت ايه وعطيتها صورة طبق الأصل منها شافتها ورجعتها..وخذت بس الجواز وإيصال سامبا حتى الآي توني رجعته (هل هذا طبيعي؟؟ ) قالت خلاص تمام..روحي لفيديكس سددي لشخص واحد لأن المرافق ماوصلت الآي توني حقته... وعطتنا ورقة صفراء بالنقص في أوراق المرافق وقالت إذا جاء الآي توني حقه أرسلوه بفيديكس مع الجواز وإيصال السيفس للسفارة, أما أسئلة المرافق فكانت: متى تخرجت؟ وش بتدرس في أمريكا؟ وطلبوا آخر شهادة له.. وسألته : تخرجت أنت في عام كذا ...؟ وش قعدت تسوي بعدها؟ وين اشتغلت؟ ووش اشتغلت؟ الآن هل تعمل؟ وش يشتغل والدك؟ هل سافرت لأمريكا سابقا؟ ... والحمدلله عدت المقابلة على خير وكانت أفضل من المتوقع..كنت أتوقع أسئلة أكثر سخونة ... المهم شكرناه وابتسمت هي بلطف ..كانت معاملتها جدا رائعة..ذهبنا لفيديكس على نهاية الممر وأنتم داخلين من الباب على يمينكم..موظف فلبيني ضحوك وبشوش شوي ويطير من هباله عن الأرض...دفعت رسوم 65 ريال لشخص واحد (لأن مرافقي لم تكتمل أوراقه) وخذ مني نموذج DS-160 (مارجعه لي) ثم أعطاني فاتورة اللي كأنها كربون تطبع..وقال اكتبي اسم المستلم وجواله والمدينة ووقعي..ثم خذها وعبى البيانات الباقية وقال أي فرع تبين تستلمينها منه؟ ثم أعطاني نسخة منها وقال ضاحكا بالإنجليزية: إذا دقينا عليكم ردوا لاتخلونا ندقدق عليكم وبس..شكرناه ثم غادرنا خارجين من نفس الطريق الذي أتينا منه حتى وصلنا لبوابة الخروج اللي فيها التفتيش وطلعنا من مكان ثاني (باب حديدي دوار ) ورجعنا للشباك وعطيناه الورقة الحمراء وخذنا أغراضنا .


ملاحظات:

- الموظفين طلبوا الصور الشخصية 5 في 5 إلا أن الموظفة الأخيرة تبع المقابلة لم تطلبها وابتسمت حين سألتها عنها قائلة: إنها هنا لدي! وأشارت بعينيها للجهاز .

-أرجعت لي الموظفة الآي توني ولم تأخذه.
-نموذج DS-160 أخذه فيديكس.
-لم يطلبوا مني إيصال السيفس ولكن نبهتني الموظفة أن السيفس هو نفسه لما قلت لها أنني سأقدم موعد الدراسة وأنتظر آي توني جديد.


تم بحمد الله, دعواتكم تتسهل باقي الأمور العالقة لي وللمرافق.

بالتوفيق للجميع

• نشر عبر تويتر
• نشر عبر فيسبوك
• نشر عبر جوجل